Технологија – Kurir.mk

Маск: Вештачката интелигенција може да ги остави сите луѓе без работа

Ивана Ефремовски — Fri, 03 Nov 2023 12:57:38 +0000

Вештачката интелигенција (ВИ) може да ги остави без работа сите луѓе, изјави претприемачот и најбогатиот човек на светот Илон Маск на настан во официјалното седиште на британската Влада, Ланкастер Хаус, во Лондон. „Тешко е да се каже точно кога, но ќе дојде момент кога работата нема да биде потребна. Можете да работите поради лично задоволство, но вештачката интелигенција ќе биде во состојба да направи сè. Не знам дали луѓето се чувствуваат добро или лошо поради тоа“, рече Маск, пренесува Си-Ен-Би-Си. Маск ја спореди вештачката интелигенција со дух од шише што ја исполнува секоја желба без ограничувања. (МИА)

Google плати 26 милијарди за да биде главен прелистувач

Ристе Здравков — Thu, 02 Nov 2023 12:04:53 +0000

Alphabet, кој е сопственик на Google, плати 26,3 милијарди долари на други компании во 2021 година за да се осигура дека овој прелистувач е стандарден (default) на телефоните. Ова го изјави еден од главните директори на компанијата пред судот во САД, објави неодамна Bloomberg News. Износот на стандардните плаќања што ги направи Google се зголеми за повеќе од трипати од 2014 година, рече официјален претставник одговорен и за пребарување и за рекламирање, се додава во извештајот, според Reuters. Приходите од мрежното рекламирање на Google беа 146,4 милијарди американски долари во 2021 година, при што стандардните плаќања беа нејзиниот најголем трошок, рече официјалниот претставник. Google одби да одговори на прашања за ова кога британската агенција го контактираше. Како што рекоа од Google, договорите за споделување приходи се легални и „тие инвестираа за да ги одржат своите бизниси за пребарување и рекламирање конкурентни“. Исто така, тврди дека ако луѓето не се задоволни со поставките, тие едноставно можат да го сменат прелистувачот.

YouTube ја зголемува цената за претплата без реклами

Ристе Здравков — Thu, 02 Nov 2023 12:00:36 +0000

Пред неколку месеци YouTube ја зголеми цената на претплатата на Premium, а сега ова зголемување продолжува во повеќе земји. Се зголемува цената во Аргентина, Австралија, Австрија, Чиле, Германија, Полска и Турција. Во Австралија, претплатата на YouTube Premium сега чини 16,99 австралиски долари (околу 10 евра) и важи за индивидуални, семејни и студентски планови. Оние кои ги плаќаат пониските цени можат да продолжат со нив три месеци, по што ќе се применува поскапувањето. Беше наведено дека зголемувањето на цената ќе се применува од следниот период на наплата, а од компанијата велат дека тоа „ќе им помогне на креаторите да заработат повеќе, а со тоа и да донесат повеќе содржини што луѓето сакаат да ги гледаат“, пренесува Sam Mobile. YouTube Premium им носи повеќе функции на претплатниците, вклучително и отстранување на реклами, стриминг 1080p, аудио во заднина и преземања видеа офлајн. YouTube веќе им објави војна на блокаторите на реклами и активно ги спречува луѓето да гледаат содржина кога имаат такви програми инсталирани на нивните веб-прелистувачи или телефони.

„Мета“ предлага месечна претплата за европските корисници на Фејсбук и Инстаграм, доколку не сакаат реклами

Катерина Бојаџиева — Mon, 30 Oct 2023 14:37:48 +0000

„Мета“ денеска објави дека од ноември ќе понуди платени претплати за Европејците за да можат да користат Фејсбук и Инстаграм без реклами, јавија француските медиуми. На овој начин,сметаат од оваа американска компанија, социјалните мрежи ќе ги исполнат барањата на европското законодавство за лични податоци и насочено рекламирање. Корисниците во ЕУ, Швајцарија и остатокот од Европската економска област (Исланд, Норвешка, Лихтенштајн) „ќе имаат избор да продолжат да ги користат двете платформи бесплатно, со персонализирани реклами, или да се претплатат за да избегнуваат реклами“, се додава во соопштението на компанија. Претплатата ќе биде 9,99 евра месечно за Инстаграм и Фејсбук профили на компјутер и 12,99 евра за мобилни апликации на смарт телефоните.

