антибиотици – Kurir.mk

Намалување на антибиотиците за 20 отсто до 2030 година – препорачува Советот на ЕУ

Ивана Ефремовски — Tue, 13 Jun 2023 16:21:43 +0000

Министрите за здравство на земјите-членки на Европска Унија на денешниот состанокот во Луксембург усвоија препорака за намалување на потрошувачка на антимикробни лекови, меѓу другото и намалување на потрошувачката на антибиотици за 20 отсто од 2030 година. -Не можеме да ја игнорираме смртоносната закана што микроорганизмите отпорни на лекови ја претставуваат по здравјето на луѓето. Борбата против антимикробната резистенција беше клучен приоритет на шведското претседателство, а денешната препорака им дава на земјите на ЕУ алатки за следење и намалување на потрошувачката на антимикробни средства, истакна шведски министер за социјални работи и јавно здравје, Јакоб Форсмед. Антимикробните средства се лекови од критична важност. Сепак, поради нивната прекумерна употреба и злоупотреба со текот на годините, антимикробната резистенција е зголемена, што значи дека антимикробните средства ја губат својата ефикасност, што го прави сè потешко или невозможно лекувањето на инфекциите. Здравството е во надлежност на земјите-членки, затоа Советот на ЕУ не може да донесува обврзувачки регулативи туку препораки кои земјите-членки можат да ги спроведуваат на доброволна основа. Препораката е фокусирана на превенција и контрола на инфекции, надзор и мониторинг, иновации и достапност на ефективни антимикробни средства, претпазлива употреба и соработка меѓу земјите-членки и на глобално ниво. (МИА)

ЕК: Преголем број Европејци сѐ уште погрешно употребуваат антибиотици

Ивана Ефремовски — Thu, 17 Nov 2022 12:42:48 +0000

Европската Комисија објави анализа за употребата на антибиотици во ЕУ, а резултатите сѐ уште не се задоволителни. Утре се одбележува паневропскиот ден на сензибилизација против антибиотици. По овој повод анализата покажува дека преголем број граѓани во ЕУ и натаму веруваат дека антибиотиците убиваат вируси, што е медицински погрешно. Според анкетата 23 отсто од испитаниците употребиле антибиотик во измината година, што е сепак најнизок број од 2009 и покажува подобрување на знаењето на граѓаните. Но, како што посочува Европската Комисија, преостанува уште многу работа на полето на сензибилизацијата. Комисијата алармира повторно дека отпорноста на антибиотици е една од трите најголеми опасности за здравјето на луѓето. За да се надмине проблемот Комисијата повикува на засилена координација меѓу земјите членки на ЕУ. Секоја година во ЕУ, Исланд и Норвешка над 35 илјади луѓе умираат поради инфекции отпорни на антибиотик. Ова значи дополнителен товар од 1,5 милиони ера за здравствените системи во ЕУ. Во овој контекст Европската Комисија најави дека на почетокот на идната година ќе предложи промени на фармацевтското законодавство за справување со овој проблем и препорака до Советот на ЕУ. (МИА)

Три природни антибиотици, лековите не се секогаш решение

Ивана Ефремовски — Fri, 03 Dec 2021 12:44:19 +0000

Сите знаеме дека антибиотиците со напредокот на медицината достигнаа да се хемиски спој од неколку природни елементи. Жалфија Порано се користела како антибиотик. Особено е добра за грлото, респираторните инфекции, како и инфекциите во устата. Исто така е корсна за желудечните инфекции и проблемите со цревата. Помага и при намалување на температурата и болките во телото кои се јавуваат на почетокот на настинка и грип. Мед Докажано е дека има антибактериски особини, дека може да излечи осип на кожата, изгореници и гребнатини, да ги исчисти забите и устата од бактерии и да го запре крварењето на непцата, а делотворен е и во лекувањето на чиреви и пликови. Но, многу е важно да изберете вистински мед. Цимет Во едно истражување откриено е дека циметот може да ги уништи повеќето бактерии кои се наоѓаат во болниците, но и дека е смртен непријател на бактеријата Ешерихија коли.

