амстердам – Kurir.mk

Амстердам ги забрани бродовите за крстарење во градот

Дарко Андоновски — Fri, 21 Jul 2023 07:12:55 +0000

Градскиот совет на Амстердам донесе одлука да ги забрани бродовите за крстарење во центарот на главниот град во Холандија. Тоа значи дека средишното пристаниште за крстарење на реката Иј, близу Централната железничка станица во Амстердам, ќе се затвори. Градските власти тврдат дека бродовите за крстарење не се во согласност ни со стремежите за еколошката одржливост во градот. „Бродовите за крстарење што ја загадуваат животната средина не се во согласност со амбициите за одржливост на нашиот град“, се вели во соопштението Со ова, се надеваат, ќе се ограничи и бројот на посетители, па и така ќе се намали загадувањето. Градот уште во март почна со интернет-кампања каде што ги повика младите Британци кои размислуваат за ергенска забава во Амстердам - да престанат да доаѓаат. Бродовите за крстарење станаа главен симбол на проблемот со прекумерниот туризам во холандската престолнина, а предлогот во Советот за преместување на пловилата помина со големо мнозинство при гласањето. Амстердам стана жртва на сопствената популарност. Околу 20 милиони посетители годишно доаѓаат во градот, надалеку познат како град на забавата.

ВИДЕО: Стотици илјади лалиња изложени во Амстердам

Ивона Петрова — Mon, 10 Apr 2023 14:22:14 +0000

Стотици илјади лалиња, кои цветаат на многу места во Амстердам, почнаа да ги украсуваат улиците на градот, авении, мостови и канали, јавува Анадолија. Како дел од 9-тиот фестивал на лалињата во Амстердам, организиран од заедницата на фестивалот лалиња, стотици илјади се изложени на 75 различни локации во Амстердам. Фестивалот се одржува во соработка со 36 различни институции, а привлекува големо внимание кај оние кои гo посетуваат Амстердам и уживаат во шарените украси на лалињата. Медиумската претставничка на фестивалот Мариек Клостерс изјави дека таа и директорката на фестивалот Саскиа Албрехт го реализирале овој проект, бидејќи лалињата не го нашле заслуженото место во градот. -Фестивалот го одржуваме од 2015 година. Нашата цел е да имаме лалиња на места каде што луѓето ќе можат да ги видат додека одат во секојдневниот бизнис, наместо да ги прикажуваме во изложбените градини или туристичките атракции, рече Клостерс. Фестивалот на лалињата, кој привлече големо внимание кај локалната јавност и туристите, трае до крајот на април.

Амстердам им порача на Британците: Подалеку од градот ако доаѓате поради дрога и секс

Ристе Здравков — Wed, 29 Mar 2023 14:21:26 +0000

Официјални лица во Амстердам ги предупредија британските туристи кои доаѓаат во холандската престолнина поради секс и дрога да се „држат настрана“ од градот преку дигитална кампања наменета за мажи на возраст од 18 до 35 години. Кампањата наречена „Остани подалеку“ се спроведува во обид да се ослободи Амстердам од неговата репутација на „развратен“ град, како најлиберален главен град во Европа. На видеата прикажани како дел од кампањата, може да се видат млади мажи како се тетерават на улица, додека полицијата им става лисици на рацете и им зема отпечатоци од прсти и ги фотографира, пренесува Би-Би-Си. Онлајн рекламите ги истакнуваат ризиците поврзани со прекумерната употреба на дрога и пијалоци во Амстердам. Пораката е дека долгиот викенд во Амстердам може да создаде „погрешен вид спомени“ и дека бегството кое посетителите го посакуваат во главниот град на земјата може да резултира со судски пресуди. Туристичките агенции со седиште во Обединетото Кралство нудат викенд-тури во Амстердам, кои вклучуваат крстарења со брод по каналот со бесплатни неограничени пијалоци и стриптиз во пабот Red Lantern. Со години луѓето се жалат дека пијаните Британци уринираат во јавност, повраќаат во одводи, се соблекуваат и влегуваат во тепачки во пијана состојба. Пред речиси една деценија, тогашниот градоначалник на Амстердам, Еберхард ван дер Лан, го покани својот лондонски колега Борис Џонсон, кој го опиша градот како „лигав“, за да види сам што прават Британците. „Тие не носат капути додека сe движат низ округот на Црвените фенери, пеејќи „You’ll never walk alone’, вели Еберхард ван дер Лан. Тие се облечени како зајаци или свештеници, а понекогаш и воопшто не се облечени. Би сакал да го поканам да ги види“, изјави тогаш Еберхард ван дер Лаан. Критичарите тврдат дека кампањата е дискриминаторска и заснована на „нефер стереотипи“.

