112 – Kurir.mk

Утре наутро нема да функционира телефонскиот број 192, граѓаните можат да го користат 112

Ивана Ефремовски — Fri, 13 Oct 2023 12:26:25 +0000

СВР Скопје ги информира граѓаните на Скопје дека утре во периодот од 8:00 до 10:00 часот телефонскиот број 192 нема да биде во функција од технички причини. Во наведениот период, како што посочуваат од МВР, граѓаните можат да го користат бесплатниот телефонскиот број 112 и на него да пријавуваат настани.

Возач кој излетал од патот Велес-Штип спасен со мобилниот телефон кој испратил автоматска порака до бројот 112

Ивана Ефремовски — Sat, 29 Jul 2023 08:54:06 +0000

Возач кој со возилото излетал од магистралниот пат Велес - Штип е спасен благодарение на тоа што од неговиот мобилен телефон е испратена говорна порака на аглиски јазик до Единствениот европски број за итни случаи 112. Од Центарот за управување со кризи информираат дека повикот е примен рано утринава во 04:20 часот и согласно процедурата, веднаш се забележани координатите на локацијата од каде што е примен повикот по што почнала итна проверка на вистинитоста на повикот во соработка со Министерството за внатрешни работи. - Според првично собраните („автоматски“) информации во ЦУК, претпоставка било дека се работи за сообраќајна незгода којашто се случила на територија на село Чалошево, на три километри по магистралниот пат во правец Велес – Штип. Триесетина минути подоцна од МВР е добиена официјална потврда дека повикот е вистинит и дека се случила сообраќајна незгода на магистралниот пат Велес - Штип, сега со поконкретен теренски опис дека тоа е близу на „Уни Агро“ и дека во излетаниот автомобил има повредено и заглавено лице, информираа утринава од ЦУК. По извлекувањето на повреденото лице, тоа е однесено во болница во Велес, а потоа, најверојатно заради сериозноста на повредите е пренесено во Хируршките клиники во Скопје. - Ова е редок пример за спасување лице кое не е можност да се јави, а мобилниот телефон автоматски испраќа порака за можна случена сообраќајна несреќа на 112. Со повикот се добиваат и координати за локација на возилото, односно повреденото лице како во случајот и најпрво се врши проверка на реалната ситуација, а потоа во согласност со ситуацијата и извлекување и спасување на повреденото лице, велат од ЦУК. (МИА)

Дневно по над 1.400 повици на телефонскиот број 112

Ивона Петрова — Mon, 01 Aug 2022 11:18:56 +0000

На телефонскиот број 112 при Центарот за управување со кризи (ЦУК) во периодот од 11.02 до 01.08.2022 година (171 ден функционирање на 112) се примени вкупно 240.253 повици, односно во просек 1.404 повици дневно. Од ЦУК информираат дека во февруари (се примаа повици само од територијата на Скопје) се примени 11.321 повици, а просекот за овој период е по околу 629 повици дневно. Од 01.03.2022 година, во Секторот 112 при ЦУК, се започна со прием на повици на единствениот телефонски број за повици при итни ситуации 112 од цела територија на нашата држава. Во месец март се примени 55.767 повици и просекот за март е 1.799 повици дневно. Во месец април се примени 42.100 повици или во просек 1.403 повици дневно. Во месец мај се примени 44.839 повици или во просек 1.446 повици дневно. Во месец јуни се примени 41.759 повици или во просек 1392 повици дневно. Во месец јули се примени 44.467 повици или во просек повици 1.434 дневно. Последните три денови од 29 до 31.07 се примени 4.635 повици или околу 1.540 повици дневно.

НЕМА ВЕЌЕ РАЗЛИЧНИ БРОЕВИ: Македонија наскоро добива единствен број за итни случаи -112

Дарко Андоновски — Wed, 09 Feb 2022 14:52:50 +0000

Владата ја донесе Уредбата за организацијата и функционирањето на единствениот комуникациско-информативен систем со единствен број на повикување во случај на ризици, опасности и други несреќи на целата територија на државата – Е-112. Е-112 има за цел да обезбеди континуитет на управувањето со итни повици, како унапредување на мерките и апликациите за навремено определување на локацијата со цел брза и навремена реакција на сите служби опфатени во системот за справување со кризи. Е-112 исто така обезбедува брзина и ефикасност во постапувањето при итни повици за итни случаи за помош и се овозможува достапност до системот на сите лица на територијата на Република Македонија, без надоместок од сите телефонски мобилни или фиксни оператори.

Мицотакис: Со помош на бројот 112 за итни случаи спасивме десетици илјади луѓе

Ивона Петрова — Mon, 16 Aug 2021 10:34:40 +0000

Бројот 112 за итни случаи, работеше исклучително добро и ни овозможи на соодветен начин да евакуираме области со десетици илјади луѓе, рече грчкиот премиер Кирјакос Мицотакис во интервјуто за Си Ен Ен, во кое говореше за неодамнешните пожари што ја зафатија Грција, јави дописничката на МИА од Атина. Објасни дека по катастрофалниот пожар во Мати во 2018 година, кога над 100 лица го загубија животот, една од неговите лични заложби било и воспоставување систем што ќе го користи меѓународниот број 112 за итни случаи за предупредување на граѓаните и давање јасни упатства за евакуација. Грчкиот премиер во интервјуто повтори дека Грција, десет дена се соочуваше со екстремно високи температури и требаше да се справи со речиси 600 пожари, од кои неколку беа особено големи. -Во еден момент се најдовме соочени со четири „мегапожари“ („megafires“) во исто време. Сторивме сè што можевме, евакуиравме области со десетици илјади луѓе. За среќа успеавме да заштитиме човечки животи, имавме само една загуба. Па така, цивилната заштита во овој поглед направи одлична работа. Но, секако соочени сме со голема еколошка катастрофа, значителен број шуми се уништени. А се плашам дека ова ќе биде реалноста со која отсега ќе се соочуваат регионите како што е Медитеранот. Не станува збор само грчки проблем, рече Мицотакис. Во интервјуто говореше и за климатските промени и владината политика за прекинување на употребата на јаглен и затворање на електраните со лигнит, истакнувајќи дека Грција е во првите редови за справување со климатската криза.