аџилак – Kurir.mk

Во Мека денеска почнува аџилакот, еден од петте столба на исламот

Катерина Бојаџиева — Sun, 25 Jun 2023 08:16:13 +0000

Во Мека денеска почнува годинашниот аџилак, еден од петте столбови на исламот, и на него се очекува да присуствуваат повеќе од два милиони муслимани од целиот свет. Тоа ќе биде најголемиот аџилак откако пандемијата на коронавирусот ги принуди саудиските власти драматично да го намалат настанот, пренесува Хина. Повеќе од 926.000 аџии учествуваа во 2022 година, во споредба со само 59.000 претходната година, покажуваат официјалните податоци. Во 2019 година, на аџилакот се собраа околу 2,5 милиони муслимани. По целосното укинување на ограничувњата поврзани со Ковид-19 и старосната граница, Кралството Саудиска Арабија очекува да се врати на нивоата пред пандемијата, што значи пристигнување на повеќе од два милиони луѓе. Од сите муслимани се очекува барем еднаш во живото да го извршат аџилакот (хаџот) во Мека, се разбира, доколку имаат средства за тоа и се здрави. Верниците се собираат во светиот град на неколкудневни ритуали во кои го следат патот на последниот аџилак на пророкот Мухамед.

Завршија подготовките за аџилак, над 2.000 верници од земјава ќе заминат во Мека

Тале Кристо — Sat, 10 Jun 2023 12:17:40 +0000

Годинава на аџилак и во посета на светите муслимански места од земјава ќе заминат над 2.000 верници, што претставува рекорден број и подготовките поминаа во најдобар ред, изјави поглаварот на Исламската верска заедница, реисот хаџи Хафиз Шаќир Ефенди Фетаи на информативната средба со верниците во Гостивар. - Од нашата земја оваа година на аџилак ќе заминат 2030 верници, кои ќе им се придружат на околу четири милиони верници од целиот свет. Оваа година бројот на аџии од Северна Македонија е поголем од која било друга земја на Балканот, рече Фетаи. Тој на верниците кои се собраа на традиционалниот информативен собир им посака добро здравје и да се придржуваат до препораките на верските лидери и лекарскиот тим. Рекорден број на верници, годинава ќе заминат од Гостиварско и сите подготовки поврзани со визи, авионски билети, вакцини се завршени и како што рече гостиварскиот муфтија Сабахудин Зендели, верниците може да заминат за Саудиска Арабија и да го исполнат петтиот услов на исламот. Собирот беше можност верниците да се запознаат со нивните водачи и да слушнат совети и предавања поврзани со престојот во светите места. Муфтијата Зендели напомена дека од гостиварско на аџилак годинава ќе одат 451 аџии кои ќе бидат придружувани верски лица и медицински тим со тројца лекари. Најстариот верник кој ќе замина Хаџот 2023 има 80 години, а најмладиот 26. Покрај советите и благословот, верниците денес ги добија и пакетите во кои се наоѓа традиционалната наметка ирхам. Првата и втората група ќе тргне на 16 јуни, односно 17 јуни со по 180 верници, а последната со 85 ќе отпатува на 18 јуни. ИВЗ го организираше патот, сместувањето и храна за време на 28 дневниот престој.

Вработените од скопскиот Центар за социјална работа се жалат дека останале без декемвриската плата – директорот им отишол на аџилак

Тале Кристо — Fri, 13 Jan 2023 16:37:54 +0000

Преку 230 вработени во Центарот за социјална работа на град Скопје нема да добијат плата. Вршителот на должноста директорот заминал на аџилак во Мека, Саудиска Арабија. Налогот за исплата на плати на вработените не го потпишал, а негова замена нема. Извори од Центарот утрово реагираа дека во најдолгиот месец во годината, дел од семејствата кои имаат само едно вработено лице нема да ја однесат платата дома, а престојните празници ќе ги поминат дури и со празни трпези. Вработените велат дека и бројот на семејства кои се наоѓаат во социјален ризик пораснал, дека расте и бројот на незадоволни граѓани од услугите кои ги добиваат од оваа институција. Исто така, вработените не добивале стимулации во работната средина, така што разочараноста и апатијата била присутна кај сите нив. Инаку, Центарот за социјална работа на град Скопје е со најголем број на вработени во цела држава и тоа со шест подрачни единици. Најголем дел од семејствата имаат деца. Кризата ги погоди сите, платите се замрзнати, а цените во потрошувачката кошничка вртоглаво растат.

Саудиска Арабија овозможува аџилак за одреден број вакцинирани аџии од странство

Тале Кристо — Sun, 08 Aug 2021 10:01:31 +0000

Од утре Саудиска Арабија ќе започне постепено да прима барања од вакцинирани странски аџии за умра (мал аџилак), откако не ги прими една и пол година поради пандемијата на коронавирус, соопштија денеска локалните медиуми. Со капацитет што постепено ќе се зголеми на два милиони аџии, со 60.000 аџии месечно, Мека и Медина ќе започнат да ги поздравуваат посетителите од странство во нивните џамии додека остануваат во сила мерките на претпазливост против Ковид-19. Официјален претставник на Министерството за аџилак и умра изјави дека домашните и странските аџии ќе треба да приложат потврда за вакцинација против Ковид-19 и тоа со некоја од вакцините одобрени во таа земја. Вакцинираните аџии од земјите на кои им е забранет влез во Саудиска Арабија ќе мора да бидат ставени во карантин по пристигнувањето. Умра, аџилак во Мека што може да се направи во секое време од годината, повторно беше отворен во октомври за локалните аџии.

