александар миновски – Kurir.mk

Пет месеци по трагедијата: Родителите бараат одговори на местото каде загинаа Калина и Александар – нови детали за кобниот ден

Ивана Ефремовски — Wed, 18 Jul 2018 09:22:37 +0000

„Поминаа пет месеци од несреќата и се уште не можам да си објаснам како се случи тоа. Сите сме потресени бидејќи вашите деца се првите две жртви планинари за коишто јас знам дека настрадале на Кајмакчалан. Имало повредени скијачи, ловџии, планинари, но ова е прв пат некој да го загуби животот во планинарска тура“. Со овие зборови, изразувајќи сочувство, непосредниот сведок на настанот, инаку вработен во скијачкиот центар Ворас, ги пречека родителите на планинарите Калина Велевска и Александар Миновски, кои зимава настрадаа при искачувањето на Кајмакчалан. После пет месеци од трагедијата, родителите го посетија местото на несреќата, во обид да добијат дел од одговорите на прашањата кои ги мачат изминатиов период, а кои за жал, остануваат заплеткани во инертната процедура на надлежните институции, објавува „Нова Македонија“. Средбата со домаќинот на родителите се одржала во селота Панагица, сместено на падините на Кајмакчалан од грчка страна. -Оваа слика што ја видовте сега горе е сосема поинаква од она што се случуваше на 10 февруари. Тој ден беше најлош во последниве 25 години, такво невреме не се памети во нашиов крај. На групата и беше укажано од самиот почеток кога дојдоа во Скијачкиот центар дека не треба да се качуваат нагоре бидејќи временските услови се исклучително лоши, но таквите апели беа игнорирани – објаснуваше тој, додавајќи дека групата имала некаква импровизирана радио врска која воопшто не била прикладна за местото и условите. Ако се има во предвид дека и мрежната покриеност на мобилните трелефони е слаба околу врвот на планината, тогаш станува појасно зошто комуникацијата на настраданите со спасителите не била на нивото кое го бара една таква ситуација. -Тој ден како се да беше свртено против исчезнатите деца. Најнапред доцна ја добивме информацијата дека планинарите се исчезнати, затоа што во такви временски услови секоја минута е драгоцена. Воедно, времето беше исклучително лошо, паметам како сега да се случува. По добивањето на веста дека треба да се бараат децата на врвот, тргнав со ратракот нагоре, но во еден момент морав да застанам бидејќи ја изгубив ориентацијата, толку беше намалена видливоста. Излегов од кабината а скијачките очила веднаш ми замрзнаа. Кога ги симнав, ветерот го носеше снегот во моите очи како замрзнати иглички и речиси не можев ништо да видам. Со последни сили го здогледав едниот од столбовите на ски-лифтот, па тргнав во тој правец да се ориентирам – продолжува сведокот, кој се потсетува и на фактот дека наспроти поголемиот број волонтери но и професионални спасители кои тој ден се собраа во Ворас, само еден од локалните познавачи на планината, инаку лиценциран планински водич, по име Панајотис успеал да се симне до настраданите. Целата сторија, погледнете ја на НОВА МАКЕДОНИЈА

Два месеци по трагичната смрт на Калина и Александар: Документи уште се чекаат, семејствата бараат одговорност!

