Александар Јончевски – Kurir.mk

Јончевски: Да ја прифатиме реалноста, далеку сме од силните европски селекции

Бошко Тасиќ — Thu, 17 Aug 2023 04:01:47 +0000

Селекторот на кошаркарската репрезентација, Александар Јончевски, даде свое видување за играта и резултатите на нашиот национален тим по завршувањето на претквалификациите за плaсман на Олимписките игри во Париз. Македонија играше без неколку важни првотимци и загуби на сите три натпревари (Естонија, Чешка и Израел), но она што загрижува е бледата игра, огромните проблеми со скокот, поставеноста во дефанзива и стерилноста во нападот. Селекторот смета дека во моментов нашата репрезентација е далеку од нивото кое го имаше порано и не можеме да се носиме против тимовите со кои во минатото бевме „рамо до рамо“. „Направивме неколку грешки во серија и Чешка го искористи тој момент за да се одлепи резултатски. Потоа повторно се вративме во мечот, но не успеавме да изненадиме. Се работи за противник кој има играчи од НБА и од Евролигата, и за нив немавме адекватен одговор во текот на натпреварот. За разлика од другите тимови, ние имавме огромен проблем во составувањето на екипата, а згора на тоа, имавме и многубројни откажувања. Шанса за настап добија сите играчи, а некои од нив добија поголема минутажа од онаа што ја добиваат во своите клубови“, изјави Јончевски. Селекторот исто така рече дека овој турнир послужил за извлекување голема поука, а воедно призна дека Македонија има уште многу работа за да парира на силните европски репрезентации. „Најголем проблем е што голем дел од нашите репрезентативци не добиваат соодветна минутажа и немаат можност секојдневно да напредуваат. Некои од нив ги одиграа првите минути во сениорска репрезентативна конкуренција. Верувам дека сите ќе извлечеме поука од овој собир, не само стручниот штаб, туку и сите играчи. Реалноста е дека сме многу далеку од силните европски репрезентации. Со дел од нив бевме „рамо до рамо“, а од некои бевме дури и подобри во минатото. Треба да сфатиме дека тоа време помина и оваа генерација очекувам да даде многу подобри резултати во иднина“, заклучи Јончевски.

Јончевски: Скокот проблем, со Естонија шанса да прикажеме борбена игра

Бошко Тасиќ — Sun, 13 Aug 2023 06:12:31 +0000

Машката кошаркарската репрезентација на Македонија со убедлив пораз од 65:86 од Израел го започна настапот на претквалификацискиот турнир за ЛОИ во Париз 2024. Селекторот Александар Јончевски по мечот изјави дека причина за поразот е отсуството на поголем број на стардарни репрезентативци поради што помалидде кошаркари добија шанса уште во првата четвртина, како и скокот. „Отсуството на голем број стандардни репрезентативци доведе во ротација уште во првата четвртина да влезат играчи кои за прв пат го носат дресот. Во понатамошниот дел од натпреварот, шанса добија сите, а се со цел да сочуваме сили за утрешниот натпревар со Естонија. Повторно се провлекува скокот, како примарен проблем каде што Израел, само во првото полувреме постигна дури 16 поени од „втора шанса“. Немаме многу време да се навраќаме на овој натпревар. Веќе утре играме со домаќинот кој на денешниот меч со Чешка покажа дека е конкурент за следната фаза. Секако, не сме се откажале. Ќе ја гледаме нашата шанса да покажеме борбена игра која би можела да ни донесе позитивен исход“, изјави Јончевски.

Јончевски: Само да бидеме комплетни во квалификациите за ЕВРО 2025

Бошко Тасиќ — Tue, 08 Aug 2023 17:59:07 +0000

Селекторот на машката кошаркарска рерпезентација Александар Јончевски верува дека неопопуларниот систем на квалификации во кој една репрезентација е веќе домаќин, и го има обезбедено учеството во завршниот дел, на крај ќе биде во македонска полза.

„Реално не бевме многу оптоварени со ждрепката и кои репрезентации ќе ни бидат противници. Откако ги видовме групите, јасно ни беше дека ќе бидеме со три подоброрангирани репрезентации и дека шансите ќе ги бараме против следната подоброрангирана, во овој случај Естонија. Системот каде една репрезентација е веќе домаќин, и го има обезбедено учеството во завршниот дел е тотално непопуларен. Таква беше ситуацијата и во претходните квалификаци, па ни е добро позната. И верувам дека тоа овој пат ќе го искористиме во наша полза“.

