авио линии – Kurir.mk

Летови Сплит-Скопје, Белград-Охрид… и бројни сезонски линии со летниот ред на летање

Ивона Петрова — Sat, 25 Mar 2023 08:54:09 +0000

Нови летови и нови авиолинии од домашните аеродроми се најавуваат во текот на летната сезона. Летниот ред на летови започнува да се применува од ноќеска на полноќ. Од ТАВ Македонија за МИА велат дека очекуваат успешна летна сезона и оваа да биде година на целосно постпандемиско закрепнување. -„Lufthansa“ од 23 април ќе почне да лета на релација Франкфурт-Скопје-Франкфурт, со десет летови неделно. Нова дестинација, Сплит, ќе биде воведена од страна на „Croatia Airlines“ од скопскиот аеродром. Авиокомпанијата ќе лета меѓу главниот град на Северна Македонија и туристичкиот центар на Далмација во текот на летната сезона, од 12 мај до 14 октомври 2023 година, два пати неделно. Уште еден новитет доаѓа од охридскиот аеродром и од авиокомпанијата Air Serbia, која ќе ја обнови линијата Белград-Охрид од јуни 2023 година. Македонскиот туристички и културен центар Охрид ќе се поврзува авионски со Белград четири пати неделно, изјавија за МИА од ТАВ Македонија. Како и во изминатите летни сезони, и оваа, ќе има сезонски летови од скопскиот аеродром до летните дестинации како Анталија, Измир, Бодрум, Хургада и Тунис (Монастир/Енфида). Овие сезонски летови најчесто почнуваат кон крајот на мај се до октомври. -Секако, очекуваме и повеќе патници од сезонските линии на Охридскиот аеродром од традиционалните дестинации/земји од/до кои се лета во текот на летната сезона, како што се Холандија (Амстердам и Мастрихт) и Полска (Варшава и Катовице). Со ова, ТАВ Македонија очекува успешна летна сезона и очекува оваа година да биде година на целосно постпандемиско закрепнување, велат од ТАВ Македонија. Според актуелниот ред на летање за скопскиот аеродром, 20 авиокомпании сообраќаат до вкупно 44 дестинации, додека од охридскиот аеродром сообраќаат шест авиокомпании до девет дестинации. Сепак, како што потенцира аеродромскиот оператор, редот на летови секогаш може да претрпи промени, односно како што ги добиваат информациите од авиокомпаниите. Ова е причината поради која ТАВ Македонија секогаш ги советува патниците да ги следат веб-страниците на скопскиот и охридскиот аеродром за ажурирање во реално време и секако, да проверат кај авиокомпанијата со која патуваат. Според ТАВ Македонија, севкупно, зимската сезона може да се оцени како успешна, особено, како што потенцираат, ако се има предвид фактот дека сѐ уште на некој начин транзитираме од кризниот период и се стремиме да ги надминеме бројките од 2019 година. Аеродромскиот оператор посочува дека двата македонски аеродрома, Меѓународниот Аеродром Скопје и Аеродромот Св. Апостол Павле Охрид имаа успешна 2022 година со значително закрепнување на патничкиот авиосообраќај, со што достигнале приближно 2,4 милиони патници или вкупно 2.371.423 патници и 19.448 реализирани летови. -Ако се земат предвид бројките само за зимската сезона, 2022/2023 година, или периодот од 30 октомври 2022 година до 26 март, резултатите ги следат позитивните стапки на закрепнување на воздушниот сообраќај по кризата. Приближно 340 000 патници во ноември и во декември патувале од двата аеродрома, скопскиот и охридскиот. Сепак, она што особено нé радува е што 2023 година ја започнавме со нагорен тренд или првите два месеца покажуваат позитивни резултати и во однос на 2022 и 2019 година како референтна година, посочуваат од ТАВ Македонија. На скопскиот и охридскиот аеродром во јануари и февруари имало вкупно 310 127 патници, што е зголемување за околу 35, односно 56 отсто, соодветно. Во споредба со 2022 година, јануари годинава има зголемување на бројот на патници за три проценти, додека февруари е на речиси исто ниво со февруари 2019 година. -Добар позитивен тренд