апостоли – Kurir.mk

Црквата денес слави дел од апостолите кои го објавуваа спасението

Ивона Петрова — Sat, 13 Nov 2021 08:15:39 +0000

Денеска е Св. апостоли Стахиј, Амплиј, Урбан, Наркис, Апелиј и Аристовул. Покрај 12-те врховни апостоли, Христос испрати уште 70 други да го објавуваат спасението на сите нешта. Меѓу нив беа и овие, кои Црквата ги слави денес. Стахиј, Амплиј и Урбан му беа соработници на свети Андреј Првоповиканиот, брат на апостол Петар. Тројцата беа подоцна епископи. Урбан беше еископ во Македонија. Тој и Амплиј пострадаа маченички. Свети Наркис беше епископ во Атина, Апелиј во Хераклеа Тракиска. Аристовул му беше брат на апостол Варнава и го прооведаше воскреснатиот Христос во Британија. Таму и го заврши привремениот живот и се пресели во небесните населби на Бога Отецот и неговиот единствен син Христос.

Денеска се празнуваат овие свети апостоли

Ивана Ефремовски — Fri, 23 Nov 2018 08:35:28 +0000

Според календарот на МПЦ (Јулијанскиот календар) денеска е 10 ноември. Денеска е Св. апостоли Олимп, Родион, Ераст, Кварт, Сосипатер и Терциј. Сите беа од редот на 70-те апостоли. Олимп и Родион пострадаа во Рим, за време на Нероновото гонење, заедно со апостол Петар. Родион претходно беше епископ во Неопатра и таму многу пострада од евреите. Ераст, пак, прво беше економ на Ерусалимската црква, а подоцна епископ во Панеада, во Палестина. Кварт беше епископ во Бејрут. Сосипатер и Терциј беа, еден по друг, епископи во Иконија. Првиот подоцна отиде на Крф, каде го проповедаше распнатиот и воскреснатиот Христос, а Терциј пострада маченички во Иконија. Последниов го запиша Посланието на свети апостол Павле до Римјаните.

Денес е Петровден, среќен именден Петар, Петра, Петранка

Ивона Петрова — Thu, 12 Jul 2018 06:07:02 +0000

Денеска е Св. апостоли Петар и Павле - Петровден. Со овој празник завршува еден од четирите повеќедневни пости во годината, кој е врзан за празникот на Апостолите. Денес црквата ги слави двајцата врховни апостоли Петар и Павле. А и историски нивниот празник се утврди пред празникот посветен на 12-те, т.е. на сите апостоли. Апостолот Петар се прославува како образец на цврстата и искрена вера, а Павле како оној кој најмогу се потрудил во проповедањето на распнатиот и воскреснат Исус Христос. Инаку тие, како и сите останати апостоли, имаат свои посебни празници во текот на богослужбеното годишно време. По примањето на Светиот Дух апостолите се растуриле по светот за да ја проповедаат светата Христова вера. На тој план меѓу нив најповеќе се истакнале светите апостоли Петар и Павле. На иконите, светите апостоли Петар и Павле се претставени заедно, Петар со клучеви од рајот, а Павле со меч, симбол на сопствената смрт. Именден празнуваат: Петар (Камен, Каменко), Петре, Петра, Петранка, Петруна.