Ивана Ефремовски — Fri, 13 Apr 2018 16:24:19 +0000

Два месеци по смртта на младите Калина и Александар јавното обвинителство се уште ја чека документацијата од грчката страна за трагичниот настан на врвот Кајмакчалан. Од ОЈО за ТВ24 велат дека за документацијата била побарана и меѓународна правна помош, а по вчерашниот распит на првиот човек на федерацијата Јовица Угриновски, се сослушуваат и сведоци. -Предметот е во предистражна постапка и надлежниот јавен обвиител ги презема сите неопходни дејстввија во насока на расветлување на настанот. Се анализираат известувањата што ги обезбеди министерството за внатрешни работи по наредба на јавниот обвинител. Преку меѓународна правна помош побарана е целокупната документација од Р. Грција во врска со настанот, а во тек е сослушување на лица во својство на сведоци, велат од ОЈО, пренесува ТВ24. Роднините на двајцата планираи, пак откако вчера ја прозваа државата и ОЈО за тромавост во истрагата, денеска велат дела од медиумите дознале до каде е процесот. Тврдат дека ОЈО мора да ги информира и да бидат вклученои во секоја фаза. -Согласно праксата на судот во Стразбур, истрагата во овие случаи треба да биде брза, транспарентна и енергична, а фамилиите на покојните, треба да бидат вклучени од првиот момент и да бидат известени за секое преземено дејствие и акт, заради заштита на нивните легитимни интереси и без тоа изречно да го бараат. Затоа, зачудува околноста што целата јавност и блиските, дознаа од медиумите за сослушувањето на Угриновски, кој е и тоа како важен сведок, со оглед на хаосот во одвивањето на планинарските спротови, стои во писмото од семејствата. Смртта на Калина и Александар во јавноста предизвика бура од реакции за начинот на водење на турата во лоши временски услови, но и за лиценцата на водичот, кој не поседувал дозвола за зимско искачување. Федерацијата на планинари формираше и посебна комисија за да ги истражи околностите кои довеле до трагичниот настан. Епилогот од тоа беше суспензијата на летната лиценца на организаторот на турата за Кајмакчалан, Зоран Костадинов – Москито. Токму, него семејствата го посочија како главен виновник за трагедијата. Од Федерацијата во извештајот пак не најдоа вина во Костадинов, а лиценцата му беше суспрендирана за пропусти во органзацијата. Главен виновник според извештајот на федерацијата за смртта на Калина и Александар биле лошите временски услови, потсетува телевизијата.

Писмо од роднина: Пријателите на Калина и Александар да престанат да молчат

Ивана Ефремовски — Sat, 03 Mar 2018 16:24:02 +0000

Македонија тагува по Калина и Александар, планинарите чии животи прерано згаснаа. Граѓаните чекаат некој да понесе одговорност за трагедијата и секој нов момент во сторијата ја чекаат со должно внимание. Роднина на еден од загинатите испрати писмо кое ние ви го пренесуваме во целост И после 20 дена од трагедијата на младите планинари Калина и Александар, планинарите, нивните здруженија и Федерацијата, се уште молчат. Надлежното обвинителство нека си ја утврдува евентуална кривична одговорност. Ќе се осврнеме на прашањето за професионалната и моралната одговорност на Федерацијата на планинарски спортови (ФПСМ) и на нејзиниот претседател, уважениот Проф. Угриновски. Замислете, Проф. Угриновски, не бил запознаен со фактот дека водичот на групата на Кајмакчалан, Зоран Костадиновски, бил прекршочно казнуван за бесправно организирање на вакви тури, а јавно се испрчи во одбрана на неговата „стручност“ за спасување на планинари во зимски услови, која се покажа на дело, на 10.02.2017. Дали истиот веќе покренал постапка за евентуално кршење на Кодексот на честа на планинарите? Наместо да го осуди молкот, тој изјави дека не е правник и дека не му се познати интерните процедури. Да го запрашаме уважениот хирург, дали влегува во операциона сала без запазување на строгите процедури и стандарди и дали оперира без ракавици и без операционен тим? Истиот, ниту еднаш не повика на покренување на соодветни постапки од страна на надлежните институции, инспекциски служби, полицијата и обвинителството. Наместо тоа, се обиде од себе да збрише било каква одговорност со трагикомичната изјава дека Калина, на минус 20 и ветер од 100 км на час, застанала да се „замези“ со еден сендвич и затоа се изгубила. Како дошол до оваа информација, кога знаеме дека помеѓу членовите на Трансверзалец владее молк ? Дали знае дека во ранецот на Калина, предаден на семејството, имало сендвичи, дали сака заеднички да ги изброиме ? Дали ја известил UIAA International Climbing and Mountaineering Federation, чијашто национална членка е Македонската Федерација од 1999 та година за трагичниот настан, дали се тие запознаени со фактот дека владее хаос во организирањето на планинарските спротови и дали јавноста ќе го добие на увид тоа известување ? Како воопшто функционира оваа Федерација, на чија веб страна има известие дека последната седница на Претседателството е во 2016 та година, а извештајот на Собранието е од 2015 та, а оттогаш наваму ништо??? На што личи нивниот Статут од 2014 та година, кој содржи терминологија, како „ целите на Федерацијата се : кај своите членови и граѓани да развива љубов спрема планината, − да работи на запознавање и зближување со другите народи во светот, да ги негува традициите од историското минато и НОВ (Народно ослободителната војна). Во кој век живеат уважените членови и Претседателот ? Небаре читате поезија, а не правила за постапување во опасна област во која се губат животи! Од подоцнежните изјави на вистински спасувачи и од објавениот видео запис за спасување на француските скијачи, целата јавност го констатира фактот дека планинарите можеле да бидат спасени, доколку во тие 11 часа од констатирањето на нивното исчезнување, навремено се алармирале компетентните стручњаци. Го прашуваме Зоран Костадиновски, зошто се јавил на планинарскиот сојуз во Битола во 03 часот на 11 ти Февруари, а тоа не го сторил 12 часа порано, кога ја узнале својата некадарност да ја спроведат спасувачката акција. Зошто за пријавениот проблем не го разбудиле од зимски сон Угриновски? Се надеваме дека дипломатските претставници на Република Грција во Република Македонија ќе помогнат експедитивно и ефикасно, по дипломатски пат, да се добијат потребните докази за да се утврди огромното доцнење и неодговорноста на грчките спасителни служби кои дошле многу доцна и ги оставија децата во снегот, „претпоставувајќи“ дека Калина е мртва, а Александар, жив, ама се откачил од јажето? Трагичното загинување на Калина и Александар ја потресоа целата македонска јавност. Долго ќе ги слушаме нивните повици за помош, која не пристигала цели 11 часа, за на крајот да замрзнат живи во снегот. Тие, нивните големи другари, пријатели, кои упорно молчат со гласен, срамен молк, им го должат одговорот на роднините, блиските, но и на целата вознемирена македонска јавност, а Претседателот на Федерација, уважениот хирург, достоинствено да си ја предаде функцијата на млади кадарни луѓе, кои ќе направат ред во планинарските спортови, во кои нема да има нови жртви поради ваква монтруозна негрижа и некомпетентност. Роднина на загинатите

