АВМУ – Kurir.mk

Алиу: Измените на Законот за АВМУ наскоро во Собрание

Катерина Бојаџиева — Fri, 20 Oct 2023 11:08:56 +0000

Измените на Законот за аудио и аудиовизуелни медиумски услуги (АВМУ) веќе се во владина процедура и многу брзо се очекува да бидат доставени до Собранието, рече денеска министерот за информатичко општество и администрација Азир Алиу. Како што информира Алиу, одговорајќи на новинарски прашања по средбата со стопанските комори, во подготовката на измените биле вклучени сите засегнати страни, но не биле сите активни, а некои и воопшто не биле активни. -Од првиот ден кога почнавме да работиме на законот, бевме многу инклузивни и транспарентни. Вклучени беа сите засегнати страни во неговата подготовка. За жал, не сите засегнати страни беа активни и не дадоа придонес. Некои воопшто не дадоа придонес. Како и да е, законот законски мора да биде на ЕНЕР и беше на ЕНЕР. Исто така, добивме фидбек од институции, некои од нив се веќе прифатени и се дел од законското решение, истакна министерот.

АВМУ: Осуда за односот на владини функционери кон новинар на ТВ Алфа

Катерина Бојаџиева — Sat, 14 Oct 2023 11:17:22 +0000

Агенцијата за аудио и аудиовизуелни медиумски услуги го осудува, како што наведува во соопштение, некоректниот однос на премиерот Ковачевски и на вицепремиерот за економски прашања Фатмир Битиќи, кон новинарот Матеја Петровски од ТВ Алфа. -Медиумите се еден од клучните столбови на демократијата и имаат важна улога во креирањето на критичкото мислење и известувањето за прашања што се од јавен интерес. Оттаму, не смее да постои начин на комуникација кој е несоодветен и навредлив кон новинарите, а со тоа и кон целата јавност на која треба да ѝ бидат пренесени информациите, наведува АВМУ. Регулаторното тело дополнува дека носителите на јавна функција треба да вложат максимални напори да дадат одговори на сите новинарски прашања кои се од интерес на јавноста и истовремено да покажат почит кон новинарската професија и достоинството на медиумските работници.

АВМУ: Ги осудуваме изнесените навреди и дисквалификации од компанијата „Брако” упатени кон новинарите на ИРЛ

Катерина Бојаџиева — Sun, 20 Aug 2023 11:36:05 +0000

Агенцијата за аудио и аудиовизуелни медиумски услуги најостро ги осудува изнесените навреди и дисквалификации од страна на компанијата ,„Брако”, упатени кон новинарите на Истражувачката репортерска лабораторија (ИРЛ) во врска со документарниот филм „Убиство во Тетово“, велат од Агенција за аудио и аудиовизуелни медиумски услуги. -Истражувачкото новинарство е клучно во остварувањето на улогата на медиумите поради што новинарите не смеат да бидат навредувани и јавно дискредитирани при отворањето и анализирањето прашања кои се од висок интерес. Напротив, медиумските работници треба да бидат поттикнувани и охрабрувани во вршењето на својата работа и информирањето на јавноста. Доколку некоја засегната страна смета дека објавените информации не се точни или дека не се целосни треба да го искористи законско загарантираното право на одговор и исправка, односно демант. Воедно, за евентуалното непочитување на принципите и стандардите утврдени во новинарските кодекси можат да се искористат механизмите кои ги имаат воспоставено саморегулаторните тела, додаваат од АВМУ.

АВМУ со осуда за попречувањето на работата на новинарската екипа на ТВ Телма

Ивона Петрова — Fri, 28 Jul 2023 07:37:32 +0000

Агенцијата за аудио и аудиовизуелни медиумски услуги најостро го осудува попречувањето на новинарската екипа на ТВ Телма при нејзиното известување за вчерашната седница на Судскиот совет на која учествуваа и експерти на оценувачката мисија на Европската Унија. -На новинарите и медиумските екипи треба да им се овозможи слободен пристап до сите настани, имајќи ја предвид нивната улога во информирањето за прашања од јавен интерес и во обезбедувањето транспарентност и одговорност на јавните органи, велат од АВМУ. Работа на медиумските работници е да известуваат секогаш и од секаде, а обврска на институциите е тоа право да не им го попречува со цел да се заштити слободата на известување и јавно информирање.

АВМУ: Медиумите професионално и етички да известуваат за трагични настани, особено ако се вклучени малолетници

Ивана Ефремовски — Wed, 10 May 2023 11:03:42 +0000

Имајќи ги предвид неодамнешните случувања во Србија, како и претставките кои македонските граѓани ги упатуваат за начинот на информирање, Агенцијата за аудио и аудиовизуелни медиумски услуги ги повикува сите медиуми, при известувањето за трагични настани, да се придржуваат до највисоките професионални стандарди и етички вредности. Ова особено се однесува на информирањето за настани во кои се вклучени малолетни лица кои се сторители или жртви на кривични дела. Вестите и информативните програми не треба да се темелат на сензационализам туку треба да содржат проверени информации. Вклучувањето описи, сцени и/или глетки на насилство или друг материјал којшто може да го загрози физичкиот, психичкиот и моралниот развој на децата и младите, мора да биде засновано на одговорна уредничка проценка за неопходноста на нивно прикажување. Професионалната одговорност подразбира и дека жртвите на насилство треба да се третираат со максимална почит и да се води сметка за заштита на приватноста, човековото достоинство, како и личната болка и жалост на жртвите. Покрај медиумите и операторите на јавни електронски комуникациски мрежи треба да покажат максимална општествена одговорност при реемитување сервиси кои содржат програми со насилство, вулгарен говор и други непримерни содржини кои лошо влијаат врз малолетниците и генерално, можат да ја вознемират општата јавност со таквите содржини. Тоа значи дека треба да бидат особено внимателни при одлучувањето какви сервиси ќе реемитуваат и да применуваат најстроги технички мерки за родителска контрола, се наведува во соопштението од АВМУ. (МИА)

