Андриј Јермак – Kurir.mk

Јермак: Уништувањето на рускиот воено-индустриски комплекс е меѓу клучните фактори за крајот на војната

Ивана Ефремовски — Sun, 03 Sep 2023 10:56:17 +0000

Еден од клучевите за завршување на војната и за зачувување на светскиот поредок е уништувањето на рускиот воено-индустриски комплекс, напиша на Телеграм, Андриј Јермак, шеф на канцеларијата на украинскиот претседател Володимир Зеленски. -Руските терористи продолжуваат да ја напаѓаат пристанишната инфраструктура со надеж дека ќе успеат да предизвикаат криза со храна и глад низ целиот свет. Главната задача за нас и нашите партнери денес е да ги елиминираме можностите на рускиот воено-индустриски комплекс да произведува оружје за понатамошни напади против Украина. Исто така построга одговорност за оние кои му помагаат на непријателот да ги заобиколи санкциите, напиша Јермак. Тој нагласи дека руската одбранбена индустрија не е во состојба да функционира без странски компоненти на оружје, а по уништувањето на одбранбената индустрија, поразот на руските војници ќе биде целосен. (МИА)

Јермак: Мировниот самит во Џеда ја зајакна позицијата на Украина

Тале Кристо — Sun, 06 Aug 2023 15:13:14 +0000

Позицијата на Украина е зајакната за време на самитот во Саудиска Арабија, чија цел е да се најде пат кон мирен крај на руската инвазија, изјави денеска шефот на претседателскиот кабинет на Украина, Андриј Јермак. Според него, „иако имаше разлики во мислењата меѓу околу 40-те земји на Самитот, сите се обврзаа да ја почитуваат Повелбата на Обединетите нации, меѓународното право и принципите на суверенитет и територијален интегритет“. -И врз овие принципи е изградена формулата за мир на претседателот (Володимир) Зеленски, која детално ја опишавме“, нагласи Јермак кој ја предводеше делегацијата на Украина на Самитот во Џеда. Предлогот на Зеленски за мир вклучува повлекување на руските трупи од цела Украина, меѓународен трибунал за гонење на руските воени злосторства и меѓународни безбедносни гаранции за Украина.

Јермак: Контраофанзивата на Киев „не напредува толку брзо“

Тале Кристо — Fri, 14 Jul 2023 16:46:45 +0000

Контраофанзивата на Киев, соочена со отпорот на руските сили, „не напредува толку брзо“, изјави денеска шефот на кабинетот на украинскиот претседател, Андриј Јермак. - Денес контраофанзивата не напредува толку брзо. Кога ќе видиме дека нешто не оди како што треба, треба да го кажеме тоа. Никој нема да ја разубави ситуацијата, вели Јермак. Тој исто така рече дека западните сојузници не вршат никаков притисок врз Киев по ова прашање, туку само прашуваат како можат да помогнат. - Целиот свет знае дека е невозможно да се изврши притисок врз Украина, рече Јермак, кој важи за десна рака на украинскиот претседател Зеленски. Украина нема да преговара со Русија додека нејзините војници не ја напуштат украинската територија, додаде тој. - Нашиот став е јасен. За такви преговори евентуално е можно да размислуваме откако руските сили ќе се повлечат од нашата територија. Цел свет знае дека нема да разговараме со Русите пред тоа, рече Јермак.

Јермак: Ќе бидат сменети функционерите кои ги избегнуваат воените должности

Ивона Петрова — Thu, 26 Jan 2023 21:26:15 +0000

Функционерите на украинската Влада кои ги избегнуваат своите должности за време на војната брзо ќе бидат сменети, изјави, шефот на кабинетот на украинскиот претседателот Андриј Јермак. – Секој треба да го разбере своето ниво на одговорност кон државата и нацијата за време на војната. Кој и да заборави на тоа, реакцијата ќе биде брза. Ова ќе му се случи на секој кој ќе си дозволи да ги заборави (своите должности), без оглед на титулите и функциите, напиша Јермак на Твитер. Повеќе од десет функционери беа разрешени оваа недела по серијата скандали и обвинувања за корупција.

