12 април – Kurir.mk

За два до три дена мора да се донесе одлука од правен аспект како да се одложат изборите

Ивона Петрова — Wed, 18 Mar 2020 06:13:15 +0000

Во следните два до три дена експертскиот тим формиран по вчерашната лидерска средба кај претседателот Стево Пендаровски треба да предложи правно решение за одлагање на изборите закажани за 12 април во ситуација на ширење на корона вирусот. Лидерите на политичките партии на средбата кај Пендаровски се согласија дека поради состојбата со корона вирусот е потребно одложување на изборите закажани на 12 април. На средбата присуствуваа лидерите на СДСМ, Зоран Заев, на ВМРО-ДПМНЕ, Христијан Мицкоски, претседателот на Алијанса за Албанците, Зијадин Села, на Алтернатива Африм Гаши и на Движењето БЕСА, Билал Касами. Во име на ДУИ на состанокот присуствуваат Бујар Османи и Изет Меџити, а од ДПА учествуваа Орхан Ибраими и Фримзим Даути. На средбата присуавуваа и претседателот на Собранието Талат Џафери и претседателот на Владата Оливер Спасовски. -Приоритет во актуелната ситуација со коронавирусот треба да бидат животите и здравјето на граѓаните, заклучиле партиските претставници. Експертскиот тим, пак, којшто се очекува да предложи решенија е составен од професорите Рената Дескоска, Гордана Силјановска-Давкова, Денис Прешова, Татјана Каракамишева-Јовановска, Јетон Шасивари, Светомир Шкариќ и Александар Спасов. На средбите ќе присуствуваат и претседателот на Собранието Талат Џафери и претседателот на Владата Оливер Спасовски. По нивната прва средба вчера попладнето беше соопштено дека експертскиот тим ги разгледувал правните аспекти за одложување на парламентарните избори закажaни за 12 април. На средбата се дискутирало за повеќе можни решенија што произлегуваат од Уставот на Република Северна Македонија. Консултациите за начинот на одложување на изборите ќе продолжат и во следните денови, информираа од Кабинетот на државата. Пендаровски: Постои ургентна потреба за одлагање на изборите Претседателот Стево Пендаровски синоќа во телевизиско интервју рече дека одлуката за одлагање на изборите и како ќе биде направено тоа од правен аспект ќе мора да се донесе за два-три дена. -Немаме никаква политичка намера да ја рушиме техничката влада ако ги одлагаме изборите, а јасно е дека ги одлагаме, и немаме намера да се враќаме на политичка влада. Значи, продолжуваме вака како и досега со техничката влада, со тие неколку министри и заменици министри од опозицијата, како еден вид на гаранција дека тоа што ќе биде дадено тоа и ќе биде навистина само со цел да се спречи ширењето на вирусот, истакна Пендаровски во интервју за „Топ тема“. Претседателот посочи на средбата на седуммината истакнати правни експерти во неговиот кабинет, кои како што кажа, имаат прилично дисонантни тонови, различни мислења. -Знаете онаа поговорка „два правника три мислења“, меѓутоа, јас се надевам, бидејќи станува збор за врвни експерти, дека ќе подготват барем две-три опции кои понатаму утре или задутре на политичко ниво повторно ќе треба да ги пресечеме, рече Пендаровски. Претседателот образложи дека има неколку дилеми. – Едниот став е дека Собранието по самораспуштањето не може да се собере назад, да се врати назад ни во случај на војна. Самораспуштено е и готово. Другото е, Собранието е самораспуштено, но мандатот на пратениците трае додека не дојдат новите пратеници избрани на следните избори. И вели, во екстра ситуации, како што е оваа, пратениците би морале да имаат право да се вратат назад, дури и да продолжат со работа не само за да одложат избори, туку и за да донесат некој закон кој е важен. Тука се кршат копјата. Има една прилично контроверзна одлука на Уставниот суд, ако паметите од 2016 година кога двапати ги одлагавме изборите. Вонредната состојба е важна и за тоа дали воопшто ќе можеме да ги одложиме изборите, образложи Пендаровски. Тој нагласи дека е важно што и Државната изборна комисија пополека влегува во фаза на печатење на изборни материјали. – ДИК пополека влегува во фаза, значи кога ги утврдува кандидатите и за следните неколку денови се планира влегување во процес на печатење на гласачкиот материјал. Четири милиони евра чини целата таа операција. Јас мислам дека тоа не треба да бидат пари кои ќе ги фрлиме туку така, ако сите сме свесни дека изборите ќе мора да се одложат, нагласи Пендаровски. Тој даде пример дека во Франција, каде завчера се одржа првиот круг од локалните избори за 25 проценти е помала излезноста. Пендаровски потенцираше дека во следните два-три дена ќе мора да се донесат одлуки. – Јас ја чекам одлуката на Советот на правниот тим експерти вечерва кои работат кај мене, што тие сугерираат, како ова правно да го надминеме, а да биде правно фундирано, да не правиме еквилибристики на кои понатаму ќе ни се смеат сите други. Но, исто така е јасно дека постои ургентна потреба, не само политичка, за одлагање на изборите, потреба да се помогне на сите нас и да дојдеме во ситуација во која државата ќе може на најпродуктивен и најрационален начин да ги искористи ресурсите кои ги има, кои не се огромни, но се тука, заклучи шефот на државата.

