атп – Kurir.mk

АТП Мастерсите во Мадрид и Мајами ќе се играат во Саудиска Арабија?

Бошко Тасиќ — Sat, 04 Nov 2023 07:22:45 +0000

Саудиска Арабија продолжува со агресивно влегување во сите пори на врвниот спорт. Откако летово почна да станува важен играч на светската фудбалска карта, сега С. Арабија се обидува да пушти „корења“ и во професионалниот тенис. Како што објавија неколку шпански весници, Саудијците оваа година ќе го организираат финалето на турнирот за млади надежи „Next Gen“ (28 ноември до 2 декември), кој ги собира осумте најдобри тенисери до 21 година, но отпочна проект и за купување на лиценците на неколку Мастерс турнири. Според информациите, Арапите се во прва фаза на преговори за купување на лиценците за организацијата на АТП Мастерс турнирите од серијата 1000 во Мадрид и Мајами. И двете лиценци се во рацете на компанијата ИМГ, која може да се одлучи за продажба. Саудиските власти повеќе од една година водат разговори со преставници на високи тениски позиции за можни инвестиции. На влегувањето на Саудиска Арабија во тенисот се гледа позитивно, бидејќи на овој начин и АТП и ВТА би избегнале создавање на паралелно натпреварување, како што се случи во голфот.

АТП воведува „минималец“ за првите 250 играчи во светот

Бошко Тасиќ — Thu, 24 Aug 2023 04:12:30 +0000

АТП за првпат на тенисерите ќе им гарантира минимална плата како дел од тригодишниот пробен период што ќе започне во 2024 година, објави управното тело на машкиот тенис. Програмата „Baseline“ ќе обезбеди минимален приход на најдобрите 250 рангирани поединечни играчи секоја сезона, при што АТП ќе го покрие секој недостаток доколку нивната заработка падне под прагот, пренесе „Ројтерс“

За 2024 година, сумите се поставени на 300.000 долари за најдобрите 100 играчи, 150.000 долари за оние кои се рангирани од 101 до 175 и 75.000 долари за оние кои се рангирани помеѓу 176 и 250 во светот.

Пад на Ивановски на новата АТП ранг листа

Бошко Тасиќ — Mon, 03 Jul 2023 13:46:53 +0000

Најдобриот македонски тенисер во моментов, Калин Ивановски има пад од четири позиции на последното рангирање, пад има и Марковски, а напредок бележи Србљак. Ивановски има пад од четири позиции и во моментов се наоѓа на 370. место на АТП ранг листата со 131 поен. Горазд Србљак со поенот од Курмилијска Бања има напредок од 24 позиции и се качи на 1093 место. Обрад Марковски има пад од 14 места и сега е на 1227 место. На ВТА листата Лина Ѓорческа со 295 поени, колку што имаше и минатата недела, има пад од две места и сега се наоѓа на 249. позиција.

Гауденци реизбран за претседател на АТП

Ивона Петрова — Tue, 27 Jun 2023 09:40:24 +0000

Италијанецот Андреа Гауденци е реизбран на местото претседател на Асоцијацијата на тениски професионалци (АТП), објави синоќа организацијата. Гауденци застана на чело на АТП во 2020 година, а неговиот мандат сега е продолжен до 20206. Под негово водство дојде до зголемување на наградниот фонд во машкиот тенис за 37.5 милиони долари оваа година, што е најголем скок во историјата на тенисот во машка конкуренција. Гауденци најави дека сака да ја интензивира соработката со седумте управни тела во тенисот, меѓу кои се ВТА, Меѓународната тениска федерација и четирите грен – слем турнири (Австралија, опен, Ју-Ес Опен, Вимблдон и Ролан Гарос).

Алкараз нов лидер на АТП ранг-листата

Тале Кристо — Mon, 22 May 2023 06:47:30 +0000

Карлос Алкараз се најде на првата позиција на најновата АТП ранг-листа објавена денес. Шпанецот има 6.815 бодови. Едно место во однос на претходната недела напредуваше и Русинот Данил Медведев кој е втор со 6.330 бода. Со пад од две места, Србинот Новак Ѓоковиќ е трет. Тој по раната елиминација на Мастерсот во Рим, сега има 5.955 бода. Во ТОП 10 светски тенисери се и: Каспер Руд (Норвешка), Стефанос Циципас (Грција), Холгер Руне, Андреј Рубљов, Јаник Синер (Италија), Тејлор Фриц (САД) и Феликс Оже-Алијасим (Канада). Од македонските тенисери, најдобро котира Калин Ивановски – 415.место со 108 бодови.

Тенисот од 2025 година нема да има линиски судии

Бошко Тасиќ — Sun, 30 Apr 2023 05:09:46 +0000

АТП организацијата најави крупни промени од 2025 година кои ќе го турнат тенисот во една нова ера, во која на мечевите повеќе нема да има – линиски судии. Андреа Гаудензи, првиот човек на АТП објави дека линиските судии дефинитивно заминуваат во историја за две години и повеќе нема да бидат потребни на ниту еден турнир од календарот, зашто ќе ги замени „окото соколово“. Технолошкиот систем „хок-ај“ кој електронски ги проверува спорните моменти веќе од 2017 година се користи, а од 2017 година почна да се тестира постојано на мечевите, а првпат беше користен на „Некст Ген финалето“ во Милано истата година. За време на пандемијата со ковид-19, на турнирите беше озовможено да се користи „електроник лајв колинг“ (ЕЛЦ) по желба, а овој систем после ковид-19 е користен на низа турнири и сега според Гундези е дојдено време да се користи секаде, па и на турнирите на земјена подлога. „Добро ја донесовме оваа одлука и заклучивме дека иако линиските судии се традиционален дел од тенисот, мора да ги следиме новите трендови и да менуваме за навивачите и играчите да го доживеат најдоброто можно искуство. Најважно е на сите турнири да имаме добри и точни одлуки, а ЕЛЦ тоа ќе ни го овозможи“, рече Гуендези.

