арда ѓулер – Kurir.mk

Арда Ѓулер повторно се повреди

Ристе Здравков — Tue, 26 Sep 2023 16:08:48 +0000

Новото засилување Арда Ѓулер заработи нова повреда на денешниот тренинг на Реал Мадрид и се врати во амбулантата на тимот, објави шпанскиот печат. Овојпат повредата на талентираниот турски играч за врска е бутниот мускул на десната нога и ќе го оддалечи од терените меѓу две и три недели. Ова е крајно лоша вест за младиот играч за врска, за кој Карло Анчелоти вчера тврдеше дека е подготвен и дека ќе биде дел од составот за мечот со Лас Палмас, кога се очекуваше да дебитира. Ѓулер дојде на „Сантијаго Бернабеу“ во текот на летото и добиваше огромни пофалби за неговите игри на првите тренинзи со неговите нови соиграчи. За време на северноамериканската турнеја на Реал Мадрид, тој доживеа непријатност во десното колено и потоа му беше дијагностициран проблем со менискусот. Турчинот беше подложен на мала операција и беше на рехабилитација за да се опорави. Тој беше целосно вклучен во тимот веќе некое време, но Анчелоти бавно го внесуваше во тимот за да му даде шанса да биде целосно подготвен, но сега Ѓулер повторно ќе биде надвор од теренот барем до репрезентативната пауза во средината на октомври.

Арда се опоравува од повредата со асистенција од подмладокот на Модриќ (ВИДЕО)

Ристе Здравков — Fri, 01 Sep 2023 06:19:16 +0000

Арда Ѓулер мораше да направи операција на коленото за да го санира проблемот со менискусот, а тоа го одложи неговото деби во првиот тим на Реал Мадрид. Фудбалскиот бисер од Турција пристигна во летниот преоден рок и со својот потенцијал брзо привлече големо внимание, но за жал фановите на Реал ќе мора да почекаат за да го видат на терените. Карло Анчелоти минатата седмица изјави дека Ѓулер може да се стави на располагање на тимот по репрезентативната пауза која следи, а сега пристигна потврда дека работи со полна пареа. Талентираниот Турчин постојано објавува видеа од теретаната во Валдебебас, но на последниот тренинг добил специјална асистенција за време на вежбите. Ѓулер го тагна Лука Модриќ на социјалните мрежи и долови како неговата мала ќерка му помага побрзо да се врати на терените.

Големото засилување на Реал Мадрид го повреди коленото

Бошко Тасиќ — Sun, 30 Jul 2023 05:41:09 +0000

Арда Ѓулер ќе мора да почека за своето деби во дресот на Реал Мадрид откако беше обелоденето дека турскиот суперталент се мачи со незгодна повреда на десното колено. Ѓулер треба да биде големо засилување за „кралевите“, кои во трката за овој трансфер ја победија Барселона, но Карло Анчелоти се уште нема можност да го види на дело турскиот репрезентативец. Тој мораше да тренира изолирано на турнејата во САД, а откако првите третмани не вродија со плод, дополнителните прегледи покажаа дека станува збор за проблем со менискусот на коленото. Првите информации велат дека Турчинот нема да мора да биде опериран, но во секој случај ќе го очекува извесен период на мирување и Ѓулер ќе пропушти најмалку еден месец од стартот на сезоната.

Арда Ѓулар ги напушта подготовките на Реал и се враќа во Мадрид

Ристе Здравков — Sat, 29 Jul 2023 17:40:05 +0000

Големиот турски талент, Арда Ѓулер вечерва ќе се врати во Мадрид каде ќе биде подложен на специјален третман за повредата која ја заработи на подготовките на кралскиот клуб. Ѓулер пред веќе неколку дена тренираше сам поради повреда, сакаше да се опорави за некој од следните мечеви на Реал Мадрид, но тоа нема да се случи. Последните информации велат дека Ѓулер се враќа во Мадрид каде ќе има специјален третман за санирање на повредата. Станува збор за повреда на десниот менискус.