Изборите ќе се одложат

Ивона Петрова — Tue, 17 Mar 2020 13:42:23 +0000

Лидерите на политичките парти на денешната средба кај претседателот Стево Пендаровски се согласија дека треба да бидат одложени парламентраните избори на 12 април. Приоритет во актуелната ситуација со коронавирусот треба да бидат животите и здравјето на граѓаните, заклучиле партсиките преставници. На средбата присуствуваа лидерите на СДСМ, Зоран Заев, на ВМРО-ДПМНЕ, Христијан Мицкоски, претседателот на Алијанса за Албанците, Зијадин Села, на Алтернатива Африм Гаши и на Движењето БЕСА, Билал Касами. Во име на ДУИ на состанокот присуствуваат Бујар Османи и Изет Меџити, а од ДПА учествуваа Орхан Ибраими и Фримзим Даути. На средбата присуствуваа и претседателот на Собранието Талат Џафери и претседателот на Владата Оливер Спасовски. МИА

Почна лидерската средба кај Пендаровски

Ивона Петрова — Tue, 17 Mar 2020 11:26:19 +0000

Почна лидерската средба во кабинетот на претседателот на Република Македонија Стево Пендаровски на која присуствуваат претседателите нa парламентарните политички партии од власта и од опозицијата кои на последните парламентарни избори освоија пратенички мандати со самостојни листи. Единствена точка на дневниот ред на лидерската средба што ја свика шефот на државата е одложување на парламентарните избори. На средбата присуствуваат лидерите на СДСМ, Зоран Заев, на ВМРО-ДПМНЕ, Христијан Мицкоски, на ДУИ, Али Ахмети, претседателот на Алијанса за Албанците, Зијадин Села, на Алтернатива Африм Гаши, на Движењето Беса, Билал Касами, и претседателот на ДПА, Мендух Тачи. На средбата се присутни и претседателот на Собранието Талат Џафери и претседателот на Владата Оливер Спасовски. Видеоинсерти и фотографии од средбата ќе бидат дистрибуирани до медиумите од страна на прес-службата на кабинетот веднаш по почетокот на лидерската средба. Изјавите за медиумите по завршувањето на лидерската средба ќе бидат пренесувани на Јавниот сервис МРТ, на фејсбук-страницата на претседателот и на јутјуб-каналот. Поради мерките и препораките на Владата за заштита од COVID-19, од Кабинето на Пендаровски, ги охрабруваат медиумите да ги преземат видеоматеријалот и фотографиите кои ќе бидат веднаш дистрибуирани.