За противниците Јончевски вели дека станува збор за квалитетни селекии. „Естонија ни е должник од тогаш, а секако ќе ги измериме силите и на претстојниот турнир во Талин каде што ќе бидат домаќини. Литванија е секако главен фаворит, а и Полска која беше четвртта на последното Европско првенство, и згора на тоа имаат и одлична генерација. Единствено на кое се надеваме е да се појавиме во комплетен состав на сите ФИБА ‘прозори’ кои претстојат низ квалификациите, каде секој натпревар би бил одлучувачки“ – дополнува Јончевски по дознавањето на имињата на ривалите во наредниот квалификациски циклус.

Јончевски: Ниту една селекција не е комплетна, можни се изненадувања

Бошко Тасиќ — Sat, 29 Jul 2023 06:29:49 +0000

Предводникот на македонската кошаркарска репрезентација Александар Јончевски вели дека ова е фаза во која не може да се прават анализи на селекциите кои се нашите ривали на турнирот во Талин: „Многу е рано за некоја анализа на противниците. Пред се, затоа што оваа недела излегоа ростерите на другите репрезентации. Во договор со стручниот штаб, ќе седнеме и ќе ги анализираме и индивидуалните карактеристики на другите репрезентации. Можам да забележам дека ниту една репрезентација не е во најсилниот состав, како и ние. И затоа не би рекол дека изненадувања се невозможни. Без разлика на тоа што подобро котираат од нас на ФИБА ранкингот.Верувам дека со една добра борбеност, со мотивација во тој одреден момент ќе бидат пресуден фактор за понатамошниот тек на настаните, односно продолжување на турнирот во втората фаза“, смета Јончевски. Македонската репрезентативна кошарка, пред доста години, беше во една слична ситуација. Односно нашиот сениорски национален тим да може да надева, да биде во можност да размислува и за настап на Олимписките игри. „Ова е една исклучително ретка можност каде што можеме да се најдеме во група со квалитетни репрезентации и понатаму. Бевме во таква ситуација во 2012 година во Венецуела, каде за влакно ни побегна еден настап на Олимпијада. Секако во тоа време, тоа слободно можам да го кажам, Македонија беше една поквалитетна репрезентација, со 4. место на Европското првенство во Литванија во 2011 година. Меѓутоа, нема да ги потценам овие момци кои имаат желба, кои имаат мотив за да се претстават себеси и државата во најдобро светло. И да докажат дека една помала репрезентација, помала нација, може да се најде на еден таков голем собир“, смета Јончевски. Главна цел на селекторот и оваа генерација кошаркари останува пласман на Евробаскетот во 2025 година.

Јончевски: Не се откажувам од настап на Јакимовски

Бошко Тасиќ — Tue, 25 Jul 2023 04:19:02 +0000

Освоеното прво место во претквалификациите за Евробаскетот 2025 и донесоа на македонската кошаркарска репрезентација настап во претквалификациите за Летните олимписки игри кои ќе се одржат во Париз следната година. Истите ќе бидат комплетирани од 12. до 20. август во Талин, Естонија, и Гљивице, Полска. Селекторот Александар Јончевски за дуелите против Израел, Естонија и Чешка нема да може да смета на дел од стандардните репрезентативци како Крстевски и Мекиќ, а предводникот на Македонија не ја отфрли можноста за приклучување на Јакимовски и покрај најавите и за негово отсуство.

„Со сигурност нема да настапи Крстевски од приватни причини, од здравствени причини се повредија Митревски и Мекиќ пред една недела. Мемед исто така кој е повикан во шестнаесетте поради ситна повреда. Последно откажување е Јакимовски кој има желба да се натпреварува. Медиумите веќе искочија со инфорамција, но јас се уште се немам откажано од него и верувам дека во разговор со неговиот тренер и Универзитетот за која настапува ќе најдеме заеднички јазик за да се појави на циклусот“, вели Јончевски.

