алмир алиу – Kurir.mk

Нема одложување на казната: Бобан Илиќ, кој го прегази малиот Алмир, мора веднаш во затвор

Ивана Ефремовски — Mon, 01 Mar 2021 17:17:46 +0000

Основниот суд Куманово ја уважи жалбата на кумановското Обвинителство изјавена против решение на судија за извршување на кривични санкции, донесено на 19 февруари 2021 година, со кое на осудениот Б.И. од Куманово му се одобри барањето за одлагање на почетокот за извршување на казната затвор, соопштија од ОЈО Куманово. -Имено, Обвинителството незадоволно од донесеното решение, поднесе Жалба на 22 јануари 2021 година, со која побара кривичниот совет при Основниот суд Куманово да го преиначи решението во насока осудениот веднаш да ја извршува досудената казна. Казната затвор во траење од 4 години, по поднесено обвинение на кумановското обвинителство и судска постапка, на осудениот му беше изречена од Апелациониот суд, а за сторено кривично дело – Тешко дело против безбедноста на луѓето и имотот во сообраќајот од член 300 став 2 во врска со член 297 став 1 од Кривичниот законик. Осудениот го стори кривичното дело на 25 јуни 2016 кога со автомобил му нанесе тешки телесни повреди со смртна последица на четиригодишниот Алмир Алиу од Куманово, информираа од кумановското Обвинителство. Одлучувајќи по поднесената жалба од Обвинителството, Основниот суд Куманово донесе Решение со кое го преиначи решението на судијата за извршување на кривични санкции и осудениот го задолжи веднаш по приемот на одлуката да се јави во казнено – поправна установа за да започне со издржување на затворската казна. (МИА)

Случајот за малиот Алмир Алиу вратен на повторно судење

Ивона Петрова — Tue, 08 Jan 2019 11:11:29 +0000

Кривичниот совет на Апелацискиот суд Скопје го поништил предметот во случајот на смртта на четиригодишниот кумановец Алмир Алиу и го вратил на повторно судење, потврди за „Порталб.мк“, адвокатот Асмир Алиспахиќ. – Сè уште ја немаме добиено одлуката од Апелацискиот суд за да видиме зошто судењето е поништено. Бидејќи предметот се враќа во Основниот суд во Куманово, Судот е должен да закаже седница за главната расправа – вели Алиспахиќ за „Порталб.мк“. Во јули 2016 година Алмир, беше прегазен со возило од Илиќ, бидејќи претходно таткото на детето и Илиќ имале банална караница во амбуланта.

Се очекува пресуда за случајот со смртта на четиригодишниот Алмир

Ивана Ефремовски — Thu, 05 Apr 2018 07:57:21 +0000

Денеска треба да биде изречена пресудата за обвинетиот во случајот за прегазувањето на четиригодишниот Алмир Алиу од Куманово, откако пред неколку дена во кумановскиот суд беа дадени завршните зборови. Обвинетиот Бобан Илиќ, кој се товари за „тешко дело против безбедноста на луѓето и имотот во сообраќајот“, во врска со смртта на Алмир, рече дека не се чувствува виновен. Илиќ изрази жалење за смртта на малиот Алмир, но рече дека е невин. Неговиот адвокат побара ослободителна пресуда и рече дека делото не го извршил со умисла. Тој се повика на невропсихијатриското и сообраќајно-техничкото вештачење и видео записот, нагласувајќи дека Илиќ бил вовлечен во конфликтна ситуација од која се обидел да излезе.

Пресврт во судењето: Наместо за убиство на Алмир, обвинетиот ќе одговара за сообраќајка

Ивана Ефремовски — Thu, 15 Mar 2018 14:28:04 +0000

Kумановецот Бобан Илиќ, наместо за убиство со умисла на четиригодишниот Алмир Алиу, ќе одговара за тешки дела против безбедноста на луѓето и имотот во сообраќајот, откако ОЈО го прекфалифицираше делото. По денешното рочиште во Основен суд Куманово, Илиќ беше ослободен од притвор. Обвинителката во завршните зборови го преквалификуваше делото, а како причина посочи дека кога било покренато првичното обвинение за убиство со умисла, доцнеле психијатриското и техничко-сообраќајното вештачење. - Пред да се случи прегазувањето на малиот Алмир, што се гледа на снимката објавена во јавноста, Бобан Илиќ и неговите брат и девојка биле физички нападнати при што им бил оштетен автомобилот, но тој дел од снимката не бил објавен. Девојката која била со двајцата браќа, се јавила и во полиција за да побара помош, рекла обвинителката. Четиригодишниот Алмир Алиу беше прегазен пред Здравствениот дом во Куманово на 25 јуни 2016 година. За истиот настан од пред Здравствениот дом во Куманово се води и друг случај, против три други лица (таткото на детето Седат Алиу, Сами Демири и Абдула Алиу) и поднесено е обвинение за сторено кривично дело насилство.