Алсат-М – Kurir.mk

ССНМ бара стриктна примена на Казнениот законик за напаѓачот врз екипата на Алсат М

Ивана Ефремовски — Mon, 21 Aug 2023 18:56:41 +0000

Самостојниот синдикат на новинари и медиумски работници најостро го осудува денешниот напад врз телевизиската екипа на Алсат М додека снимала во Старата чаршија во Скопје. Соопштението на ССНМ го пренесуваме во продолжение: Нападот врз две новинарки и снимателот од Алсат М додека извршувале работна задача ССНМ го смета за напад и закана врз сите новинари и медиумски работници во земјава за нивно слободно и непречено информирање на јавноста. Дополнително, нападот не бил само вербален туку и физички при што снимателот на Алсат М се здобил и со телесни повреди што за ССНМ ова е еклатантен пример за примена на Кривичниот законик според кој напад врз новинар за време на извршување на работни задачи ќе се третира како напад врз службено лице и соодветно ќе се казни. ССНМ во тој контекст ја поздравува брзата реакција на МВР за идентификување и приведување на напаѓачот, но бара целиот случај да има и своја судска завршница и бара од надлежните институции да постапат понатаму во случајот. ССНМ е на став дека само со брзо постапување на институциите по ваквите случаи и соодветно казнување на сторителите може да се стави крај на, се позачестените, како вербални, така и физички напади врз новинарите и да се промени праксата на неказнивост на сторителите. ССНМ освен што ги повикува институциите брзо да реагираат на ваквите напади, истовремено ги охрабрува сите колеги да пријавуваат вакви и слични случаи до надлежните институции и до новинарските организации бидејќи само така ќе може да се подобри севкупната безбедност на медиумските работници.

Алсат дознава дека е донесена одлука за ослободување на Морина

Дарко Андоновски — Mon, 12 Aug 2019 11:38:03 +0000

Алсат дознава дека е донесена одлука за ослободување на Морина Телевизија Алсат-м дознава дека е донесена одлука за ослободување на Морина, стои во нивната кратка вест објавена на нивниот сајт.

Османи: Загрижени сме за назначувањето на Еролд Муслиу

Дарко Андоновски — Thu, 23 May 2019 08:31:37 +0000

Вицепремиерот Бујар Османи во врска со назначувањето на Еролд Муслиу на чело на Агенцијата за разузнавање за Алсат М изјави: -Вчерашната одлука на претседателот не вознемири сите. Мислиме дека тоа беше одлука донесена од недостаток на информации, рече Османи. Османи додаде дека се додека не се расчисти во целост случајот Куманово, опфатените лица не можат да заземат клучни позиции во институциите. Тој се надева дека претседателот ќе го разгледа уште еднаш изборот на Муслиу, за кој верува дека не го направил тоа за други цели.

Инаку вчера и весникот Лајм објави дека „Пендаровски му ја зададе првата „шлаканица“ на ДУИ, десет дена по преземањето на функцијата“.

Именувањето на Еролд Муслиу за директор на Агенцијата за разузнавање се смета за силна „шлаканица” од страна на претседателот Стево Пендаровски за ДУИ, велат партиски извори за весникот Лајм. Тие потсетија дека Муслиу бил споменуван во 2011 година како потенцијален кандидат за директор, кога претседател беше Ѓорге Иванов, но тогаш силно реагираше ДУИ, оценувајќи го како несоодветен кадар. Но, сега Иванов веќе не е претседател и очигледно влијанието на ДУИ во претседателството е многу послабо. Подолу може да се прочита реакцијата на ДУИ од 2011 година против Еролд Муслиу. Весникот Лајм се обиде да ги контактира, но од ДУИ засега нема некаква реакција во врска со назначувањето на Мусли како директор на Агенцијата за разузнавање. „Високи извори во ДУИ денес за Алсат-М изјавија дека со сите сили ќе се спротивстават на евентуалната намера на претседателот за на чело на Агенцијата за разузнавање да го постави Еролд Муслиу. Според партијата на Ахмети на оваа позиција треба да биде именувана личност која има кредибилитет а не личности како Еролд Муслиу. „Актуелниот директор на Агенцијата за разузнавање има уште две ипол години мандат и нема никаква процедура за негово разрешување и назначување на некое друго лице. Ако евентуално дојде до промена на директорот на Агенцијата, воопшто неможе да стане збор за директор на оваа институција да биде Еролд Муслиу. Таму треба да биде назначен некој со кредибилитет а не некој кој учествувал во фалсификување на досијеа или производство на фалсификувани документи“.