ЌЕ СЕ ОТКАЖЕТЕ УШТЕ ДЕНЕС: Платформата X воведе уште две нивоа на претплата, еве колку чинат и што нудат

Дарко Андоновски — Mon, 30 Oct 2023 11:42:28 +0000

Дали ви беше прескапо да плаќате осум евра месечно за X Premium? Платформата на Маск сега нуди уште две нивоа на претплата, едното за три, а другото за дури 16 евра месечно, со различни достапни функции. Продолжуваат обидите на X (поранешен Twitter) да префрли што е можно повеќе свои корисници на еден од платените начини на користење. По контроверзната платена програма за верификација Twitter Blue, која сега се нарекува X Premium и чини осум евра месечно, социјалната мрежа и нејзиниот сопственик Илон Маск смислија уште неколку начини како да зграпчат пари. Неодамна започнаа платена програма за отворање на сите нови сметки, која важи за Нов Зеланд и Филипини, а чини еден долар годишно. Таа има за цел да го намали количеството на спам и ботови. Сега се реализира уште една неодамнешна објава на Маск – се проширува понудата на достапни претплатни пакети. Покрај постоечкиот X Premium за осум евра месечно, корисниците сега добиваат и поевтин, по цена од три евра, како и двојно поскап претплатен пакет. Во зависност од цената се менуваат и поволностите што ги нуди секој претплатен пакет.

introducing Premium+ – no ads in For You or Following – largest boost for your replies (vs other Premium tiers or unverified users) – access to our full suite of creator tools now available on Web ✌️ subscribe here → https://t.co/Ywvyijo9CQ
— Premium (@premium) October 27, 2023

X Basic Основниот пакет Basic ако го купите преку десктоп верзија чини три евра месечно или 32 евра годишно. Им овозможува на претплатниците да пост-уредуваат објави, да објавуваат подолги објави и видеа, да преземаат видеа, да слушаат содржини со исклучен екран на телефонот, како и одредени опции за персонализација (од иконата на апликацијата до криење на сопствените допаѓања и слично). Овој претплатен пакет не бара проверка на идентитетот, а претплатниците на него на X нема да имаат видлив „син беџ“. X Premium Средниот пакет, по цена од осум евра месечно или 84 евра годишно, останува како што беше. Значи, нуди се што нуди Basic, но носи и проверка за верификација, покажува помалку реклами на платформата, нуди поголема видливост на објавите, како и можност за заработка од објави (за професионални создавачи на содржина). X Premium+ Најскапиот пакет сега чини 16 евра месечно или 168 евра годишно. Само уште две поволности се додадени во пакетот Premium: подобра видливост на објавите и целосно отстранување на рекламите од прикажувањето на содржината.

„Гугл мапс“ со сѐ повеќе новитети засновани на вештачка интелигенција

Ивона Петрова — Fri, 27 Oct 2023 13:00:53 +0000

Директорите на „Гугл“ во мај ја претставија функцијата „Имерсив вју“ за рути, којашто овозможува навигациски фотографии за планирани патеки. Сега оваа опција е достапна за корисниците ширум светот. Кога корисникот се движи пешки, на велосипед, во јавен превоз или во свое возило, новата опција ќе му овозможи и виртуелно да се движи по улиците следејќи визуелни слики на патеката што ја избрал. Функцијата, надградена со технологијата за вештачка интелигенција, ќе биде достапна за уредите со „ИОС“ и „Андроид“ почнувајќи од оваа недела за Амстердам, Барселона, Лондон, Даблин, Фиренца, Лас Вегас, Лос Анџелес, Мајами, Њујорк, Париз, Сан Франциско, Сан Хозе, Сиетл, Токио и Венеција, т.е. во САД и 20 земји во Европа. „Гугл мапс“ обично се користи во сѐ поголем број електрични возила како дел од екосистемот „Андроид аутомотив ОС“. Корисниците наскоро ќе можат да бараат блиски дестинации коишто исполнуваат повеќе езотерични критериуми.