Од месец мај, нема повеќе пушење џоинт на јавни места во Амстердам

Тале Кристо — Thu, 09 Feb 2023 19:55:43 +0000

Луѓето од средината на мај веќе нема да можат да пушат марихуана на јавни места во историските области на Амстердам, бидејќи холандските власти се борат против негативните ефекти од масовниот туризам. Согласно останатите измени, рестораните мора да се затворат порано, а проститутките порано да завршат со работа во квартот на црвените светла Вален, се вели во соопштението на градот. Потезите имаат за цел да ја направат населбата побезбедна и поудобна за жителите, се вели во соопштението, истакнувајќи дека ноќе, атмосферата понекогаш може да биде „многу мрачна“. Локалните жители со годините се жалат на пиењето, викањето и пушењето. Туристите привлекуваат и дилери на дрога, кои пак создаваат криминал, зголемувајќи ги опасностите на улиците, се вели во соопштението од градот. Една од причините зошто туристите ги привлекува Амстердам се кафулињата каде што на туристите им е дозволено да купуваат мали количини хашиш и марихуана. Градските власти размислуваат дали да ја ограничат продажбата на кафулиња во периодот од 16 часот попладне до 1 часот по полноќ. Новите правила се дел од поширокиот сет мерки за заштита на локалното население, со дополнителни правила според кои пабовите ќе мора да престанат да примаат гости по 1 часот по полноќ. Проститутките ќе мора да ги затворат прозорците до 3 часот наутро, наместо до 6 часот наутро.

ФОТО: Познат холандски новинар во критична состојба откако е ранет во центарот на Амстердам

Ивона Петрова — Wed, 07 Jul 2021 05:55:56 +0000

Познат холандски новинар од рубриката Црна хроника, Питер Р. де Вриес е во критична состојба откако во него беше пукано синоќа од огнено оружје во центарот на Амстердам, јавија холандските медиуми. Де Вриес (64) беше сериозно повреден во нападот и беше пренесен во болница. Нападот се случи само неколку минути откако тој ја напушти зградата на РТЛ каде учествуваше во популарното телевизиско шоу „Булевар РТЛ“. Полицијата потврди дека привеле три лица осомничени за нападот. Де Вриес се стекна со слава уште во раните 80-ти години на минатиот век кога известуваше за киднапирањето на магнатот Фреди Хајнекен. Од 1995 до 2012 година водеше популарна емисија на холандската телевизија, која опфаќаше познати случаи од „Црна хроника“. Во врска со повеќе случаи, на Де Вриес му се закануваше криминалното подземје, а пред две години тој самиот напиша на Твитер дека полицијата го предупредила дека се наоѓа на „списокот за отстрел“ на криминалец во бегство.

Mакедонските фудбалери пристигнаа во Амстердам – го одработија и првиот тренинг

Тале Кристо — Fri, 18 Jun 2021 18:13:59 +0000

Амстердам од денеска е новата база на македонските фудбалери, кои попладнево го одржаа првиот тренинг во холандскиот град спроти дуелот против домашната репрезентација во рамки на ЕУРО2020. По двата порази во Букурешт против Австрија (1:3) и Украина (1:2), македонската репрезентација в понеделник против Холандија го игра натпреварот од последното трето коло во групата Ц. За избраниците на Игор Ангеловски тоа воедно ќе биде и последниот натпревар на дебитантскиот настап на Европските првенства, откако по вчерашниот триумф на Холандија над Австрија (2:0) „црвено – жолтите“ останаа без шанси за пласман во нокаут фазата. И покрај тоа, амбициите и мотивираноста кај македонските фудбалери се на високо ниво во обид против фаворизираната Холандија да ја забележат првата победа на ЕУРО2020. Натпреварот се игра в понеделник од 18 часот на „Јохан Кројф Арена“ во Амстердам.

