Андреј Ковачев – Kurir.mk

МНР со одговор до Ковачев: Секој европратеник кој го почитува достоинството на државата и нејзините граѓани е добредојден во Македонија

Ивана Ефремовски — Tue, 09 May 2023 12:30:31 +0000

Секој европратеник кој го почитува достоинството на државата и нејзините граѓани е добредојден во Македонија, соопшти денеска Министерството за надворешни работи во пишана изјава до медумите, откако бугарскиот европратеник Андреј Ковачев денеска во интервју за БТВ побара прецизно објаснување од официјално Скопје зошто не бил пуштен на граничниот премин за влез во земјава на 6 мај, пред, како што рече тој, „да разгледува можност за ново вето кон Македонија“. Одговорот од МНР го пренесуваме во целост: „За Владата на Македонија приоритетно прашање е членството во ЕУ. За таа цел се ставени на располагање сите владини и административни ресурси за успешно завршување на скрининг процесот и отворање на првиот кластер - фундаменти. Паралелно се работи и на уставните измени кои влегуваат во клучна фаза, каде за кратко време работната група треба да излезе со предлог амандманите. Сензитивноста на овој процес не остава простор за преземање на најмал ризик кој би влијаел негативно на успешното спроведување на измените. Во таа насока, на 6 мај, на граничниот премин Ново Село, „поради неисполнување на условите за влез во Република Македонија, согласно законот за странци, не било дозволен влез на група од петмина државјани на Република Бугарија“. Дополнително би сакале да нагласиме дека во оваа група со која патувал и европратеникот Андреј Ковачев, имало лица за кои во Министерството за внатрешни работи има сознанија дека претставуваат ризик по јавниот мир и безбедност. Европратеникот Ковачев не е меѓу нив, но надлежните служби донеле таква одлука поради групата со која патувал. Секој европратеник кој го почитува достоинството на државата и нејзините граѓани е добредојден во Македонија“.

НЕ СЕ ПОЖЕЛНИ ВО МАКЕДОНИЈА: Европратеникот Ковачев и други бугарски државјани вратени од граница, не смеат да влезат кај нас

Ивана Ефремовски — Sat, 06 May 2023 18:20:31 +0000

Македонската гранична полиција не дозволила влез за петмина бугарски државјани кои денеска сакале да влезат во државата за да оддадат почит на паднати бугарски војници на гробиштата кај Ново Село. Меѓу нив се и Милен Врабевски и европратеникот Андреј Ковачев. Како што дознава Сител, останатите тројца се извесни Венцислав Цачев, Ивајло Иванов и Ивајло Колев. Сите добиле решение дека се прогласени за непожелни, односно за персона-нон-грата. Тие се сметаат за закана за јавниот поредок, националната безбедност и меѓународните односи на Македонија. Ковачев на социјалните мрежи се пожали за третманот од македонските власти, па за панихидата објави стари слики. -За жал фотографиите се од минатата година. Оваа година не бевме пуштени во РСМ, за да оддадеме почит на бугарските воени гробишта кај Ново Село. Тажно и нелогично однесување, напиша Ковачев. Неколкумина бугарски државјани меѓу кои и провокаторот Ангел Џамбаски беа прогласени за персона-нон-грата уште во феврурари кога се чествуваше роденденот на Гоце Делчев. Тоа решение, како што тогаш објави МНР, требаше да биде времено само за периодот на прослава на роденденот на македонскиот херој, но три месеци подоцна македонската полиција повторно не им дозволи влез. Министерството за надворешни работи на Република Бугарија соопшти дека е разочарано од одлуката на властите во Република Македонија да не им дозволата влез во земјата на бугарскиот пратеник во Европскиот парламент Андреј Ковачев, на претседателот на Фондацијата „Бугарска меморија“ Милен Врабевски и на уште тројца бугарски државјани.