Јермак: Мирот во Украина е можен кога ќе се вратат границите од 1991 година

Ивана Ефремовски — Sat, 19 Nov 2022 12:45:31 +0000

Мирот во Украина ќе биде можен само ако се вратат границите на земјата од 1991 година, изјави денеска Андриј Јермак, помошник на претседателот на Украина, Володимир Зеленски. – Ќе има мир кога ќе ја уништиме руската армија во Украина и ќе дојдеме до границите од 1991 година, напиша Јермак на Телеграм. Советникот на украинскиот претседател Михаило Подољак претходно ги отфрли „теориите на заговор“ за предавање на неговата земја и „тајни преговори на Западот со рускиот претседател Владимир Путин“. Тој на Твитер соопшти дека Украина нема да ѝ се предаде на Русија и оти тоа не е политичко прашање, туку прашање на опстанокот на украинскиот народ. – Било какви теории на заговор за „предавање на Украина“ или тајни преговори на Западот со Путин не ги земаат предвид „малите детали“. Украинците. Таквите аранжмани не можат да се спроведат. Украина нема да клекне пред Русите. Не се работи за политика. Се работи за нашето постоење, напиша Подољак. Зеленски, пак, оцени дека Русија сега бара кратко примирје, за да ги обнови силите, бидејќи, како што рече, нема да успее да ја заврши војната на сегашниот начин. Во видео-обраќање до учесниците на Меѓународниот безбедносен форум во Халифакс, Зеленски рече дека Русија сега бара пауза за обнова на своите сили. – Некои тоа може да го наречат крај на војната, но таквото одморање само ќе ја влоши ситуацијата, смета Зеленски. Тој нагласи дека секоја помисла за отстапување на украинска територија или суверенитет не може да се смета за мир. – Неморални компромиси ќе доведат до ново крвопролевање. Вистински, траен и искрен мир може да биде резултат само на целосно уништување на руската агресија, рече Зеленски. (МИА)

Јермак по новите напади: Тие сакаат послушност, но терористите секогаш губат

Ивана Ефремовски — Tue, 15 Nov 2022 14:48:51 +0000

Две станбени згради денеска се погодени во руски напад врз Киев, изјави градоначалникот на главниот град на Украина, Виталиј Кличко. Според британските меидуми, најмалку две експлозии одекнале во Киев, а над градот се издигнал чад. Шефот на кабинетот на украинскиот претседател, Андриј Јермак на Твитер објави дека на обраќањето на украинскиот претседател Володимир Зеленски на самитот на лидерите на Групата 20 на Бали, руските сили одговориле со нов ракетен напад врз украинскиот главен град. -Дали некој сериозно мисли дека Киев навистина сака мир? Тие сакаат послушност. Но, на крајот на денот, терористите секогаш губат, рече Јермак. Експлозиите се случија по предупредувањата за воздушан опасност низ Украина, што следеа само неколку часа по обраќањето на Зеленски. На самитот на Г-20 во Индонезија, Зеленски ги повика најголемите светски економии да го зајакнат своето лидерство и да ја запрат војната во неговата земја во согласност со мировниот план од десет точки за мирно решение на конфликтот со Русија, што тој го предложи. (МИА)

Шефот на кабинетот на Зеленски: Русија не успеа да ја постигне целта

Ивана Ефремовски — Wed, 21 Sep 2022 08:50:07 +0000

Андриј Јермак, шефот на кабинетот на украинскиот претседател на Твитер објави слика од видео-конференција за која рече дека ја одржал со членовите на Комитетот за разузнавање на Претставничкиот дом на САД. -Повеќе од шест месеци целосна војна против Украина, Русија не успеа да ја постигне својата цел. Ова се случи благодарение на храброста на украинскиот народ и помошта на нашите меѓународни партнери, напиша Јермак на Твитер. (МИА)

Шефот на кабинетот на Зеленски: Изјавата на Лавров докажува дека Русија е закана за Евреите