бележат и бројките за остварениот број на летови, а вкупните летови во периодот од ноември до февруари изнесуваат 5480, што повторно на месечно ниво, поединечно бележи зголемување на бројот на движење на авионите. Карго-сообраќајот за истиот период од четири месеци е 1133 тони. Бидејќи зимската сезона сè уште трае, сè уште немаме бројки за статистиките и бројките за сообраќај за март, но, сепак, со оглед на тоа како почна годината, уверени сме дека бројките ќе покажат зголемување на сообраќајот на патници и летови, велат за МИА од ТАВ Македонија. Нови авиолинии во државава се очекуваат со повикот за доделување субвенции. На 1 март минатата година заврши последниот од трите договори за субвенционирани летови со унгарскиот нискобуџетен авиопревозник „Виз ер”. Тековниот повик за субвенции следуваше по поништувањето на претходниот што го објави Министерството за транспорт и врски, на кој аплицираа авиокомпаниите „Виз ер“, „Луфтханза“ и „Ејџиан ерлајнс“, но Комисијата за евалуација констатираше дека не ја доставиле пропишаната комплетна документација. Од ТАВ Македонија, на прашањето на МИА како се одразува ваквиот тек на работите околу субвенционирањето на авиолините, порачуваат дека како аеродромски оператор со задоволство би ги поздравиле и пречекале новите авиокомпании и дека ќе продолжат да вложуваат напори и да инвестираат во одлични аеродромски услуги. -Субвенциите што им се доделуваат на авиокомпаниите се одличен инструмент за државата да привлече нови авиокомпании да започнат со работа од скопскиот или охридскиот аеродром. Новите авиокомпании секогаш носат нови дестинации, зголемени фреквенции и конкуренција, и конечно, луѓето можат да избираат од поширокиот избор на мапата со мрежа на дестинации и ќе го планираат своето патување со најповолната понуда и лет. Додавањето нови авиокомпании и воспоставувањето нови авиолинии се исто така корисни за зголемување на можностите за домашните и меѓународните патници кои патуваат од нашите аеродроми, за бизнис-заедницата, но и за регионот, бидејќи патниците од гравитациската зона дополнително би биле привлечени да патуваат од нашите аеродроми. Друга придобивка, исто така, е тоа што може да го направи нашиот воздухопловен пазар препознатлив во регионот со широка мрежа на дестинации, укажува аеродромскиот оператор. Со тековниот повик за субвенции се доделува финансиска поддршка за нови авиолинии за периодот 2023 - 2025 година. Износот за субвенциите за годинава изнесува 1,1 милион евра. Финансиската поддршка ќе се доделува согласно критериумите за рангирање на новите дестинации по следниот редослед: период на oперирање на дестинацијата, број на неделни летови, атрактивност на аеродромот кон кој оперира и број на седишта понудени на продажба. Поддршката ќе изнесува седум евра во денарска противвредност по патник во заминување превезен од Меѓународниот аеродром Скопје и 4,5 евра во денарска противвредност по патник во заминување превезен од аеродромот Св. Апостол Павле – Охрид. На јавниот повик можат да се пријават сите заинтересирани авиокомпании кои ги исполнуваат критериумите: да поседуваат уверение за работа издадено од земја членка на Европската Унија согласно прописите за издавање на уверение за работа на авиопревозници, да имаат превезено најмалку 10 милиони патници во 2019 година, да имаат остварено профит од минимум 25 милиони евра во 2019 година и да достават изјава заверена на нотар, дестинацијата за која добива финансиска поддршка од државата и по завршувањето на финансиската поддршка да продолжи да ја оперира за период за кој ги добивал субвенциите. Во спротивно ќе биде должен да го врати целиот износ на средства што ги добил како финансиска поддршка. Понуди на повикот може да се доставуваат до 31 месецов, а отворањето е предвидено за 3 април годинава во 12 часот.