Професор Трајковски: Со антибиотици НЕ се лекува коронавирус

Ивана Ефремовски — Tue, 14 Sep 2021 16:16:54 +0000

Според Светската Здравствена Организација, САРС Ков-2 е вирус и затоа антибиотиците не треба да се користат како начин за превенција или лекување од него, истакна професорот Дејан Трајковски во својата најнова ковид анализа. -Според СЗО, САРС Ков-2 е вирус и затоа антибиотиците не треба да се користат како начин за превенција или лекување од него. Но, додаваат дека хоспитализираните можат да примат антибиотик поради можна бактериска коинфекција.Значи, со антибиотиците евентуално може да се лекува некаква споредна инфекција (на пример добиена на болница), но дефинитивно НЕ може да се излекува од ковид-19. Дали антибиотиците можат да направат штета кај болните од ковид-19, не пишува. Не дај Боже тоа да било случај во македонските болници и да имало врска со високиот леталитет, пишува профeсорот Трајковски.

Никако не смеете да се сончате ако пиете антибиотици, а еве и зошто

Дарко Андоновски — Sat, 14 Aug 2021 14:04:53 +0000

Прекумерното изложување на сончева светлина може да доведе до брчки и други оштетувања на кожата, дури и рак. Сепак, она што многумина можеби не го знаат е дека земањето одредени лекови може да ги зголеми ефектите на сонцето. Така, некои антибиотици можат да ги направат луѓето почувствителни на сонце, особено оние со посветла кожа и очи. Некои лекови содржат соединенија кои, активирани со UVA зрачење, можат да ги оштетат клеточните мембрани и, во некои случаи, ДНК. Последиците може да бидат сериозни изгореници од сонце на изложени делови од телото. Во ретки случаи, лековите исто така можат да предизвикаат алергиска реакција на изложување на сонце, предизвикувајќи осип што може да го покрие целото тело. Што е фотосензитивност? Некои антибиотици во комбинација со изложување на сонце може да доведат до фотосензитивност, односно чувствителност на ултравиолетовите зраци. Долготрајната изложеност на сонце може да го зголеми ризикот од изгореници од сонце. Постојат два вида фотосензитивност: фототоксична и фотоалергиска реакција. Фотоотоксични реакции се јавуваат кога нова хемикалија во нашето тело комуницира со УВ зраци. Резултатот е осип на кожата што изгледа како сериозно изгореници од сонце, кои обично се развиваат во рок од 24 часа по изложувањето на сонце. Фотоалергиските реакции се јавуваат и како несакан ефект на некои лекови, но тие можат да се појават и поради хемикалии кои се наоѓаат во козметиката и кремите за сончање. Со овој тип на реакција, обично се потребни неколку дена за да се развие осип по изложување на сончева светлина. Симптоми на фотосензитивност Симптомите се движат од благи до тешки. Најчестиот симптом е осип или изгореници од сонце. Осипот може или не може да предизвика чешање. Во некои случаи, изгореници од сонце може да бидат толку силни што се појавуваат плускавци. Количината на изложеност на сонце потребна за реакцијата варира во голема мера. Кај некои луѓе, многу малку изложување на сонце може да предизвика осип или изгореници, додека во некои реакции ќе се појави по продолжено изложување. Најдобар начин да ги спречите симптомите на фотосензитивност е да го ограничите времето поминато на сонце. Луѓето чувствителни на светло секогаш треба да користат крема за сончање кога се на отворено. Покривањето и заштитата на кожата, исто така, може да спречи проблеми. Носете капи, очила за сонце и кошули со долги ракави изработени од природни материјали. Овие едноставни совети можат да помогнат да се заштити вашата кожа. Ако имате здравствени проблеми во летните месеци што може да се решат со употреба на антибиотици, проверете кај вашиот лекар за да видите дали можете да останете на сонце. Во продолжение, детално прочитајте ги упатствата што доаѓаат со лекот, во кои јасно ќе се наведе дали е важно да се избегне изложување на сонце колку што е можно додека го земате овој лек за да избегнете потенцијални реакции. Најбезбедно е, ако веќе имате таква терапија во летните месеци, да го прескокнете сончањето и да бидете внимателни неколку дена по земањето на терапијата.

