автомобилизам – Kurir.mk

И вториот кружен натпревар од годинешниот календар нема да се одржи

Тале Кристо — Sun, 08 Aug 2021 13:58:54 +0000

Иако викендов на патеката во Кичево требаше да се одржи вториот натпревар од Шампионатот во автомобилизам на круг за годинава, сепак овој натпревар нема да се одржи од причина што техничкиот организатор, како и првиот, го откажа и овој натпревар. – И покрај тоа што во календарот за годинава, во два термини беа планирани натпревари од Шампионатот во автомобилизам на круг на автодромот во Кичево,сепак поради откажување на натпреварите од страна на техничкиот организатор АКК Рено спорт и овој натпревар нема да се одржи, потврди Автомобилската федерација на Македонија. Причините за откажувањето и на овој натпревар не се познати, но јасно е дека љубителите на автомобилизмот и брзините од Кичево и регионот останаа пократки за уште еден возбудлив и неизвесен автомобилистички натпревар.Останува нејасно дали и наредните години, како и годинава, автомобилизмот ќе биде осиромашен без Шампионат на кружни патеки.

Последната трка од државниот шампионат во автомобилизам ќе се вози на 1 ноември на патеката кон Пониква

Тале Кристо — Wed, 14 Oct 2020 20:55:46 +0000

По две одложувања на терминот, последната ридско-брзинска трка од овогодишниот државен шампионат во автомобилизам ќе се вози на 1 ноември на патеката кон Пониква. На состанокот што го иницираше градоначалникот на Кочани, Николчо Илијев, претставниците на Автомобилистичката федерација и сопствениците на угостителски објекти на Пониква се договориле трката да се вози, со оглед што таа е во функција на промоција на планинскиот центар. Притоа е постигната и согласност за идната година да се изготви календар на натпреварите. Кочани ја има најдобрата патека за ридско-брзински трки во Македонија, а Пониква е прекрасно место и штета е да се прекине традицијата стара 30 години. Автомобилизмот е високоризичен спорт и бара многу ангажман и финансиски средства за подготовки, поради што задоволни сме што со помош на локалната власт најдовме заеднички јазик со угостителите и годинава успешно ќе го привршиме државниот шампионат, истакна Ранко Станојковски, претседател на комисијата за спорт при Автомобилистичката федерација на Македонија. Угостителите на Пониква се противеа на одржувањето на ридско-брзинските трки поради затворањето на патеката, која е дел од регионалниот патен правец кон планинскиот центар на Осогово, со образложение дека во деновите додека трае натпреварувањето посетителите не можат да стигнат до угостителските објекти. На работниот состанок е заклучено ридско-брзинските трки на Пониква од догодина да се одржуваат во последната седмица од април и во првата од септември, во периодот меѓу 12 и 16 часот, а организаторот да води сметка тоа да не биде продолжен празничен викенд.

Викендов меѓународен кружен натпревар во автомобилизам, по овие улици нема да може да возите во Скопје

Ивона Петрова — Fri, 25 Oct 2019 08:15:32 +0000

Во периодот од 07.00 до 17.00 часот, овој викенд во организација на Автомобилистичка федерација, ќе се одржи меѓународен кружен натпревар во автомобилизам ФИА – ЦЕЗ Награда на град Скопје „Скопје-2019“. Натпреварот ќе се одвива на потегот од крстосницата помеѓу бул.„Крсте Петков Мисирков“ и бул.„Гоце Делчев“, право до крстосницата помеѓу бул.„Гоце Делчев“ и ул.„Беласица“, до надвозникот на железничката пруга на исток, северно продолжува до кружниот тек, јужно до крстосницата помеѓу улиците „Владимир Комаров“ и „Беласица“. Од тие причини Одделението за безбедност на патниот сообраќај во наведениот период ќе преземе мерки за посебен режим на сообраќајот, при што сообраќајот ќе се пренасочува по околните сообраќајници. МВР апелира до граѓаните да ги почитуваат наредбите што ги издаваат полициските службеници по сообраќајниците по кои ќе се одвива настанот.