ајватовци – Kurir.mk

Пожарот во Ајватовци е локализиран, хеликоптери исфрлија околу 200 тони вода

Ивана Ефремовски — Sun, 27 Aug 2023 19:55:56 +0000

Во текот на вчерашниот и денешниот ден (26 и 27.08) Одделот за воздухопловни единици на МВР по добиено барање од ЦУК за гасење на пожар кај селата Бучинци и Ајватовци, на територија на општина Илинден , упати два хеликоптери (Ми-171 и Бел-212). Тие врз пожарот исфрлија околу 200 тони вода. Пожарот е локализиран.

Под контрола и вториот крак од пожарот кај Ајватовци, се интервенира на нов пожар во Студеничани

Дарко Андоновски — Sun, 27 Aug 2023 15:13:38 +0000

Под контрола се двата крака од пожарот кај Ајватовци во Општина Илинден, а се интервенира и за гаснење на нов пожар во атарот на Општина Студеничани. - Пожарот на вториот крак кај селото Ајватовци е конечно ставен под контрола. Се продолжува со интервенцијата на полициските хеликоптери и авион „ер трактор“ на Дирекцијата за заштита и спасување (ДЗС), како и на пожарникарите, доброволците од доброволното противпожарно друштво од Свети Николе и локалното население. Конечно сум оптимист во врска со овој пожар, изјави за МИА, директорот на Центарот за управување со кризи (ЦУК), Стојанче Ангелов. Поради пожарот со Студеничани во активностите за гасење на пожарите ќе се вклучи и армиски хеликоптер. Пожарот кај селото Ајватовци започна вчера попладне, а по интервенција на скопските противпожарните екипи и локалното население во текот на ноќта беше ставен под контрола. Пожарот денеска повторно се разгоре, а во негово гаснење се интервенира и со два полициски хеликоптера и авион на ДЗС. Од скопската Противпожарна бригада за МИА информираат дека скоро сите жаришта во Ајватовци се стивнати, но мора да се контролира за да не се разгорат повторно, додека за пожарот во Студеничани појаснуваат дека станува збор за непристапен терен и дека две екипи во моментов интервенираат за гасење на пожарот.

ВИДЕО: Уште едно разгорување на пожарот кај Ајватовци, втор хеликоптер на МВР се вклучи во гаснењето

Ивона Петрова — Sun, 27 Aug 2023 10:04:01 +0000

Поради разгорување на пожарот кај Ајватовци на два крака, два полициски хеликоптера се вклучени во гасење на пожарот кај Ајватовци, информира директорот на Центарот за управување со кризи (ЦУК), Стојанче Ангелов. Тој исто така вели дека на лице место гасат пожарникарите од скопската Противпожарна бригада но и доброволци од доброволното противпожарно друштво од Свети Николе, со поддршка на локалното население. Ангелов претходно информираше дека пожарот е активен само на еден крак и останатите делови се изгаснати, но по разгорување на првиот крак ангажиран е полициски хеликоптер, а сега веќе и втор полициски хеликоптер по разгорувањето на пожарот на два крака.

Пожарот кај Ајватовци активен на еден крак, останатите делови се изгаснати

Ивона Петрова — Sun, 27 Aug 2023 08:43:06 +0000

Пожарот кај Ајватовци се уште е активен на еден крак, односно под репетиторите, додека останатите делови се изгаснати, информира директорот на Центарот за управување со кризи (ЦУК), Стојанче Ангелов. - Екипи на скопската БППЗ работат на гаснење на активниот крак и обиколка и проверка на изгаснатите делови од пожарот. Пожарот се гаснеше непрекинато во текот на целата ноќ од страна на скопските пожарникари и доброволци од локалното население предводени од градоначалникот на Општина Илинден Александар Георгиевски, истакна Ангелов. Додаде дека се очекува да биде целосно изгаснат во следните неколку часа и дека засега нема потреба од интервенција на воздухоплови. - Голема благодарност до храбрите скопски пожарникари, храбрите доброволци од локалното население кои дадоа голем придонес во гаснењето на овој голем пожар, како и благодарност до храбрите пилоти на полициските хеликоптери и Ер тракторот на ДЗС, вели Ангелов.

Мал крак гори кај Ајватовци, поддршка од воздух не е потребна

Ивона Петрова — Sun, 27 Aug 2023 07:25:58 +0000

Нема потреба од поддршка на воздухопловните сили за гасење на пожарот кај скопско Ајватовци во раните утрински часови. Неизгаснат остана само еден релативно мал крак. Од страна на Бригадата за противпожарна заштита на град Скопје со поддршка од локалното население пожарот ќе биде следен, изјави директорот на Центарот за управување со кризи (ЦУК), Стојанче Ангелов. Нагласи дека рано утрово пожарот е ставен под контрола. Два од трите краци од пожарот кои вчера гореа, како што рече, се изгаснати. Пожарот избувна вчера попладне и се прошири на територијата на соседните села Мршинци, Бучинци и Бујковци во општина Илинден, како и во општина Арачиново. Во еден период беше надвор од контрола и беше најавено дека рано утринава ќе дејствуваат два полициски хеликоптера, а подоцна ќе им се приклучат и два ер трактора на Дирекцијата за заштита и спасување. Вчера беше изгаснат пожарот во општините Пробиштип и Чешиново Облешево каде дејствуваа полициски хеликоптери и ер трактор, а во доцна попладнето заврна и дожд. Вчера вечер активни пожари имаше и во скопските села Умово и Рашче.