АТП не најде докази против Зверев за семејно насилство

Тале Кристо — Tue, 31 Jan 2023 16:38:57 +0000

Асоцијацијата на тениски професионалци (АТП) соопшти денеска дека нема доволно докази за казнување на германскиот тенисер Александр Зверев за семејно насилство. Зверев, кој неодамна беше втор тенисер во светот, а во моментов е рангиран на 14. место на АТП листата, беше обвинет од својата поранешна девојка за физичко злоставување. АТП во есента 2021 година отвори независна истрага, а денеска објави дека нема доволно докази за казнување и оти овој случај од нивна страна е завршен. Олга Шарипова, поранешната девојка на актуелниот олимписки првак, прво на социјалните мрежи обелодени дека, наводно, била жртва на физичко насилство, а подоцна и во интервјуа говореше дека Зверев ја тепал, задушувал со перница и ја заклучувал во хотелски соби. Сите овие наводи германскиот тенисер ги отфрли. АТП порача дека ќе преземе соодветни чекори доколку во иднина се појават нови докази.

АТП ќе плати рекордни 217,9 милиони долари во парична награда во 2023 година

Тале Кристо — Thu, 17 Nov 2022 13:40:47 +0000

Асоцијацијата на тениските професионалци (АТП) го објави најголемото зголемување на паричните награди во историјата. Вкупниот награден фонд на АТП турнирите и Челинџерс следната сезона ќе изнесува рекордни 217,9 милиони долари. Во однос на 2022 година ќе порасне за 17%, односно за 37,5 милиони. Наградниот фонд на АТП турнирите ќе порасне за 12% до 175 милиони. Да потсетиме дека оваа сума не ги зема предвид Грен слем наградите кои организаторите сами ги одредуваат. Наградниот фонд на Челинџер турнирите ќе порасне за 75% до 21,1 милиони.

Ѓоковиќ пред Циципас на АТП ранг листата

Ристе Здравков — Mon, 15 Aug 2022 07:05:59 +0000

Српскиот тенисер Новак Ѓоковиќ остана на шестата позиција на АТП ранг листата. Во понеделникот, 15 август, Ѓоковиќ го престигна Стефанос Циципас, кој беше рано поразен од Џек Дрејпер на Мастерсот во Монтреал. Сепак, српскиот тенисер, кој не учествуваше на турнирот бидејќи не можеше да отпатува во САД како невакциниран странец, не забележа никаков напредок на АТП ранг листата. Наместо него на петтата позиција сега е Каспер Руд, кој скокна две места со пласманот во полуфиналето на Монтреал. Данил Медведев и натаму прв, Зверев втор, Надал трет, Алкарас четврти… Што се однесува до останатите српски играчи, Кецмановиќ назадуваше, а Краиновиќ напредуваше за една позиција. Џере остана ист, а Лајовиќ падна за дури 19 места. АТП Топ 10: 1. Данил Медведев (6.885) 2. Александар Зверев (6.760) 3. Рафаел Надал (5.620) 4. Карлос Алкараз (5.045) 5. Каспер Руд (4.865) 6. Новак Ѓоковиќ (4.770) 7. Стефанос Циципас (4.650) 8. Андреј Рубљов (3.630) 9. Феликс Огер-Алијасим (3.625) 10. Хуберт Хуркач (3.435) —————————— 36. Миомир Кечмановиќ (1.210) 46. Филип Крајиновиќ (975) 86. Ласло Џере (607) 87. Душан Лајовиќ (600)

Вимблдон 2022 со рекорден вкупен награден фонд

Бошко Тасиќ — Thu, 09 Jun 2022 16:15:55 +0000

Вкупниот награден фонд за годинешниот Вимблдон ќе изнесува рекордни 40,3 милиони фунти, објавија денеска организаторите на третиот тениски Грен слем во сезоната. Победниците во машка и женска сингл конкуренција ќе освојат по два милиони фунти, што е помалку од 2,35 милиони фунти што ги добија во 2019 година, кога турнирот последен пат се одржа пред полни трибини. Меѓутоа, вкупниот фонд е зголемен за вкупно 5,4 отсто во однос на 2019 година, кога наградниот фонд изнесуваше 38 милиони фунти, а за 11 отсто во однос на минатата година, јави „Би-Би-Си“. Вимблдон им плати на тенисерите вкупно 10 милиони фунти во 2020 година, откако турнирот беше откажан поради пандемијата на коронавирусот. Зголемени се наградите за 40 отсто за тенисерите со инвалидска количка, а зголемени се и наградите за квалификациите. Квалификациите кои ќе ги поминат сите три рунди ќе добијат 62 000 фунти, додека победата во првиот круг од главниот настан ќе вреди 50 000 фунти. Вимблдон 2022 е на програмата од 27 јуни до 10 јули.