Борел: ЕУ треба да има здравствена независност

Ивона Петрова — Thu, 07 May 2020 07:03:10 +0000

Европа мора да извлече поука од корона-кризата и да ја гарантира својата стратешка независност во клучните области како што се производство на лекови, залихи, па дури и преместување на производство, рече шефот на европската дипломатија Жосеп Борел. „Не е нормално Европа да не произведува ниту еден грам парацетамол, а Кина да обезбедува 80 проценти од светското производство на антибиотици“, им рече Борел на неколку европски дневни весници. „Досега, мислевме дека не е важно каде се произведуваат производите, дека светскиот пазар снабдува се, во секое време и насекаде“, објасни шефот за надворешна политика на ЕУ, додавајќи дека ова се покажало како погрешно во време на криза. Санитарната криза поврзана со појавата на коронавирусот во Европа ја зголеми побарувачката и предизвика нарушувања на синџирот на снабдување. Во моментов, 80 проценти од активните супстанции што се користат за лекови во ЕУ доаѓаат од трети земји, особено Индија и Кина, се вели во извештајот за францускиот Сенат за 2018 година од 2018 година. „Не велам дека секој мора да произведува се, самостојно, но синџирот на снабдување мора да биде пократок и зошто да не има производствени центри во близина. Зошто да не произведуваме дел од нашите потреби во Африка, кој е се поголем корисник на лекови“, предложи тој. „Пандемијата ја покажа и потребата за стратешко снабдување со медицинска опрема, како што сега постојат стратешки резерви на нафта“, додаде Борел.

Новиот коронавирус закана за глобален недостиг од антибиотици

Ивона Петрова — Tue, 18 Feb 2020 06:32:20 +0000

Државите во светот може да се соочат со недостиг на антибиотици доколку не се решат проблемите со фармацевтската индустрија предизвикани од епидемијата на коронавирус во Кина. Тоа го изјави Jорг Вутке, претседател на трговската комора на Европската унија во Кина, на тркалезната маса во Пекинг. Вутке нагласи дека епидемијата на новиот коронавирус имала негативно влијание врз синхронизирањето на доставувањата на антибиотици во Кина. Во меѓувреме, бројот на смртни случаи од новиот коронавирус во Кина е 1868, соопштија кинеските власти.

46 отсто од студентите на УКИМ земаат антибиотици и без претходно консултирање со лекар

Дарко Андоновски — Thu, 21 Nov 2019 14:15:54 +0000

Четириесет и шест отсто од студентите на Универзитетот „Св. Кирил и Методиј“ во Скопје земаат антибиотици и без претходно консултирање со лекар, а 38 отсто од нив сметаат дека антибиотиците помагаат при лекување на сезонски грип, покажуваат резултатите од последното анкетно истражување што во изминатите два месеци го спроведе Здружението на студенти по медицина (ЗСМ). Од Здружението соопштија дека по повод одбележувањето на Светската недела за рационална употреба на антибиотици (од 18 до 24 ноември) спровеле анкетно истражување во изминатите два месеци со цел добивање на информации околу степенот на познавањата на студентите при Универзитетот „Св. Кирил и Методиј“ во Скопје за правилната употреба на антибиотиците и појавата на антибиотската резистенција. Со анкетата биле опфатени 1.024 испитаници.

Состанок на националната мрежа за следење на антимикробната резистенција

Ивона Петрова — Tue, 19 Nov 2019 06:58:31 +0000

Состанок на националната мрежа за следење на антимикробната резистенција ќе се одржи денеска во просториите на Домот на хуманитарни организации „Даре Џамбаз“ во Скопје, во рамки на одбележувањето на Светската недела за рационална употреба на антибиотици. Состанокот ќе се одржи во организација на Мултисекторската комисија за контрола на антимикробна резистенција при Министерство за здравство и во соработка со Здружението на микробиолози и ЦРИС „Студиорум“. Податоците покажуваат дека во светски рамки, вклучително и во нашата држава, антимикробната резистенција, односно отпорноста на бактериите кон антибиотиците е растечка закана за глобалното здравје. Секоја година во светот умираат околу 700 илјади лица, како резултат на инфекции со бактерии отпорни кон повеќе антибиотици. Отпорноста кон антибиотиците е причина за смрт на 33 илјади луѓе во Европската унија секоја година и овој број постојано се зголемува. Светската недела за подигнување на свеста за антибиотици традиционално се одбележува во ноември, со цел зголемување на глобалната свест за отпорност кон антибиотиците и стимулирање на примената на најдобрите практики кај пошироката јавност, здравствените работници и креаторите на политики.

