асом – Kurir.mk

АСОМ со писмо до пратениците: Заштитете го сопствениот народ, не работете во корист на скриени владини интереси

Super Admin — Tue, 31 Oct 2023 09:54:14 +0000

Кажете СТОП на неевропскиот и неуставен предлог Закон за игри на среќа и заштитете го сопствениот народ, порача Асоцијацијата на спортски обложувалници на Македонија (АСОМ), во писмото кое го упати до пратениците од Комисијата за европски прашања.

„Предупредуваме дека овој закон ќе донесе катастрофални последици за целото општество со тоа што повеќе од 10.000 директно вработени и 54.000 индиректни работници ќе останат без приход и работа. Станува збор за ваши сограѓани чија поддршка во изборниот процес сите ја баравте ветувајќи подобри услови за живот во нашата земја. Сега овие луѓе кои плаќаат кредити, ја планираат својата иднина и иднината на своите деца, ќе бидат оставени без приходи во време на инфлација и економска криза.“- истакнува АСОМ.

Во писмото Асоцијацијата посочува дека новите предлог- измени ќе предизвикаат непоправливи економски штети за целата држава бидејќи ќе придонесат за затворање на една важна индустрија, која во буџетот годишно носи прилив од над 280 милиони евра. Се истакнува дека апсолутно се неприфатливи предлог измените кои предвидуваат дислокација на објектите, забрана за приредување игри на среќа на интернет за лиценцираните приредувачи, како и зголемување на давачките и надоместоците.

„Веруваме дека и самите вие сте свесни дека местото на овој закон не е во Комисијата за европски прашања и дека се прави сѐ овој неевропски закон насила да се избутка. Дека нашиот став е издржан и правилен укажува и фактот што вие како Комисија за европски прашања при Собранието на РСМ во заклучокот од одржаната седница по предлог текстот на законот му укажувате на Собранието посебно да го оцени аспектот за усогласеноста со ЕУ легислативата.“- потенцираат од АСОМ.

Од АСОМ посочуваат дека Собранието на РСМ нема преземено обврска за усогласување со препораките на ЕУ, па од таа причина означувањето на предлог текстот на законот со ЕУ знаменце е со целосна спротивност и со усвоените акти на Собранието за преземената обврската за усогласување со ЕУ легислативата.

„Ве повикуваме вас како Комисија за европски прашања да ги заштитите граѓаните на оваа земја и да го отфрлите овој закон кој е фатален, ја стимулира сивата економија и поттикнува криминални активности, што се покажа како пример во нашето соседство. Живееме во демократска земја во која на недемократски начин насилно се турка предлог законот кој е создаден без дебата и без консултација со претставниците на игри на среќа, далеку од очите на јавноста без да се земе во предвид мислењето на експертите и познавачите на индустријата. Немојте да бидете дел од овој заговор и немојте да поднесете одговорност за донесувањето на закон кој не е во корист на нашата земја.“- велат од АСОМ.

Во писмото Асоцијацијата предупредува дека овој закон веднаш штом ќе стапи на сила ќе донесе катастрофални последици за вработените во индустријата на игри на среќа, и ги повикува пратениците да не бидат заложници на нечии интереси, да реагираат на време и да ги заштитат граѓаните кои им ја доделиле сопствената доверба.

„Во повеќе наврати повторивме дека бараме итно повлекување на законот, формирање на заедничка работна група од експерти, претставници на индустријата и Владата за носење на нов европски и функционален закон, но наидовме на молк.“- истакнуваат од АСОМ.

АСОМ во писмото јасно посочува дека нивен интерес е самата индустрија да напредува, играчите и малолетниците да се заштитени и едуцирани, а легислативата да се европеизира.

„Апелираме до вас да имате слух за нашите барања и вашата одлука во врска со овој закон да ја донесете врз база на факти, раководејќи се од поривот да направите добро за граѓаните кои ги претставувате, а не да работите во корист на скриени владини интереси.“

Асоцијацијата во писмото потсети на нивниот предупредувачки собир пред Собранието преку кој покажува колку се сериозни во своите намери да се спречи носењето на штетниот предлог закон.

