авиосообраќај – Kurir.mk

Бавно заздравување на комерцијалниот авиосообраќај во Европа

Тале Кристо — Mon, 07 Dec 2020 08:49:53 +0000

Заздравувањето на комерцијалниот авиосообраќај во Европа оди бавно. По првичниот пад од над 90 проценти во април и мај годинава, регистрирано е делумно заздравување за време на летните месеци јули и август – пад од 64 и 53 проценти, но потоа повторно се бележи зголемен пад во септември и октомври од 59 и 62 проценти, покажуваат податоците на Евростат. Истата крива во падот на бројот на летови ја има и аеродромот во Скопје. По падот од 40 проценти во март и 94 и 93 проценти во април и мај, има благо закрепнување во јули и август со пад од 55,9 и 58,7 проценти споредено со истиот период минатата година. Но, затоа во септември и октомври повторно се враќа на пад од 62,5 и 59,3 проценти. Во број на летови, тоа значи пад од 1.273 полетувања во март 2019 на 754 во 2020 година, потоа од над 1.500 летови во април, мај и јуни 2019 на помалку од 100 лета во истите месеци годинава. Во август 2019 од скопскиот аеродром имало 1.945 лета, за во август 2020 тој број да падне на 803, потоа од 1.764 во септември 2019, на 661 лет во септември 2020 година. Охридскиот аеродром, пак, има 100 процентен пад во април, мај и јуни, за потоа во јули, август и септември тоа да се намали на 79,2 и 80 проценти и повторно во октомври да се зголеми на 93,9 проценти, споредено со истиот период минатата година. Прв на удар од рестриктивните мерки за справување со пандемијата на КОВИД-19, преземени низ Европа уште од почетокот на 2020 година, беше комерцијалниот авиотранспорт, регистрирајќи остар пад на бројот на комерцијални летови – патен, товарен и поштенски во рамки на цела ЕУ. Меѓу јануари и октомври годинава голем број аеродроми во Европа имаа драстичен пад на бројот на комерцијални летови, споредно со истиот период минатата година. Најголем пад на бројот на комерцијални летови има аеродромот во Франкфурт/Мајна со пад од 251.900 комерцијални летови или за 58 проценти, потоа Париз/Шарл де Гол со пад од 232.900 лета или 55 проценти, Амстердам/Шипхол со пад од 225.700 лета или 53 проценти, Минхен со пад од 218.300 лета или 63 проценти и Мадрид/Барахас со пад 212.800 лета или 60 проценти. Остар пад на бројот на летови има и во останатите аеродроми во ЕУ како што е Барселона/Ел прат (-182 500 лета или 63 проценти), Рим/Фиумичино (-172 400 лета или 65 проценти), Виена/Швеха (-138 600 лета или 60 проценти), Копенхаген/Каструп (-134 900 лета или 61 процент) и Палма де Мајорка (-129 200 лета или 66 проценти). Аеродромите од земјите во регионот, исто така, бележат пад на бројот на комерцијални летови. Во март годинава најголем пад имаат аеродромите во Албанија и Црна Гора од 51 и 50 проценти, потоа Србија – 41,2 проценти, Северна Македонија – 40 проценти, Хрватска – 36 и Бугарија – 30 проценти. По падот од 83 до 95 проценти во бројот на летови во април, мај и јуни во сите земји од регионот, потоа во август најмал пад има Албанија – 40 проценти, потоа Грција – 58,7 проценти, па Србија – 59,6 проценти, Северна Македонија – 60,4 проценти, Хрватска – 61,2 проценти, Бугарија – 61,1 процент и Црна Гора – 72,1 процент. Во октомври најголем пад во бројот на летови во регионот имаат Хрватска и нашата земја со 70 и 63,2 проценти, потоа следат Црна Гора со 59,1 процент, Србија – 50,2 проценти, Грција – 47 проценти, па Бугарија и Албанија со по 43 проценти пад, споредено со истиот период минатата година.

