академска година – Kurir.mk

Прв академски час на факултетите на УКИМ, почнува студиската 2022/2023 година

Ивона Петрова — Mon, 03 Oct 2022 05:47:16 +0000

На факултетите во состав на Универзитетот „Св. Кирил и Методиј“ – Скопје денеска ќе бидат организирани први академски часови за симболично означување на почетокот на студиската 2022/2023 година и добредојде на новата генерација студенти. Првиот академски час на УКИМ беше одбележан во саботата на Машинскиот факултет и, по пауза од две години поради КОВИД-пандемијата, се одржа со физичко присуство. Бруцошите ги поздрави ректорот на УКИМ, проф. д-р Никола Јанкуловски, со порака дека е чест, но и голема обврска да се студира на најстариот, најдобриот и најголемиот универзитет во нашата држава. – Затоа што знаењето, науката, талентот, креативноста и квалитетот се основни постулати во неговото работење… Ви посакувам низ студирањето да ве следат истрајноста, знаењето и желбата за ваш личен напредок и развој. Работете вредно, посветете им се максимално на студиите, соработувајте со вашите професори, соработувајте и меѓусебно, посветете се на вашата утрешнина, истакна Јанкуловски. Според најавата на УКИМ, ректорот денеска, по повод првиот академски час, ќе ги посети Медицинскиот факултет (8.30 часот), Филолошкиот (11:00), Економскиот (12:00) и Архитектонскиот факултет (13:30). Формиран во 1949 година со три факултети, Универзитетот „Св. Кирил и Методиј“-Скопје денес е заедница од 23 факултети, пет научни институти и четири јавни научни установи, како и придружни членки. Со Конкурсот за упис на додипломски студии во учебната 2022/2023 година, на Скопскиот универзитет беа слободни 10 918 места: 5306 за редовни студенти финансирани од буџетот кои плаќаат годишна партиципација од 200 евра. За редовни студенти кои ќе плаќаат школарина од 400 евра беа наменети 4522 места и 1090 места за вонредни студенти.

Во Албанија почна новата академска година со протест на студентите

Тале Кристо — Mon, 02 Nov 2020 11:15:07 +0000

Во Албанија денескапочна новата академска 2020/2021 учебна година за 130.000 студенти, од кои 21.000 се бруцоши. По препорака на Комитетот на експерти за справување со пандемијата со Ковид-19 наставата најмалку првиот месец ќе се одвива онлајн. Се уште не се знае како ќе се одвива наставата понатаму со физичко присуство на студентите или онлајн, бидејќи тоа ќе зависи од сосостојба со паднемијата во земјата. Одлуката Комитетот ја донесе поради влошената епидемиолошка состојба во земјата каде во последните две недели се регистрирани повеќе од 4.000 новозаразени и 60 починати од Ковид-19 , што го принуди Министерството за здравство да ја пушти во употреба и третата ковид болница. Онлајн настава студентите следеа и на крајот од минатата академска година, кога во земјата беше воведена вонредна состојба. – Новата академска година ќе биде невообичаен предизвик за нашите универзитети поради пандемијата предизвикана од Ковид-19, но универзитетите се подготвени однапред, така што наставата може да започне и да се одвива непречено, изјави вчера министерката за образование, млади спорт, Евис Куши, посакувајќи им на сите студенти среќна и успешна академска година. Поради несогласување со оваа одлука и одлуката за затворање на студентските домови, студентите протестираат пред Министерството за образование, спорт и млади. Полицијата упати повик студентте да се разотидат во рамки на антиковид мерките со кои се забранува групирање.

Почнува академската 2018/2019 година

Ивона Петрова — Mon, 01 Oct 2018 05:51:14 +0000

На универзитетите во Македонија денеска е првиот ден од академската 2018/2019 година, која согласно со новиот Закон за високото образование почнува на 1 октомври наместо на 15 септември. Првиот академски час на Универзитетот „Св. Кирил и Методиј“ симболично ќе биде одбележан на Филозофскиот факултет каде што ќе се обрати ректорот на УКИМ Никола Јанкуловски.

Намален бројот на запишани студенти во академската 2017/2018

Дарко Андоновски — Wed, 04 Jul 2018 13:20:28 +0000

За два процента е намален бројот на запишани студенти во академската 2017/2018 година во споредба со 2016/2017 година. Податоците што денеска ги објави Државниот завод за статистика покажуваат дека во 2017/2018 година се запишале вкупно 56.941 студенти што е намалување во однос на 2016/2017 година. Поголем е бројот на запишани студентки, односно 55,6 проценти се студентки или 31.669. Најголем број или 85,7 проценти се запишани на државните високообразовни установи, а 13,9 проценти на приватните факултети. Во прва година на студии запишани се 15.094 студенти или 26,5 проценти. Тука се опфатени и студентите што по втор, трет и повеќепати запишуваат прва година.