АСОМ: Анализата на РСЕ ги потврди нашите предупредувања дека тендерите на Државна лотарија се незаконски

Super Admin — Fri, 20 Oct 2023 11:46:50 +0000

Точно пред две недели стоејќи пред Владата предупредивме дека Државна лотарија ја спинува јавноста пласирајќи неточни информации во своја корист. Нашите ставови ги потврди и истражувањето на Радио Слободна Европа која е независна медиумска компанија, која добива грант од американскиот Конгрес и е должна според американскиот закон, да обезбеди објективно и професионално новинарство, засновано врз факти. Истражувањето на Радио Слободна Европа докажа дека дел од тендерите на Државна лотарија ги добиваат компании блиски на владеачката гарнитура, што дополнително ги потврди нашите тврдења дека владината одлука за отпочнување на постапка за основање на три нови друштва за приредување интернет игри на среќа е незаконска и дискриминирачка, а повикот на Државна лотарија е веќе договорен за странски компании. Ние ја предупредивме јавноста дека зад информациите кои ги пласира Државна лотарија стојат владини интереси, како и дека тенденциозно се објави информацијата дека повеќе од 10 домашни компании подигнале документација за наместениот тендер за избор на правни лица заради доделување договор за заедничко вложување во интернет игрите на среќа во коишто доминантно учество со 51 % ќе има Државна лотарија, и истакнавме дека ниту една членка на АСОМ нема да учествува на незаконскиот тендер. Анализата откри уште една манипулација на јавноста од страна на Државна лотарија која во соопштение испратено до сите медиуми се фалеше дека бележи раст во работата, што истражувањето докажа дека е неточно и уште еднаш ја доведе во прашање релевантноста на информациите кои Државна лотарија ги објавува. Податоците кои ги видовме во истражувањето на РСЕ се уште една силна причина зошто ниту една членка на АСОМ и ниту една домашна компанија нема да се јави на незаконскиот тендер за избор на приредувачи на игри на среќа преку интернет. Јасно се гледа дека и тој тендер е однапред договорен за 3 компании, како и сите други тендери на Државна лотарија. Ова повторно ја потврди нашата теза дека новиот предлог Законот за игри на среќа се турка во Собрание за да се направи обид да се озакони незаконскиот тендер, посебно во услови кога излегуваат на виделина низа скандали во Државна Лотарија. Повеќе од јасно е дека со донесување на новиот предлог Закон за игри на среќа и со незаконската Владина одлука за основање на три нови друштва за приредување на интернет игри на среќа крајна цел е преземање на Владата на бизнисот со игри на среќа, а не заштита на малолетниците како што тоа се сервира во јавноста. Токму затоа остануваме на нашиот став и без исклучок бараме:

Пратениците да го отфрлат новиот предлог Закон за игри на среќа кој ќе значи крај на легалната индустрија на игри на среќа.
Да се поништи незаконската владина одлука која претставува сериозна закана за домашните лиценцирани приредувачи на игри на среќа.
Итно да се вклучат сите засегнати страни во креирање на сите следни одлуки поврзани со индустријата.
Да се донесат подзаконските акти кои цела деценија се држат во фиока за домашните компании согласно актуелниот закон да може да приредуваат игри на среќа и реално да се либерализира пазарот.

Ние и нашите вработени нема да стоиме и да гледаме како Владата врши упад во бизнисот со игрите на среќа свесно ставајќи клуч на врата на една легална индустрија, која во буџетот годишно носи прилив од 280 милиони евра и вработува над 10.000 лица. Доколку Владата продолжи да го турка овој штетен закон насила и остане индиферентна на нашите апели подготвени сме да излеземе на масовни протести.

АСОМ: Подготвени сме за масовни протести и борба за нашите права и егзистенција

Super Admin — Thu, 05 Oct 2023 12:33:15 +0000

Доколку Владата остане глува на нашите апели подготвени сме да излеземе на масовни протести со цел да се бориме за нашите права и егзистенција, порачаа од Асоцијацијата на спортски обложувалници (АСОМ) на денешната прес-конференција пред Владата на РСМ. Асоцијацијата пред Владата уште еднаш јавно го повтори својот став дека владината одлука за отпочнување на постапка за основање на три нови друштва за приредување интернет игри на среќа е незаконска и дискриминирачка за домашните лиценцирани компании и ги истакна своите барања.

„Без исклучок бараме: да се донесат подзаконските акти кои цела деценија се држат во фиока за домашните компании согласно актуелниот закон да може да приредуваат игри на среќа и реално да се либерализира пазарот, да се поништи незаконската владина одлука која претставува сериозна закана за домашните лиценцирани приредувачи на игри на среќа и итно да се вклучат сите засегнати страни во креирање на сите следни одлуки поврзани со индустријата.“- порача претседателот на АСОМ Васко Илијевски.

АСОМ информираше дека поседува информација дека на Комисијата за европски прашања во Собранието насила ќе се обиде да се истурка новиот предлог Закон за игри на среќа, кој значи крај на легалната индустрија на игри на среќа, што во никој случај нема да го дозволи.