Репрезентативците подготовките ќе ги одработи во главниот град, а предвидени се и два пријателски натпревари против Полска кои ќе бидат одиграни во Белград. „Имаме тринеделни подготовки кои ќе ги одработиме во Скопје. Имаме закажани две средби со Полска во Белград и тие ни се единствените пријателски натпревари на кои ќе видиме до каде сме. До тогаш ќе тренираме во Скопје.Првата недела нема да бидеме комплетни бидејќи ќе отсуствуваат дел од репрезентативците кои имаат обврски во своите нови клубови, лекарски прегледи итн.Верувам дека од следната недела ќе бидеме комплетни односно ако можам да кажам комплетни бидејќи имаме откажувања на почетокот, а во текот на оваа недела се случија и некои други непланирани откажувања, но тоа е што е. Тие играчи кои ќе се јават на повикот верувам дека ќе го искористат до максимум“, додава Јончевски. Македонија на претквалификацискиот турнир влегува како аутсајдер, но со желба за надигрување и воедно на овие средби гледа како добра шанса за одмерување на силите со силни противници пред квалификациите за Евробаскетот 2025. „Последен пат кога се натпреваруваше Македонија на ваков претолимписки турнир беше во 2012 година. Се сеќавам тогаш исто бев дел од стручниот штаб. Едно многу тешко натпреварување со оглед на тоа што само 12 репрезентации ќе се најдат на олимпискиот турнир, меѓутоа ова е добра шанса да ги одмериме силите со посилни противници кои понатаму ќе ги сретнеме во квалификациите за Евробаскетот. Мерило ќе ни биде да видиме до каде сме бидејќи нашиот првичен план е настап на Европско првенство 2025. Бидејќи веќе настапивме во претквалификациите и истите успешно ги поминавме овој пат ќе можеме да спарингуваме со екипи кои ќе бидат вистински противници и ќе ни бидат едни од противниците кои ќе настапат на Европското“, завршува селекторот на Македонија.

Јончевски го објави поширокиот список за претквалификациите за Олимпијадата

Ивона Петрова — Thu, 20 Jul 2023 12:29:37 +0000

Селекторот на македонската кошаркарска репрезентација Александар Јончевски денес го објави поширокиот список на играчи кои ќе конкурираат за настап на олимпискиот претквалификациски турнир Талин-Гљивице 2023. На списокот на Јончевски објавен денес се наоѓаат: Војдан Стојановски, Ненад Димитријевиќ, Ти-Џеј Шортс, Андреј Јакимовски, Андреј Магдевски, Адем Мекиќ, Андреј Маслинко, Стојан Ѓуроски, Дамјан Робев, Виктор Ефремоски, Љубомир Младеновски, Андреј Андоноски, Теодор Симиќ, Андреј Шошкиќ, Резарт Мемед, Марин Петков, Андреј Митревски и Амар Хот. Првиот собир е закажан 24 јули во 18 часот, во Спортскиот центар „Борис Трајковски“ во Скопје.

Јончевски: Честитки до играчите и стручниот штаб, сите дадоа свој придонес

Бошко Тасиќ — Mon, 27 Feb 2023 05:33:39 +0000

Селекторот на машката кошаркарска репрезентација Александар Јончевски е презадоволен од прикажаното на мечот во Арената „Нордстранд“ во Осло и победата над Норвешка: – Морам да напоменам дека нашиот состанок пред овој меч почна додека Данска водеше со шест поени. Но, реков дека тоа нас воопшто нас не нè интересира. Дека сакаме самите да си ја завршиме работата. Сакавме да ја повториме онаа наша добраа игра против Норвешка во Гевгелија. И не, никако не бевме обесхрабрени по неуспехот пред некоја вечер во Левице. Пред сè, затоа што сепак и против Словачка имавме добра игра, игравме со доста енергија во нападот, креиравме доста отворени шутеви, кои за жал не ги погодивме. Од друга страна, тие погодија доста потешки обиди за три поени, и затоа победија. Затоа пак мотивацијата на сите нас овде во Осло, беше на ниво, без оглед на тоа што притисокот дополнително се зголеми со драматичната победа на Словачка во Данска. Секако, одговоривме на поставените задачи, посебно во одбрана, би се рекло, и скоро идентично, повторено издание како пред некој месец во Гевгелија – рече Јончевски по натпреварот со Норвешка. Стратегот упати посебна честитка следува до играчите, но и до целиот стручен штаб. Се чини дека, за разлика од пред некоја вечер, во Осло многу дилеми симна нашето одлично отворање на средбата со Норвешка. – Мислам дека е така. Практично од првата топка, отворивме одлично и потоа полека, како поминуваше времето, само ја зголемувавме не само разликата, туку многу повеќе ја билдавме самодовербата, а со тоа полесно го донесовме натпреварот до самиот крај. Сакам да им упатам честитки на сите играчи кои дојдоа, кои влегоа во игра, и го дадоа својот максимум, што дадоа сè од себе, играа на високо ниво без оглед на водството од 30 поени, одигравме до последна секунда. Не двоиме некој, без оглед кој колку играше, одигра баш професионално, и честитки до нив, и до целиот стручен штаб, кој имаше одличен скаутинг и за овој меч, одлучувачки во секој поглед – вели Јончевски.