Kовачев против „Република“: Бугарскиот пратеник потврди дека германскиот Рајх и Бугарија ја окупирале Македонија

Дарко Андоновски — Fri, 10 Mar 2023 15:51:45 +0000

Бугарскиот пратеник во ЕП Андреј Ковачев реагира на текст објаевен во „Република“ за конференцијата која се одржа во Брисел по повод Меѓународниот ден на Холокаустот, објавува сајтот. На Ковачев не му се допадна пишувањето на „Република“ дека Бугарија не ги спасила Евреите туку помогнала да ги пратат во логорот Треблинка. Дека нивните пишувања се точни потврдува и самиот Ковачев во реакцијата до нивната редакација. „Ние изразвме длабоко длабоко жалење за тоа што се случувало со депортираните од тогашните окупирани од германскиот рајх Македонија и Беломорска Тракија кои трагично го завршуваат својот живот во концетрационите логори на нацистите-рекол Ковачев во ЕП. Добро е што Ковачев конечно призна дека Германиа и Бугарија ја окупирале Македонија во Втората светска војна и жалат за она што се случило со Евреите. Денеска цел ден трае преписка меѓу кабинетот на Ковачев и редакцијата на „Република“. На нашето љубезно барање целата содржина да ни биде преведена на македонски јазик за точно да разбереме за што се работи, добивме циничен одговор на нашиот мejл“, пишуваат од редакцијата на Република.

Ковачев по пописот во Македонија: Ќе ги откриеме сите кои имаат бугарско државјанство!

Ивана Ефремовски — Wed, 30 Mar 2022 18:30:22 +0000

Сите знаеја кои се веќе „официјалните“ резултати од пописот во Македонија. 3.504 граѓани се дрзнаа да се запишат како Бугари, вака бугарскиот европратеник Андреј Ковачев ги коментира официјалните резултати од пописот во Македонија. Тој напоменува дека повеќепати инсистирал на промена на Законот за бугарско државјанство. -Добивањето бугарско државјанство по потекло не може да биде таен чин. Сите оние кои добиле бугарско државјанство по потекло мора да бидат објавени. Вака се објавуваат во САД, Канада, Германија или Франција, додаде Ковачев и нагласи дека да си доброволно бугарски државјанин откако ќе докажеш бугарско потекло и ќе потпишеш декларација дека се чувствуваш Бугарин не е тајна или срамна работа. Според бугарскиот европратеник, при добивањето државјанство „потребна е церемонија или барем фотографија пред грбот и знамето“. -Колку долго ќе чека (бугарското) Народно собрание? прашува европратеникот Ковачев, објавија медиумите во Бугарија.

За Бугарите сега е спорно и одбележувањето на 11 Октомври

Тале Кристо — Mon, 14 Feb 2022 12:01:27 +0000

Бугарскиот европратеник од редовите на опозициската ГЕРБ, Андреј Ковачев, во теливизиско интервју го посочи како спорен и празникот 11 Октомври, во релациите меѓу Бугарија и Македонија. – На пример, таму сѐ уште е како празник, како што го нарекуваат, кога пукнала првата пушка против Бугарите во октомври месец. Ако ништо не смениш од претходниот режим на Титова Југославија не може со истата идеологија да влезеш во ЕУ, зашто таа идеологија е директно насочена против друга земја членка на ЕУ – изјави Ковачев на БТВ. Тој истакна дека образованието не би требало да се заснова на омраза. -Ние треба да сме заедно, како рамноправни членки на ЕУ, но нашите млади поколенија не треба да стекнуваат образование кое води кон омраза меѓу нив. Тоа не можеме да го прифатиме, тоа е основна европска вредност, дел од основните Копенхашки критериуми – изјави европратеникот. Според него, треба да се намали говорот на омраза, што доаѓа од учебниците, медиумите и академските средини во Македонија. -Образовниот систем и медиумите во С еверна Македонија треба да почнат да ја објективизираат нашата заедничка бугарска историја. Тоа е во името на нашата заедничка европска иднина. Нема како да ја поддржиме сегашната идеолошка основа на Северна Македонија – додаде Ковачев.

