Шпекулациите за иднината на Жозе Мурињо, кои се вртат на Островот од почетокот на неделата, продолжија во полн ек. Вчера во повеќето англиски медиуми се појави информација дека раководството на клубот може да одлучи дури да го отпушти Португалецот, бидејќи му пречи на тимот со своето однесување и лошата атмосфера која владее денови пред почетокот на сезоната.

Некои од британските букмејкери го посочија Мурињо како фаворит за да стане првиот отпуштен менаџер во Премиер лигата.

Во позадина на сето ова исплива првото големо име, на кое ќе се обратат шефовите на Јунајтед во случај да се разделат со Жозе. Според „Сан“, кој се осврнува на извори на „Олд Трафорд“, ова ќе биде Зинедин Зидан.

Французинот е слободен откако одлучи неочекувано да го напушти Реал Мадрид претходно во летото. Потоа, имаше информации дека тој добил предлог да се врати во Јувентус како спортски директор, но ова сè уште не е потврдено од ниту една од страните.

Според „Сан“ од „Олд Трафорд“ имаат листа со високопрофилни тренери кои во моментов се слободни и првото име во него е на 46-годишниот Французин, кој ги изведе Реал до три последователни трофеи во Лигата на шампионите. Таблоидот потсетува дека ситуацијата е слична како во последната сезона на Луис ван Гал во Манчестер Јунајтед. Тогаш Мурињо беше слободен да го заземе местото.