„Нема да стоиме мирно и да гледаме како Владата врши упад во бизнисот со игрите на среќа свесно ставајќи клуч на врата на една легална индустрија, која во буџетот годишно носи прилив од 280 милиони евра и вработува над 10.000 лица.“- истакна Илијевски.

Стоејќи пред Владата од Асоцијацијата јавно потврдија дека ниту една членка на АСОМ, Асоцијација во која членуваат над 95 проценти од претставниците на обложувалниците во земјава нема да учествува на незаконскиот однапред договорен тендер кој го објави Државна лотарија за избор на правни лица заради доделување договор за заедничко вложување во интернет игрите на среќа во коишто доминантно учество со 51 % ќе има Државна лотарија.

АСОМ до пратениците: Ќе се соочите со гневот на 10.000 вработени, отфрлете го Законот за игри на среќа

Катерина Бојаџиева — Wed, 04 Oct 2023 11:15:14 +0000

Асоцијацијата на спортски обожувалници (АСОМ) поседува информација дека на денешната Комисија за европски прашања во Собранието насила ќе се обиде да се истурка новиот предлог Закон за игри на среќа кој значи крај на легалната индустрија на игри на среќа и широко ќе ја отвори вратата на сивата економија и криминалот. Апелираме дека со насилниот обид да се донесе најдеструктивниот закон во историјата ќе се соочите со гневот на 10. 000 вработени во индустријата на игри на среќа кои ќе ги оставите на улица. Со овој предлог закон Владата врши упад во бизнисот со игрите на среќа свесно ставајќи клуч на врата на една легална индустрија, која во буџетот годишно носи прилив од 280 милиони евра. По донесувањето на незаконската одлука за отпочнување на дискриминирачката постапка за основање на три нови друштва за приредување интернет игри на среќа, сега Владата сака да го истурка и новиот предлог Закон за игри на среќа. Со ова целосно ќе се затвори легалната индустрија и приредувачи, додека Владата преку странски компании ќе го етаблира монополот во организација на онлајн игри на среќа. Овој очигледен план јасно кажуваме дека нема да помине. Државата тенденциозно скоро една деценија не ги донесува подзаконските акти со кои постоечкиот закон овозможува легалните приредувачи кои се на пазарот да организираат игри на среќа на интернет, иако министерот за финансии беше задолжен да ги донесе за 6 месеци. Целото ова смислено сценарио на Владата оди во една јасна насока, а тоа е дека станува збор за договорено сценарио со цел да се нанесе силен удар на домашните приредувачи на игри на среќа и да се отвори пазарот за странски однапред договорени компании. Државата свесно не уништува, а со тоа ја доведува во прашање егзистенцијата на 10.000 вработени и индиректно 54.000 луѓе кои живеат од работењето во домашните компании на игри на среќа. Уште еднаш јасно порачуваме, Законот за игри на среќа кој Владата сака насила да го донесе целосно го отфрламе и го сметаме за неевропски, неуставен и монополски. За нас апсолутно неприфатливи се предлог измените кои предвидуваат дислокација на објектите што значи целосно затворање, забрана за приредување игри на среќа на Интернет, зголемување на давачките и надоместоците, како и измените на Законот кои задираат во веќе постоечките лиценци, бидејќи истите значат колапс за нашата индустрија. Предлог измените ќе предизвикаат непоправливи економски штети за целата држава. Бараме итно од пратениците и Владата: 1) Пратениците да го отфрлат овој штетен предлог Закон за игри на среќа. 2) Да се донесат подзаконските акти кои цела деценија се држат во фиока за домашните компании согласно актуелниот закон да може да приредуваат игри на среќа и реално да се либерализира пазарот. 3) Да се поништи незаконската владина одлука која претставува сериозна закана за домашните лиценцирани приредувачи на игри на среќа, како и итно да се вклучат сите засегнати страни во креирање на сите следни одлуки поврзани со индустријата. Доколку надлежните не ги послушаат нашите апели подготвени сме на масовни протести и сериозна борба со цел да ја спречиме тенденциозната ликвидација на легалната индустрија на игри на среќа, велат од АСОМ.

АСОМ: Со сите механизми ќе ги спречиме штетните одлуки за отворање на нови три онлајн компании на државата

Super Admin — Sat, 30 Sep 2023 13:03:54 +0000

Силна осуда за Владината одлука за отпочнување на постапка за основање на три нови друштва за приредување интернет игри на среќа, изрази Асоцијацијата на спортски обложувалници (АСОМ) на вчерашниот брифинг со новинарите. Според Асоцијацијата одлуката ќе ја доведе во прашање егзистенцијата на постојните приредувачи на игри на среќа, кои веќе имаат инвестирано во кадар, опрема и простор. Станува збор за сериозни работодавачи со над 10 илјади вработени, кои плаќаат данок на државата од околу 280 милиони евра годишно и придонесуваат за општеството.

