Алексеј Навални – Kurir.mk

Навални одбил да излезе на распит откако му биле одземени сите средства за пишување

Катерина Бојаџиева — Tue, 24 Oct 2023 05:47:15 +0000

Затворениот руски опозициски активист Алексеј Навални не учествувал на рочиштето на кое повторно му се суди во знак на протест поради тоа што затворските власти му ги одзеле сите средства за пишување, соопштија неговите соборци. Навални, кој во Русија веќе е осуден на 19-годишна затворска казна, требаше преку видео врска да присуствува на денешното судско рочиште, што е само едно од многуте против него додека се уште се наоѓа во притвор. Според неговиот соборец Иван Жданов, бидејќи Навални одбил да ја напушти ќелијата, „оперативците на обезбедувањето со шлемови го одвлекле кај истражителите затоа што се очекувало „денеска да има некаква истражна постапка“. Жданов не кажа кога Навални бил вратен во ќелијата и зошто му била одземена опремата за пишување. Рускиот независен информативен портал „Медиазона“ објави дека по одбивањето на Навални рочиштето било одложено за 2 ноември. Навални е најголемиот противник на рускиот претседател Владимир Путин и се бореше против корупцијата на функционерите, а беше и организатор на големи демонстрации против владата во Кремљ. Беше уапсен во 2021 година откако се врати од Германија во Москва, каде што беше спасен од труење со нервен агенс, за што Навални го обвини Кремљ. Оттогаш, тој е осуден на три затворски казни и со месеци е под постојан притисок и со месеци минати во самица за помали прекршувања на затворските прописи. Навални се наоѓа во специјалната „Казнена единица број 6“ во Владимирската област, источно од Москва, а се очекува да биде одведен во „Казнена единица со специјална безбедност“ со најстрог режим.

Руските истражители уапсија адвокат на Навални

Ивона Петрова — Fri, 13 Oct 2023 11:31:08 +0000

Руските истражители уапсија адвокат кој работел за затворениот руски опозициски лидер Алексеј Навални и ги пребарале домовите на уште двајца адвокати, соопштија денеска неговите соработници. Тие рекоа дека тројцата адвокати се под истрага поради сомневање дека припаѓаат на екстремистичка група и ги обвинија властите дека отвориле случај против нив со цел дополнително да го изолираат затворениот Навални. „Утринава се спроведуваат полициски рации во домовите на тројцата адвокати на Навални. Еден од нив е приведен, а ние не можеме да стигнеме до другите двајца“, објави помошничката на Навални, Марија Певчих на социјалната платформа Х. „Навални сега остана без никаква правна одбрана или застапување“, додаде таа. Со помош на своите адвокати, Навални (47) одржува активно присуство на социјалните мрежи и често поднесува тужби против третманот во казнената колонија во Владимирската област, источно од Москва, каде што е затворен. Тој наскоро треба да биде префрлен во колонија со „специјален режим“ откако беше прогласен за виновен во август за серија нови обвиненија поврзани со „екстремистички“ активности и осуден на дополнителни 19 години, покрај 11 и пол години кои веќе ги отслужува. Навални ги отфрла сите обвинувања како политички мотивирани и смислени да ги замолчат неговите критики кон претседателот Владимир Путин.

Рускиот апелационен суд ја потврди пресудата на Навални за екстремизам

Ивана Ефремовски — Tue, 26 Sep 2023 17:13:12 +0000

Рускиот апелационен суд ја потврди пресудата за екстремизам на опозицискиот лидер Алексеј Навални, отфрлајќи ги аргументите на одбраната кои се жалат на казната. Тоа значи дека Навални ќе биде испратен во затворска колонија со уште потешки услови, пренесоа светските агенции. -Судот ја разгледа жалбата на одбраната на Алексеј Навални и Даниел Холодни и одлучи да ја остави првостепената одлука непроменета, се вели во одлуката на судот, цитирана од руските медиуми. Времето што Навални веќе го помина во притвор ќе се брои како еден ден за еден ден. Расправата на жалбата се одржа зад затворени врати поради писмото испратено до судот од Министерството за внатрешни работи во кое се вели дека приврзаниците на Навални ќе направат провокации за време на судската седница. На новинарите им беше дозволено само за објавување на одлуката. Навални на судската седница учествуваше преку видео врска од казнената колонија. По одлуката на апелациониот суд, казната на Навални стапи на сила. Тоа значи дека тој наскоро ќе биде префрлен во колонија со посебен режим согласно одлуката на судот. Засега е во колонија со строг режим во село Мелехово, Владимирско. Во август оваа година, Московскиот градски суд го прогласи опозицискиот лидер за виновен за финансирање екстремизам, создавање екстремистичка заедница и повикување на екстремизам преку Интернет. Имајќи ги предвид досегашните пресуди и со делумен збир на казните, осуден е на 19 години затвор во колонија со посебен режим. Тој, исто така, беше казнет со 500 илјади рубли и забрана за користење на Интернет 10 години по неговото ослободување. Второобвинетиот во случајот, поранешниот технички директор на каналот на Јутјуб на Навални, Даниел Холодни, беше прогласен за виновен за финансирање екстремистичка активност користејќи ја својата службена положба и учество во екстремистичка заедница. Тој е осуден на 8 години затвор. (МИА)

