Останати спортови – Kurir.mk

МОК доби престижен сертификат од ИОК за реализираните проекти од областа на спортот

Бошко Тасиќ — Sat, 04 Nov 2023 17:10:30 +0000

Македонскиот олимписки комитет (МОК) доби престижен и светски признаен сертификат од Меѓународниот олимписки комитет (ИОК) како одговорна организација што применува практики и принципи на добро владеење. Овој значаен сертификат МОК го доби по претходна евалуација од страна на ИОК на сите досегашни реализирани проекти, како и по позитивниот извештај за работењето на Македонскиот олимписки комитет изработен од реномираната ревизорска организација Price Waterhouse Cooper. Претседателот на ИОК, Томас Бах, лично му го врачи сертификатот на претседателот на МОК, Даниел Димевски, на средба во седиштето на ИОК. По тој повод, седиштето на Меѓународниот олимписки комитет беше во боите на македонското знаме, со што големиот пријател на македонските олимпијци, претседателот Бах, уште еднаш ја покажа својата силна поддршка за спортот во земјава и организациите кои го шират олимпискиот дух.

АТП Мастерсите во Мадрид и Мајами ќе се играат во Саудиска Арабија?

Бошко Тасиќ — Sat, 04 Nov 2023 07:22:45 +0000

Саудиска Арабија продолжува со агресивно влегување во сите пори на врвниот спорт. Откако летово почна да станува важен играч на светската фудбалска карта, сега С. Арабија се обидува да пушти „корења“ и во професионалниот тенис. Како што објавија неколку шпански весници, Саудијците оваа година ќе го организираат финалето на турнирот за млади надежи „Next Gen“ (28 ноември до 2 декември), кој ги собира осумте најдобри тенисери до 21 година, но отпочна проект и за купување на лиценците на неколку Мастерс турнири. Според информациите, Арапите се во прва фаза на преговори за купување на лиценците за организацијата на АТП Мастерс турнирите од серијата 1000 во Мадрид и Мајами. И двете лиценци се во рацете на компанијата ИМГ, која може да се одлучи за продажба. Саудиските власти повеќе од една година водат разговори со преставници на високи тениски позиции за можни инвестиции. На влегувањето на Саудиска Арабија во тенисот се гледа позитивно, бидејќи на овој начин и АТП и ВТА би избегнале создавање на паралелно натпреварување, како што се случи во голфот.

Одложено ЕП во ватерполо во Израел

Тале Кристо — Fri, 03 Nov 2023 17:26:58 +0000

Европското првенство во ватерполо кое идниот јануари требаше да се одржи во израелскиот град Нетанија е одложено, објави синоќа Европската организација во водени спортови (ЛЕН). "По неодамнешните терористички напади во Израел и по опсежни состаноци меѓу ЛЕН и израелската ватерполо Федерација, двете институции се согласија дека ќе биде невозможно да се нагости ЕП во ватерполо во Нетанија од 3 до 16 јануари 2024 како што беше планирано, се наведува во соопштението. Истакнувајќи дека новиот термин и локацијата дополнително ќе бидат прецизирани, ЛЕН изрази остра осуда на терористичките напади во Израел. "Уште еднаш остро ги осудуваме одговорните за терористичките напади во Израел и ја изразуваме нашата поддршка и сочувство до израелските граѓани во овие тешки моменти", порача ЛЕН. Европското злато го брани Хрватска која лани во финалето во Сплит беше поуспешна од Унгарија.

