„Рајанер“ има 95 отсто помали приходи во однос на минатата година

Магдалена Андонова — Mon, 27 Jul 2020 10:02:05 +0000

Нискобиџетниот ирски авиопревозник „Рајанер“ денеска соопшти за својата прва загуба во текот на првиот квартал од оваа фискална година, за која смета дека е „најпредизвикувачка во 35-годишната историја на компанијата“, како резултат на последиците од пандемијата на коронавирус. Нето загубата на компанијата, во периодот од април до јуни, изнесува 185 милиони евра, во однос на нето добивката од 243 милиони евра во истиот период лани. Приходите се опаднати за 95 проценти, на 125 милиони евра, во кварталот кој заврши на 30 јуни. Мерките за заштеда на трошоците не може да ја компензираат загубата на приходите. Пред една година приходите беа 2,31 милијарди евра. Компанијата соопшти дека поради забраните за патувања наметнати ширум Европа поради пандемијата, од средината на март до крајот на јуни речиси целата нејзина флота беше приземјена. „Рајанер“ превезе само 500.000 патници за разлика од 41,5 милиони во истиот период минатата година. Од 1 јули авиопревозаникот продолжи со летовите на голем број нејзини рути и очекува побарувачката бавно да расте во следните месеци. Постојат надежи дека до септември ќе достигне 70 проценти од нормалниот сообраќај. Ирската авиокомпанија очекува „многу предизвикувачка година“ и во моментнов е најисплашена од можниот втор бран на ширење на Ковид-19 низ Европа кон крајот на есента, кога ќе почне и сезоната на грипови. (МИА)

95 осто – Kurir.mk

„Рајанер“ има 95 отсто помали приходи во однос на минатата година