Градоначалничката на Амстердам сака на туристите да им забрани да влегуваат во кафулињата со марихуана

Дарко Андоновски — Tue, 12 Jan 2021 10:11:00 +0000

Градоначалничката на Амстердам, Фемке Халсема, предлага забрана за влез на туристите во познатите кафулиња низ градот во кои се продава марихуана. -Голем број туристи доаѓаат во Амстердам само за консумирање на лесните дроги, а таквите туристи станаа досадни, изјави Халсема на јавната телевизија. Градоначалничката Халсема, членка на Зелената партија ГроенЛинкс, на фунцкијата е од 2018 година. -Амстердам е космополитски град и ние сакаме туристи, но би сакале тие да доаѓаат поради неговата убавина и култура, рече таа. Канабисот технички е незаконски во Холандија, но поседувањето на помалку од пет грама за лична употреба е декриминализирано уште од 1976 година. Халсема на Градскиот совет му предложи уредба според која во кафулињата со канабис ќе може да влезат само оние што ќе покажат холандски пасош. Таа се надева дека градот со тоа ќе престане да биде дестинација за „туризам на меките дроги“. Во Холандија има 570 кафулиња во кои може да се купи и консумира марихуана, а само во Амстердам ги има 166.

Амстердам планира забрана за марихуана за туристите

Тале Кристо — Sat, 09 Jan 2021 08:10:55 +0000

Градоначалничката на Амстердам, Фемке Халсема, предложи да им се забрани на туристите да ги посетуваат градските „кофишопови“ каде, како што првенствено се продава и конзумира марихуаната. Таа сака да ја намали „привлечноста на Амстердам како дестинација за туризам на мека дрога“, напиша во писмото до Градски совет. – Во последниве години, видовме дека побарувачката за канабис во Амстердам е неверојатно зголемена, изјави Халсема во интервју за јавната телевизиска станица НОС. – Ова главно се должи на зголемувањето на бројот на туристи, додаде таа, истакнувајќи дека некои од нив се „канабис туристи“ кои доаѓаат во Амстердам единствено да ја консумираат дрогата. Овие „туристи“ се извор на проблеми за центарот на градот, рече градоначалничката. -Амстердам е меѓународен град и ние ги поздравуваме туристите, но би сакале туристи кои доаѓаат поради богатството на градот, неговата убавина, културните институции, рече таа за холандската јавна телевизија. Според податоците на Министерството за јавно здравје, Холандија има 570 „кофишопви“, а според податоците на Амстердам, во тој град има 166, или 30 отсто од сите во Холандија. Од 1970-те, холандската влада ги толерира оние продавници што продаваат канабис, но производството и снабдувањето со канабис се, сепак, нелегални.

Eротски комплекс наместо Црвените фенери во Амстердам

Ивона Петрова — Thu, 20 Feb 2020 08:43:42 +0000

Амстердам планира изградба на тн. „еротски комплекс” составен од клубови, театри и други објекти посветени на сексот или хотел за проститутките – сè тоа во рамки на преуредувањето на познатата Улица на црвените фенери. Хотелот за проституција со затворени прозорци или еротски центар се најверојатни опции, според градскиот совет на холандскиот главен град, чии планови се објавени вчера. „Тие опции имаат најмногу предности и најмалку недостатоци”, соопштуваат градските челници. Градоначалничката Фемке Халсема покрена чистење на Црвените фенери, којашто сепак, привлекува голем број туристи. Но, тие честопати се пијани, дрски, па понекогаш и насилни кон сексуалните работнички, сметаат властите. Халсема рече и дека е загрижена поради порастот на тајна проституција околу тој надалеку прочуен дел на холандската престолнина. Последниве месеци градот организирал разговори со сексуалните работници, сопствениците на зградите и други лица засегнати со проституција, за да се чујат и нивните мислења.

Амстердам го забранува за туристите она по што е најпрепознатлив

Катерина Бојаџиева — Wed, 19 Feb 2020 18:18:27 +0000

Амстердам ја разгледува можноста да воведе забрана за продажба на марихуана на туристи во кафулињата, а истовремено истражува и нови начини како да го балансира начинот на живот на населението со потребите на туристите. Во истражувањето во кое поголемиот број од младите туристи се изјасниле дека се одлучиле за посета на Амстердам бидејќи сакале да го искусат чувството што го нудат кафулињата во кои се продава канабис. Околу 57 отсто од лицата кои биле анкетирани истакнале дека кафулињата со канабис се важна причина за посета на Амстердам, преку 30 проценти од испитаниците истакнале дека ретко би го посетувале Амстердам доколку не е дозволено да се посетуваат таквите кафулиња, додека 11 проценти од испитаниците воопшто не би го посетиле Амстердам. Целта на истражувањето било да се открие најпопуларната причина за посетата на Амстердам и дали туристите се уште би го посетувале доколку достапноста на еден или повеќе од овие фактори се намали или исчезне. Имено, Амстердам во последните неколку години се обидува да го реши проблемот со прекумерниот број туристи, бидејќи градот се соочува со голем бран на туристи кои се однесуваат лошо.