агенција за разузнавање – Kurir.mk

Пратениците во посета на Агенцијата за разузнавање

Ивона Петрова — Wed, 26 Jul 2023 05:37:19 +0000

Членовите на собраниската Комисија за надзор над работата на Агенцијата за национална безбедност и на Агенцијата за разузнавање денеска ќе оствари надзорна посета во просториите на Агенцијата за разузнавање. Оваа Комисија ги разгледува прашањата што се однесуваат на почитување на правата и слободите утврдени со Уставот и закони од страна на АНБ и Агенцијата за разузнавање на граѓаните и други правни лица, законитоста во спроведување на овластувањата на АНБ и Агенцијата за разузнавање од аспект на пречекорување на овластувањата, преземање неовластени постапки, злоупотреба и други негативности во работењето, спротивно на нивните права утврдени со закон, методите и средствата што ги користат АНБ и Агенцијата за разузнавање од аспект на законитоста и почитувањето на правата на граѓанинот и други субјекти, материјалната, кадровската и техничката опременост на АНБ и Агенцијата за разузнавање, воспоставување меѓународна соработка за прашања кои се однесуваат на ваквиот надзор и други прашања што се однесуваат на АНБ и на Агенцијата за разузнавање.

Пратеници во надзорна посета на Агенцијата за разузнавање

Ивона Петрова — Mon, 10 May 2021 05:10:05 +0000

Членовите на собраниската Комисија за надзор над работата на Агенцијата за национална безбедност и на Агенцијата за разузнавање денеска ќе остварат надзорна посета во просториите на Агенцијата за разузнавање. Ова е прва посета на Агенцијата за разузнавање на пратениците од оваа Комисија.

Јавна расправа за законот за АР на собраниската Комисија за одбрана и безбедност

Ивона Петрова — Thu, 06 Feb 2020 07:04:37 +0000

На денешната седница на собраниската Комисија за одбрана и безбедност ќе се одржи јавна расправа по Предлог-закон за Агенцијата за разузнавање. Имајќи предвид дека првпат по 25 години во собраниска процедура е нов закон за Агенција за разузнавање, што треба да се донесе пред заокружување на процесот за полноправно членство на државата во НАТО, Агенцијата за разузнавање вчера преку соопштение ги сподели, како што стои, најбитните придобивки. Од АР посочуваат дека новиот закон е резултат на повеќемесечна работа на тим од Агенцијата, во консултација со академската заедница, Министерството за правда, партнерските служби од земјите членки на НАТО и ЕУ и специјализираните тела од Алијансата. – Потребата од донесување на новиот закон се наметна поради новонастанатите промени во безбедносното опкружување на државата, во регионални и глобални рамки, што бара итно, ефикасно и навремено реагирање на терен. Со новиот закон, Агенцијата се дефинира како служба надлежна за надворешно разузнавање, која собира, обработува, анализира, разменува, чува и штити податоци и сознанија за асиметрични, хибридни и киберзакани од странство, појаснуваат од АР. Со тоа, се подвлекува во соопштението, се прави јасна дистинкција меѓу надлежностите на Агенцијата за разузнавање и Агенцијата за национална безбедност, што досега не беше прецизирано. Новиот закон за АР ги заокружува реформите во безбедносниот систем на државата што официјално започнаа со донесувањето на Законот за оперативно-техничката агенција (ОТА), во април 2018 година, Законот за Агенција за национална безбедност (АНБ), во мај 2019 година и Законот за координација на безбедносно разузнавачката заедница, во мај 2019 година. – Законот ги подобрува и зајакнува професионалните стандарди: ја департизира Агенцијата, го подобрува менаџирањето во Агенцијата, меѓу другото се воведува место заменик-директор, го регулира и прецизира начинот на извршување на задачите и употребата и контролата на методите и средствата на работа и овозможува подобра заштита на класифицираните информациите што ги создава Агенцијата и што ги прима од партнерските служби, а наскоро и од НАТО како нејзина земја членка, се посочува во соопштението од АР. Покрај тоа, се додава, содржи и важен социјален аспект за вработените: ги уредува правата и обврските на вработените, односно ги изедначува со колегите од соодветните безбедносни служби, по однос на условите за пензионирање и платите, согласно специфичноста на разузнавачката работа. Тоа, посочуваат од АР, истовремено ќе овозможи ново кадровско екипирање и зајакнување со нов потребен профил на млади образовани кадри, кои треба да ја градат својата кариера и иднина во нашата држава. Особено важно е што во новиот закон за АР се имплементирани забелешките и препораките на НАТО, како и партнерските служби од земјите членки на НАТО и ЕУ. Истиот, стои во соопштението од АР, ги дефинира местото и улогата на Агенцијата и овозможува нејзина соодветна регионална и меѓународна позиционираност, со што ќе ја подобри нејзината интероперабилност и ќе ја направи рамноправен партнер на службите – членки на НАТО и ЕУ. – Имајќи го предвид специфичниот временски предизборен период, кој неочекувано ја ограничи работата на Собранието, се надеваме дека пратениците ќе ја препознаат важноста на актуелниот моментум и ќе го изгласаат пристапниот протокол за членство во НАТО со заокружени реформи на безбедносно-разузнавачкиот систем, соопштија од АР.

