Од РК Вардар и Алкалоид до Швајцарија: Младиот Андреј е талентиран Македонец – бележи успех во светот, а сака да ги брани боите на македонското знаме

Ивана Ефремовски — Fri, 18 Aug 2023 21:01:29 +0000

Андреј Јанески е дете од Македонија кое треба да биде пример за врсниците, но и за помалите кои уште се двоумат дали времето поминато на телефони треба да го заменат со спортување. Тој денес има 17 години, а зад себе веќе има големи успеси во спортот, кој одлучил да биде не само негово хоби, туку и професија. Ова момче е родено во Прилеп и на само 7-годишна возраст почна да го исполнува својот сон – да биде ракометар. КУРИР стапи во контакт со него преку неговиот татко, кој е негова голема поддршка и кој се гордее на секој успех на својот син. -Со ракомет почнав да се занимавам уште на мојата 7-годишна возраст. Мојот прв ракометен клуб беше РК Вардар во кој тренирав 7 години. Откако се затвори ракометната школа на РК Вардар, продолжив да тренирам во РК Алкалоид, таму тренирав две години со мојот тренер Влатко Котески, од кого научив многу за ракометот. Многу сум му благодарен што ме внесе во тајните на овој спорт и ми овозможи да се развивам како спортист, рече Андреј во изјава за КУРИР. Минатата година ова талентирано момче заедно со своето семејство се преселило во Швајцарија. Големата промена во неговиот живот не му била пречка да продолжи да се занимава со ракомет, напротив, таму прави големи чекори кои му носат успех. -Во Швајцарија продолжив да играм ракомет во клубот TV SOLOTHURN во кантонот Solothurn каде и живеам. Во клубот сум веќе една година и сум стандарден првотимец во секој натпревар, вели тој. Андреј има низа успеси, а како најзначајни ги издвојува вицешампионската титула во РК Алкалоид, шампионската титула во швајцарскиот клуб. Промовиран е во категоруја У19 и има постигнато 23 голови. Како што големата дистанца не можеше да го оддалечи од љубовта кон ракометот, уште помалку можела да го одвои од големата љубов кон Македонија. Го прашавме дали еден ден би ги бранел боите на македонското знаме. -Еден ден, кога би добил покана, со СРЦЕ би прифатил и би заиграл за Македонската ракометна репрезентација, вели Андреј. Овој млад и многу талентиран Македонец има порака до сите деца кои уште се двоумат дали да спортуваат: „Мојата порака до сите деца е да се занимаваат со секаков вид на спорт кој ги интересира и за кој мислат дека поседуваат талент. Само со упорност и вложување во себе се постигнуваат вистински резултати. Квалитетот на крај секогаш испливува на површина“.

Андреј Јанески – Kurir.mk

Од РК Вардар и Алкалоид до Швајцарија: Младиот Андреј е талентиран Македонец – бележи успех во светот, а сака да ги брани боите на македонското знаме