САД ја осудуваат новата затворска казна од 19 години за Навални

Катерина Бојаџиева — Fri, 04 Aug 2023 18:29:50 +0000

САД денеска ја осудија одлуката на рускиот суд кој го осуди опозицискиот политичар Алексеј Навални на 19 години затвор. „Ова е неправеден крај на неправеден процес“, се вели во соопштението на Стејт департментот. Се додава дека Кремљ со години се обидува да го замолчи Навални и дека со новата процедура руските власти уште еднаш покажале дека оние кои се осмелуваат да го критикуваат режимот не можат да сметаат на правично судење. „Со години, Кремљ се обидуваше да го замолчи Навални и да спречи неговите повици за транспарентност и одговорност да стигнат до рускиот народ. Со спроведувањето на ова последно судење во тајност и ограничувањето на пристапот на неговите адвокати до наводните докази, руските власти уште еднаш ја илустрираа и неоснованоста на нивниот случај и недостатокот на правична постапка што им се овозможува на оние кои се осмелуваат да го критикуваат режимот“.

Борел бара итно ослободување на Навални

Ивона Петрова — Fri, 04 Aug 2023 16:39:54 +0000

Високиот претставник на Европска Унија за надворешна политика и безбедност, Жозеп Борел, денеска ги повика руските власти веднаш да го ослободат опозиционерот Алексеј Навални. Европска Унија повикува на негово итно и безусловно ослободување, напиша Борел на Твитер додавајќи оти новата пресуда против Навални е „политички мотивирана“. Рускиот суд денеска го осуди Алексеј Навални на дополнителни 19 години затвор поради екстремизам. Тоа е трета затворска казна и оваа е најдолга. Најжестокиот 47-годишниот критичар на рускиот претседател Владимир Путин веќе издржува 11-годишната затворска казна под обвинение за измама и други наводни злосторства, за кои тој тврди дека се исто така лажни. Неговото политичко движење претходно беше прогласено за нелегално и означено како „екстремистичко“ од страна на руските власти.

Навални доби уште 19 години затвор

Ивона Петрова — Fri, 04 Aug 2023 14:56:10 +0000

Рускиот суд го осуди Алексеј Навални на дополнителни 19 години затвор поради екстремизам. За Навални тоа е трета затворска казна и оваа е најдолга. Најжестокиот 47-годишниот критичар на рускиот претседател Владимир Путин веќе ја издржува 11-годишната затворска казна под обвинение за измама и други наводни злосторства, за кои тој тврди дека се исто така лажни. Неговото сопствено политичко движење претходно беше прогласено за нелегално и означено како „екстремистичко“ од страна на руските власти.

Навални: Наскоро ќе добијам уште една „сталинистичка“ казна

Ивона Петрова — Thu, 03 Aug 2023 13:35:05 +0000

Опозицискиот руски политичар Алексеј Навални денеска изјави дека очекува да биде осуден на сталинистичка казна од приближно уште 18 години затвор. Навални веќе отслужува неколку казни во вкупна вредност од повеќе од 11 години затвор под обвинение за измама и други прекршоци кои тој ги смета за лажни. Неговото политичко движење беше забрането и прогласено за екстремистичко. -Ќе ми биде изречена огромна казна, се нарекува сталинистичка казна. Побараа 20 години, па ќе ми дадат 18 или нешто слично, напиша Навални на Твитер. Тој, исто така, побара од луѓето да се солидаризираат со другите политички затвореници, велејќи дека главната цел на оваа казна е „заплашување“.