Од 21 септември во Санкт Петрбург – се воведува директен лет од Скопје еднаш неделно, а за летовите до Москва има промена

Магдалена Андонова — Thu, 02 Sep 2021 13:10:40 +0000

Руската авиокомпанија Нордвинд Ерлајнс од 21 септември стартува нова авиолинија Санкт Петрбург – Скопје. Компанијата соопшти дека летовите ќе се одвиваат еднаш неделно, секој вторник. Од 29 септември, Нордвинд Ерлајнс планира да ја зголеми и фреквенцијата на летови од Москва до Скопје. Директни летови Москва – Скопје ќе има трипати неделно – секој понеделник, среда и петок. (МИА)

Се укинува оваа дестинација која беше промовирана пред два месеци- од Скопје повеќе нема да има директен лет кон овој европски град

Дарко Андоновски — Tue, 02 Feb 2021 14:36:56 +0000

Авионпревозникот „Виндроуз“ ја укинува линијата Скопје-Киев која само пред два месеци беше лансирана. Во четврток и во недела ќе бидат последните летови, со две ротации во март, а потоа линијата ќе биде целосно укината. „Виндроуз“ е првата компанија која директно ги поврзе Македонија и Украина. Оваа авиокомпанија неодамна воведе повеќе нови линии кон земјите од поранешна Југославија, како Загреб, Подгорица и Белград, кои ќе продолжат да постојат.

Скопскиот аеродром со 37 редовни авиолинии во зимскиот ред на летање

Ристе Здравков — Wed, 31 Oct 2018 09:52:09 +0000

Со зимскиот распоред на летање што стапи во сила на Меѓународниот аеродром Скопје функционираат 37 редовни авиолинии до 35 дестинации што се опслужени од 13 авиокомпании, информираат за МИА од ТАВ Македонија, концесионерот на македонските аеродроми. Најновата дестинација додадена во распоредот на скопскиот аеродром е редовниот лет од Атина до Скопје, со кој од утре ќе оперира „Ејџиан Ерлајнс“ (Aegean Airlines). Нискобуџетниот авиопревозник „Визер“ има летови до: Братислава, Брисел (Шарлероа), Будимпешта, Келн, Копенхаген, Дортмунд, Ајндховен, Франкфурт (Хан), Фридрихшафен, Гетеборг, Хамбург, Хановер, Малме, Малта, Милано (Малпенса), Минхен (Меминген), Нирнберг, Осло (Сандефјорд), Париз (Бувоа), Рим, Стокхолм (Скавста), Венеција (Тревизо) и Лондон (Лутон). „Катар ервејс“ оперира до Доха, „Флајдубаи“ до Дубаи, Истанбул е опслужуван од „Туркиш ерлајнс“ кои летаат до „Ататурк“, и „Пегасус ерлајнс“ што летаат до „Сабиха Гокчен“. „Адриа ервејс“ лета до Љубљана, „Аустриан“ до Виена, „ЛОТ Полиш“ до Варшава, „Кроација“ до Загреб, Ер Србија до Белград, додека „Еделвајс“ и „Германија флуг“ го опслужуваат Цирих. – На Охридскиот аеродром Св. Апостол Павле, „Визер“ ќе ја отвори Виена како нова дестинација и редовна линија во текот на целата година, почнувајќи од 17 ноември 2018, велат од ТАВ Македонија. Охридскиот аеродром во текот на годината има три редовни авиолинии – Виена, Цирих и Базел, и осум сезонски дестинации (Истанбул, Катовице, Варшава, Талин, Ајндховен, Тел Авив, Брисел и Амстердам) опслужувани од 11 авиокомпании („Визер“, „Онур ер“, „Смол планет ерлајнс“, „Ентер ер“, „Нордика“, „Корендон“, „Аркиа“, „ТУИФлај“, „Германиа Флуг“, „Хелветик“, „Брисел ерлајнс“). Во првите девет месеци од 2018 година услугите на двата аеродрома ги користеле 1,8 милиони патници, што е пораст од 18 отсто во споредба со истиот период лани. Бројот на летови, пак, од јануари до септември годинава на двата аеродроми е 15.395, што е зголемување од 12 проценти. Од ТАВ Македонија велат дека очекуваат досегашното темпо на двоцифрен пораст на патничкиот сообраќај да продолжи до крајот на годинава. Како што потенцираат, резултатите што ги остваруваат македонските аеродроми се повисоки од официјалниот просек од 4,8 отсто во Европската Унија, како и од растот од 6,8 проценти на аеродромите надвор од ЕУ.