„Проблемот лежи во тоа што Министерството за финансии од 2014 година ги нема донесено подзаконските акти, без кои во пракса не можеме да приредуваме игри на среќа преку интернет. Вие ја следите нашата борба многу одамна. Со години бараме од Владата да ги донесе тие акти и тие упорно не ги носат, што е незаконски, и не спречуваат да организираме игри на среќа на интернет кои се всушност истите игри на среќа кои и сега ги приредуваме.“- вели Васко Илијевски, претседател на АСОМ .

Од АСОМ објаснуваат дека постоечкиот закон овозможува легалните приредувачи кои се на пазарот да организираат игри на среќа на интернет, а Владата и Министерството за финансии незаконски не ги донесуваат подзаконските акти цели 9 години, иако министерот за финансии бил должен да ги донесе за 6 месеци. Тие потенцираат дека одлуката која Владата три месеци ја криеше е незаконска.

„Државната лотарија се повикува одредбите на член 7, став 3 од Законот за игрите на среќа и забавните игри. Овој член не пропишува постапка и начин како и услови и критериуми за избор на приватен партнер. Преку овој повик јасно се гледа дека се прекршува Законот за игрите на среќа и забавните игри при што без прецизни законски услови и дефинирани критериуми се избираат приватни партнери. Ова е незаконски и намерно направено за тие да може да си изберат кого сакаат.“- објасни Илијевски.

Според АСОМ станува збор за смислено сценарио односно, договорена работа, наменета за странски однапред договорени компании, посочувајќи дека државата прво ги дискриминирала и не им дозволувала да приредуваат интернет игри на среќа, а сега како услов бара да имаат искуство во тоа што јасно укажува дека партнерите се веќе договорени и ги исполнуваат токму наведените специфични услови во јавниот повик. Тие најавија дека нема да отстапат се додека повикот не се поништи.

„Бараме да се поништи повикот кој е незаконски и дискриминирачки, да се донесат подзаконските акти кои со години се држат во фиока и реално да се либерализира пазарот и итно да се вклучат сите засегнати страни во креирање на сите следни одлуки поврзани со индустријата. Срамно, неевропски и недемократски е да се носат закони со кои се уништува гранката без никаква консултација со домашните компании. “ – истакна Илијевски.

Од АСОМ порачаа дека ќе ги преземат сите правни механизми за да ја докажат незаконитоста на владината одлука, најавувајќи дека доколку нивните апели бидат игнорирани тие се подготвени своите права да ги бараат преку протести, бидејќи оваа одлука сериозно ја загрозува егзистенцијата на сите вработени во оваа дејност.

АСОМ: Премиерот манипулира, странски, а не домашни фирми ќе се офајдат од интернет игри на среќа

Тале Кристо — Thu, 28 Sep 2023 12:44:03 +0000

„За каква либерализација говори премиерот кога на незаконски конкурс, скроен за странски компании и одлука донесена тајно се бираат новите компании партнери на Владата? Премиерот кој секојдневно посетува домашни компании каде кажува каква поддршка дава Владата за нив, реши да ги дискриминира домашните приредувачи на игри на среќа и да направи оглас со кој ќе се изберат странски, многу очиглендо однапред договорени компании. Премиерот и Владата, цели седум години колку се на Власт спротивно на законот не ги носат подзаконските акти на посточкиот закон со кој законски се либерализира пазарот како во сите европски земји и посточеките приредувачи можат да приредуваат онлајн игри на среќа. Ова не е никаква либерализација на пазарот, туку дополнителна монополизација на бизнисот од страна на државата со компании избрани на незаконски оглас. Во однос на приходите за кои говори премиерот, тоа е уште една манипулација со јавноста. Кога Владата го предлагаше новиот закон за игри на среќа, предлагаше неколкукратно покачување на давачките, огромен процент на данок за онлајн и земско играње на игри на среќа. Сега, Владата нема проблем да организира онлајн игри на среќа по закон за кој сметаа до вчера дека има прениски давачки. Го прашуваме премиерот, како тоа ќе печали државата по закон кој велевте дека има прениски даноци? Дали сега кога вие ќе си ги бирате компаниите ќе има и друг приход 'настрана' па давачките не се ниски? Овие срамни одлуки на Владата, тајни договори и срозување на домашните компании од индустријата на игри на среќа ќе бидат оспорени пред институците и ќе одиме до крај со барањето да се поништи овој незаконски повик“, се вели во реакцијата на АСОМ.