Навални во затвор не смее да употреби ДВА ЗБОРА, ако се обиде – следува жестока казна!

Дарко Андоновски — Tue, 01 Aug 2023 09:01:37 +0000

Опозицискиот руски политичар Алексеј Навални, кој се наоѓа во руски затвор во Сибир, поднесе тужба до Врховниот суд на Руската Федерација барајќи укинување на затворската одредба која им забранува на осудените во комуникација да користат „зборови и изрази прифатени во криминална средина“. Како што е објавено на социјалните мрежи на Навални, тој бил укорен од затворскиот персонал затоа што ги употребил зборовите „кров“ и „колиба“. Кога се обратил до администрацијата, тие му објасниле дека тие зборови се вклучени во „збирка жаргонски зборови и изрази што ги користат криминалните елементи“. Списокот на такви забранети зборови, за чија употреба се заканува казна, оваа затворска колонија ја добила во 1983 година од Министерството за внатрешни работи на СССР и оттогаш е тајна, пишува Медуза. Навални веќе поднел жалба до окружниот суд и по одбивањето подготвил жалба до Врховниот суд. Состанокот е закажан за 23 август во 14 часот. Алексеј Навални е еден од најголемите критичари на Кремљ и на рускиот претседател Владимир Путин. Тој е осуден на девет години затвор за измама и непочитување на судот, а од 2021 година е во казнена колонија во Сибир. Во моментов му се суди за екстремизам, а обвинителството бара 20-годишна затворска казна.

Обвинителите бараат 20 години затвор за Навални

Катерина Бојаџиева — Thu, 20 Jul 2023 19:15:45 +0000

Обвинителите во новиот судски процес против рускиот опозиционер Алексеј Навални бараат 20 години затвор. Судењето се одвива зад затворени врати, а на Навални му се суди за екстремизам. Според соработниците на Навални, пресудата ќе биде изречена на 4 август, според која опозиционерот треба казната да ја отслужи во колонија со специјален режим. Тие исто така тврдат дека Навални на денешното рочиште ја осудил „глупавата и неразумна“ војна на Русија во Украина. Навални (46) отслужува деветгодишна затворска казна откако е осуден за измама и непочитување на судот. Тој беше уапсен во јануари 2021 година, откако се врати во Москва од Германија, каде што се лекуваше од труење со нервен агенс. Навални се соочува со седум нови обвиненија, вклучително и формирање и финансирање на екстремистичка организација и рехабилитација на нацистичката идеологија. Критичарот на Кремљ ги отфрла обвинувањата како политички и го обвинува Кремљ дека сака да го осуди на доживотен затвор. Новите обвиненија се однесуваат на активностите на антикорупциската фондација на Навални и изјавите на неговите главни соработници.

Навални: Веќе 100 дена пред ќелијата ми пуштаат ист говор на Путин

Ивона Петрова — Fri, 14 Jul 2023 06:55:16 +0000

Најпознатиот руски критичар на власта на Путин, опозиционер и затвореник, Алексеј Навални, се пожали дека бил принуден да го слуша истиот говор од рускиот претседател повеќе од 100 дена по ред. Станува збор за говорот на Путин од февруари годинава, во траење од 1,46 час, а се пушта секој ден пред ќелијата на Навални, пишува Скај Њуз. Одбележувајќи го 100-от ден од емитувањето на говорот на Путин, Навални соопшти дека му било кажано дека ќе мора да го слуша говорот цела 2023 година. „Кога Путин ќе го одржи своето следно годишно обраќање, и тоа ќе почнат да ни го пуштаат“, рече тој. Во годинашното обраќање пред Федералното собрание во Москва, Путин кажа дека „специјалната воена операција“, како што Русија ја нарекува војната во Украина, била спроведена со цел „да се елиминира заканата од неонацистичкиот режим“. Во таа прилика Путин нагласи дека Русија направила „се што можела“ за да ги реши разликите „по мирен пат“ и го обвини Западот дека ја подготвува Украина за „голема војна“, со снабдувањето со оружје. Навални во моментов отслужува вкупно 11 и пол години затвор, но се соочува и со нови обвиненија за создавање екстремистичка организација. Доколку биде прогласен за виновен во новиот случај против него, може да биде осуден на затворска казна до 30 години.