НОВИ ДЕТАЛИ: Македонските спасувачи мобилизирани еден час пред Калина и Александар да бидат пронајдени мртви

Ивана Ефремовски — Fri, 23 Feb 2018 17:55:38 +0000

Дирекцијата за заштита и спасување, иако подготвена, не излезе на терен во потрага по планинарите Александар Миновски и Калина Велевска, кои пред две недели беа исчезнати, а потоа најдени мртви на планината Кајмакчалан. Двајцата планинари беа пронајдени на македонска територија, од каде што мртвите тела ги извлекоа грчките служби. Од ДЗС велат дека имале информација дека планинарите се на грчка територија, а без службите на соседната држава да побараат помош, македонските спасувачи не можеле да дејствуваат. – Иако бевме подготвени и комплетирани, не почнавме со претрага и нивно спасување. Причината е што во согласностс со добиената информација двајцата планинари беа од страната на Република Грција, а не од страната на Република Македонија. За ангажирање наши спасувачи на територија на други држави секогаш мора да има официјално барање од државата што бара помош ние да испратиме наши спасувачи – вели Слободан Вуковиќ од Дирекцијата за заштита и спасување за „Макфакс“. Тој вели вели дека тимот на ДЗС бил целосно мобилизиран во 9 часот, а грчкиот извештај за несреќата покажува дека во 10 часот Калина и Александар биле пронајдени мртви. Акцијата не се извршува, никој не дал насока за понатамошна активност. „На ден 11.2.2018 година (недела) во 3.30 часот добиена е информација од Секторот за внатрешни работи Битола дека во Република Грција при планинарење планинари од Скопје се изгубени, еден маж и една жена. Веднаш беше издадена наредба да се изврши процена, да соберат релевантни податоци, а потоа, доколку е потребно, веднаш да се почне со мобилизација на тимот за брз одговор за заштита и спасување од Битола. По извршената процена, во 4 часот е почната мобилизацијата. Таа заврши во 9 часот кога целокупната опрема беше ставена на располагање за престојната акција што требаше да се изврши и се чекаа насоки за понатамошна активност“, вели Вуковиќ. Доколку дванаесетте спасувачи по целосната мобилизација во 9 часот беа испратени да го пребаруваат теренот, според сервисот „Гугл мапс“, ќе им требало минимум два часа да стигнат до врвот Кајмакчалан од македонска страна за да ја започнат акцијата. Дирекцијата за заштита и спасување теоретски би пристигнала во 11 часот, време кога, според барањето за обдукција на телата, грчките служби ги извлекувале безживотните тела на Калина и Александар од местото каде што се пронајдени. Дирекцијата за заштита и спасување нема информации зошто АРМ не е вклучена во оваа активност. Претседателот на Федерацијата на планинарските спортови, Јовица Угриновсвки, пред два дена изјави дека Калина и Александар можеле да бидат спасени. Основното јавно обвинителство соопшти дека отвори предмет за расветлување на трагичниот настан на планинскиот врв Кајмакчалан. Тие издале наредба да се направат проверки и во планинарското друштво „Трансверзалец“ , нивните акти и одлуки врз основа на кои се организираат планинарските експедиции, потребните услови што треба да се исполнат, како и околностите под кои се спроведувало искачувањето на Кајмакчалан. Извор: Макфакс