Пендаровски: Немам повеќе нерви да се занимавам со политика ако моите тези овој пат не поминат

Дарко Андоновски — Wed, 17 Apr 2019 20:59:57 +0000

Ако не успеам овој пат ќе се повлечам, немам повеќе нерви да се занимавам со политика ако моите тези овој пат не поминат, рече Стево Пендаровски кој беше дел од дебатата на телевизија Алсат М. -Но доколку ме изберат едвај чекам како претседател полицијата да ме казни, зошто тоа ќе биде преседан, рече Пендаровски.

Силјановска: Според Преспанскиот договор ќе треба да избришеме од историските учебници дека Македонците се бореле во граѓанската војна во Грција!

Дарко Андоновски — Wed, 17 Apr 2019 20:42:03 +0000

Професорката Гордана Силјановска Давкова на претседателската дебатата на Алсат телевизија истакна дека според Преспанскиот договор ќе треба да избришеме од историските учебници дека Македонците се бореле во граѓанската воја во Грција. Таа посочи дека истото ќе важи и за Албанците кои се бореле од страната на ДАГ, а како што Македонците нема да смеат да ги употребуваат македонските топоними во Грција ниту Албанците ќе смеат да ги употребуваат своите. -Ако знаете многу албански имиња се Епир. Едно од барањата на грчкото министерство за надворешни работи е да се тргне и тоа. Исто така има проблем и со именувањата во Грција во делот што е познат како Чемерија. Исто така она што не смееме повеќе да го употребуваме, само Тесалоники, не Солун важи и за албанскиот јазик. Како се вика на албански Солун. Селаник, значи и тоа ќе биде забрането. Исто така се бара од историските читанки да се тргне дека и Албанците и Македонците учествувале во ДАГ, а учествувале. Според тоа времето ќе покажи дека има проблем, вели Силјановска.

Алсат-М: Беса и Алијансата го поддржуваат Река како претседателски кандидат

Дарко Андоновски — Thu, 28 Feb 2019 12:43:40 +0000

Откако професорот Блерим Река денеска преку социјалната мрежа Фејсбук ја потврди својата кандидатура како независен кандидат за претстојните претседателски избори во Република Северна Македонија, Движењето Беса и Алијансата за Албанците соопштија дека ја поддржуваат кандидатурата на проф. Д-р Блерим Река за претседател на државата. Според нив, неговото богато академско и дипломатско искуство само ќе ја зајакне функцијата на претседател на државата. -Како опозициски партии, сметаме дека претседателските избори во земјата немаат значење без албански кандидат, бидејќи во спротивно Албанците би биле сведени само на гласачи кои гласаат, но не и субјект за кој треба да се гласа. Од принципиелни причини, ја поддржуваме кандидатурата за претседател на професорот Река, се вели во соопштението на Движењето Беса.

Мицкоски: Врз Груевски се води видлив политички прогон

Дарко Андоновски — Thu, 01 Nov 2018 21:04:27 +0000

Пред неколку дена имав средба со Никола Груевски. Разговаравме за ова што му се случува за политичкиот прогон на кој е изложен, јас како актуелен претседател на ВМРО-ДПМНЕ, а тој како почесен претседател имаме заедничка тема не само за партиското функционирање, туку и за личните моменти, рече претседателот на ВМРО-ДПМНЕ, Христијан Мицкоски гостувајќи на телевизија Алсат-М, а говорејќи за тоа дали имал средба со почесниот претседател на партијата, Груевски. Мицкоски укажа и дека иако подолго време немале комуникација сакал да се сретне зошто сакал да ги види сите детали што се поврзани со политичкиот прогон врз него. -Разговараме, додаде Мицкоски, и за политиките во изминатиот период.

Мицкоски: ВМРО-ДПМНЕ е расадник на кадри, а времето покажува дека без секого се може

Дарко Андоновски — Thu, 01 Nov 2018 20:14:28 +0000

Во гостувањето во емисијата „Патот кон“ на Алсат телевизија, претседателот на ВМРО-ДПМНЕ, Христијан Мицкоски во врска со најновите оставки во рамките на партијата вели дека веднаш на местата на Даниела Рангелова и Лука Кржаловски се назначени в.д. претседатели на УЖ и УМС на ВМРО-ДПМНЕ. Тој посочи дека во деновите кои престојат ќе биде реформирана структурата на тие две партиски структури, а се очекува и да се распише конкурс за пополнување на овие 2 места. -Со ова покажуваме дека ВМРО-ДПМНЕ располага со кадровски потенцијал кој што секогаш е на располагање на партијата и уште еднаш ја потврдуваме тезата дека ВМРО-ПДМНЕ била, е и ќе остане расадник на кадри во иднина но исто така и тезата дека без секого се може рече, Мицкоски.