Мицкоски со одговор до Ковачев: Што правите со вашата политика на омраза кон Македонците

Катерина Бојаџиева — Thu, 20 May 2021 13:59:46 +0000

Најголемиот македонофоб, Андреј Ковачев, лично ме напаѓа, а јас никого не мразам во животов. Јас ги почитувам сите наши соседи, сите народни кои не опкружуваат. Кога Ковачев, Каракачанов се македономрасзци, кога ќе сфатат дека постоела македонска нација, постоел македонскиот народ, колективната меморија на македонсиот народ е многу порано од тоа што они мислат. тогаш ние можеме да градиме пријателски односи, рече лидерот на ВМРО-ДПМНЕ, Христијан Мицкоски за време на посетата на Штип. Овој македонски народ постоел, кажа Мицкоски, и пред Илинден, и за време на Илинден и после Илинден. „Македонскиот народ постои денеска и ќе постои во иднина, колку тоа да не сака да го признае македономразецот Ковачев кој за жал е дел од европарламентот, и треба да промовира европски вредности. Тој треба да бара одговор на прашањата и да се извини за политиката која ја гради кон Македонија, тој треба да дозволи да ги отпочне преговорите Македонија со ЕУ, бидејќи овој народ секогаш бил на страна на вистинските европски вредности“, рече Мицкоски.

Ковачев за лидерот на ВМРО-ДПМНЕ: Мицкоски е предводник на антибугарските политики

Тале Кристо — Thu, 20 May 2021 11:57:33 +0000

„Додека Зоран Заев, Стево Пендаровски и Никола Димитров се во обиколка на европските метрополи, се жалат против Бугарија, Христијан Мицкоски директно бара поништување на Договорот за добрососедството. Вистината е дека тој и неговиот претходник, Никола Груевски, отсекогаш биле против неговото потпишување“. Ова го изјави европратеникот од ЕПП, Андреј Ковачев, пренесе БГНЕС, по даденото интервју на опозицискиот лидер за неделникот „Фокус“. -Долго време имав дилема кој од нив е поголем бугарофоб, но долго време знам дека има јасен победник на ова натпреварување и ова не е бегалецот во Будимпешта. Мицкоски мора да признае дека, за разлика од многу други тамошни политичари, кои зборуваат едно приватно, друго пред медиумите, тој е многу јасен, прецизен,, искрен и доследен … во неговата омраза кон сè што е бугарско. Вистински шампион на антибугаризмот! Злобните јазици ќе најдат еквиваленти само меѓу српските четници од почетокот на 20 век, против кои се бореше ВМРО, додаде Ковачев.

Ковачев: Малку е веројатно Софија до утре да го промени својот став за ветото

Дарко Андоновски — Mon, 07 Dec 2020 09:40:03 +0000

Малку е веројатно до утре или во следните неколку часа да има некаков нов развој на настаните во однос на сегашната состојба, особено ако се има предвид неуспехот на последниот состанок заедничката бугарско-македонска Комисија за историски прашања, изјави денеска бугарскиот европратеник Андреј Ковачев, во врска со можноста за промена на ставот на Бугарија во однос на ветото за преговарачката рамка за земјава со ЕУ во пресрет на утрешниот Советот на министри на Унијата. Како што јави БГНЕС, според Ковачев, премиерот Зоран Заев треба да манифестира „поголема храброст и поттик“, со цел спроведување на Договорот за добрососедство и пријателство меѓу двете земји. – Ако во Заедничката мултидисциплинарна експертска комисија за историски и образовни прашања на Бугарија и Северна Македонија колегите од Скопје се плашат да ги прифатат фактите, тогаш ќе треба да се најдат други механизми за спроведување на Договорот. Европската унија постои не да се мразиме едни со други, туку да живееме заедно во целосна толеранција, истакна Ковачев. Според него, не смее да се дозволи младите во земјава „да бидат воспитувани да ја мразат Бугарија“. – Во текот на последните три децении, ние постојано демонстриравме добра волја – ние бевме првите што ги признавме како независна држава, го браневме нивниот територијален интегритет, дававме различна помош, вклучително и воена, ги враќавме на патот. Од друга страна, она што го гледаме е дека тие не можат да се разделат од приодот на Тито и не се подготвени да ги отстранат наметнатите поделби од комунистичкиот режим, додаде бугарскиот европратеник. Ковачев оцени дека македонската страна „се обидува да најде разни изговори“, потенцирајќи дека изборите во Бугарија „немаат никаква врска со заедничката историја“. – Сите бугарски политички партии се согласуваат – не постои начин да се направи компромис со историјата и јасните историски факти, нагласи Ковачев, кого БГНЕС го карактеризира како „еден од најголемите поддржувачи за пристапување на Република Северна Македонија во ЕУ“.

