Абдулаќим Адеми – Kurir.mk

Сочувство од Груевски за смртта на Адеми: Беше вреден, лојален и чесен човек, Македонија ќе го запомни како министер кој направи многу позитивни проекти и реформи

Ивона Петрова — Sat, 17 Feb 2018 15:15:51 +0000

Поранешниот премиер Никола Груевски на социјалните мрежи изрази сочувство за смртта на екс министерот Адбулаќим Адеми, кој вчера беше погребан во родното место. -Почина Абдулаќим Адеми. Тој беше член во владата која ја предводев и промени три позиции, потпретседател на Владата за спроведување на рамковниот договор, министер за животна средина и министер за образование. Добро го запознав и покрај како соработник, го чувствував и како пријател. Ќе го паметам како личност кој беше пред се добар, чесен и тродољубив човек и министер. Личност која носеше добрина и човечност во себе. Личност што сакаше секому да помага, да решава проблеми и да работи. Беше човек кого можам да го сврстам во групата на оние кои држат до дадениот збор, стои во објавата на Груевски. Груевски вели дека и покрај долгогодишното работење на високи државни функции, тој никогаш не се променил или возвишил, не го обзема ниту ароганција, ниту надменост. -Остана скромен, ненаметлив и човек кој знае внимателно да го ислуша соговорникот, да размисли, да разбере и да разговара искрено и со силата на аргументите. Само мудрите луѓе го можат тоа. Остана на земја, остана човек. Даваше се што е во негова моќ да си ги заврши работите, и можам да кажам дека беше човек кој внимаваше каков впечаток ќе остави кај било кого од околината, не само како министер, туку пред се како човек. Со сите се однесуваше со почит, независно на нивната позиција, и беше почитуван од околината. Беше човек, кој со својата сериозност, смиреност, разумност и стабилност влеваше доверба кај секого. Со болка во душата ја примив веста за неговата смрт. Искрено жалам што заради присуството во судот вчера не бев во можност да присуствувам на неговиот погреб. Неговото семејство, има причина да бидат горди на својот сопруг и татко. Неговата партија загуби вреден, лојален и чесен човек на функцијата генерален секретар. Македонија ќе го запомни како министер кој направи многу позитивни проекти и реформи. Замина прерано. Бог да го прости. Нека му е лесна земјата. Почивај во мир Абдулаќим, завршува Груевски.

Мицкоски испрати телеграма со сочувство до семејството на Адеми

Катерина Бојаџиева — Fri, 16 Feb 2018 15:44:42 +0000

Претседателот на ВМРО-ДПМНЕ Христијан Мицкоски испрати телеграма со сочувство до семејството на Абдулаќим Адеми. -Со жалење ја примив веста за смртта на Абдулаќим Адеми, поранешниот пратеник, министер за образование, министер за животна средина и просторно планирање, заменик претседател на Владата задолжен за спроведување на Рамковниот договор и генерален секретар на ДУИ. Дозволете ми од мое лично име и од името на партијата, да го упатам моето искрено жалење и длабоко сочувство до сите членови на вашето семејство и пријатели. Во овие моменти, знам дека не постојат зборови кои може да ја намалат загубата во вашето семејство, но со споделувањето на чувствата се споделува и тагата, стои во телеграмата и се додава: „Спомените за него нема да избледат, Абдулаќим Адеми пред се како човек, а потоа и интелектуалец остави големи траги кои нема да се заборават. Нека почива во мир“.

Абдулаќим Адеми погребан во родното Шемшово

Ивона Петрова — Fri, 16 Feb 2018 15:10:09 +0000

На гробиштата во тетовското село Шемшово, денеска беше погребан генералниот секретар на Демократска унија за интеграција, Абдулаќим Адеми, кој почина по тешко боледување. Од него се простија членови на семејството, пријатели, сопартијци и познаници. На погребалната церемонија присуствуваа лидерот на ДУИ, Али Ахмети и членови на Демократската унија за интеграција како и владини функционери. По погребалната церемонија, сопартиецот од ДУИ, Бујар Османи, му заблагодари на Адеми за добрите дела што ги направи додека беше дел од извршната власт, со ветување дека неговите почнати проекти и натаму ќе се спроведуваат. -Како носител на високи државни и национални функции, како пратеник, вицепремиер за спроведување на Охридскиот договор, како министер за животна средина, и потоа за образование, направи Албанците државата да ја чувствуваат за своја. Бројни училишта и проекти до лани, меѓу кои и основањето на новиот државен универзитет на албански јазик, го носат потписот на Адеми. Ќе направиме се овој отворен фронт на проекти што останаа до половина да ги довршиме како твој непишан тестамент, рече Османи во неговиот говор. На крајот на церемонијата беше прочитана телеграма со сочувство од премиерот Зоран Заев.

Телеграма со сочувство од МОН до семејството на Адеми

Ивона Петрова — Fri, 16 Feb 2018 09:24:18 +0000

Министерството за образование и наука изразува искрено жалење и упатува длабоко сочувство до семејството и пријателите на поранешниот министер за образование и наука Абдулаќим Адеми, кој почина во текот на вчерашниот ден. -Адбулаќим Адеми беше на чело на Министерството за образование и наука во периодот од 2014 година до 2016 година кој беше обележан со многу промени и иницијативи во рамките на образовниот систем на Република Македонија, се вели во телеграмата испратена од МОН.