Маж за кој се претпоставува дека има експлозив околу себе се наоѓа во пошта во украинскиот град Харков, изјави портпаролот на полицијата Јарослав Тракало за локалната телевизија 112.
– Неговите барања не ни се познати, рече Тракало.
Руската агенција Интерфакс ја пренесе изјавата на шефот на регионалната полиција на Харков, Олег Бех, кој вели дека еден маж во поштата држи како заложници деветмина возрасни и две деца.
Украинските медиуми јавуваат дека полицијата го блокирала тој дел од градот и дека таму има 20 полициски возила, пожарникари и Брза помош, како и единици за демонтирање експлозив. Се очекува да пристигнат и преговарачи со киднаперот.