Нов закон за Агенцијата за разузнавање до крајот на годинава

Ивона Петрова — Fri, 04 Oct 2019 11:45:29 +0000

Директорот на Агенцијата за разузнавање Еролд Муслиу на денешната седница ги информирал членовите на собраниската Комисија за надзор над работата на Управата за безбедност и контраразузнавање и на Агенцијата за разузнавање дека ќе се носи нов закон за Агеницијата за раузнавање, на местото на постоечкиот што е од 1995 година, а според препораките на НАТО треба да биде донесен до крајот на оваа година. Претседателот на Комисијата за надзор над работата на УБК и на Агенцијата за разузнавање, Трајко Вељаноски информира дека препорачале да бидат вклучени сите политички субјекти, особено опозицијата во изготвувањето на новиот закон и да се донесе со консензус, затоа што, потенцира, е битно реформите што се прават во однос на безбедноста да бидат консезуално усвоени. Крајот на октомври или во првата половина на ноември зависно од термините и собраниските активности членовите на Комисијата ќе изврши надзор врз работата во Агенцијата, информира Вељаноски по завршување на седницата, на која директорот на Агенцијата за разузнавање реферираше за кадровските решенија, како и за целокупното работење. – Надзорот е согласно овластувањата што ги има Комисијата. Одредени прашања што беа поставени и дадените одговори ќе можат да бидат на лице место проверени, изјави претседателот на собраниската Комисија.

Пендаровски по успешно завршените партиски задачи го награди Ерол Муслиу за директор на Агенција за разузнавање

Предраг Кукиќ — Wed, 22 May 2019 13:24:47 +0000

За директор на Агенција за разузнавање беа во игра три имиња на Албанци кои се наоѓаа на раководни позиции во бeзбeднocниoт систем. Стануваше збор за Ариф Асани, aктyeлен заменик директор на УБК и фаворит на ДУИ, фаворит од сенка на Оливер Спасовски беше неговиот советник Рефик Черими, а на Зекири беше актуелниот заменик директор на Агенцијата Ерол Муслиу. И по „мачните“ преговори кој да стане директор на Агенција за разузнавање денеска се обелодени по медиумите. Пендаровски го назначи Ерол Муслиу, кој е познат како човек на Заев. Додека се бираше кој да стане директор, Муслиу беше фаворит на потпретседателот на СДСМ, Мухамед Зекири, кој пак се смета за нaјзаслужен во СДСМ за поддршката од албанскиот електорат на овие избори. Досегашниот заменик-директор на Агенцијата за разузнавање за неговата мината позиција се зборува дека ја добил и со поддршка од други странски разузнавачки служби, но токму тоа е и причина за сомнежот во искреноста на неговото работење. Изминатиот период имаше информација дека луѓе вработени во Агенцијата за разузнавање по препорака на Муслуиу, заедно со Мухамед Зекири од СДСМ биле на посета на гробовите на загинатите терористи од Косово во Диво Насеље, каде имаат остварено средба дури и со локалните власти. Според информациите имале и средби со безбедносните структури на Косово. Што точно се зборувало остана енигма.