Франција троши трипати повеќе антибиотици од Холандија, европска земја со најмала потрошувачка

Катерина Бојаџиева — Mon, 18 Nov 2019 09:49:27 +0000

Останува уште многу да се направи за потрошувачката на антибиотици во Франција, иако таа беше стабилизирана, па дури и малку намалена по медиумските кампањи, јавува дописникот на МИА. Оваа констатација е дел од извештајот објавен по повод светската недела за рационална употреба на антибиотици. Целта на оваа недела е да се привлече вниманието на јавноста кон отпорноста на антибиотици (факт дека некои бактерии сега стануваат отпорни на антибиотици), што светските здравствени власти го сметаат за голема закана. Проценката на агенцијата за Јавно здравје на Франција се однесува на антибиотиците издадени на рецепт во градските ординации (надвор од болниците), односно 93 отсто од вкупната потрошувачка. Таа се заснова на два индикатори: бројот на потрошени дози и бројот на рецепти. Ако се земе предвид првиот показател, потрошувачката на антибиотици во градската медицина се „стабилизира“ по зголемувањето помеѓу 2014 и 2016 година. Таа изнесува 22,5 дози дневно на 1.000 жители во 2018 година, наспроти 22,7 во 2009. Со цел да се добие попрецизен увид, здравствените власти годинава користат нов показател, бројот на рецепти. Тоа покажува дека потрошувачката на антибиотици паднала за 15 отсто помеѓу 2009 и 2018 година (од 2,81 на 2,38 на 1.000 жители на ден). -И во двата случаи, тоа е доста охрабрувачко. Сепак, има уште многу долг пат, бидејќи Франција останува една од најлошите ученици во Европа: таа е на трето место според потрошувачката на антибиотици меѓу европските земји (зад Грција и Кипар), вели Бруно Коињард, директор за заразни болести во јавното здравство Франција. Ако се собере потрошувачката во „градската“ медицина и болниците, „Франција е со 25,3 дози на 1.000 жители на ден, но европскиот просек е 19,8“, вели д-р Коињард. Земјата со најдобри перформанси е Холандија со приближно 9,7 дози, што значи дека се трошат трипати повеќе антибиотици во Франција. Според извештајот, „здравственото осигурување би можело да заштеди 400 милиони евра доколку француската потрошувачка е иста како и онаа на Холандија“. Како да се објасни оваа француска специфичност, која опстојува и покрај препораките? Со „практики и историја во пристапот кон лекови кои варираат од земја до земја“, вели д-р Коињард. Во Франција „грижата за пациентите е многу заснована на третман: пациентот чека рецепт и лекови по консултацијата. Навиките тешко се менуваат, а тука се културните и емотивните аспекти на препишувањето на антибиотици. Некои лекари ќе сакаат да „допрат широк опсег на лекување“ и ќе се обидат да решат проблем со третман со антибиотици уште од самиот почеток, наместо да му кажат на пациентот да се врати на консултација во наредните денови ако тоа е потребно. Предизвикот не е само да препишува помалку лекови, туку и подобро, со размислување за изборот на видот на антибиотици или времетраењето на третманот, што може да биде и пократко, вели Коињард. Доколку потрошувачката се намалува за децата по 14 години, таа се зголеми кај лицата со над 65 години, популацијата која е „кревка и повеќе склона кон инфекции“, објаснува д-р Коњигард. Покрај тоа, целокупната потрошувачка варира во зависност од регионот на Франција. Така националниот просек е надминат на азурниот брег и Горна Франција, а е пониска во делот на Лоара, Оверњ-Рона-Алпи и Бретања.