АСОМ предлага други решенија наместо дислокација на објектите за игра на среќа

Катерина Бојаџиева — Thu, 09 Mar 2023 11:52:13 +0000

Сива економија, крах на една индустрија и играње игри на среќа на црно, ќе предизвикаат новите измени на Законот за игри на среќа и забавни игри на автомати, оценуваат од Асоцијацијата на спортски обложувалници на Македонија (АСОМ). Тие на денешната прес-конференција побараа отворена јавна дебата со цел да се донесе соодветно законско решение кое ќе овозможи соодветно функционирање на оваа дејност. - Индустријата за игри на среќа вработува повеќе од 10.000 вработени директно, а индиректно преку 54 000 луѓе обезбедуваат приходи од работењето на оваа стопанска гранка. Негативите ефекти ќе се одразат најмногу врз вработените и врз приходите во буџетот на државата, кои според наша проценка се движат некаде преку 250 милиони евра на годишно ниво. Затоа уште еднаш ќе потенцираме дека за вакво законско решение е потребно да се отвори јавна расправа, односно дебата со сите институции кои се задолжени за носење на вакви закони како би се овозможило индустријата да ги изнесе сите факти, изјави Васко Илијевски, претседател на Асоцијацијата на спортски обложувалници на Македонија. Во однос на предлогот за дислоцирање на спортските обложувалници тој рече дека постојат други решенија. - Дистанцата е јасно дефинирана во членот 21 од Законот, каде што стои дека влез за малолетни лица е забранет. Јасно законодавецот предвидел кој може да учествува во игрите на среќа и сметаме дека тоа е доволна мерка која може да се подобри во насока доколку смета законодавецот да се зголеми казната, да се вклучи и другата страна на процесот доколку е затекнато на самото уплатно место, тука се мисли за малолетникот, родителот старателот, заштитата преку забраната на странските сајтови и она што како препорака го имавме работа на едукативни програми да помогнат на играчите да ја разберат услугата која ја нудат понудувачите на игрите, посочува Илијевски. Меѓутоа, од здружението „Антикоцкари“ не се согласни со ваквите ставови и велат дека казните не покажале никаков ефект, односно дека не се почитуваат забраните за влез во објектите. - Не знам зошто не им одговара дистанца, не се работи за затворање, треба да разјасниме некои работи и зошто на нив им смета оваа дислокација. Сме ги слушале тие приказни за едукации, дека постојат психолози, дека не се доозволува да се влегува на децата, но тоа нема никаков ефект, единствено решение е дислокација, вели Џемал Абдиу, од движењето „Антикоцкари“. Тој вели дека тоа го покажал и случај во добитник кој 15-годишник од Тетово. - Треба да се дислоцираат на три километри или да се затвораат. Да се помират со овие измени, да не се врши притисок и да сфатат дека животот не е коцка парите не се центар на светот. Не се почитува влезот на малолетници и самите се свесни дека не се почитува тоа, додава Абдиу. Предлог-законот за изменување и дополнување на Законот за игрите на среќа и за забавните игри, предложен од Министерството за финансии, во кој се предвидува просториите во кои се приредуваат игрите на среќа да бидат оддалечени од училиштата не помалку од 500 метри, беше утврден минатитот месец.

АСОМ: Владата го ускратува правото на дебата за предлог-измените на Законот за игри на среќа

