5 г – Kurir.mk

АЕК на јавен состанок ќе додели одобренија за 5Г

Дарко Андоновски — Wed, 06 Jul 2022 12:54:00 +0000

Агенцијата за електронски комуникации (АЕК) на јавен состанок закажан за 11-ти месецов ќе додели одобренија за 5Г. Воведувањето на 5Г во државава и доделувањето на одбренијата за 5Г се дел од агендата за првиот јавен состанок на АЕК за годинава. На дневниот ред се и теми за роамингот во Западен Балкан и напорите за обезбедување поевтин роаминг со ЕУ, сајбер безбедноста како и за заштита на правата на крајните корисници на електронски комуникациски услуги. АЕК претходно ја утврди најниската висина на еднократниот надомест и начинот на плаќање за добивање одобрение за користење радиофрекфенции од радиофрекфенциксите опсези 700 MHz И 3.x GHZ. Еднократниот надомест за одобренијата А2 и А3 изнесува 5,25 милиони евра, а по 2,9 милиони евра за Б2 и Б3. По 10,8 илјади евра е надоместот за одобренијата Б41, по 5,4 илијади евра за Б44 и Б45, а по 6,3 илјади евра за Б46. Писма за искажување интерес на објавената намера за спроведување постапка на јавен тендер со јавно нададавање до АЕК доставија Неотел, А1 Македонија и Македонски Телеком. На 25 ноември лани АЕК објави тендер за доделување одобренија за користење радиофрекфенции за петтата мобилна генерација 5Г, но беше прекинат по постапката на Комисијата за заштита на конкуренцијата (КЗК) откако беше поднесена претставка на една од заинтересираните страни, во која се тврди дека со дел од понудените услови за влез на нов мрежен оператор се нарушува конкуренцијата на пазарот.

Македонија го фаќа трендот: ЌЕ ИМАМЕ 5Г МРЕЖА ВЕЌЕ СЛЕДНАТА ГОДИНА

Ристе Здравков — Sat, 15 Aug 2020 10:19:58 +0000

Двата постоечки оператори поради условите предизвикани од COVID-19, се за одложување на постапката на доделување радиофреквенции за 5G за следната година, додека ЕОЛО смета дека таа треба да се спроведе во најскоро време. Ова го соопшти Агенцијата за електронски комуникации во став по анализа на забелешките и коментарите што беа доставени до неа во тек на јавната расправа што ја организираше ова регулаторно тело во врска со планираното доделување одобренија за 5G. Пристигнатите коментари од компаниите: Intracom Telecom, НЕОТЕЛ, Македонски Телеком, А1 Македонија и EOLO S.p.A. се достапни на веб-страницата на АЕК заедно со одговорите и ставот на регулаторното тело. АЕК во документот најавува дека постапката за доделување одобренија за 5G технологијата ќе почне до крајот на годинава и ќе биде преку аукција, при што ќе се понудат поединечни одобренија за сите опсези. Тоа, појаснува, од причина што операторите се заинтересирани за различни опсези, односно ниту еден оператор не е заинтересиран за сите опсези. -Постапката за доделување одобренија ќе започне до крајот на 2020 година. Двата постоечки оператори, поради условите предизвикани од COVID-19, се за одложување на постапката на доделување за следната година. Меѓутоа, ставот на ЕОЛО како заинтересиран странски инвеститор е постапката да се спроведе во најскоро време. Во Националниот оперативен бродбенд план (НОБП) е наведено АЕК да распише тендер до крајот на 2020 година. Со започнување на постапката се зголемува и можноста за зголемување на конкуренцијата и од други заинтересирани страни, а секако и дека трет мрежен оператор е и една од целите на АЕК. Дополнително, прогласената вонредната состојба поради COVID-19 е укината, наведува АЕК. Оттаму наведуваат дека по потребното усогласување на ЗЕК, одобренијата за национално/регионално покривање ќе се доделуваат на 15 години со можност за продолжување уште за пет години. Во одобренијата, најавуваат, ќе бидат внесени условите за покриеност од Националниот оперативен броадбенд план: • До крајот на 2023 година најмалку еден град да биде покриен со 5G сигнал; • До крајот на 2027 година сите градови во државата да бидат покриени со непрекинат 5G сигнал; • До крајот на 2029 година, секој граѓанин да има можност за пристап до интернет преку 5G со минимална брзина на пристап до интернет од најмалку 100 Mbps. • До крајот на 2025 година, главните коридори согласно Договорот за основање на транспортна заедница на основната и сеопфатна патна мрежа во државата да бидат покриени со непрекинат 5G сигнал. АЕК на 5 февруари годинава објави повик за добивање мислење од заинтересираните страни во однос на издавањето одобренија за 5Г со рок на доставување до 6 март, којшто беше пролонгиран до 20 април гдинава на барање на домашните оператори. Од АЕК претходно за МИА изјавија дека сите пристигнати мислења ќе бидат разгледани од нивните стручни служби и ќе бидат соодветно имплементирани во законската постапка, предвидена со Законот за електронските комуникации (ЗЕК) за доделување на овие радиофреквенции. Министерот за информатичко општество и администрација Дамјан Манчевски на јавна дебата минатиот месец соопшти дека АЕК наесен планира да го објави првиот оглас за изразување на интерес за користење на фреквенции за 5Г согласно Националниот оперативен бродбенд план (НОБП).

