Освен што претходно најави дека ќе воведе санкции за претседателката на Претставничкиот дом на САД, Ненси Пелоси по нејзината посета на Тајван, кинеското Министерство за надворешни работи најави и повлекување на заедничката соработка со САД за повеќе прашања.
Според Ројтерс, активностите меѓу двете земји кои ќе престанат се американско-кинеските разговори за климата, дијалогот меѓу американските и кинеските воени лидери, прекуграничната соработка во борбата против криминалот, механизмите за поморска безбедност и односите за имиграцијата и борбата против дрогата.