АВМУ реагира поради отстранувањето на снимателите од седницата на Судскиот совет

Ивана Ефремовски — Wed, 10 May 2023 08:03:44 +0000

Агенцијата за аудио и аудиовизуелни медиумски услуги (АВМУ) го осудува отстранувањето на присутните сниматели на вчерашната седница на Судскиот совет и посочува дека ваквиот непрофесионален однос кон медиумите придонесува не само за фрлање сенка врз транспарентноста на судството, туку и за нарушување на правото на јавноста да биде целосно информирана за работата на судските власти. -Потсетуваме дека е особено важно на сите новинарски екипи да им се обезбеди непречен пристап за известување од настани кои се од јавен интерес, во насока на обезбедување транспарентност и отчетност на институциите, се наведува во реакцијата на АВМУ. (МИА)

Владата ги утврди предлог-измените на Законот за АВМУ

Катерина Бојаџиева — Tue, 25 Apr 2023 17:47:19 +0000

Владата на денешната 149 седница го утврди текстот на Предлогот на закон за изменување и дополнување на Законот за аудио и аудиовизуелни медиумски услуги. Како што соопшти владината Прес-служба, според образложението од предлагачот, Министерството за информатичко општество и администрација, со измените се усогласуваат одредби во Законот со законодавството на Европската Унија. Министерот за информатичко општество и администрација Азир Алиу на вчерашниот брифинг најави дека во делот на медиумите првата фаза од измените на Законот за аудиовизуелни медиумски услуги е заокружена и ќе биде поставен на Е-Влада, со цел тие да се изгласаат што поскоро за да се испочитува зададениот рок - 31 мај годинава за да не се изгуби пристапот до фондовите од Креативна Европа. Измените се однесуваат на финансиите за јавниот сервис МРТ и се прави анализа со којашто се планира да се намалат сегашните средства во износ од 1 процент за МРТ што се предвидени доколку не се загрозува Буџетот на државата. Сега се анализира да се најде решение, но нема да биде еден процент, посочи Алиу. Според министерот, со законските измени ќе се понуди и решение за регулација на мултимедијалните содржини (текст, аудио, видео). Порталите во оваа фаза не се опфатени и ќе влезат во ново решение. Првичните размислувања се тие да имаат регистрирана фирма во државава, како и минимум еден вработен како директор и уште двајца за работен процес. На почетокот на денешната владина седница, новоименуваниот државен правобранител Агрон Речи, пред премиерот и пред министрите во Владата, даде заклетва дека ќе работи совесно, чесно и одговорно, согласно Уставот и законите.

Советот на АВМУ ќе одржи седница

Ивона Петрова — Mon, 27 Feb 2023 06:19:21 +0000

Советот на Агенцијата за аудио и аудиовизуелни медиумски услуги денеска ќе ја одржи 8-та седница. На дневен ред се извештајот за годишната сметка на Агенцијата за аудио и аудиовизуелни медиумски услуги за 2022 година со предлог-одлука за усвојување на годишната сметка. Меѓу другото, ќе се расправа и за предлог-одлуката за доделување на дозвола за телевизиско емитување преку ЈЕКМ што не користи ограничен ресурс на регионално ниво, предлогот за давање одобрување за спроведување на постапка за јавна набавка – услуга: мобилна телефонија, како и предлог за давање одобрување за спроведување на постапка за јавна набавка-услуга: одржување на хигиена.

АВМУ го поддржа протестниот марш за одбрана на новинарското достоинство

Ристе Здравков — Fri, 17 Feb 2023 12:14:00 +0000

Агенцијата за аудио и аудиовизуелни медиумски услуги го поддржа и се приклучи кон протестниот марш на Самостојниот синдикат на новинари и медиумски работници и Здружението на новинари, кој е израз на незадоволство на новинарите од нападите врз нив и општествените и социо-економските услови во кои тие работат. Нападите, етикетирањата и омаловажувањето на медиумските работници, кои зачестија изминатиот период, се апсолутно неприфатливи, особено кога доаѓаат од носители на јавни функции. На овој начин се загрозува професионалното работење и безбедноста на новинарите и се поттикнува омраза и насилство поради што ваквото однесување во ниту случај не смее да стане пракса. Само медиумските професионалци кои се ослободени од било каков притисок и на кои не им се загрозени работничките и човековите права, можат да придонесат за развојот на демократијата и за зачувување и промовирање на слободата на изразување и слободата на информирање. фото: makfax.mk

АВМУ: Радиодифузерите утре да ја прилагодат програмата со денот на жалост

Катерина Бојаџиева — Sun, 12 Feb 2023 21:47:44 +0000

Агенцијата за аудио и аудиовизуелни медиумски услуги (ААВМУ) ги повикува радиодифузерите утре соодветно да ја прилагодат програмата и да емитуваат содржини кои по својата медиумска функција одговараат на ден на жалост, што го прогласи Владата за жртвите од земјотресите во Турција и Сирија. -Забавните шоу програми, хумористичните емисии или играна програма од жанрот комедија кои биле планирани да се емитуваат утре, да се распределат за други денови во седмицата, а музиката да биде од соодветни музички жанрови. Доколку тоа го дозволуваат веќе склучените договори, препорачливо е да не се емитува рекламирање, соопшти ААВМУ.