Икс воведува опции кои корисниците долго време ги посакуваа

Ивана Ефремовски — Thu, 26 Oct 2023 10:02:25 +0000

Социјалната мрежа Икс почна да ја воведува услугата за аудио и видеоповици. Опциите може да се најдат во делот „Поставки“ за „Директни пораки“, а новите функции може и да се исклучат. Оваа новина во август ја најави извршната директорка Линда Јакарино, истакнувајќи дека ова е само чекор во еволуцијата на платфрмата кон тоа да стане „апликација за секого“, исто како што напомна и сопственикот Илон Маск. Корисниците ќе имаат можност да изберат опција за одобрување повици само од одредени корисници, по избор. (МИА)

Закерберг: Новиот ривал на Икс, Тредс има скоро 100 милиони корисници месечно

Ивана Ефремовски — Thu, 26 Oct 2023 05:56:44 +0000

Новиот конкурент на мрежата Икс (Х), Тредс (Threads) достигна речиси 100 милиони корисници месечно, изјави извршниот директор Марк Закерберг во презентацијата на резултатите од последниот квартал на матичната компанија Мета. Сè што беше претходно познато за развојот на Тредс беше дека услугата достигна 100 милиони регистрации за неколку дена кога беше лансирана на почетокот на јули. Фирмите за веб-аналитика процениле дека бројот на дневни активни корисници и времето што го поминуваат на платформата се намалиле. Закерберг не даде детали за бројот на дневни активни корисници. Откако Маск го презеде Твитер, неколку сервиси се обидуваат да им понудат нова платформа на незадоволните корисници на најпознатата мрежа за кратки пораки. Тредс е прикачен на социјалната мрежа за фотографии и видео на Мета, Инстаграм, овозможувајќи му да допре до веќе постоечките врски помеѓу стотици милиони корисници. Услугата сè уште не е лансирана во ЕУ, а Мета ги посочува европските дигитални закони како оправдување. Автоматското поврзување на корисничките податоци од Инстаграм и Тредс Мета може да доведе до правни проблеми, сметаат познавачите. (МИА)

Ватсап наредниве недели овозможува два профила на еден телефон

Катерина Бојаџиева — Fri, 20 Oct 2023 10:39:34 +0000

За луѓето кои имаат приватен и деловен профил на „Ватсап“ или пак два профила од иста природа, наскоро нема да им требаат два мобилни телефона. Апликацијата ќе им овозможи на своите корисници да имаат два профила на еден уред. Но, условот е корисникот да има два телефонски броја или мобилниот телефон да поддржува е-СИМ или двојна т.е. повеќенаменска СИМ-картичка. Од „Ватсап“ велат дека сега веќе нема да треба да се одјавите од еден профил за да влезете во друг, туку ќе биде овозможен истовремен пристап до двата профила. За тоа се бира опцијата „Сетингс“ во апликацијата, се кликнува на стрелката до името и се бира „Додај профил“. Секој профил има посебни поставки за приватност, па може да се избере примање известувања само од една сметка. Ова е полезно доколку корисникот е на одмор и не сака да добива пораки од работа. Годинава претходно на корисниците им беше дадена можност да пристапат до еден профил од повеќе уреди. Новото ажурирање ќе пристигне на уредите со „Андроид“ наредниве недели.

„Хонда“ и „Џенерал моторс“ најавија такси-услуги без возач во Јапонија

Тале Кристо — Thu, 19 Oct 2023 07:42:37 +0000

Јапонската компанија „Хонда“ и „Џенерал моторс“ од САД денеска објавија дека планираат нови такси-услуги без возач во Токио во 2026 година. Тоа, велат, „ќе помогне во справувањето со недостигот на работна сила“ во „Земјата на изгрејсонето“. Развиен во соработка со операторот за самоуправувачки автомобили - „Круз“, со седиште во Сан Франциско, САД, проектот ќе нуди „целосно нов вид на искуство во движењето“ во Јапонија... Потфатот исто така има за цел „да помогне во решавањето на општествените проблеми со коишто се соочува оваа далекуисточна земја, како што е недостигот на возачи на такси и на автобуси“, истакнуаат од „Хонда“. - Ова ќе биде голем чекор кон остварување понапреден сообраќај во општество, изјави главниот извршен директор Тошихиро Мибе. Јапонската Влада го поттикнува развојот на самоуправувачките возила додека земјата се бори со брзо стареење на населението и постојаниот недостиг на работна сила. Во 2020 година, Јапонија стана првата земја во светот што дозволи возило способно да преземе целосна контрола во одредени случаи - да сообраќа на јавни патишта.