Реал Мадрид официјално го претстави турскиот „бисер“, неговата мајка во солзи радосници

Ристе Здравков — Fri, 07 Jul 2023 15:12:55 +0000

Денес точно напладне Реал Мадрид го претстави своето најново засилување, турскиот фудбалски „бисер“, Арда Ѓулер. 18-годишниот Турчин пристигна во Мадрид и беше претставен на медиумите, а неговата мајка беше пресреќна и не можеже да ги задржи солзите. Целото потесно семејство на младиот фудбалер присуствуваше во церемонијалната сала на „Сантиаго Бернабеу“, а емоциите беа големи кај сите, вклучително и кај Ѓулер. Се случи и еден интересен момент кога претседателот Флорентино Перез го изговори неговото име, па иако Арда Ѓулер не требаше веднаш да дојде на подиумот, тој стана и му се придружи на Перез додека сè уште го држеше својот говор.

Miscommunication 😅| Arda Guler went on the stage before Florentino could finish his speech. pic.twitter.com/NeSTe04joh
— Real Madrid Info ³⁵ (@RMadridInfo) July 7, 2023

Оваа ситуација беше навистина малку комична и ги насмеа повеќето присутни во салата. Фудбалското „чудо“ и најголемиот турски талент, пристигна од тимот на Фенербахче, а „кралскиот клуб“ за неговиот трансфер плати дваесет милиони евра. „Младите играчи кои доаѓаат во нашиот клуб се јасна претстава за стратегијата што ја имаме. Сакаме да креираме големи ѕвезди кои во иднина ќе бидат носители на играта во Реал. Ние секогаш ги сакаме фудбалерите кои се подготвени да освојат буквално сè што може. Ѓулер беше следен од најголемите европски клубови и многу ми е драго што доаѓа кај нас. Добредојде, Арда“, изјави Флорентино Перез. Младиот турски талент потекнува од школата на Генчлербирлиги, а потоа премина во Фенербахче каде постигна седум голови на 32 натпревари. Најпрво беше објавено дека Ѓулер ќе остане уште една година во гигантот од Истанбул, но изгледа дека веднаш ќе му се стави на располагање на тренерот Карло Анчелоти. Се претпоставува дека во блиска иднина тој ќе ја носи славната „десетка“ на Реал Мадрид, веднаш по заминувањето на Лука Модриќ.

Познати се деталите за трансфер на Ѓулер во Реал Мадрид

Бошко Тасиќ — Thu, 06 Jul 2023 05:03:28 +0000

Фудбалските тимови на Реал Мадрид и Фенербахче си подадоа рака каде големиот турски фудбалси талент Арда Ѓулер се сели на Сантијаго Бернабеу во Мадрид. Во наредните денови Ѓулер и официјално ќе биде промовиран како ново засилување за Реал Мадрид. Кралскиот клуб за овој трансфер ќе плати 20 милиони евра фиксна сума како обесштетување, плус бонуси и даноци за трансферот. Надвор од овие трошоци, Реал Мадрид ќе плати и провизија на агентот на Ѓулер, односно на неговиот татко. Фенербахче ќе има 20 проценти од следната продажба на Ѓулер Турчинот ова лето ќе му се приклучи на Реал Мадрид, не во 2024 како што некои шпекулираа. Медицинските тестови се закажани. Договорот кој ќе го потпише Ѓулер со Реал Мадрид ќе биде на шест години.

Милан плаќа над откупната клаузула за да го победи Реал до потписот на талентираниот Ѓулер

Ристе Здравков — Mon, 26 Jun 2023 11:41:47 +0000

Турскиот весник Фанатик пишува за стратегиите на Реал Мадрид и Милан кои се надмудруваат на трансфер пазарот и се обидуваат да стигнат до потписот на талентираниот Арда Ѓулер. 18 годишниот Арда Ѓулер важи за голем талент, многумина го сметаат за „турскиот Меси“ и се очекува ова лето да ја промени средината. За неговите услуги подолго време интерес пројавуваат клубови како Салцбург, Лајпциг, Севиља, Борусија Дортмунд но и Реал Мадрид, Барселона и Милан. Турскиот весник Фанатик пишува за стратегиите на гигантите и како тие се надмудруваат со цел да стигнат до потписот на Арда Ѓулер. Реал Мадрид е подготвен да ја активира откупната клаузула во неговиот договр вредна 17,5 милиони евра и да го остави на позајмица во Фенербахче уште една сезона. Милан пак е подготвен да плати над откупната клаузула односно околу 22 милиони евра, плус бонуси, плус на Фенербахче да му даде процент од следната продажба. Секако, на крајот треба да одлучи и Арда Ѓулер и да го одбере проектот кој најмногу му одговара.