Угриновски: Трагедијата на Кајмакчалан можеше да се спречи, но не е сега време да кажеме како

Ивона Петрова — Wed, 21 Feb 2018 21:28:42 +0000

Претседателот на Федерацијата на планинарски спортови, Јовица Угриновсвки во вечерашното гостување на телевизија 24 рече дека трагедијата на Кајмакчалан во која загинаа Калина и Александар можела да се спречи, пренесува Фокус. -Да, можеше да се спречи. Но, нема сега да кажеме како. Да го оставиме јавното обвинителство да си ја заврши работата, па потоа ќе го откриеме тоа, рече Угриновски.

Судска медицина- Солун: Калина и Александар починале во рок од еден час

Катерина Бојаџиева — Wed, 21 Feb 2018 15:52:37 +0000

На врвот Кајмакчалан, смртта настапила прво кај планинарката Калина Велеска, а еден час подоцна починал Александар Миновски. Времето на смртта е од извештајот за обдукција направен во солунскиот институт за судска медицина кој за Телма ги потврдил форензичарот Леонидас Мармалакис. -Миновски Александар, 10-ти февруари, околу 11 часот навечер. Тоа е заведено како време на смрт, истакнал Мармалакис, кој за времето на смртта на Калина рекол дека е истиот ден околу 10 (22) часот. Обдукцијата утврдила дека причина за смртта е смрзнување, потврдил форензичарот од судска медицина во Солун. Во грчкиот институт не одговориле на прашањата на телевизијата дали двајцата планинари имале други повреди и скршеници, бидејќи во полицискиот извештај кој го објави Телма во понеделник стоеше дека Александар бил најден во 22 часот во свесна состојба, а спасувачите се обиделе со ремен да го извлечат, но тој им паднал во подлабока бездна и не можеле да го пронајдат. Еден час по неуспешното спасување, Александар починал, утврдиле во солунската судска медицина.

ЦУК не се вклучил во потрагата бидејќи Калина и Александар биле на грчката страна на Кајмакчалан

Ивана Ефремовски — Wed, 21 Feb 2018 15:27:01 +0000

Центарот за управување со кризи формирал тимови за спасување на двајцата планинари, Калина Велевска и Александар Миновски, но тие не биле вклучени во потрагата бидејќи чекале од грчките колеги да ги известат дали планинарите ја ја поминале граничната линија на врвот на Кајмакчалан и се наоѓаат на македонска територија, дознава „Макфакс“. До Центарот за управување со кризи, „Макфакс“ испрати прашања, со барање на конкретни одговори за тоа во колку часот бил мобилизиран тимот на управата и колкумина биле вклучени во потрагата, дали тимот дејствувал на терен и какви мерки се преземи за пронаоѓање на сега починатите Калина и Александар, но тие не одговорија. Од таму кусо информираат дека првата дојава за настанот ја добиле во 03:50 часот изутрина, кога во битолскиот центар за управување со кризи пристигнала информација дека на планината Кајмакчалан, од грчка страна кај Лутраки, се изгубени две лица планинари на планинарското друштво „Трансферзалец“ – Скопје. „Веднаш е стапено во контакт со МВР, СВР Битола, Пограничната полиција, ДЗС – Битола, кои веќе биле запознати и подготвени да започнат потрага по изгубените лица“, велат од ЦУК за порталот.