Димовски му одговори на Ковачев: ВМРО-ДПМНЕ протестира против оние чија цел е да ги уништат Македонскиот народ и Македонската држава и против неофашистите како тебе и тој кого го фалиш

Магдалена Андонова — Thu, 26 Nov 2020 17:22:48 +0000

ВМРО-ДПМНЕ, не толку почитуван Андреј Ковачев, протестира против оние чија цел е да ги уништат Македонскиот народ и Македонската држава и против неофашистите како тебе и тој кого го фалиш. Кратко и јасно. И протестира за зачувување на сопствениот идентитет, јазик, култура и историја, стои во Фејсбук статусот на Димитар Димовски. - Ако ова ти е јасно, да ти разјаснам уште нешто. Македонците страдале од Бугарите во повеќе наврати. Претпоследното страдње било за време на втората светска војна, кога бугарските фашистички војници имаат ликвидирано и заклано стотина македонци, но и претепано и силувано илјади Македонци и Македонки. И кога испрстиле стотици македонски Евреи во Треблинка. И кога украле сериозни количини на историски и културни вредности од Македонските цркви и домови. Последното страдање ни го причинувате сега, крадејќи нинка историјата и негирајќи ни ги јазикот и идентитетот, пишува тој. - Ако ова го разбираш, да ти објаснам уште нешто. Македонскиот народ е кроток, добродушен народ. И верувам дека во голема мера ќе ви прости за злоделата. Дојдете ти и твоите истомисленици и шефови, Борисов, Каракачанов, Џамбаски..., да ги посетите спомениците на оние Македонци кои се погубени од раката на бугарскиот фашистички окупатор. Дојдете во Ваташа, во Поречието, во Куманово, Прилеп, Берово, низ цела Република Македонија, влезете и во музејот на холокаустот и кажете: "Простете, нашите предци ви згрешиле многу. Ние сакаме да ја исправиме таа грешка." Ако сте искрени и сериозни, тоа ќе го препознаеме и ќе ви простиме. И можеме да продолжиме да градиме добри односи, да одиме напред, почитувајќи се едни со други, но и почитувајќи ги правата на оние кои се изјаснуваат за бугарско малцинство кај нас (иако не сум чул до сега дека има такви) и на оние кои се изјаснуваат за Македонци кај вас. Јасно ми е дека се срамите од својата историја, па затоа и посегнувате по нашата. Јасно ми е и дека ви причинува фрустрации тоа што Македонци ви биле даскали, градители, министри и премиери. Но ние не го ни споменуваме тоа и нема ни во иднина да ви го кажуваме. Македонија е богата со паметни и мудри луѓе, има и за на вас да ви даде, вели Димовски. - Андреј Ковачев, ти си пратеник во Европскиот парламент, кој по природата на работите, треба да биде нај гласен во промовирањето на европските вредности. Не на неофашистичките и претендентските кон туѓото. П.С. Што се однесува до Југославија, Македонија и Македонците страдале и во тоа време, но секако многу помалку отколку во времето во кое вие сте биле наши "администратори". И да, јас не сум југословен, ниту пак моите предци биле тоа. Ние по корен сме Македонци. Тоа и ќе останеме, пишува тој.

Ковачев: 100.000 луѓе од Македонија добиле бугарско државјанство – не може да се зборува бугарски до пладне, а македонски попладне

Ивана Ефремовски — Wed, 25 Nov 2020 13:38:54 +0000

Станува сè појасно зошто е таков нашиот став кон Македонија – станува збор за надминување на омразата, една од основните вредности на ЕУ, рече европратеникот Андреј Ковачев за БТВ. Според него, водачите на Македонија не покажуваат дека се дистанцирале од омразата и спротиставувањето уште од времето на тоталитаризмот. -Комисијата мора да работи само врз основа на историски податоци. Тие веруваа дека Бугарија нема да предизвика никакви проблеми во однос на Македонија. Грците на секој знак рекоа што треба да се напише, а ние сме најблиски и најбратски земји од обете страни на границата, и тие тоа го сметаа тоа за наша слабост. Не може да се зборува бугарски до пладне, а македонски попладне, рече тој. Тој потсети дека над 100.000 луѓе од Македонија добиле бугарско државјанство. „Ние не им го одземаме правото на самоопределување. Имаме проблем само со толкувањето на историјата“, коментира Андреј Ковачев. Според него, Македонија не сака да ги исполни економските врски со Бугарија.