Археолошки музеј – Kurir.mk

Комисија за култура на ВМРО-ДПМНЕ: „Јубилеј 100 години Археолошки музеј“ е непостоечкиот јубилеј

Ивана Ефремовски — Mon, 20 Feb 2023 19:04:55 +0000

Со цел наменско трошење на и онака тенкиот буџет во културата, во знак на искрена поддршка на заложбите на министерката д-р Бисера Костадиновска-Стојчевска за „економична“ и „балансирана“ распределба, Комисијата за култура на ВМРО-ДПМНЕ му укажува на Министерството за „култура“ дека треба да бидат повлечени 400 000 денари за одбележување на т.н. „Јубилеј 100 години Археолошки музеј“ поради непостоечкиот јубилеј, реагираат од ВМРО-ДПМНЕ. Во продолжение го пренесуваме нивното соопштение: Не е на одмет да ви дадеме уште неколку од бројните бесплатни поуки. Археолошкиот музеј на Македонија како посебен правен субјект во 2023 година ќе одбележи јубилеј од скромни 11 години постоење, и тоа благодарение на Владата на ВМРО-ДПМНЕ, која во 2012 година реализираше еден ваков огромен подвиг. Гарнитурата на СДС(М), денес ставена во сервилна улога како подизведувач на агендите на нивните газди од ДУИ, како и отаде границата на исток, Бугарија, се познати по неоснованата храброст да прекројуваат и ревидираат историски факти. Преку т.н. историски комисии навикнати се да лажираат избори, анкети, скрининзи и европски преговори, а овојпат преку нивните неспособни менаџери во културата продолжија со замена на тези, одобрувајќи речиси половина милион денари за настан кој ќе биде прославен како јубилеј кој не соодвестува со историските факти. Како појаснување за јавноста да знае, а и да ја потсетиме научната фела и „стручната комисија“ која ги додели средствата: 1) во 1920 година е основана археолошка збирка која функционира во рамките на Филозофскиот факултет; 2) истата збирка 1924 година започнува да функционира како Историско-археолошки музеј со лапидариум (Музеј на Вардарска Бановина/Музеј на Јужна Србија) во Куршумли ан; 3) за време на II светска војна го добива името Народен музеј, сместен исто така во Куршумли ан; 4) во 1949 год. го добива името Археолошки музеј на Македонија, сместен во зградата на касарната на Скопското Кале, каде по Скопскот земјотрес не постои; 5) во 1976 год. е пуштена во употреба градбата Музеј на Македонија, каде што во 1982 година археологијата почнува да функционира како оддел. Штом не знаете да ви појасниме! Во 2012 год. за првпат во историјата е основан нов правен субјект, НУ Археолошки музеј на Македонија - Скопје, како нова матична установа од областа на археологијата, чие име го сменивте преку ноќ за никој да не ве види, кој во 2014 година, за првпат доби негов простор во самиот центар на Скопје, повторно благодарение на Владата на ВМРО-ДПМНЕ. Тогаш, за каков јубилеј 100 години Археолошки музеј станува збор? Како сте тргнале, кутриот, нема да почека ни полнолетство, а истите вие го уништувате и однадвор и однатре. Археолошкиот музеј на Македонија наместо паметник за милениусмкото цивилизациско постоење на Македонија, Владата на ДУИ и СДС(М) целосно и во континуитет го запустува, го запоставува, го цензурира, а вие се фотографирате само меѓу празните витрини. Колку за споредба и заради бележење на институционалната меморија, кога истиот музеј во 2019 година одбележуваше т.н. јубилеј 95 години Археолошки музеј, во ретроспективниот видеозапис беше изземен посебниот правен субјект Археолошки музеј на Македонија, регистриран 2012, а отворен 2014 година, од втората директорка по ред во режимот на СДС(М), д-р Славица Бабамова. Истовремено, „100-годишниот јубилеј“ годинава би се одбележал со отстранетата постојана нумизматичка збирка од вашиот прв режимски директор, Горан Санев, на чие место ќе гостува изложбата од Бугарија под наслов „Сребрена Тракија“. И ако 1 април 1924 година е датумот на втемелувањето на музејската дејност во Македонија, како што стои на веб-страница од Археолошкиот музеј на Македонија, јубилејот е 2024, а не 2023 година. Исто така, во официјална информација не е наведено постоењето на музејот од 2014 година. Ако веќе се одбележува јубилеј, треба да се одбележува 100 години археолошки инситуционален истражувачки континуитет во Македонија, а редно би било да го признаете историскиот успех и востановувањето на посебниот правен субјект специјализиран за археологијата од 2012 година – Археолошкиот музеј на Македонија. Патем, во јубилејот никаде не стои именката - Македонија, а клучното нагласување на 100-те години, всушност, е потиснување на успехот на Владата на ВМРО-ДПМНЕ, имајќи предвид дека во нејзинот мандат за првпат се изгради и се отвори самостоен Археолошки музеј на Македонија! Годинава СДС(М) може да слави само: 9 години Археолошки музеј на Македонија и 2 години од нивниот Археолошки музеј на „Република Северна Македонија“ со нивните заслуги: 1) растурање на постојаната поставка и 2) внесување на додавката „северна“. Колку завидливост кон бисерот на македонската археологија! Но празни души, празен музеј.