Ивона Петрова — Mon, 06 Mar 2023 15:13:22 +0000

Асоцијацијата на спортски обложувалници на Македонија (АСОМ), денес по втор пат испрати писмо до Делегацијата на Европската Унија во земјава со цел да ја изрази својата загриженост што и покрај апелите на евроамбасадорот Дејвид Гир да не се врши злоупотреба на европско знаменце за скратување на дискусија при носење важни закони, Владата предлог измените на Законот за игри на среќа, ги достави до Комисијата за европски прашања во Собранието. „Нашите апели и заложби, повторно не беа сфатени сериозно, а тоа е очигледно бидејќи измените на Законот за индустријата за игри на среќа, се доставени на усвојување. Со тоа, Владата сепак изврши злоупотреба на европското знаме со цел да оневозможи јавна расправа за овој важен закон.“- се вели во писмото од АСОМ. Од Асоцијацијата велат дека оваа одлука е во спротивност со принципите на европските интеграции на нашата држава и сериозно задира во надлежноста на пратениците од Комисијата за европски прашања, посочувајќи дека Законот за игрите на среќа и забавните игри не подлежи на обврска за усогласување со донесена ЕУ Директива. „Членките на Европската унија немаат усогласено и донесено Директива која е правно обврзувачка за членките на Унијата и која истовремено ќе преставува обврска за пристапните членки на ЕУ да ја транспонираат таа директива во сопственото законодавство. Европската Унија има донесено Препорака CELEX32014H0478 која се однесува на заштита на потрошувачите и играчите на интернет игри на среќа и спречување на малолетниците за учество во интернет игрите на среќа. Предлагачот на законот како основ за означување на текстот на законот со ЕУ знаменце ја земал оваа препорака, која не е правно обврзувачка за членките на Унијата, а уште помалку за пристапните членки на ЕУ.“- велат од АСОМ. Според АСОМ означувањето на предлог текстот на законот со ЕУ знаменце, заради негово усогласување со Препорака на ЕУ преставува директна злоупотреба на механизмот за усогласување на домашното законодавство со законодавството на ЕУ. „Членовите на Комисијата не треба да го разгледуваат предлог Законот поради ненадлежност, дополнително новите измени се косат со Уставот на Република Северна Македонија, односно прекршуваат 4 члена од Уставот. Одлуката на Владата да ја забрани јавната дебата со злоупотреба на ЕУ знаменце за измените на постоечката законска регулатива за индустријата за игри на среќа, се коси со европските вредности. Токму тие европските вредности ѝ се потребни на самата земја за да има модерно, стабилно, развиено општество кое ќе ја води нашата држава кон членство во ЕУ. “- посочуваат во писмото од АСОМ. Асоцијацијата реагира дека Владата во овој случај го ускратува правото на дебата, демократско носење на одлуки и правните процедури. Од АСОМ посочуваат дека тоа се коси со европските нормативи и Владата наместо да се стреми во нашата држава да има европски институции, свесно создава неефикасни, кои не ги штитат граѓаните и бизнис секторот во земјата. АСОМ во писмото побараа средба со евроамбасадорот Дејвид Гир со цел лично да го информираат за злоупотребата и недемократскиот пристап на Владата кон индустријата на игри на среќа.

АСОМ: Стоп за срамниот, неевропски, неуставен, дискриминирачки и монополски Закон за игри на среќа!