Лидерската средба закажана во 12 часот, најавено присуството на политичките лидери, Џафери и Спасовски

Ивона Петрова — Tue, 17 Mar 2020 09:07:24 +0000

Со почеток во 12 часот денеска, во Кабинетот на Претседателот „Вила Водно“ ќе се одржи лидерска средба, на која ќе присуствуваат претседателите нa парламентарните политички партии од власта и од опозицијата кои на последните парламентарни избори освоија пратенички мандати со самостојни листи. Од Кабинетот на Пендаровски информираат дека на лидерската средба е најавено присуство на претседателот на СДСМ, Зоран Заев, претседателот на ВМРО-ДПМНЕ, Христијан Мицкоски, претседателот на ДУИ, Али Ахмети, претседателот на Алијанса за Албанците, Зиадин Села, претседателот на Алтернатива, Африм Гаши, претседателот на Движење Беса, Билал Касами и претседателот на ДПА, Мендух Тачи. На средбата ќе присуствуваат и претседателот на Собранието Талат Џафери и претседателот на Владата Оливер Спасовски. Видео инсерти и фотографии од средбата ќе бидат дистрибуирани до медиумите од страна на прес службата на Кабинетот веднаш по почетокот на лидерската средба. Изјавите за медиумите по завршување на лидерската средба, ќе бидат пренесувани на Јавниот сервис МРТ, на Facebook страницата на Претседателот и на YouTube каналот.

Лидерите на партиите на средба кај Пендаровски, согласни за одложување на изборите

Ивона Петрова — Tue, 17 Mar 2020 06:21:47 +0000

Претседателите нa парламентарните политички партии од власта и од опозицијата кои на последните парламентарни избори освоија пратенички мандати со самостојни листи денеска во кабинетот на претседателот на Република Македонија Стево Пендаровски ќе одржат лидерска средба. Единствена точка на дневниот ред на лидерската средба што ја свика шефот на државата е одложување на парламентарните избори. Како што соопштија од кабинетот на преседателот, на лидерската средба е најавено присуство на претседателот на СДСМ, Зоран Заев, претседателот на ВМРО-ДПМНЕ, Христијан Мицкоски, претседателот на ДУИ, Али Ахмети, претседателот на Алијанса за Албанците, Зијадин Села, претседателот на Алтернатива, Африм Гаши, претседателот на Движењето Беса, Билал Касами, и претседателот на ДПА, Мендух Тачи. На средбата ќе присуствуваат и претседателот на Собранието Талат Џафери и претседателот на Владата Оливер Спасовски. СДСМ, ДУИ и ВМРО-ДПМНЕ вчера излегоа пред јавноста и соопштија дека се подготвени за одложување на предвремените парламентарни избори закажани за 12 април годинава.

Ахмети поддржува одложување на изборите

Ивона Петрова — Mon, 16 Mar 2020 11:23:48 +0000

Претседателот на ДУИ, Али Ахмети поддржување одложување на парламентарните избори закажани за 12 април. Изборите и кампањата се последни во агендата на нашите приоритети, затоа што сите наши човечки, интелектуални и институционални капацитети ги ставивме на располагање на победа во заедничката борба против вирусот. Сега, нас ни треба да го победиме вирусот а не победа на изборите. Со изборите и кампањата ќе се занимаваме откако ќе ја победиме ова закана спрема сите нас, вели Ахмети.

Телефонски разговор Мицкоски-Пендаровски, прифатена лидерска средба за одложување на изборите

Ивона Петрова — Mon, 16 Mar 2020 11:20:05 +0000

Лидерот на ВМРО-ДПМНЕ Христијан Мицкоски остварил телефонски разговор со претседателот на државата Стево Пендаровски, дознава Курир. Во разговорот Мицкоски ја истакнал потребата од свикување на лидерска средба од страна на претседателот на која ќе се разговара за одложување на парламентарните избори закажани за 12 април со цел заштита на граѓаните, а поради новонастанатата ситуација со коронавирусот и мерките кои се спроведуваат. Како што неофицијално дознава Курир, барањето за свикување на лидерска средба било прифатено и истата ќе се одржи утре во претпладневните часови. - Нема ниту една разумна, и ниту една човечка, рационална, и прагматична причина тие да не се одложат, бидејќи за мене, а верувам и на останатите, борба за власт по цена на животите на граѓаните е неприфатливо, напиша денеска меѓудругото Мицкоски на Фејсбук.

