Американски сенатори – Kurir.mk

Американските сенатори повторно предлагаат закон – ниту еден претседател да не може да ги повлече САД од НАТО

Тале Кристо — Wed, 12 Jul 2023 16:11:29 +0000

Во овие два дена на оддржување на самиот на НАТО во Вилнус, американски сенатори и од Демократската и од Републиканската партија ги обновија напорите да спречат кој било американски претседател да ги повлече САД од Алијансата. Заедничката резолуција, до која увид имале британските медиуми, е нов обид на Конгресот да осигура дека ниту еден американски претседател нема да може да го напушти НАТО без да добие одобрение од Сенатот. „Претседателот нема да ги суспендира, укине, откаже или повлече САД од Северноатлантскиот договор потпишан во Вашингтон на 4 април 1949 година, освен со одобрение од двотретинско мнозинство во Сенатот“, се наведува во резолуцијата. Законот во изминатите години беше предложуван неколку пати, вклучително и за време на мандатот на Доналд Трамп, кој јавно кажа дека САД треба да го напуштат НАТО. Актуелниот претседател Џо Бајден е голем поддржувач на Алијансата, особено во околностите на руската агресија врз Украина. Се очекува тој денеска да зборува за единството меѓу сојузниците на самитот во Вилнус.

САД: Сенаторите бараат Русија да биде прогласена за „спонзор на тероризмот“

Тале Кристо — Thu, 28 Jul 2022 13:20:33 +0000

Американскиот Сенат, Горниот дом на Конгресот, едногласно ја одобри необврзувачката резолуција со која се повикува американскиот државен секретар Ентони Блинкен да ја прогласи Русија за „држава спонзор на тероризмот“ поради нејзините акции во Украина, Чеченија, Грузија и Сирија, пренесува Њујорк тајмс. Во резолуцијата, усвоена во средата, се тврди дека „вооружените сили на Руската Федерација извршиле бројни погубувања на невини цивили и се обиделе да ги прикријат злосторствата на масовните гробници низ Украина“. Претставничкиот дом, долниот дом на Конгресот, претходно донесе слична мерка, но само Стејт департментот има овластување да определи земја за спонзор на тероризмот. Сепак, со усвојувањето на резолуцијата во Сенатот се врши дополнителен притисок врз конгресмените на администрацијата на американскиот претседател Џо Бајден да ја додадат Русија на листата на држави спонзори на тероризмот, во која веќе се Куба, Северна Кореја, Иран и Сирија.

Американски сенатори со писмо бараат од Бајден да протера 300 руски дипломати од САД

Тале Кристо — Tue, 05 Oct 2021 19:20:34 +0000

Американските сенатори со писмо го повикаа претседателот Џо Бајден да протера 300 руски дипломати од САД, доколку Москва не издаде повеќе визи за американските дипломати во Русија. Предлогот на лидерите на Комисијата за надворешни работи и разузнавање на Сенатот, демократите Боб Менендез и Марк Ворнер и републиканците Џим Риш и Марк Руби, може да биде вовед за поостра ескалација на актуелниот спор меѓу персоналот на амбасадите, во време на тензии меѓу Вашингтон и Москва. Русија во август и забрани на американската амбасада во Москва да задржува, вработува персонал од трета земја, освен чувари, принудувајќи ја мисијата да отпушти 182 вработени и десетици соработници, соопшти Стејт департментот. Тоа практично значи дека во Русија сега има околу 100 американски дипломатски претставници, наспроти околу 400 руски дипломати кои се распоредени низ САД, посочија сенаторите. „Оваа диспропорција во дипломатското претставување е неприфатлива“, напишаа сенаторите во писмото до претседателот Бајден.