Само вакцинирани или со стекнат имунитет од Ковид-19 на мал аџилак во Мека

Катерина Бојаџиева — Mon, 05 Apr 2021 18:47:26 +0000

Само луѓето кои биле вакцинирани или со стекнат имунитет од Ковид-19 ќе можат да одат да вршат омра, мал аџилак во Мека за време на муслиманскиот месец на постот Рамазан, што почнува во средината на април, соопштија саудиските власти. Министерството за аџилак објави дека „само на лицата имунизирани од коронавирусот“ ќе им биде дозволено да вршат аџилак или молитви во Големата џамија во Мека на почетокот на Рамазан. „Тие луѓе спаѓаат во три категории, оние кои примиле две дози вакцина, оние кои примиле само една доза 14 дена порано и оние кои биле излекувани од коронавирусот“, соопштија властите. За време на Рамазан во Мека обично има голем број верници од Саудиска Арабија и други муслимански земји. Мал аџилак, или омра, може да се изведува во текот на целата година за разлика од аџилакот што е еднаш годишно. Малиот аџилак беше прекинат во март 2020 година поради пандемијата, а на почетокот на октомври полека почна да се враќа со мерки на претпазливост.

Поради КОВИД-19 муслиманските верници од земјава нема да одат на аџилак

Магдалена Андонова — Tue, 23 Jun 2020 14:20:26 +0000

Исламската верска заедница годинава нема да организира заминување на аџилак по најавите дека Саудиска Арабија ќе прими ограничен број верници. Во соопштението на ријасетот кое го потпиша в.д. реисот Шаќир ефенди Фетаху се наведува дека причините се опасноста од КОВИД-19 и ограничувањата кои ги воведе Саудиска Арабија. Во обраќањето до верниците, се наведува дека ИВЗ како единствена овластена институција за организирање на аџилакот одлуката ја донела врз уредбата на Министерството за аџилак на Саудиска Арабија. – Драги верници, врз основа на одлуката донесена од Министерството за Хаџ во Кралството Саудиска Арабија, со жалост ве информираме дека оваа година одењето на аџилак е откажано како последица од мерките преземени поради пандемијата ковид19. Врз основа на одлуката на властите во Саудиска Арабија и земјаќи ја во предвид заштита на здравјето на нашите граѓани Ријасетот на ИВЗ како легитимно тело за организирање на организација на петтиот исламски услов – Хаџ, нема да ја спроведе постапка за Хаџ за 1441/2020 година, стои во соопштението. Минатата година од земјава за аџилак што го организира ИВЗ со локалните муфтиства беа пријавени 850 верници. Околу 2,5 милиони муслимани годишно ги посетуваат светите места во Мека и Медина во текот на неделата на Хаџ. Годинава аџилакот треба да почне кон крајот на јули, а секој муслиман треба да го стори тоа барем еднаш во својот живот. Министерот за хаџ, Мохамед Бентен, претходно изјави дека годинешните аџии ќе бидат избрани според строги здравствени критериуми. На оние над 65 години им е забрането учество во хаџот оваа година. Во Саудиска Арабија има повеќе од 161.000 луѓе заразени со КОВИД-19, а повеќе од 1.300 починале. Изминатите две недели се бележи зголемување на бројот на нови случаи. (МИА)

Саудиска Арабија го забрани аџилакот во Мека поради коронавирусот

Дарко Андоновски — Wed, 04 Mar 2020 15:51:07 +0000

Саудиска Арабија го забрани аџилакот во Мека поради страв од ширење на коронавирусот, објави денеска државната новинска агенција, повикувајќи се на неименуван официјален претставник од Министерството за внатрешни работи кој ја најави забраната. Засега не се наведува колку долго ќе трае забраната. Саудиските власти минатата недела ги затворија светите исламски места за странски верници поради Ковид-19.

За повеќе од два милиона верници денеска почна аџилакот во Мека

Дарко Андоновски — Fri, 09 Aug 2019 10:36:35 +0000

Повеќе од два милиона муслимани денеска го почнуваат аџилакот во Мека, во Саудиска Арабија, а тамошните власти предупредуваат дека нема да толерираат никакви обиди за политизација на овој верски собир во време на тензии во Персискиот залив. Вкупно 2,5 милиона верници од странство и Саудиска Арабија се пријавиле за годинешниот аџилак. -Верниците од цел свет добија над 1,8 милиона визи преку интернет, изјави еден од организаторите. Аџилакот е еден од петте столба на исламот и секој муслимански верник треба да го направи барем еднаш во својот живот, доколку има средства за него. Годинава аџилакот се паѓа во време на големи тензии во Заливот, каде во претходниот период имаше напади врз танкери со нафта, уривање беспилотни летала и запленети танкери. Иранската агенција Тасним пренесува дека 88.550 ирански верници годинава учествуваат во аџилакот и покрај тоа што Иран и Саудиска Арабија ги прекинаа дипломатските односи.

Од Западен Балкан на аџилак во Мека ќе заминат 4.212 верници

Матеја Петровски — Mon, 06 Aug 2018 13:10:27 +0000

Од земјите од Западен Балкан на аџилак во светите муслимански места Мека и Медина ќе заминат 4.212 верници, од коиј најголем број се од Босна и Херцеговина и Косово. Годинава од Македонија на аџилак во Саудиска Арабија ќе патуваат 672 верници, од Албанија 470, од Косово 1.080, од Босна и Херцеговина 1.680, од Србија 235, од Црна Гора 60 и од Хрватска 15 верници. Првата група од Албанија тргнува утре, а од Косово на 9 август. Верниците од Македонија, како што потврдуваат од ИВЗ, ќе патуваат со четири авионски чартер летови од 11 до 15 август. (Миа)