Раст на европскиот авиосообраќај по укинување на рестриктивните мерки

Магдалена Андонова — Mon, 13 Jul 2020 14:06:48 +0000

Се повеќе авиони летаат над небото над Европа откако почнаа да се укинуваат рестриктивните мерки воведени поради панмдемијата со новиот коронавирус. Во изминатата недела Европската организација за безбеден авиосообраќај (Еуроконтрол) забележа 90.549 летови, што е само 36,6 отсто од летовите во истиот период минатата година. Главниот директор на Еуроконтрол, Емон Бренан денеска на Твитер објави дека просечно дневно има нешто помалку од 13.000 летови. Тоа е за 1.383 летови повеќе во споредба со претходната недела. Ираската нискобуџетна авиокомпанија „Рајнер“ значително придонесе за пораст на летовите, која имаше просечно 1.045 летови дневно изминатата недела. (MИА)

Во ризик 25 милиони работни места во авиосообраќајот

Ивона Петрова — Wed, 08 Apr 2020 06:39:53 +0000

Авиокомпаниите предупредуваа дека поради пад на патувањата, 25 милиони работни места низ целиот свет може да бидат загрозени, а Меѓународната асоцијација за авиосообраќај (ИАТА) повика на итна помош од владите, бидејќи авиопревозниците немаат пари. Глобалниот воздушен сообраќај опадна за 70 проценти на почетокот на вториот квартал, соопшти ИАТА, при што европските летови паднаа за 90 проценти. Извршниот директор на ИАТА, Александер де Жуниак, рече дека авиокомпаниите ширум светот не можат да си дозволат поврат на пари за откажаните летови, како резултат на кризата со коронавирусот, и дека превозниците наместо тоа издаваат ваучери, бидејќи заштедуваат пари за да преживеат. „Најважната работа за нас е да избегнеме да останеме без готовина, така што враќањето на билетите за откажаните билети е речиси финансиски неизводливо“, рече Де Жуниак. Организациите за заштита на потрошувачите ги критикуваа авиокомпаниите за кршење на регулативите поврзани со враќање пари на клиенти кои купиле билети во дефинирани рокови. ИАТА исто така рече дека една третина од вработените во воздушниот сообраќај се или на принуден одмор или дека ги изгубиле работните места.

Турција очекува авио-сообраќајот да се нормализира до крајот на јуни

Ивона Петрова — Thu, 02 Apr 2020 10:41:41 +0000

Турскиот министер за туризам Мехмет Нури Ерсој денеска изјави дека очекува авио-сообраќајот да се нормализира до крајот на јуни, бидејќи сега авио-компаниите ги откажаа повеќето летови заради пандемијата од коронавирусот. Ерсој за телевизијата Сои-Ен-Ен Турк кажа дека прво ќе заживее воздушниот сообраќај од Азија. Потоа, како што кажа, ќе следат летови од Русија, балканските земји и Европа. Домашниот воздушен сообраќај, исто така, треба да се обнови, додаде тој, пренесен од британските медиуми. Компанијата „Туркиш Ерлајнс“ ја продолжи одлуката за откажување на сите летови до 1 мај, освен на неколку локални релации, а компанијата „Пегасус Ерлајнс“ ги има откажани сите летови.

Песочна бура на Канарските острови, нарушен авионскиот сообраќај

Ивона Петрова — Mon, 24 Feb 2020 09:02:18 +0000

Голема песочна бура од Сахара ги погоди шпанските Канарски острови, поради што е нарушен авионскиот сообраќај на таа популарна туристичка дестинација. Шпанскиот оператор на аеродромот, „Аена“ вчера, пора слаба видливост, ги откажа или пренасочи сите лестови за и од Канарските острови. Во текот на ноќта сообраќајот е нормализиран на сите аеродроми, освен во јужниот дел на Тенерифе. Ветерот беше пречка и за траектниот сообраќај, јави Би-Би-Си. Регионалната Влада во саботата прогласи вонредна состојба, а на жителите им беше советувано да останат во домовите, да затворат прозорци и да избегнуваат патувања. Шпанската национална метеоролошка служба соопшти дека ветер со јачина од 120 километри на час на Канарските острови може да се очекува и денеска.