Тајсон Фјури сигурно ќе боксува со Усик во декември

Бошко Тасиќ — Fri, 03 Nov 2023 05:23:47 +0000

Промоторот на украинскиот боксер Александар Усик изјави дека Британецот Тајсон Фјури „не може да побегне“ од борбата за неприкосновената титула светски шампион, која беше договорена за 23 декември годинава. Фјури пред неколку дена во Ријад со одлука на судиите го победи поранешниот УФЦ шампион Френсис Нгану и избегна изненадувачки пораз откако беше соборен во третата рунда. Борбата се одржа според боксерските правила во 10 рунди. Двајца судии постигнаа две кола во корист на Фјури, 96-93 и 95-94, а еден судија во корист на Нгану – 95:94. Фјури изјави дека борбата била потешка отколку што очекувал, односно дека „не било во сценариото“. Тој се здоби со повреда на окото и расекотина на главата, па се шпекулира дека борбата против Усик може да биде одложена за следната година.Сепак, промоторот на Усик, Алекс Красјук, рече дека мечот ќе се одржи како што е договорено. „Сите, вклучувајќи го и Усик, не му дадоа многу шанса на Нгану. Но, човекот го шокираше светот. Фјури го потцени својот противник. Ароганцијата, недостатокот на дисциплина и жедта за пари доведоа до овие околности. Но, ние имаме потпишан 23 декември и Фјури не може бегство од тоа“, рекол Красјук, пренесе „Скај“. Фјури е шампион во тешка категорија во верзијата ВБЦ, а Усик ги држи другите три појаси – ВБО, ВБА и ИБФ. Промоторот Френк Ворен рече дека борбата најверојатно нема да се одржи пред 2024 година. „Тоа требаше да го направиме на 23 декември. Се сомневам дека тоа ќе се случи сега. Тајсон не може да оди во тренинг камп по ваква борба. Тоа е за осум недели. Му треба барем толку долго за да закрепне, телото да се врати во форма. Да го оставиме да заздрави. Потоа може да оди во камп. Ќе биде почетокот на следната година“, изјави Ворен, а пренесува Би-би-си. Усик натпреварот го следеше во живо во Ријад. „Имаме договор кој вели дека борбата ќе се одржи на 23 декември. Нека Фјури прво ја предаде титулата, а потоа може да одмори“, изјави Усик за „Boxing King Media“. Усик и Фјури досега немаат изгубено професионална борба. Преговорите траеја поголемиот дел од годината и завршија во септември.

Ѓоковиќ победува и со стомачен вирус

Бошко Тасиќ — Fri, 03 Nov 2023 05:19:15 +0000

Новак Ѓоковиќ имаше евидентни проблеми и не покажуваше нервоза која е карактеристична за него на секој меч, па дури и во ситуација кога ситуацијата изгледаше доста сложена за него. Грикспор направи пресврт во првиот сет и го искористи големиот пад на Ноле за да врзе пет гејма во низа, но кога се чинеше дека Србинот ќе биде во голема неволја поради физички проблеми, светскиот рекет број еден уште еднаш ја демонстрираше својата истрајност. Иако беше далеку од најдоброто ниво, Ноле успеа да се одржи во егал ситуација и го доби вториот сет во тајбрејкот, за потоа да добие дополнителна енергија и да го добие и третиот за пласман во четвртфиналето. По победата од 4:6, 7:6 и 6:4, Ноле доби директно прашање за проблемот кој беше очигледен, а Србинот откри дека се мачи со стомачен вирус во изминатите неколку дена. – Не сакам да одземам ништо од играта која ја прикажа Грикспор. Играше на високо ниво и ќе заслужеше ако победеше. Јас почнав добро, но останав без гориво и без енергија кога ми направи брејк. Имам проблем со стомакот, не се чувствував добро на теренот.Имам некој стомачен вирус, веќе неколку дена минувам повеќе време на тоалетната школка, отколку на теренот. Но, најважно е што пронајдов начин да се извлечам. Бев блиску до пораз, но пронајдов начин да се вратам. Се обидував само да го задржам својот сервис и да дојдам до тајбрејк, а потоа се чувствував подобро и среќен сум што ја минав оваа пречка, – изјави Србинот.

Ф1: Нема опасност од откажување на трката во Абу Даби

Катерина Бојаџиева — Thu, 02 Nov 2023 21:27:58 +0000

Раководството на Формула 1 соопшти денеска дека трката за Големата награда на Абу Даби, со која се завршува сезоната, не е во опасност да биде откажана и покрај немирите во регионот поради војната меѓу Израел и Хамас. Реакцијата со која Ф1 го потврди одржувањето на трката закажана од 24 до 26 ноември, уследи откако на социјалните мрежи се појавија шпекулации дека настанот ќе биде откажан поради безбедносни причини. Претпоставките се дека гласините ги иницираше соопштението на британското Министерство за надворешни работи во кое се наведува дека британските туристи кои ги посетуваат Обединетите Арапски Емирати требал да бидат внимателни поради зголемени закани од терористички напади. Дополнително, известување со иста содржина за своите граѓани објавија и Германија, Франција, Белгија и Бахреин.