Обвинителството ќе ја истражува смртта на Калина и Александар

Ивона Петрова — Mon, 19 Feb 2018 19:01:03 +0000

Македонското обвинителство отвора истрага за смртта на двајцата планинари кои загинаа на Кајмакчалан, дознава Макфакс. Според извори од обвинителството, се чекаат резултатите од обдукцискиот наод изготвен од Судската медицина во Солун, по што ќе бидат преземени потамошни истражни дејства. Од обвинителстово засега не откриваат кој се ќе биде сослушан во врска со трагедијата која се случи на Кајмакчалан, дали ќе бидат земени изјави од учесниците на двонеделната планинарска тура, водичите и организаторите од планинарското друштво „Трансверзалец“ од Скопје. „Се зависи од тоа кога ќе стигнат наодите од Грција“, велат од Јавното обвинителство. Истрага за случајот се води и од страна на грчките надлежни институции, кои соработваат со македонската полиција за разветлување на причините за трагедијата.

Федерацијата на планинарски спортови објави извештај што се случувало на Кајмакчалан

Ивона Петрова — Fri, 16 Feb 2018 14:25:48 +0000

Федерацијата на планинарски спортови објави детален извештај од командантот на тимот за брз одговор за заштита и спасување на планина при Дирекцијата за заштита и спасување за тоа што се случувало на Кајмакчалан каде што викендов младите планинари Калина Велевска и Александар Миновски ги загубија животите. Во продолжение го пренесуваме извшетајот интегрално: Хронологија на случувањата 10.02 2018 : 01 часот поагање на автобусот од Скопје.(мк време) 9 часот (грчко време )присигнување во ски центарот Ворас. 9,30 поаѓање на групата 10 часот враќање на I група планинари (23) 11 часот поделба на колоната на две групи 11,15 часот I-та група е на врвот 11,20 часот групата се враќа назад 11,30 средба на групата што се симнува со групата што се качува. Наредба да втората група го прекине искачувањето поради влошените временски услови и да се вратат заедно назад. Наредбата е издадена од водичот Зоран Костадинов лично на водичот на втората група. 11,35 часот двете групи почнуваат заедничко симнување кон ски – центарот освен 7 планинари кои се одвојуваат од групата и самоиницијативно продолжуват кон врвот, стигнуваат до маузолејот. Во тој момент е воспоставен радиоконтакт помеѓу водичот Зоран и Александар. Александар добива изричита наредба од Зоран да тргнат назад што побрзо. Пет члена од оваа група се сретнува со остатокот од групата и со водичот Зоран на 50 метри од контролната ски куќичка. Увидувајќи дека недостасуваат двајца планинари водичот придружуван со уште двајца планинари (Д.К. и Б.П) се враќаат назад кон врвот, пристигнуваат на врвот и ја пребаруваат околината обидувајќи се да воспостават радио контакт и телефонски контакт. Пребарувањето на тренот трае 30-40 минути. Под претпоставка дека двајцата планинари (К.В. и А.М.) се вратени назад, групата што ги пребарува се упатува надолу кон центарот. 13 часот групата која што пребарува пристигнува во ски центарот, констатира дека недостасуваат двајца планинари и ја алармира спасителната служба во центарот. 13,10 часот, два ратрака од центарот придружувани во едниот со водичот Зоран и во другиот со Дејан се упатуваат кон врвот по потрага. Ратракот придржуван со Дејан го пребарува теренот до 14,30. По нивното враќање во центарот Дејан воспоставува телефонски контакт со Калина и Александар, кои му кажуваат дека се добро и дека се под некоја карпа во заветрина. За ова по радиоврска од центарот е информиран ратракот во кој се наоѓа Зоран и почнува претрага на терен каде што се претпоставува дека има карпа. 