Авиосообраќајот на првиот ден од Новата година се одвива тековно

Ивана Ефремовски — Wed, 01 Jan 2020 10:38:26 +0000

Авиосообраќајот на првиот ден од Новата година се одвива тековно. Реализирани се сите планирани полетувања и слетувања. На скопскиот аеродром, според информациите од нивната веб страница, утринава реализирани се сите полетувања меѓу кои за Гетеборг, Лондон и Ларнака, а слетале авиони од Копенхаген, Франкфурт, Берлин, Доха и Ларнака. (МИА)

Магла на повеќе патни правци, се нормализира авиосообраќајот

Ивона Петрова — Mon, 16 Dec 2019 11:40:52 +0000

Поради појава на магла намалена видливост има на патниот правец Македонски Брод – Кичево од 30 до 50 метри, на патот Охрид – Струга од 40 до 50 метри и на планинскиот премин Ѓавато од 50 до 100 метри, соопшти во пладневниот извештај за состојбата на патиштата Автомотосојузот на Македонија (АМСМ). По утринските откажувања на полетувањата и слетувањата на Меѓународниот аеродром Скопје кои беа попречени од густата магла, од претпладне, односно напладне, се реализираат планираните летови. Како што информира Автомотосојузот на Македонија (АМСМ) интензитетот на сообраќај на патните правци надвор од градските средини е умерен. На граничните премини, од македонска страна, нема подолги задржувања за влез и излез од државата. АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, поради појава на магла и можност од појава на одрони. Тоа посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево. Во сила е законската обврска за задолжително поседување зимска опрема во возилата.

Поради магла отежнат сообраќајот, реализирани само четири лета на скопскиот аеродром

Ивона Петрова — Mon, 16 Dec 2019 07:06:19 +0000

Маглата која утринава ја има по котлините и планинските превои го отежнува сообраќајот низ државата. Намалена видливост има на неколку патни правци, а на скопскиот аеродром се реализирани само неколку полетувања, но ниту едно слетување. Според информациите од Авто мото сојузот на Македонија, намалена видливост од 50 до 100 метри има кај Кичево, на планинскиот превој Ѓавато и долж Повардарието. Јавното претпријатие „Македонија пат“ кое е задолжено за одржување на патиштата низ државата апелира на внимателно возење и прилагодување на брзината кон условите на патот. На аеродромот во Скопје, според информациите од нивната веб страница, утринава не е реализирано ниту едно планирано слетување, а со задоцнување полетале само четири авиони на „Визер“.

Дел од летовите на скопскиот аеродром откажани

Ивона Петрова — Mon, 24 Dec 2018 11:01:21 +0000

Авиосообраќајот на скопскиот аеродром повторно се одвива отежнато. Дел од летовите се откажани, а дел од оние што се треба да се реализираат, се очекува дека ќе доцнат. Според веб страницата на скопскиот аеродром, откажани се полетувањата и слетувањата за и од Истанбул и Атина, додека летот од Доха на „Катар ервејс“ е пренасочен за Софија. Најавено е доцнење на летовите од Виена. Утринава до 8 часот беа реализирани сите планирани полетувања и слетувања на скопскиот аеродром. МИА

Нормализиран авиосообраќајот, утринава реализирани сите полетувања и слетувања

Ивона Петрова — Mon, 24 Dec 2018 06:53:53 +0000

Густата магла утринава го отежнува одвивањето на патниот сообраќај, додека авиосообраќај на скопскиот аеродром е нормализиран. Јавното претпријатие „Македонија пат“ утринава информира дека густа магла со видливост до 30 метри има во Тетово, додека на патниот правец Неготино- Демир Капија и во Куманово и Сарамзалино видливоста е од 50 до 100 метри. На останатите патни правци низ државата сообраќајот се одвива тековно по влажни коловози, но од „Македонија пат“ препорачуваат внимателно возење и прилагодување на условите на патот. На скопскиот аеродром, каде за време на викендот сообраќајот се одвиваше отежнато и беа откажани дел од летовите, утринава, според веб страницата на аеродромот, се реализирани сите планирани полетувања и слетувања. МИА