ДИК до утре треба да ги потврди кандидатските листи

Ивона Петрова — Mon, 16 Mar 2020 06:35:30 +0000

Државната изборна комисија денеска, а најдоцна утре треба да ги потврди кандидатските листи на коалициите и политичките партии за учество на изборите на 12 април. Кандидатски листи до ДИК поднесоа 15 коалиции и политички партии, а досега е потврдена само листата на партијата Глас за Македонија за пет изборни единици. Според последните измени на Изборниот законик сега постапката поради проверката на кандидатите трае подолго. Уверенијата за неосудуваност и други податоци се проверуваат преку судовите од страна на ДИК и за доставување до ДИК судовите имаат 24 часа да одговорат електронски, а потоа документите да ги достават до Комисијата по пошта. Има рок и за отстранување на неправилностите на листите. Од ДИК велат дека во некои од листите кои допрва треба да се потврдуваат се забележани одредени неправилности, како на пример не е запазена законската одредба за соодност мажи – жени. По потврдувањето на кандидатските листи од ДИК, со жрепка ќе биде одреден редоследот на листите на партиите и коалициите на избирачкото ливче и тој број е ист во сите изборни единици. Жрепката треба да се одржи најдоцна до 20 март, а листите треба да бидат официјално објавени на 21 март. Изборната кампања започнува на 23 март, а завршува на 10 април на полноќ.

До ДИК доставени кандидатски листи од 15 коалиции и партии

Ивона Петрова — Fri, 13 Mar 2020 10:59:00 +0000

До Државната изборна комисија до синоќа на полноќ кандидатски листи доставиле 15 коалиции и партии, најмногу од нив имаат доставено кандидатски листи за сите шест изборни единици, додека неколку и за гласањето во дијаспората. Кандидатски листи за шесте изборни единици и за дијаспората доставиле коалицијата „Никогаш северна, секогаш Македонија“, ДУИ, коалицијата „Можеме“ предводена од СДСМ и Беса, коалицијата предводена од ВМРО-ДПМНЕ „Обнова на Македонија“, политичката партија ИНТЕГРА и партијата Демократи. За шесте изборни единици во земјава кандидатски листи до ДИК доставиле коалицијата Алијанса за Албанците и Алтернатива, Левица и Работничката партија. ДПА доставила кандидатски листи за изборните единици 1, 2, 3, 5 и 6, а СДУ, ГДУ и Глас за Македонија за изборните единици 1, 2, 3, 4 и 5. Твоја партија доставила кандидатски листи за изборите единици 1, 2 и 5. Рокот за доставување на кандидатски листи за предвремените парламентарни избори на 12 април заврши ноќеска на полноќ. По поднесувањето на кандидатските листи, ДИК проверува дали тие се доставени во предвидениот рок и дали се составени согласно Изборниот законик. Кандидатските листи што ќе бидат доставени по рокот ќе бидат отфрлени. ДИК исто така проверува дали предложените кандидати ги исполнуваат условите пропишани во Уставот и во член 7 став 2, 3 и 4 од Изборниот законик, преку соодветните регистри и евиденции на надлежните институции. Овие институции се должни во рок од 24 часа електронски до ДИК да ги достават бараните податоци за кандидатите. Ова е новина за Комисијата, која е воведена со последните измени на Изборниот законик. Доколку се констатира дека листите се во согласност со одредбите од Изборниот законик, тие се потврдуваат најдоцна 48 часа од приемот на бараната документација од институциите. ДИК има пропишано и рокови за отстранување на евентуални неправилности или замена на кандидати доколку тоа е потребно. Редоследот на листите на партиите и коалициите на избирачкото ливче се утврдува со ждрепка и тој број е ист во сите изборни единици. Жрепката треба да се одржи најдоцна до 20 март, а листите треба да бидат официјално објавени на 21 март. Изборната кампања започнува на 23 март, а завршува на 10 април на полноќ.