Катерина Бојаџиева — Mon, 27 Feb 2023 12:39:57 +0000

Законот за игри на среќа кој Владата го криеше конечно e обелоденет. Овој предлог кој е доставен до Собранието е најлошиот предлог кој во историјата на државата бил предложен, а содржината, новите членови, давачките, условите за лиценцирање, монополизирањето на интернетот, оддалеченоста се целосно неприфатливи, велат од Асоцијацијата на спортcки обложувалници на Македонија. Овој закон е неуставен, монополски, дискриминирачки и како таков воопшто не може да биде предмет на расправа. Истиот бараме веднаш да се повлече и го отфрламе во целост. Неверојатно е дека и покрај сите апели на меѓународната заедница и Евроамбасадорот Гир, Владата повторно насила, без дебата и спротивно на легислативата сака да донесе закон со европско знаменце. Ова се прави само со цел да се избегне редовна постапка во која би биле разобличени целите, а апсурдноста на самиот закон би излегла на виделина. Како Асоцијација ова нема да го дозволиме и најавуваме жесток отпор на ова насилно, недемократско и неевропско однесување на Владата. Уште еднаш јавно прашуваме, зошто бегате од јавна дебата? Како може закон кој има несогледливи финансиски и економски реперкусии да се носи без дебата во комисиите за финансирање и буџет каде што треба да се еволуираат овие закони? Зошто бегате од соочување со претставниците на индустријата ако сте сигурни во своите предлози? Отворено прашуваме, чии интереси штитите или подобро што се крие зад оваа апсурдна идеја за насилно затворање на една легална индустрија? Асоцијација на спортски обложувалници во Македонија ги повикува пратениците од Комисијата за европски прашања: Арбер Адеми, Арта Билали-Зендели, Моника Зајкова, Зеќир Рамчиловиќ, Снежана Калеска-Ванчева, Фаница Николоска, Лолита Ристова, Жаклина Пешевска, Даниела Христова, Марија Петрушевска, Антонијо Милошоски, Миле Лефков, Мерита Колчи-Коџаџику, Халил Снопче, да не гласаат за измените на Законот за игри на среќа и истите да ги отфрлат бидејќи се со цел да згаснат една цела легална гранка и да овозможат цут на сивата економија. Нема ниеден основ по кој овој закон треба да биде во таа комисија, освен заради брзо гласање и мнозинство за истиот да помине. Јавно ве покануваме да се изјасните против европско знаменце, бидејќи нема ниедна причина овој закон да биде донесен во таква постапка. Немој да биде заложници за нечии скриени интереси и во име на европскиот пат на земјата немојте да изгласате неевропски закон! Како Асоцијација бараме од пратениците во Собранието да бидат чувари на процесот на демократија и усогласување на законодавството на Република Северна Македонија со законодавството на Европската Унија, а не гласачка машина за остварување нечии желби на штета на граѓаните. Постојат правни докази со кои може да се констатира дека европското знаменце се злоупотребува од страна на потписниците на оваа изјава. Имено, Предлог законот не го прати коресподентна табела во која јасно и на недвосмислен начин ќе се види кој дел од наведената директива во кој член од предлог законот е транспонирана, односно пренесена. Посочуваме дека на овој факт особено внимание треба да обрнат членовите на комисијата за европски прашања при Собранието. Предупредуваме дека праксата на усогласување на законите со правото на ЕУ не повлекува само давање на изјава туку и подготовка на коресподенна табела за пренесување на одредбите од ЕУ директивите во законите кај нас. Апелираме дека злоупотребата на европското знаменце употребено во овој закон ќе даде искривена слика за транспонирањето, односно пренесувањето на ЕУ регулативата CELEX 32014H0478. Предлагачот на законот не може да ја транспонира оваа ЕУ регулатива од причина што со овој предлог закон тежнее кон автократски режими во кои интернет просторот се забранува, наместо како што укажува ЕУ регулативата CELEX 32014H0478 да се регулира т.е. да се воспостават правила при приредувањето на општите и посебните игри на среќа преку интернет. Почитувани пратеници, вашите одлуки и вашиот глас се во име на граѓаните кои ви го дале мандатот, кои ве плаќаат и кои ги застапувате. ЕУ досега во повеќе наврати предупредува европското знаменце да не се злоупотребува, сега имате можност да докажете чии интереси застапувате. Дали на граѓаните или нечии други интереси кои се на штета на сите нас. Како Асоцијација сме подготвени за отворени за дебата, бидејќи нашата единствена цел е да се изнајде законско решение прифатливо за сите засегнати страни. Најавените измени во неколку наврати ги дефиниравме како неприфатливи и кобни за индустријата на игри на среќа, затоа доколку истите се донесат ќе излеземе на масовни протести. Покрај тоа, овој закон е опасен и за играчите и широко ги отвора вратите за сивата економија. Премиере Ковачевски, министре Бесими? Чии агенди исполнувате? Зошто законот го криевте? Зошто бегате од јавна дебата? Зошто се залагате за уништување на една легална гранка, која преку даноци и давачки го полни државниот буџет? Зошто сакате и се залагате 10.000 граѓани да оставите на улица без работа и од нив да направете социјални случаи ? Во чиј интерес е законот шверцерски да го донесете со злоупотреба на европското знаменце? Покрај оддалеченоста од 500 метри на објектите од училиштата поткрепена со наводната заштита на младата популација, законот содржи измени кои се нелогични и неуставни, многу сериозни финансиски импликации за оваа индустрија. Со измените Владата сака двојно да ги зголеми давачките за лиценци и нови уплатни места, што води кон затворање на индустријата. Затоа бараме измените на Законот за игри на среќа кои се испратени до Комисијата за европски прашања да се повлече, затоа што: Законот е за затворање на индустријата за игри на среќа. Законот е дискриминирачки. Законот е неуставен. Законот е монополски. Законот единствено е во корист на криминалот и на коцкањето на црно, стои во нивното соопштение.

АСОМ до Владата: На мала врата сакате да протнете штетен закон со кој се враќа дивото обложување