Јончевски: Имавме свои шанси, ама не успеавме да ги реализираме

Бошко Тасиќ — Fri, 24 Feb 2023 05:50:48 +0000

Македонската кошаркарска репрезентација го доживеа првиот пораз во претквалификациите за Евробаскетот во 2025 година и тоа од селекцијата на Словачка која триумфираше со 82-73.

-На крајот на натпреварот, некако се се сведе на оној момент , кога при негатива од седум не успеавме да ја намалиме на потребните четири. Секако, многу порано го испуштивме чекорот со кој требаше да одиме кон успех, многу порано, на крајот на втора и цела трета четвртина, -рече селекторот Александар Јончевски и додаде:

-Факт е дека лошо го отворивме натпреварот, но и тоа дека некако се вративме во игра, и да поведеме. Меѓутоа од една непромислена, намерна лична грешка, во еден посед примивме дури шест поени, доволно Словачка да го врати водството. Во третата четвртина, не игравме така лошо, креиравме и имавме пет-шест отворени шутеви, но не ги искористивме, а Словачка нè казни преку расположениот Крајчовиќ, потоа и Бродзијански. Во последната четвртина, пробавме да смениме нешто во одбраната, да играме со ‘преземање’, и успеавме таа негатива да ја намалиме на едноцифрена. Но неколку одлуки, очигледни прекршоци, влијаеа на нашата концентрација. Со неуедначен критериум при досудување на личните грешки, во кој на наши реакции добивме две технички грешки, на клупа и на тренер, Словаците повторно ја преземаа контролата и успеаја да го одбранат тој наш последен обид да стигнеме. Останува да анализираме, онака, што се вели со ладни глави, и да одиме понатаму, кон Осло. Се заедно гледано, овде во Левице, имавме свои шанси кои не успеавме да ги реализираме, -порача Јончевски. Сега за Македонија следи дуел со Норвешка во Осло на кој можеме да го потврдиме првото место во групата и да обезбедиме пласман во главните квалификации.

Јончевски: Штета е да не го искористиме овој позитивен скор

Бошко Тасиќ — Wed, 22 Feb 2023 05:58:58 +0000

Македонската машка кошаркарска репрезентација е пред нови предизвици во претквалификациите за Евробаскетот кој е закажан за 2025 година. Ние имаме перфектни четири од четири во групата Д, но се уште ја немаме завршено задачата, поточно тоа ќе треба да го направиме против Словачка или Норвешка, две средби кои ги играме на гостински терен. Првата шанса е пресметката со Словаците закажана за в четврток од 18 часот. -Имаме четири бода, но еден кикс може да нè врати долу на табелата. Можеме да очекуваме тешки натпревари, бидејќи секоја селекција има свои математики. Словачка и Норвешка имаат две победи и не се предаваат, сигурно ќе играат на победа. Освен Данска, нема откажани репрезентации, сите имаат свои математики. Имаме два-три дена да се подготвиме и да видиме како ќе настапиме. Ќе видиме дали ќе промениме нешто во тактиката, бидејќи веќе одигравме два натпревари со истите репрезентации. Очекувам позитивен исход, -рече селекторот Александар Јончевски и додаде: - Победивме на домашен терен, во исклучително тежок натпревар во кој во поголемиот дел бркавме негатива, стигнавме до победа против Словачка. Научивме доста од тој натпревар како да пристапиме на возвратниот. Двете селекции имаат измени од ростерот на тој натпревар. Ние ќе ги немаме Димитријевиќ и Јакимовски, а Словаците ќе сметаат на нивниот најјдобар играч Бродзијански. Верувам дека и тие се подготвуваат за игра на победа, па ќе видиме како тактички ќе одговориме на промените. Целиме на една победа, секако дека ќе играме на две победи, но имаме позитивна енергија и греота е да не го искористиме овој позитивен скор од четири победи на стартот, -заклучи предводникот на „црвено-жолтите“. Првата средба во Скопје ја добивме со 79-75.

Јончевски седнува на клупата на Кожув

Бошко Тасиќ — Sun, 22 Jan 2023 21:37:24 +0000

Македонскиот кошаркарски селектор Александар Јончевски од денеска е тренер на Кожув. Гевгеличани ја објавија соработката со стручњакот кој треба да донесе подобри резултати во домашното првенство, а Јончевски ќе ја извршува функцијата паралелно со водењето на националниот тим, За македонскиот селектор ова е втор тренерски ангажман во Кожув, екипата која ја водеше меѓу 2018 и 2021 година. Досегашниот тренер Апостоли Апостолов ќе остане во стручниот штаб на составот од Гевгелија, потврди КК Кожув во своето соопштение. Јончевски брзо најде нов ангажман откако пред неколку дена ја заврши соработката со екипата на Трепча.