Комисија за култура на ВМРО-ДПМНЕ: Археолошкиот музеј вредното македонско културно наследство го чува затворено во своето депо и го крие од очите на јавноста

Дарко Андоновски — Fri, 26 Aug 2022 12:34:36 +0000

Комисијата за култура на ВМРО-ДПМНЕ преку статус на Фејсбук обвинува дека во Археолошкиот музеј исто како и во приказната на Али Баба, кој љубоморно од сите го криел своето неверојатно богатство заклучено во пештера само за себе, така и Националната установа - Археолошки музеј на Македонија - вредното македонско културно наследство го чува затворено во своето депо и го крие од очите на јавноста, додека отвора изложба со фотографии од сопствената ризница. -„ПЕШТЕРАТА“ НА AРХЕОЛОШКИОТ МУЗЕЈ НА МАКЕДОНИЈА!!! Исто како и во приказната на Али Баба, кој љубоморно од сите го криел своето неверојатно богатство заклучено во пештера само за себе, така и Националната установа - Археолошки музеј на Македонија - вредното македонско културно наследство го чува затворено во своето депо и го крие од очите на јавноста, додека отвора изложба со фотографии од сопствената ризница. Случајно или не, ретката македонска публика која влегува во оваa репрезентативна зграда во самиот центар на Скопје веќе одамна нема што да види во неа и никако не може да види артефакти за својот национален и идентитетски корен, што, за жал, можеби е и посакуваната цел. Во Археолошкиот музеј веќе неколку години не е изложена античката збирка, која сведочи за повеќе од илјада години македонска историја на ова тло и на која работеле стотици археолози и историчари, и сега таа се крие по депоа и подруми, додека половина Музеј зјае празен!? Исто така, и репрезентативната нумизматичка збирка која ја отсликува комплетно македонската милениумска историја и која има повеќе изданија со јасно читлив натпис - Македонија - е трајно отстранета од управата на Музејот. Новата реалност во Археолошкиот музеј на Македонија покажува дека сега македонската и странската публика во оваа исклучително значајна музејска установа ќе можат да гледаат само фотографии од предметите и артефактите, додека истите се чуваат во депото на самата зграда, уништувајќи го на овој начин восхитот на посетителот кога тој пред себе гледа вреден археолошки предмет стар илјадници години. Комисијата за култура на ВМРО-ДПМНЕ смета дека Министерката за култура Бисера Костадиновска Стојчевска и директорката на Археолошкиот музеј, Славица Бабамова, веднаш треба јавно и јасно да ја објаснат новата реалност во Археолошкиот музеј, установа која сериозно го губи стекнатото реноме и станува установа за потсмев од страна на незадоволните посетители, но и на пошироката јавност. Министерката за култура и директорката на Установата да објаснат кои се активностите на Археолошкиот музеј, зошто е нефункционален, кои се причините за стопираните археолошки истражувања и истражувањата без никаков резултат и цел? Исто така, бараме одговори на прашањата: кои се причините за мноштвото привремено ангажирани вработени и нивната потреба; кои се причините за игнорантскиот однос на Владата на СДСМ-ДУИ кон вредностите и достигнувањата на македонската археологија? Али Баба го криел богатството љубоморно од сите. Тој имал јасна цел: да го зачува за себе. Во новата реалност (приказна), сегашната власта го трга македонското археолошко богатство од очите на јавноста со друга, поинаква цел. Јавноста ја сфаќа оваа нова приказна. Во „пештерата“ на оваа власт се прикрива и крие македонскиот идентитет. Централна Комисија за Култура на ВМРО-ДПМНЕ, стои во нивниот пост на Фејсбук.

