„Артемис 2“ – Kurir.mk

НАСА: „Артемис 2“ закажан за ноември 2024 година

Катерина Бојаџиева — Wed, 08 Mar 2023 11:31:31 +0000

Американската Национална воздушно-вселенска администрација - НАСА соопшти дека, според досегашниот тек, е на добар пат да ја оствари својата мисија со луѓе околу Месечината следниот ноември, по успешниот пробен лет без посада. Притоа е објавено ажурирање за програмата „Артемис“ за испраќање луѓе на Месечината. Инаку, првата мисија „Артемис 1“ заврши успешно во декември кога капсулата „Орион“ без астронаути и по повеќе од 25 дена патување околу Месечината - без да слета на неа, потоа се врати безбедно на Земјата. Ако сѐ оди според очекувањата, „Артемис 2“ ќе полета во ноември 2024 година, и треба да однесе четворица луѓе околу Месечината, повторно - без да слета на единствениот природен сателит на Земјата. НАСА подоцна оваа година ќе ги открие имињата на членовите на посадата. Засега се знае дека само еден од нив ќе биде Канаѓанец. А пак, „Артемис 3“, планирана за околу 12 месеци по мисијата „2“, ќе треба да слета со астронаути, првпат на Јужниот Пол на Месечината. НАСА, исто така, се надева дека подоцна ќе почне и оствари повеќегодишно патување до Марс. Во рамки на мисиите „Артемис“, НАСА планира да испрати жена и личност која не е белец, на Месечината.

Во тек изборот за екипаж за „Артемис 2“

Ивона Петрова — Mon, 30 Jan 2023 11:23:50 +0000

Во првата половина на оваа година, НАСА ќе го избере екипажот од четири лица за својата програма „Артемис“ за праќање на астронаути на Месечината, првпат по 50 години. Закажана за 2024 година, „Артемис 2“ ќе биде првата мисија на програмата, со цел заобиколување на Месечината со летало и посада, летајќи подалеку во вселената од кој било човек од програмата „Аполо“, на пр., и така отворајќи го патот за екипажот на „Артемис 3“, т.е. слетување со луѓе на Месечината во 2025 година. Полетувањето најверојатно ќе се случи во вселенскиот центар „Џонсон“ на НАСА во Хјустон. Сè тоа ќе чини околу 100 милијарди долари. Процесот на избор на екипажот е таен. Освен што ја објави националноста на астронаутите – тројца Американци и Канаѓанец, НАСА не соопшти ништо друго. Oдредувањето тим за вселенските мисии отсекогаш било тајно и датира од 1950-тите, иако денес критериумите можеби се променети. Според познавачите, на врвот на листите со прогнози, е Рид Вајсман – 47-годишен одликуван авијатичар, кој првпат беше избран за астронаут на НАСА во 2009 година. Ако се избере Вајсман, белец – тоа би значело дека, најверојатно, преостанатите ќе бидат барем една жена и еден Афроамериканец.