Партиските лидери согласни, нема митинзи за изборите

Ивона Петрова — Fri, 13 Mar 2020 06:32:22 +0000

Предвремени парламентарни избори на 12 април ќе се одржат. Нема одложување, за тоа не станало збор на вчерашната лидерска средба, но поради коронавирусот и мерките и препораките, политичките партии ќе водат кампања без митинзи. На лидерска средба кај премиерот Оливер Спасовски, претседателите на СДСМ Зоран Заев, на ВМРО-ДПМНЕ Христијан Мицкоски, на ДУИ Али Ахмети, на Алијанса за Албанците Зијадин Села и на движењето БЕСА Биљаљ Касами имаа заеднички став дека е најважно здравјето на граѓаните и дека ќе ги почитуваат препораките. – Нема поважна работа од здравјето на граѓаните. И во таа насока побарав согласност која беше прифатена дека е неопходно сите да покажат одговорност и да се однесуваат одговорно, изјави техничкиот премиер Оливер Спасовски, по координативната средба со лидерите на политичките партии за состојбата со коронавирусот. Многу е важно, рече Спасовски, сите политички партии да покажат одговорност пред здравјето на граѓаните, да ги следат препораките на институциите и нивните активности и кампањата за изборите да ја приспособат врз основа на она што е препорачано во мерките од страна на институциите. – За мене претставува очекувано задоволство тоа што на состанокот се обедини заеднички став дека е најважно здравјето на граѓаните. Тоа е пред се и над се, нагласи Спасовски. Лидерот на СДСМ Зоран Заев истакна дека ќе ги почитуваат препораките и мерките на Владата за справување со коронавирусот и своите предизборни активности ќе ги водат преку медиумите, социјалните мрежи и преку лајфстриминг. – Здравјето на граѓаните е највисок прироитет за сите институции и политички субјекти. Здравјето секому треба да му биде над се останато, рече Заев, додавајќи дека политичките партии треба да бидат пример за почитување на инситуционалните препораки. Тој истакна дека на средбата не станало збор за одложување на изборите и оти начинот на водење на предизборната кампања ќе биде усогласен со мерките и препораките кои се за доброто на сите граѓани за брзо и ефикасно справување со ситуацијата. Мицкоски посочи дека извесно е дека изборната кампања ќе се адапира на актуелните услови поради коронавирусот и ќе се води на алтернативни начини, преку социјални мрежи и мас медиумите и дека нема да има партиски митинзи додека трае забраната за јавни собири. – Не се разгледа можноста да одложување на изборите. Она за што разговаравме е да имаме преадаптирање на изборната кампања. Немаше разговор по таа тема за одложување. Ќе имаме алтернативен начин за водење на кампањата, преку социјалните медиуми, преку мас медиумите, така натаму. Од врата на врата, поинаков начин, поинаков пристап, итн., рече Мицкоски. Ахмети наведе дека и ДУИ ќе ги почитува препораките и нема да организира големи митинзи за предвремените парламентарни избори закажани за 12 април. – Политичките партии ќе најдат начин како ќе работат и дејствуваат. Денес медиумите се многу развиени. Електронскиот свет е на највисоко ниво и сите партии може да комуницираат преку електронските средства, изјави Ахмети. И Зијадин Села потврди дека Алијансата за Албанците ќе ги следи препораките и упати порака дека нема потреба од паника. – Оваа ситуација ќе помине како и сите други. Ова е вирус и последиците од овој вирус не се различни од последиците на сезонските грипови. Секогаш како последица на сезонскиот грип имало пациенти кои завршиле во болница како последица на хроничните заболувања. Нема потреба од паника, луѓето треба да бидат солидарни, рече Села и ги повика фармацевтските компании да не ја злоупотребуваат ситуацијата и да не прават профит од средствата за дезинфекција. Касами, исто така, посочи дека ќе ги почитуваат сите мерки и препораки на Владата за справување со коронавирусот и оти ќе ги искористат сите други можности за комуникација со гласачите за им ги пренесат нивните пораки и идеи.