Адријана Поп Арсова – Kurir.mk

Македонката Поп Арсова не го заврши маратонот во Будимпешта, Шанкуле е победничка

Ивона Петрова — Sat, 26 Aug 2023 09:24:49 +0000

Амане Берисо Шанкуле од Етиопија го освои златниот медал на женскиот маратон претпладнево на Светското првенство во атлетика што се одржува во Будимпешта. Шанкуле го оствари својот најдобар сезонски резултат – 2 часа 24 минути и 23 секунди. Нејзината сонародничка Готутом Гебресласе заврши на 2. место со 11 секунди заостанување зад победничката. На третото место маратонот го заврши Мароканката Фатима Езахра Гардади со време 2:25.17. Единствената Македонка на ова Светско првенство, Адријана Поп Арсова, не го заврши маратонот.

Поп Арсова на 28. место на маратонската трка на СП

Бошко Тасиќ — Mon, 18 Jul 2022 18:48:50 +0000

Македонската атлетичарка Адријана Поп Арсова го освои 28. место на маратонската трка на Светското првенство во Орегон, САД. Таа ја истрча патеката со време од 2:41.20 часа. Таа не успеа да го собори своето најдобро време (2:35:29 часа) кое е и актуелен македонски рекорд, но солидно ја претстави Македонија на атлетскиот мундијал во конкуренција на четириесет маратонки од целиот свет. Првото место и златниот медал ѝ припадна на Готитом Гебресиласие од Етиопија со нов рекорд на Светските првенства (2:18.11 часа).

Маратонката Поп Арсова единствен македонски учесник на Светското атлетско првенство

Ивана Ефремовски — Thu, 14 Jul 2022 14:40:42 +0000

Американскиот град Јуџин од утре до 25 јули ќе биде домаќин на Светското атлетско првенство на кое единствен македонски претставник ќе биде маратонката Адријана Поп Арсова. Маратонската трка во женска конкуренција е на програмата на 18 јули со почеток во 15:15 по македонско време. Поп Арсова треба да се појави на стартот во конкуренција на 48 маратонки. На Светското првенство во Јуџин ќе настапат вкупно 1.900 атлетичари од 190 држави. (МИА)

Бронзен медал за Поп Арсова на Балканската атлетска трка на 10 километри

Ивона Петрова — Sat, 11 Jun 2022 12:38:19 +0000

Забележителен настап на првата Балканска атлетска трка на 10 километри во хрватскиот град Карловац постигна македонската атлетичарка Адријана Поп Арсова, освојувајќи го бронзениот медал. Поп Арсова, која настапува за Атлетскиот клуб Делта од Скопје мина трето пласирана низ целта, истрчувајќи ја уличната трка во Карловац во време од 35:08. Настап на меѓународната сцена денеска ги очекува и македонските атлетичари Дарио Ивановски и Јован Стојоски на Европското првенство за мали земји, чиј домаќин е Малта. На Европското првенство во градот Марса, Ивановски ќе настапи во трката на 5.000 метри, додека Стојоски ќе се натпреварува во трките на 100 и 400 метри.

Атлетичарите Поп Арсова и Илиевски ги подобрија македонските рекорди во маратон

Магдалена Андонова — Mon, 16 May 2022 14:04:47 +0000

Атлетичарите од АК „Делта“ од Скопје, Адријана Поп Арсова во женска и Драган Ивановски во машка конкуренција постигнаа нови македонски рекорди во маратон, кои и досега беа во нивна сопственост. Двата рекорди беа соборени на вчерашниот маратон чиј домаќин беше данскиот главен град Копенхаген. Ивановски на својот 25. роденден ја истрча маратонската делница од 41,2 километри за 2:18,12 часа, што е за повеќе од три минути подобро време од неговиот стар државен рекорд (2:21,27 часа) остварен на ланското издание на Скопскиот маратон. Нов рекорд во Копенхаген истрча и Адријана Поп Арсова, со време од 2:35,29 часа, или пет минути побрзо од нејзиното претходно рекордно остварување, 2:40,36 часа, исто така, лани на Скопскиот маратон. (МИА)

Арсова и Ивановски победија на Скопскиот маратон со нови државни рекорди

Ивона Петрова — Sun, 03 Oct 2021 11:50:15 +0000

Адријана Поп Арсова во женска и Дарио Ивановски во машка конкуренција со време на нови државни рекорди минаа први низ целта на Скопскиот маратон што денеска се одржа нив улиците на македонската престолнина. Во конкуренција на околу 150 учесници во дветеконкуренции, Поп Арсова ја истрча маратонската трка во време 2:40:36 часа, додека Ивановски триумфираше со време од 2:21:27 часа. Вторите места ги освоија Силвија Јукаила од Еквадор и Младен Стевановиќ од БиХ, додека како третопласирани завршија Билјана Кираџиева и Германецот Давид Перлич. Во полумаратонската трка триумфираше Бугаринот Ценков со време 1:09:10 час, додека во женска конкуренција прва низ целта мина Србинката Ристиќ (1:26Ч09).

Адријана Поп Арсова на маратонот во Ајнтховен го собори македонскиот рекорд

Ристе Здравков — Tue, 16 Oct 2018 10:08:22 +0000

Адријана Поп Арсова, членка на АК Делта, оваа година изненади со својот настап на Виз Ер Скопски маратон и на 28 години таа продолжува со нејзиното темпо. Поп Арсова во неделата на маратонот во Ајнтховен, Холандија, постави нов македонски рекорд со резултат од 3:00:44 часа. - Немав некои потешкотии во текот на трката, освен тоа што првите 21км ги поминав пребрзо и имав мала криза на 25км, и искрено мислам дека крајниот резултат ќе беше подобар тоа да не се случеше. Но, тоа е искуство плус за мене за следниот маратон, задоволна сум и со ова остварување во овој момент. Маратонот е мојата омилена дисциплина баш заради тежината и неизвесноста која ја носи. Сега во следниот период малку ќе одморам, па потоа ќе планирам кој ќе биде мојот следен маратон на кој ќе се обидам и да се симнам под границата од 3 часа, истакна Поп Арсова. Претходниот рекорд во Македонија беше поставен од Адријана во мај. Километрите по улиците на Скопје ги истрча со време од 3:05:04 и со тоа го освои бронзениот медал во женска конкуренција. Поп Арсова го држи и македонскиот рекорд во полумаратон и рекордот на 10КМ, кој неодамна го постави на Скопје Трча 10КМ.