Главниот технички директор заминува од Мерцедес

Бошко Тасиќ — Thu, 02 Nov 2023 05:20:38 +0000

Главниот технички директор на Мерцедес, Мајк Елиот, по завршувањето на сезоната ќе го напушти тимот, потврдија од Мерцедес. „После 11 неверојатни години, главниот технички директор Мајк Елиот одлучи да го напушти тимот. Мајк беше еден од столбовите на достигнувањата на тимот и му благодариме за се што донесе во тимот. Му посакуваме многу среќа во твоето следно поглавје Мајк“, објави Мерцедес. Елиот, кој ги замени позициите со сегашниот технички директор Џејмс Алисон како дел од реструктуирањето на тимот пред Големата награда на Азербејџан во април, го напушта Мерцедес, каде што работи од 2012 година. „Една од најголемите привилегии во мојата кариера беше да се биде дел од овој тим на Мерцедес. За време на мојот мандат видов дека расте од група луѓе кои се собраа да победуваат на трки, до прва шампионска титула, до рекордни осум последователни конструкторски титули. Горд сум што придонесов за тоа“, рече Елиот (49).

Алкараз по елиминацијата во Париз: Едноставно не се чувствував добро на теренот

Ивона Петрова — Wed, 01 Nov 2023 11:30:23 +0000

Вториот светски рекет Карлос Алкараз не успеа да го помини 1/16финалето на Мастерсот во Париз. Шпанецот синоќа загуби од рускиот тенисер Роман Сафиулин (45-ти на АТП листата) со 6:3 и 6:4. - Тој не ме изненади бидејќи знаев дека играше на одлично ниво во последните неколку месеци. Победи квалитетни играчи. Јас едноставно не се чувствував добро на теренот. Треба да се подобрам на многу начини, да вежбам многу. Не ја почувствував играта. Се движев лошо. Иако квалитетот на ударите беше добар. Во однос на движењето, треба многу да се подобрам, изјави Алкараз. Во осминафиналето, Сафулин ќе се соочи со неговиот сонародник Карен Качанов.

Адокатот на Шумахер објави зошто никогаш не бил објавен извештајот за состојбата на легендата

Бошко Тасиќ — Wed, 01 Nov 2023 05:17:18 +0000

На 29 декември ќе поминат точно 10 години од страшната несреќа на Михаел Шумахер на скијањето на француските Алпи, по кои никогаш не беше ист. Информации за здравјето на Шумахер има малку, односно понекогаш се појавуваат нови детали, но неговата сопруга Корина одамна не дава изјави. Адвокатот на семејството Шумахер, Феликс Дам објаснува зошто е тоа така и го објасни начинот на кој Корина се бори да ја зачува приватноста на Шумахер. „Сè уште во мојата глава ја имам сликата на голем број новинари кои со денови чекаа информации пред болницата. За да се намаи притисокот, првите детали беа дадени на прес-конференции. Се работи за заштита на приватноста. Се разбира, многу разговаравме за тоа, а исто така размислувавме дали конечниот извештај за здравјето на Шумахер може да биде вистинскиот начин да го направиме тоа“, вели адвокатот.

Четири медали, од кои една златна, за македонските таеквондисти во Чешка

Катерина Бојаџиева — Tue, 31 Oct 2023 21:53:09 +0000

Македонската традиционална Таеквон-до репрезнетација освои четири медали на престижниот турнир „Моравиа Опен 2023“ што викедов се одржа во чешкиот град Острава. Во конкуренција од над 500 натпреварувачи од 13 европски земји се освоени еден златен, еден сребрен и два бронзени медали, и тоа во дисциплините спаринг (борби) и форми (борба со замислен противник). Најголемиот успех го постигна репрезентативката Елена Јанеска, која го освои тронот во категоријата спаринг (борби) за јуниорки над 64 килограми, совладувајќи ги противничките од Холандија, Чешка, Естонија, Чешка. Таа се закити и со сребрен медал во категоријата борби со замислен противник. Јанеска само пред една седмица го постигна истиот успех на Меѓународниот Таеквон-до ИТФ А класа натпревар „Србија Опен 2023“ во Нови Сад, Србија, освојувајќи златен медал во спаринг (борби) + 64 кг за јуниорки 16-17 години и сребрен медал во форми (борба со замислен противник) за црн појас први дан јуниорки 16-17 години. Марио Крстески го освои бронзениот медал во форми (борба со замислен противник) за црвен појас јуниори 16-17 години, додека Михаил Јоноски освои бронзен медалво форми (борба со замислен противник) за црвен појас јуниори 16-17 години. Поради повредата од Светското првенство од која се уште се опоравува, Христијана Парулеска на натпреварите во Чешка учествуваше во улога на тренер. aб/нд/ Фото: ИТФ