Катерина Бојаџиева — Fri, 10 Feb 2023 08:48:29 +0000

Асоцијацијата на спортски обложувалници на Македонија (АСОМ) денеска прати отворено писмо до Владата во кое пишува дека најмалку очекувале во „ек“ на економска криза таа да им го сврти грбот на 10.000 вработени во индустријата на игрите на среќа и од нив да направи социјални случаи. „Запрепастувачки за нас како Асоцијација е дека после толку долго време од нашите обиди и повици да се организира „јавна расправа“ за измените на Законот за игри на среќа, вие како Влада се оглушивте. Сега, на мала врата и по скратена постапка, сакате штетното законско решение да помине во Собрание, преку злоупотреба на европското знаменце“, пишува АСОМ во писмото до Владата. Во писмото АСОМ исто така прашува зошто измените и дополнувањата во Законот за игри на среќа и забавни игри треба да се донесат по скратена постапка со ЕУ знаменце и без да поминат јавна расправа и без да се слушнат засегнатите страни, пошироката и стручна јавност, која може и треба да даде свој коментар или нов пакет предлози. Со одлуката на Влада АСОМ се игнорира како официјална организација во која членуваат над 90% од приредувачите на игри на среќа. Што за Асоцијацијата на спортски обложувалници на Македонија отвора ново прашање: Дали и кој стои зад овие измени и чив интерес се штити? По однос на грижите на граѓаните од негативните последици АСОМ во отвореното писмо потсетува дека Владата ниту еднаш не ги зела во предвид низата решенија и законски измени кои биле доставувани до ЕНЕР системот, но и до Владата. „ Треба да биде јасно, дека нашата индустрија „НЕМА ИНТЕРЕС“ од играње ниту на малолетници, ниту има интерес од креирање зависности. Напротив, индустријата на игри на среќа има интерес игрите да се играат за забава и тоа силно го промовира. Годишно трошиме десетици илјади евра како компании за спроведување кампањи за заштита од негативни последици и едукација на играчите. Ние сме општествено одговорни компании, кои 100% ги почитуваат актуелните законски норми и правила поврзани со нашата дејност, плаќаме даноци и со тоа постојано ги зголемуваме буџетските приливи. Ние сме индустрија која е одлично регулирана во моментов, а нашите членки се компании кои работат согласно законите без никакви отстапки. Ако вие како Влада сакате на било кој начин да помогнете или придонесете, треба да бидете партнер во овие напори“, порача АСОМ во писмото до Влада. Според АСОМ затворањето на индустријата во државата значи враќање во деведесеттите и играње по подруми и нелегални објекти. Единствениот начин да се влијае позитивно е преку едукација и добра регулација. „АСОМ е против и до крај ќе се бори против нелогични и погрешни законски измени. Вашиот предлог како Влада не постои во ниедна европска земја, гарантирано ќе отвори пат до диво обложување и нема да го намали играњето или пак негативните последици од него“, пишува АСОМ. Во писмото до Владата АСОМ потсетува дека измените на Законот се направени без анализи, а одлуката за утврдување на измените и дополнувањата на овој закон и владините државнички одлуки се контрадикторни. „Нелогично е Владата со новиот Закон да дозволи затворање на 98% од објектите, и во исто време да очекува поголем број вработувања или поголеми приходи од зголемените давачки. Дислокација на објектите, значи нивно затворање, односно околу 250 милиони евра годишно помалку пари во буџетот. Одговорно тврдиме, а вие како Влада проверете со Министерството за финансии и другите институции, дека овој закон ќе значи директно губење на 10.000 работни места, а индиректно со намалени или целосно изгубени приходи ќе бидат 54.000 работници“, пишува АСОМ во писмото до Влада. Актуелниот закон според АСОМ ги опфаќа сите сегменти на контрола на игрите на среќа од сите надлежни институции. Согласно тоа, покрај законските регулативи и забрани за влез на малолетни лица во објектите, членките на Асоцијацијата спроведуваат и дополнителни контроли во објектите со цел да не дојде до било какво нарушување на законите. Тоа дополнително потврдува дека АСОМ како индустрија застапува светски реномирани брендови и висока професионалност во областа која ја работи. АСОМ исто така одбива да верува дека поради политичко популистички цели, дејноста свесно сака да се претстави како незаконска или нелегална. Според АСОМ, Владата со измените во Законот на широка врата дава „пас“ за нелегални диви обложувалници. „Ако вие како Влада навистина сакате добар закон, сè уште има можност да го сторите тоа, во Собрание преку поднесување амандмани. Нашата држава, како земја аспирант за членство во Европската Унија, треба ги искористи позитивните практики на европското законодавство. Повторно ќе ја потсетиме Владата дека во веќе постоечкиот Закон за игри на среќа, направен на база на европските закони. За крај, веруваме во добрите намери и даваме уште една шанса да седнеме на маса и заеднички да донесеме подобар закон. Ве повикуваме да отворите дебата, да повикате експерти и да направиме анализа за тоа какви измени би ги постигнале целите, кои верувајте дека се заеднички. Но, овој закон, во оваа форма, тоа не го постигнува и ние ќе ги преземеме сите правни механизми и законски можности да го спречиме неговото носење“, завршува АСОМ во писмото до Влада.