17 часот потрагата со ратракот е прекината и тимот со Зоран се враќа во Ски центарот. Во меѓувреме 1 ратрак во кој е Дејан повторно трнува во потрага во обид да ги лоцира според остварениот контакт. Телефонски контакт помеѓу овој ратрак и Алексадар и Калина се одржува се до 19 часот. АНАЛИЗА И ИЗВЕШТАЈ ЗА ЗИМСКОТО ИСКАЧУВАЊЕ НА КАЈМАКЧАЛАН 2018 1. Терен и карактеристики на маршутата Појдовна точка: Скијачки центар Ворас (2070 мнв) – Грција Целна точка: врв Кајмакчалан (2520 мнв), маузоолеот и костурницата од I Светска војнa Завршна точка: Ски центар Ворас Карактеристики на теренот: Планираната маршута е на чист, непошумен терен со просечен нагиб од 25-30 степени што се зголемува до 35 степени на 400 метри пред врвот. Целиот трен е прекриен со снег кој е добро утапкан и чврст ( ски стаза што го олеснува движењето) Теренот е обезбеден со уредно поставени зимски маркации од левата и десната страна на ски стазата како и жичарата и столбовите кои можата да послужат како добра маркација. На 410 метри од врвот постои контролна куќичка од ски лифтот (види прилог топографска карта и google earth). 2. Просечни времетраење на искачувањето – 3-4 часа во зимски услови. 3. Метеореолошки услови (види извод од хидромереолошки завод): На самиот старт, временските услови биле релативно неповолни со ветер 30-40 м /сек. Температура од -9 степени целзиусови и магла со видливост од 100 -150м. Овие метереолошки услови се вообичаени и очекувани за периодот и локацијата на акцијата. Подоцна, метео-условите се влошуваат со ветер до 50 км на час и температура од -10 до -12 степени целзиусови и магла со видливост од 15 – 20 м. што веќе може да се смета за неповолни услови за зимско планинарење. 4. Целата група на местото на пристигнувањето брои 54 (пристигнати со автобус), плус 12 учесници (од Демир Хисар пристигнати со минибус) и плус две учесничи (странски државјани пристигнати со сопствени возило). По информација за временските услови на турата кон врвот појдуваат 63 планинари предупредени од водичот дека во зависност од временските услови искачувањето може да биде прекинато во било кој момент. На половина пат кон врвот 23 планинари се откажуваат од понатамошното искачување и се вракаат во ски центарот. Кон врвот продолжуваат колона од 40 планинари. На отприлика 600 м од врвот колоната се поделува на две групи: 22 планинари предводени од Зоран Костадинов одат први, а останатите од групата предводени од Калина Велевска ги следат на околу 100 -150 метри растојание. 5. Состав на групата: Водичи: два Искусни планинари: 28 Планинари: 6 планинари- почетници 4 6. Лична опрема на учесниците: 80% од учесниците се соодветно опремени за искачување во зимски услови, а 20% релативно добро опремени. 7. Средства за комуникација: Индивидуални мобилни телефони Радиоврска (токи-воки) 2 комада – на почетокот и крајот на колоната. 8. Опрема за ориентација: GPS, компас и топографска карта мобилните телефиони имааат апликација за GPS и локација. ПРЕТХОДНИ АКТИВНОСТИ 1. Организатор ДПС.„Трансверзалец“ ( 20 години традиција, 200 регистрирани членови, 6 лиценцирани водичи и 4 во постапка на лиценцирање). 2. Акцијата зимско искачување е најавена 45 дена пред реализацијата на facebook на друштвото со точно наведени напаствиjа за секој од учесниците.

Калина и Александар погребани во Скопје

Курир — Thu, 15 Feb 2018 11:37:18 +0000

Денеска на скопските гробишта се погребани посмртните останки на Калина Велеска и Александар Миноски, двајцата планинари кои трагично настрадаа на врвот Кајмакчалан минатиот викенд, објави Телма. Планинарскиот клуб Трансверзалец чии членови беа настраданите се обрати до јавноста преку социјалните мрежи во кои изразува жалење за изгубените животи и упати сочувство до семејствата на загинатите Калина и Александар. -Во врска со официјалниот извештај, Клубот ги достави сите потребни информации до соодветните институции и ќе излезе со изјава во петок по завршувањето на истрагата и објавување на извештајот, истакнуваат од клубот. Досега никој не ја понесе одговорноста за трагедијата. 26-годишната Калина Велеска и 36-годишниот Александар Миновски загинаа при турата на Кајмакчалан. Првичните информации се дека и покрај лошото време била одржана планинарската акција, а двајцата загинати не успеале да се вратат во планинарскиот дом. Се уште не се расветлени сите околности за смртта на двајцата млади, но, искусни планинари.