Тале Кристо — Wed, 04 May 2022 10:17:32 +0000

Неодамнешните изјави на рускиот министер за надворешни работи Сергеј Лавров за еврејската крв на Адолф Хитлер докажуваат дека Москва претставува закана за Евреите насекаде и се граничи со негирањето на Холокаустот, изјави Андриј Јермак, шеф на кабинетот на украинскиот претседател Володимир Зеленски. – Тоа повторно покажа дека Русија претставува егзистенцијална закана, не само за Украина, со најмалку 100.000 Евреи, туку и за целата еврејска нација низ светот, истакна Јермак за израелскиот весник „Тајмс оф Израел“. Шефот на руската дипломатија во неделата за италијанска телевизија изјави дека „Хитлер имал и еврејска крв“ и дека „некои од најлошите антисемитисти се Евреи“. Неговите изјави како одговор на прашање за тврдењето на Москва дека инвазијата врз Украина е обид да се денацифицира таа земја, иако нејзиниот претседател Зеленски е Евреин, беа остро критикувани. Јермак отворено зборуваше за своето еврејско потекло и рече дека членовите на семејството на неговиот татко, Евреин роден во Киев, биле убиени во масакрот во Бабин Јар во септември 1941 година, кога нацистите и нивните локални сојузници убија 33.000 Евреи. Тој ги повика и Израел и еврејските организации да одговорат на изјавите на Лавров, поддржувајќи ја реакцијата на Зеленски, кој праша дали Израел треба да го намали нивото на односите со Москва. Засега не е јасно дали предизвиканиот јаз ќе има пошироки дипломатски последици или ќе влијае на одлуката за проширување на помошта за Украина. Јермак очекува изјавите на рускиот министер и, како што рече, воените злосторства на Русија, кои се повеќе се очевидни, да ја поттикнат Владата на Израел да заземе проукраинска позиција. Главниот руски рабин Берел Лазар, исто така, ги критикуваше изјавите на Лавров, нарекувајќи ги шокантни и побара Лавров да се извини. – Не се сметам себеси за компетентен да му дадам совети на шефот на руската дипломатија, но би било убаво тој да им се извини на Евреите и едноставно да признае дека згрешил, вели рабинот, кој има блиски врски со рускиот претседател Владимир Путин.

Шефот на кабинетот на Зеленски смета дека Русија „почнува со гасна уцена“

Ивона Петрова — Wed, 27 Apr 2022 06:40:37 +0000

Киев ја обвини Русија за уцена на Европа, со прекинот на испораката на гас за Полска и Бугарија, како и дека со тоа се обидува да го разбие единството на сојузниците на Украина. Како што јавуваат странските агенции, Полска, која е членка на НАТО, е меѓу европските земји што бараат најстроги можни санкции против Русија, поради инвазијата на Украина. Бугарија, исто така членка на Алијансата, речиси е во целост зависна од увозот на рускиот гас. Шефот на кабинетот на украинскиот претседател Володимир Зеленски, Андриј Јермак, смета дека Русија „почнува со гасна уцена“. – Русија се обидува да го разбие единството на нашите сојузници. Земјата, исто така, докажува дека енергетските ресурси се оружје. Затоа Европската унија треба да биде обединета и да воведе ембарго на енергетски ресурси, одземајќи им го на Русите нивното енергетско оружје, изјави Јермак. Рускиот претседател Владимир Путин побара „непријателските“ земји да плаќаат за гас во рубљи, што, досега, ова го прифатија само неколку купувачи.

ВИДЕО: Ослободен украински градоначалник, бил разменет за руски војници

Ивона Петрова — Thu, 17 Mar 2022 07:07:38 +0000

Руските сили го ослободија градоначалникот на градот Мелитопол, кого го заробија минатата недела, соопшти денеска шефот на кабинетот на претседателот Володимир Зеленски, Андриј Јермак. Според властите тој бил разменет за деветмина руски војници, заробени во Украина. „Градоначалникот на Мелитопол, Иван Федоров, е ослободен од руско заробеништво“, објави Јермак на социјалните мрежи. Украина соопшти дека руските сили го киднапирале Федоров минатиот петок. Во видео што синоќа на Телеграм го постави заменик-шефот на кабинетот на Зеленски, украинскиот претседател разговара со Иван Фјодоров, му честита за неговото спасување и го уверува дека Украина не го напушта својот народ. Од спротивната страна, градоначалникот му одговори дека ќе му требаат ден-два да се врати на работа. Како одговор, Зеленски рече дека не може да „вети два дена“, но го охрабри градоначалникот да се одмори.

Mer Melitopola Iwan Fedorow na wolności. Rozmawiał z nim prezydent Wołodymyr Zełenski. Nieznane są szczegóły jego wyzwolenia od Rosjan. Wideo TG Kyryło Tymoszenko pic.twitter.com/qxfigaVdxr
— Piotr Pogorzelski (@PogorzelskiP) March 16, 2022

Заменик-шефот на кабинетот на Зеленски, Кирил Тимошенко, во посебна објава рече дека спасувањето на градоначалникот дошло по „специјална операција“. „Ви благодарам што не ме напуштивте. Ќе ми требаат ден-два да се опоравам, а потоа ќе ви стојам на располагање да придонесам за нашата победа“, рече тој. Даша Заривна, портпаролка на претседателската администрација, доцна синоќа изјави за украинската телевизија дека Фјодоров бил заменет за деветмина заробени руски војници на возраст од 20 и 21 година. – Тоа се главно деца, војници, кои, според руското Министерство за одбрана, не се наоѓаат во Украина, потенцираше Заривна. Градоначалникот на Днипро, друг град во јужна Украина, исто така беше киднапиран во неделата, што предизвика силна осуда од Европската унија.