Гори силен оган, но пожарот е под делумна контрола: Пожарникарите уште гаснат во Ајватовци, ако не изгаснат утре ќе се активираат хеликоптери

Ивана Ефремовски — Sat, 26 Aug 2023 20:30:19 +0000

Пожарот над Ајватовци е се уште активен иако е ставен под делумна контрола. Главната линија на пожарот е на исток во однос на Ајватовци. -Силен оган гори на најмалку два крака, гори и зимзелена шума. Пожарникарите ќе се обидат едниот дел од пожарот да го стопираат вечерва. Ако не биде ставен под контрола рано наутро ќе се активираат хеликоптери на МВР и Ер тракторите на ДЗС, информира првиот човек на ЦУК, Стојанче Ангелов. Пожарот над Ајватовци долго време беше надвор од контрола. Зафатена е поголема површина од најмалку 30-тина хектари од кои поголемиот дел е зимзелена шума.

Пожарот во Илинден станал опасност за селото и манастирот: Градоначалникот Георгиевски на терен, состојбата ќе се следи цела ноќ

Ивана Ефремовски — Sat, 26 Aug 2023 19:33:09 +0000

Градоначалникот на општина Илинден, Александар Георгиевски вечерва е излезен на терен на местото каде со часови има пожар. -Пожарот зафати над 100 хектари шума, особено борова шума. Имаше критични ситуации кога беше загрозен манастирот во Ајватовци и селото Ајватовци. Благодарение пред се на граѓаните кои дојдоа, но пред се на пожарникарите, на ЦУК, кои заедно со хеликоптерите помогнаа во гаснењето на овој пожар, колку-толку се локализираше и сега е под контрола. Но, пожарот уште е активен и опасен, се надеваме дека ноќта ќе биде тивка и нема да се разгори дополнително да ги загрози имотите и жвотите на нашите граѓани, рече градоначалникот на Илинден. Георгиевски посочи дека во текот на целата ноќ ќе се следи состојбата.

Пожарот над Ајватовци е надвор од контрола: Постои опасност од проширување (ФОТО)

Ивана Ефремовски — Sat, 26 Aug 2023 18:54:42 +0000

Пожарот над Ајватовци е надвор од контрола. Зафатена е поголема површина од најмалку 30-тина хектари од кои поголемиот дел е зимзелена шума, посочи вечерва директорот на Центарот за управување со кризи (ЦУК) Стојанче Ангелов. -Постои опасност од ветерот пожарот да се прошири кон селото Ајватовци и сега силите на Противпожарната бригада на град Скопје ќе се фокусираат да го сопрат огинот да се движи кон селото, изјави Ангелов. Нагласи дека пожарот е веќе излезен од атарот на скопското село Ајватовци и додаде дека е изгорени и Ајватовски рид. Најави дека уште од рано наутро двата полициски хеликоптера ќе почнат да дејствуваат на пожарот, а нешто подоцна ќе им се приклучат и двата авиони ер трактор на Дирекцијата за заштита и спасување. -Во овој момент ќе се обидеме да направиме уште нешто за локализирање на пожарот во текот на ноќта, потенцира Ангелов. (МИА)

Пожарот кај Ајватовци доби сериозни димензии (ФОТО)

Ивана Ефремовски — Sat, 26 Aug 2023 17:49:49 +0000

Околу 16 часот избувна нов пожар кај селата Бучници и Ајватовци, на територијата на Општина Илинден во борова шума и се шири со голема брзина. Ангажиран е еден Ер трактор за гасење на пожарот, информира Центарот за управување со кризи (ЦУК). Од Центарот велат дека пожарот добил сериозни димензии. -Денеска околу 16:00 часот избувна шумски пожар кај село Бучинци и Ајватовци – општина Илинден во борова шума. Се шири со голема брзина. Покрај пожарникарите од скопската Бригада за противпожарна заштита ангажиран е и еден Ер трактор на Дирекцијата за заштита и спасување (ДЗС), велат од ЦУК.

Пожар во Ајватовци, гори сува трева

Дарко Андоновски — Sun, 24 Feb 2019 18:18:58 +0000

Во селото Ајватовци, во општина Илинден вечерва околу 18:20 часот изби пожар. Од Противпожарната служба за МИА изјавија дека на местотот се испратени три возила со цел да ја изгаснат огнената стихија. Посочија дека е запалена сува трева, како и дека во околината на местото каде што е предизвикан пожарот нема куќи. Се уште не е позната причината за пожарот.