Американски сенатори бараат Амазон да ги повлече од продажба опасните производи

Магдалена Андонова — Sun, 13 Sep 2020 08:20:03 +0000

Тројца американски демократски сенатори побараа повлекување на сите опасни производи од продажната платформа на Амазон, откако Си Ен Ен ги објави резултатите од истрагата, која покажа дека десетици електронски производи на Амазон остануваат во продажба, и покрај поплаките на клиентите дека се стопиле, експлодирале или запалиле. Во писмо до сопственикот на Амазон, Џеф Безос, сенаторите Ричард Блументал од Конектикат, Роберт Мендез од Њу Џерси и Ед Марки од Масачусетс напишаа дека извештајот на Си Ен Ен покажува дека продавачот ги игнорира сериозните грижи на клиентите за одредени електронски уреди. „Амазон мора веднаш да ја прекине продажбата на опасни и неисправни основни производи на Амазон, да ги повлече и веднаш да ги информира клиентите за потенцијалните ризици“, напишаа демократските сенатори во писмото. Амазон не одговори директно на загриженоста на сенаторите, но од оваа компанија рекоа дека „безбедноста е на прво место“ и дека нивните производи ги исполнуваат сите безбедносни стандарди, јави Си Ен Ен. (MИА)

Американски сенатори бараат да се блокира повлекувањето на војниците од Германија

Тале Кристо — Tue, 30 Jun 2020 11:42:58 +0000

Двопартиска група од американски сенатори соопшти дека ќе преземе активности за да го спречи претседателот на САД Доналд Трамп да ги повлече војниците од Германија. Шестмина сенатори, вклучувајќи ги и влијателните републиканци Линдзи Грахам и Марко Рубио, изјавија дека планираат да го изменат законот за трошоците за одбрана, со цел да се ограничи употребата на средства за намалување на војниците во Германија. – Во време кога САД и нашите европски сојузници треба да продолжат да дејствуваат заедно за да ги спречат злонамерните влијанија, во наш национален интерес, како и во интерес на нашите сојузници и партнери, е да го продолжиме нашето присуство во Германија, изјави сенаторот Рубио. Во меѓувреме, поранешниот републикански кандидат за претседател на САД, Мит Ромни напиша на Твитер дека повлекувањето би претставувало подарок за Москва. – Повлекувањето на американската војска од Германија ќе биде подарок за Русија. Тоа е последното нешто што треба да го направиме. На овој начин се загрозува американската национална безбедност и се поткопува НАТО, напиша Ромни. Трамп претходно овој месец објави дека САД ќе го намалат бројот на распоредените војници во Германија до 25.000. Тој го обвини Берлин дека не ги исполнува своите финансиски обврски кон НАТО. Американскиот претседател истакна дека ќе премести дел од војниците од Германија во Полска. Овој потег беше критикуван од германски министри, меѓу кои и министерката за одбрана Анегрет Крамп-Каренбауер и министерот за надворешни работи, Хајко Мас.

Американски сенатори: Саудискиот принц го нареди убиството на Кашоги

Ивона Петрова — Wed, 05 Dec 2018 07:08:09 +0000

Двајца американски сенатори изјавија дека „нема сомнеж“ дека саудискиот престолонаследник го наредил убиството на новинарот Џамал Кашоги, откако добиле информациии на состанок зад затворени врати за заклучоците на Централната разузнавачка агенција (ЦИА). Таквиот став е спротивен на на тврдењето на Трамп, кој неодамна изјави дека ЦИА „сигурно не нашла апсолутно ништо“ за поврзаноста на Мухамед бин Салман со убиството на Кашоги. – Нема никаков сомнеж дека принцот престолонаследник Мухамед бин Салман го нареди убиството и оти беше известен за текот на настаните, изјави Боб Коркер по синоќешниот состанок со директорката на ЦИА, Џина Хаспел. Линдси Грејем, сојузник на Трамп во Сенатот истакна дека саудискиот принц бил соучесник во убиството на Кашоги на највисоко можно ниво. Крокер, претседател на Одборот за надворешна политика изјави дека на состанокот, што траеше околу еден час, не ја слушнал аудио снимката од убиството на Кашоги на 2 октомври во Генерланиот конзулат на Саудиска Арабија во Истанбул. Неколку републикански и демократски сенатори учествуваа на состанокот со Хаспел. На средбата беа и претставници на различни одбори поврзани со безбедноста. МИА