Албанците со уставните измени ќе бараат и официјален албански јазик и државотворен статус

Дарко Андоновски — Fri, 14 Sep 2018 11:54:59 +0000

Во дебата на тема референдумот и Албанците, во емисијата “Патот кон“ на Алсат-м телевизија, соговорниците припадници на албанската етничка заедница, едногласно се изјаснија дека Албанците во Македонија ќе дадат се од себе референдумот да успее, но за возврат со уставните измени кои следат да добијат официјално службен албански јазик и државотворен уставно-правен статус. Веби Џемаили, познат по своите контроверзни изјави во однос на македонската историја, смета дека првин треба да почекаат успешно да помине референдумот и после тоа да се инсистира на целосна рамноправност меѓу Албанците и Македонците. - Мислам дека треба првин да чекаме да помине оваа прва фаза која е загрозена. Да го поминеме јазот а потоа треба да седнеме на сосема рамноправен начин и многу искрено да го штитиме нашиот дигнитет во државата. Бидејќи ние денеска, гледам и Илир Мета и другите велат дека Албанците се државотворни. Тоа само во сон. Државата е нивна. Ако сега сојде до уставни измени, Албанците мора да бидат еднакви со Македонците во државата бидејќи се двата основни столба на оваа држава. Ние сега ќе дадеме се од себе за да помине договорот, но, потоа треба со инсистирање да бараме еднаш засекогаш да се постигне целосна рамноправност меѓу Албанците и Македонците во оваа заедничка држава, рече Џемаили. Додека пак, претседателот на Организацијата на воените ветерани, Бесим Хода, истакна дека албанските политички партии наместо да го рекламираат Заев по албанските населени места, треба да се врата на политичката платформа во јавноста позната како Тиранска Платформа, и на средбите кои ги прават со граѓаните за референдумот да им гарантираат, дека после заедно ќе инсистираат за албанскиот јазик и за статусот на Албанците за државотворен народ. - Јас мислам дека албанските политички партии наместо еден месец да излегуваат и да шетаат со Премиерот по албанските населени места за да го рекламираат, требаше да се вратат во единствената победа во овие 20 години демократија во Македонија, во политичката платформа која ја потпишаа за координација кај Албанците и во овој еден месец на средбите што ќе ги прават ЗА референдумот на Албанците да им гарантираат дека после ова тие заедно ќе седнат и ќе бараат официјализирање на албанскиот јазик и да инсистираат на тоа, Албанците покрај Македонците да бидат државотворен народ. ова треба да го направат сега, бидејќи ќе излезат пред граѓаните и треба да кажат нешто. За референдумот се знае, Албанците го кажале своето и нема потреба некој да им каже, рече Хода. Учесниците на дебатата исто така едногласно истакнаа дека не само што ќе излезат да гласаат, туку и дека ќе се обидат да убедат многу други да го направат истото и да гласаат ЗА на раферендумот на 30-ти септември.

Мицкоски: Новиот статут кој се подготвува ќе допринесе за поголема демократизација и отчетност како наш двигател

Матеја Петровски — Sat, 18 Aug 2018 14:36:16 +0000

Претседателот на ВМРО-ДПМНЕ, Христијан Мицкоски денеска во интервју за Алсат М телевизија, зборуваше околу новиот статут на ВМРО-ДПМНЕ. -Ние немаме што да криеме, тоа е уште еден доказ дека третата генерација политичари во ВМРО-ДПМНЕ, сака да ја освои јавноста со својата отвореност, отчетност и демократизација, што впрочем и е наш водечки двигател во целото ова постоење како ВМРО-ДПМНЕ, изјави Мицкоски. Мицкоски зборуваше и за новиот институт во партијата, претседавач на Извршниот комитет, за што кажа дека таму има пропишана постапка како тој се предлага и избира. -Никаде не вели дека претседателот на партијата не треба и не смее да биде предложен од група членови на Централниот комитет, а понатаму нормално избран со мнозинството на гласовите на членовите на ЦК, изјави Мицкоски.