ПРЕП. АТАНАСИЈ АТОНСКИ: Миленик им беше на врсниците кои во детските игри ќе избереа овој за цар, оној за војвода, а Атанасиј за игумен

Магдалена Андонова — Sun, 18 Jul 2021 20:42:34 +0000

Денеска е 5 јули (по стар стил) и се слави Преподобен Атанасиј Атонски. Беше роден во Трапезунт, од богобојазливи родители. Рано остана сираче, а по Божја Промисла го зеде некој војвода, го одведе во Цариград и го даде да ги изучува науките. Заради својата кроткост и смиреност им беше миленик на врсниците. Во детските игри тие ќе го избереа овој за цар, оној за војвода, а Атанасиј за игумен. Како некое претскажување… Кога заврши со училиштето Атанасиј (до постригот Аврамиј) се оддалечи во Малеинската пустина, близу Света Гора, каде што се подвизуваше како ученик на прочуениот Михаил Малеин. Желен за потесен подвиг, се пресели на Света Гора заради безмолвие. Но, околу него почнаа да се собираат мнозина ревнители кон подвижничкиот живот и тој беше принуден да ја соѕида својата славна Лавра. Во тоа изобилно му помагаа византиските цареви, најпрво Никифор Фока којшто и самиот сакаше да се замонаши и да се повлече, а потоа Јован Цимисхиј. На свети Атанасиј навалуваа многубројни искушенија и од демоните и од луѓето, но тој како храбар Христов војник одолеваше на сè и со својата неизмерна кроткост и непрестајна молитва кон живиот Бог сите ги победуваше. Полн со Божја благодат, се удостои да ја види Пресвета Богородица, Којашто чудесно изведе вода од карпа и му вети дека секогаш ќе биде Икономиса (Игуманија) на манастирот. Атанасиј предничеше пред своите браќа и во работата и во молитвата и сите ги љубеше со љубов на пастир и духовен отец. Смртта му дојде ненадејно. Еднаш со шестмина монаси се искачи над една новоизградена црквена припрата да го прегледа ѕидот што се ѕидаше тогаш, но ѕидот се урна и сите ги затрупа. Така заврши овој голем светилник на монаштвото, во 980 година. По смртта повеќепати им се јавуваше на своите собраќа за да ги утеши или укори.

Денеска е Преподобен Атанасиј Атонски: Бог му даде дар да чудотвори

Ивана Ефремовски — Sat, 18 Jul 2020 08:48:47 +0000

Според календарот на МПЦ (Јулијанскиот календар) денеска е 5 јули. Денеска е Преподобен Атанасиј Атонски. Овој Атанасиј се роди во Трапезунт и живееше во десеттиот век. Крстеното име му беше Аврамиј. Рано остана сирак, па за него се грижеше некој византиски великодостојник кој подоцна го испрати во Цариград на школување. Потоа Аврамиј се подвизуваше како монах (сега со името Атанасиј) најпрвин кај познатиот Михаил Малеин, а потоа на Света Гора. Околу него наскоро се собраа голем број монаси кои ја изградија лаврата Свети Атанасиј Атонски, или Великата лавра. Заради големата чистота на срцето Бог му даде на свети Атанасиј дар да чудотвори. Се упокои во 980 година. Тешко е да се зборува за животот на еден ваков подвижник. ОД КАТОЛИЧКИОТ КАЛЕНДАР: Денеска е Св. Бруно. Бил роден во 1049 година, во Астија. Во 1080 година, папата Гргур Седми го прогласил за бискуп во Сењија. Тој му помогал на папата во борбата против мешањето на царот во внатрешните работи на црквата. Пишувал многу, па во историјата на христијанската книжевност бил познат како хагиограф, теолог, говорник и литургичар. Свети Бруно умрел во 1123 година.

Атанасиј Атонски – Kurir.mk

ПРЕП. АТАНАСИЈ АТОНСКИ: Миленик им беше на врсниците кои во детските игри ќе избереа овој за цар, оној за војвода, а Атанасиј за игумен

Денеска е Преподобен Атанасиј Атонски: Бог му даде дар да чудотвори