Почнува проектот „Музејска едукација преку цртежи“ на Археолошкиот музеј

Ивона Петрова — Mon, 13 Apr 2020 05:15:41 +0000

Археолошкиот музеј денеска започнува со проектот „Музејска едукација преку цртежи“. Музејските предмети ќе ги објавуваат на нивните социјални мрежи – на фејсбук и на новиот инстаграм профил arheoloshki_muzej. Како што посочуваат од Музејот, секој кој ќе се вклучи во овој проект потребно е да ги сподели цртежите со #МузејскаЕдукација преку #Цртежи и да го тагне профилот на музејот. Сите деца кои ќе бидат дел од оваа иницијатива ќе бидат поканети на бесплатна едукативна работилница во нивното едукативно катче, а за возрасните кои ќе се вклучат ќе следи бесплатна посета на Археолошкиот музеј веднаш по завршувањето на вонредната состојба. – Во овие денови на изолација за #СедиДома на децата им се потребни најразлични едукативни активности. Преку оваа активност децата, цртајќи ги музејските предмети кои ќе ги објавуваме, ќе се запознаат со археологијата и нашето богато културно наследство, како и со примената на тие предмети во минатото. Ги охрабруваме и возрасните да се приклучат во овој креативен проект и да ги споделуваат со нас нацртаните цртежи, се вели во соопштението

„Статусни симболи кај пајонските заедници” – изложба во Археолошкиот музеј

Ивона Петрова — Thu, 12 Dec 2019 07:10:27 +0000

Археолошкиот музеј денеска ќе ја отвори изложбата „Статусни симболи кај пајонските заедници”, која ја организира во соработка со Музеј Гевгелија. Изложбата е приказ на пет богати женски погребувања од некрополите Лисичин Дол и Милци кои по своите карактеристики се издвојуваат од останатите погребувања во населбата. Тие се во изворна состојба, добро зачувани и прикажуваат нови типови религиозни комплети од групата на т.н „Македонски пајонски бронзи”. -Самата појава на предмети од типот на „македонски пајонски бронзи” ги издвојува од нивниот статус што го имале во заедницата, Сите елементи проткаени низ изложбата „Статусни симболи кај пајонските заедници” отвораат и нови прашања за карактерот и животот на пајонските заедници од железното време, наведува Археолошкиот музеј за изложбата која ќе може да се посети до март 2020 година.

Изложбата „100 години Требениште“ останува во Скопје до крајот на месецов

Ивона Петрова — Thu, 08 Aug 2019 06:58:32 +0000

Уште 20-ина дена јавноста има можност во Археолошкиот музеј во Скопје да ја види ексклузивната меѓународна изложба „100 години Требениште“ која претставува околу 400 вредни артефакти откриени во некрополата Требениште кај Охрид, меѓу кои е и златната маска прикажана на 500-денарките. Од нејзиното откривање во 1932, оваа маска првпат ја напушти матичната поставка во Народниот музеј во Белград за да гостува во Археолошкиот музеј по повод едновековниот јубилеј од откривањето на некрополата Требениште во 1918 година. Од Археолошкиот музеј за МИА велат дека од средината на март, кога беше отворена, изложбата досега ја виделе речиси 10 000 посетители. Изложбата „100 години Требениште“ беше долго подготвувана и организирана во соработка со Народниот музеј во Белград и Националниот археолошки институт и Музеј во Софија, каде што ќе гостува во наредните две години како заеднички проект на три држави. Интерес има и во Париз, Берлин, Загреб и Виена, како и во други градови за кои Археолошки дополнително ќе информира по затворањето на изложбата на 31 август. Посетителите најмногу ги привлекле и се интересирале токму за четирите златни маски т.е. одразите на ликови од непознати владетели втиснати во златна фолија. Се работи за великодостојници кои во 6 и 5 век п.н.е., во т.н. архајски период, го населувале северниот брег на Охридското Езеро. Но, исто така, посетителите се восхитени и од изложениот накит од злато, сребро и килибар, ексклузивните садови изработени од сребро и стакло, керамика итн. Сето тоа било скриено повеќе од две и пол илјади години под слоеви земја во гробницата во Требениште до случајното откривање на 20 мај 1918 година кога бугарски војници го поправале патот меѓу Охрид и Кичево, веројатно за воени потреби. Во градежните зафати тие користеле камења од околните ниви. Златната маска претставена на нашата банкнота од 500 денари е откриена во 1932 година при втората кампања на истражувањата на требенишката некропола од српски археолози. Таа е најдена во гроб на женски покојник и засега е единствената златна маска откриена на овој локалитет која ѝ припаѓа на благородничка, за разлика од останатите три златни посмртни маски кои им припаѓаат на требенишките владетели. Оваа и уште една златна маска од четирите претставени на изложбата се чуваат во Народниот музеј во Белград, а другите две златни маски денес се дел од збирката на Националниот археолошки институт и Музеј во Софија. Сите четири маски потекнуваат од 6-тиот и почетокот на 5 век п.н.е. До крајот на август изложбата е отворена за посетители од вторник до недела од 10 до 18 часот. Влезот е 200 денари. Гостувачката изложба од Казахстан, пак, која го прикажува Златниот човек – најпознатиот артефакт на таа азиска земја, во Археолошкиот музеј може да се види до недела, 11 август. Влезот за оваа изложба е бесплатен.