Алексеј Резников – Kurir.mk

Резников: Војната може да трае долго, ќе имаме болни загуби, но на крајот ќе победиме

Ивана Ефремовски — Tue, 22 Aug 2023 14:58:20 +0000

Украинскиот министер за одбрана Алексеј Резников денеска изјави дека војната со Русија може да трае долго и со болни загуби за украинската страна, но дека Украина дефинитивно ќе победи. -Имаме многу подмолен непријател. Војната може да биде долга, бидејќи е вистински маратон. Допрва ќе имаме болни загуби. За да ги победиме Русите и да не го пренесеме овој проблем на идните генерации, мора да разбереме дека главната работа е набавката на оружје, нагласи министерот говорејќи на „VI Меѓународен форум на ветерани“, пренесе ТСН. Според него, победата не е поврзана само со деокупација на територијата, туку, како што наведе, важно е да се направи се што е можно за окупаторите никогаш да не помислат да се вратат. -Меѓутоа, тоа е тешка задача. Многу луѓе во светот сè уште веруваат дека тоа е невозможно. Меѓутоа, Украинците веќе докажаа дека имаат поинаква идеја за тоа што е можно, а што е невозможно, така што ние сигурно ќе победиме, рече украинскиот министер за одбрана. Резников кажа дека ако минатата година на Украина и требаше оружје за да преживее, сега клучот за победата на Украина е „она што луѓето го чувствуваат“ - единство и подготвеност за борба“. (МИА)

Резников за Си-ен-ен: Ќе продолжиме со напади врз мостот Керч и Крим, како легитимни цели

Ивана Ефремовски — Tue, 25 Jul 2023 15:29:48 +0000

Украинскиот министер за одбрана Алексеј Резников денеска изјави дека Украина ќе продолжи со нападите кон привремено окупираниот Крим и на мостот Керч. Во интервју за Си-Ен-Ен, тој кажа дека „сите овие цели се легитимни“, бидејќи нивното гранатирање ќе ја намали способноста на Русите да се борат против Украина и ќе помогне да се спасат животите на Украинците, пренесуваат украинските медиуми. „Нормална тактика е да ги уништите логистичките линии на вашиот непријател за да ги спречите да добијат повеќе муниција, гориво, храна и слично. Затоа ќе ја користиме оваа тактика против нив“, рече Резников на прашањето дали целта на Украина е трајно да го оневозможи мостот. Зборувајќи за тоа дали Украина планира да нападне руски бродови во Црното Море како одговор, Резников рече дека Украина има потенцијал. „Имаме оружје, како што беше случајот со крстосувачот „Москва“, и ако ни се закануваат во Црното Море, ќе мора да одговориме“, рече тој. (МИА)

Резников: Формирана коалиција од 11 земји за обука на пилоти на Ф-16

Ивона Петрова — Tue, 11 Jul 2023 18:52:20 +0000

Украинскиот министер за одбрана Алексеј Резников денеска објави формирање на коалиција од 11 нации за обука на своите пилоти во борбени авиони Ф-16. -Формирана е коалицијата за обука на Ф-16 за украинските воздухопловни сили! Денеска 11 земји партнери и Украина потпишаа меморандум, напиша Резников на Твитер. Во оваа коалиција влегуваат Велика Британија, Канада и европските земји.

Резников: Украинските војници ќе се обучуваат на тенкови „Леопард 2“

Ивона Петрова — Sat, 21 Jan 2023 09:56:00 +0000

Украинскиот министер за одбрана Алексеј Резников изјави дека украинските сили ќе се обучуваат за употреба на борбени тенкови Леопард 2, и покрај тоа што западните сојузници вчера не одлучија дали да го снабдуваат Киев со тенкови од германско производство. Резников во изјава за украинскиот сервис на Гласот на Америка нагласи дека украинските војници ќе тренираат на такви тенкови во Полска. „Државите кои веќе имаат тенкови Леопард можат да почнат програма за обука на нашите тенковски единици. Се надевам дека Германија ќе го следи нивниот процес, ќе спроведе внатрешни консултации и ќе донесе одлука за испорака на тенковите. Јас сум оптимист за тоа бидејќи првиот чекор е направен. Ќе почнеме со програмите на „Леопард 2“, рече Резников. Американскиот министер за одбрана Лојд Остин и началникот на Генералштабот на американската армија Марк Мили за време на брифингот во американската воздухопловна база Рамштајн во Германија изјавија дека Германија во овој момент нема да испорача тенкови Леопард 2 на Украина.

Резников: Во Украина пристигна нова пратка оружје од Велика Британија

Ивона Петрова — Fri, 12 Aug 2022 09:17:30 +0000

Во Украина пристигна нова пратка оружје од Велика Британија, соопшти денеска украинскиот министер за одбрана Олексиј Резников. – Во Украина пристигнаа ракетни фрлачи М270, појасни тој. Резников на Твитер им се заблагодари на британскиот министер за одбрана, Бен Волас, како и на британските граѓани за претходно ветената донација. – Вашата поддршка е многу важна за Украина. Нашата војска вешто ќе ја користи оваа „замена“ на бојното поле, додаде министерот.

Украина: Американските ракетни системи „ХИМАРС“ пристигнаа во земјата

Ивана Ефремовски — Thu, 23 Jun 2022 13:20:29 +0000

Украинскиот министер за одбрана Алексеј Резников денеска соопшти дека во таа земја пристигнале американски артилериски ракетни системи (ХИМАРС). „Благодарност до мојот американски колега и пријател, секретарот за одбрана Лојд Остин, за овие моќни системи. Летото ќе биде жешко за руските окупатори. И последно за некои од нив“, објави Резников на Твитер. Според британски медиуми, украинскиот министер за одбрана не навел како артилериските ракетни системи пристигнале во земјата. (МИА)

Резников: Русија спроведува државен тероризам во Украина

Ивана Ефремовски — Mon, 21 Mar 2022 15:55:48 +0000

Русија спроведува државен тероризам во Украина и ќе продолжи да напаѓа други земји, изјави денеска украинскиот министер за одбрана Алексеј Резников во Лондон. Зборувајќи со британскиот министер за одбрана Бен Валас за време на посетата на Лондон, Резников кажа дека од почетокот на руската воена операција загинале 150 украински деца, уништени се повеќе од 400 училишта и градинки и повеќе од 110 болници, пренесоа британските медиуми. -Ова е државен тероризам. Затоа Кремљ мора да се запре, бидејќи ќе оди понатаму. Тие ќе нападнат и други земји, рече Резников. Според британските медиуми, украинскиот министер за одбрана не презентирал никаков доказ во прилог на неговото тврдење. (МИА)

Резников: Во руските акции убиени 38 и повредени над 70 деца

Ивона Петрова — Tue, 08 Mar 2022 13:39:24 +0000

Украинскиот министер за одбрана Алексеј Резников денеска изјави дека во руските воени акции убиени се 38 и повредени над 70 деца, според најновите проценки на жртви и штети. Во видео обраќање, Резников изјави дека има најмалку 400 цивилни жртви и 800 повредени, иако податоците се нецелосни. Резников, изјави дека во руските напади се уништени повеќе од 200 украински училишта, 34 болници и 1.500 станбени згради. Според неговите проценки, околу 10 илјади странски студенти, од Индија, Кина и Персискиот залив, се заробени во борбите. Резников, тврди дека украинските сили убиле над 11 илјади руски војници. -Руските освојувачи пукаат врз хуманитарните коридори низ кои се обидуваат да побегнат цивилите, изјави Резников, без да прецизира каде се случува тоа.