ЕК: Земјите да ги променат добавувачите за 5 Г

Ристе Здравков — Fri, 24 Jul 2020 16:47:00 +0000

Земјите челенки на ЕУ треба да преземат итни активности за промена на снабдувачите на опрема за 5G мрежи, соопшти денеска Европската комисија. Според Ројтерс, ваквиот заклучок на Комисијата е чекор кон намалување на присуството на кинескиот Huawei во Европа, откако Соединетите Американски држави вршат притисок врз блокот од 27 члена да го следат примерот на Велика Британија и да ја забранат опремата на кинеската компанија во европските 5G мрежи. Европската унија се согласи во ноември минатата година да ги заостри критериумите за снабдувачите на 5G опрема, со цел да се намалат ризиците за компјутерска безбедност за мобилните мрежи од следната генерација, кои се сметаат клучни за стимулирање на економскиот раст и конкурентност, потсетува британската агенција. Стратегијата вклучува намалување на зависноста на земјите од ЕУ и телекомуникациските оператори од еден снабдувач, а Huawei, светски број 1 производител на телекомуникациска опрема, има конкуренти во лицето на финската компанија Nokia и шведската Ericsson. Иако е постигнат одреден напредок, останува многу да се направи на патот, рече комисијата, истакнувајќи дека „потребен е итен напредок за да се намали зависноста од добавувачите со висок ризик, „со цел да се намали зависноста во целата Унија“. Документот додава дека е идентификуван проблем и на ниво на индивидуални оператори на мобилни мрежи и на национално ниво, при креирање соодветни стратегии за зголемување на бројот на добавувачи, при што некои проблеми се недостаток на интероперабилност или големината на земјата. Официјалните претставници на ЕУ велат дека исфрлањето на добавувачите со висок ризик и зголемувањето на трошоците нема да го нарушат распоредувањето на 5G мрежата низ блокот и дека Nokia и Ericsson ќе можат да ги исполнат нивоата на побарувачка. „Ако ја погледнете глобалната состојба, Nokia и Ericsson имаат голем дел од светскиот пазар во однос на потпишаните договори за 5G мрежите ширум светот. Заедно тие држат до 60-65 проценти. Мислам дека двајца европски добавувачи можат да ги задоволат потребите не само на Европа, туку и на голем дел од светот“, рече еден од официјалните претставници на ЕК. Комисијата, исто така, ги повика 13 земји од ЕУ да усвојат механизам за проверка на странските директни инвестиции без одлагање, како алатка што им овозможува на владите да интервенираат во случаи на странски директни инвестиции во стратешки средства, особено од државни или компании кои ги финансира државата.