Бадел 1862 – Kurir.mk

ШАМПИОНОТ ГО ВРАТИ УДАРОТ: Бадел 1862 ја прекина победничката серија на Баскет Кам

Ивона Петрова — Mon, 30 Jan 2023 09:33:34 +0000

Бадел 1862 ја прекина победничката серија на екипата од Македонска Каменица, славеше со минимални (66:65) на гостински терен. Нема веќе непоразени екипи во Првата женска лига. За тоа најголем „виновник“ е екипата која го брани шампионскиот пехар – Бадел 1862. Која го победи својот најголем конкурент во изминатите години – Баскет Кам 2011, инаку лидерот во домашното првенство. И тоа на гостински терен, во Македонска Каменица, макар и минимално (66:65). Одлучувачка за конечниот победник беше серијата (19-4) која „траеше“ од крајот на втората и почетокот на третата четвртина по која „баделки“ поведоа со (40:34). А до истекот на третиот дел од играта, имаа и +10 (52:42). Во драматичните секунди, бранителот на титулата го издржа притисокот и дојде до важен триумф во борбата за пласман во плеј-офот. Американската интернационалка Катлин Метју која ги одигра сите 40 минути и постигна 27 поени и 16 скока. Димитријевиќ постигна 17, а Лазареска со 12 поени. Во тимот на Баскет Кам 2011, Цветанка Димова постигна 16, а Сања Адамоска уште 13 поени. Изненадување направи екипата на Крива Паланка која на домашен терен го победи Вардар со (75:71). Девојките во „црвено-црна“ комбинација водеа во поголемиот дел од натпреварот. Но на средината од последната четвртина домашните кошаркарки израмнија на (63:63) и во финишот дојдоа до победата. Шамека Мекнил беше енигма за одбраната на Вардар. Постигна 38 поени дополнети со седум асистенции и шест освоени топки. Михаела Алексовска додаде 16 поени, Глухавичанин уште 12 поени. Кај Вардар, Едина Муса оствари дабл-дабл со 21 поен и 10 скока, а Зафирова реализираше 16 поени. Убедлива победа остварија кошаркарките на Струга 2009 во дуелот против кавадаречки пробаскет (92:44). Американката Ли запиша двоен ефект изразен со 27 поени и 17 скока, сличен беше и учинокот на младата Модева, која на 15 поени додаде и 11 скока, Зендели заврши со 13, а Стојановска уште 11 поени за домашната екипа. Во гостинската Стоева запиша 15, а Јовановиќ уште десет поени. Се поблиску до врвот се и кошаркарите на МЗТ Скопје Аеродром кои во овој 10. круг од натпреварите славеа победа против Гризли (72:51). На табелата, лидер остана Баскет Кам 2011 со биланс од девет победи и еден пораз. А од третата до шестата позиција се четири екипи, Бадел 1862, МЗТ Скопје Аеродром, Струга 2029 и Крива Паланка се на само еден бод разлика. Во групата „Б“, смена на лидерската позиција. Екипата на Патриот 2016 победи на гостински терен во Гостивар (73:56), и го искористи поразот на водечкиот Шкупи на гостински терен од ЖКК Куманово (57:63). По 12 одиграни кола екипата од Делчево има победа повеќе од екипата од Чаир во трката за првата позиција која носи бараж дуели за место во групата „А“.

Почина Борче Филчев, Бадел 1862 се прости од својот долгогодишен претседател

Ивона Петрова — Fri, 26 Aug 2022 08:21:26 +0000

Кошаркарскиот клуб Бадел 1862 соопштува дека починал нивниот долгогодишен претседател Борче Филчев (71). -Со неизмерна тага и огромна празнина во душата, соопштуваме дека ненадејно не напушти Борче Филчев (71), нашиот долгогодишен претседател, предобар човек и вљубеник во кошарката кој остави неизбришливи траги во нашиот клуб. Нека ти е лесен патот до вечноста, пријателу наш.... соопшти клубот. Од клубот додадоа дека оваа сезона и сите наредни му ги посветуваат него и на неговата визија за кошарката.

Бадел 1862 го засилува стручниот штаб, Горан Крстевски зачекорува во женската кошарка

Ивона Петрова — Tue, 12 Jul 2022 07:24:33 +0000

Шампионот на Македонија во женска кошарка, Бадел 1862 го засилува стручниот штаб. Ново име во стручниот штаб е Горан Крстевски Кичо, проверен тренер кој по многубројните титули и успеси во машката младинска и сениорска кошарка, реши да зачекори и во женската. -Почестени сме што тоа го прави токму во нашите бои, боите на ЖКК Бадел 1862. Крстевски ќе биде од огромна помош во стручниот штаб кој го сочинуваат тренерите Перо Стамески, Анета Глигорова и Дарко Димитријевиќ, велат од клубот.

Бадел 1862 го совлада Триглав во WABA лигата

Бошко Тасиќ — Tue, 25 Jan 2022 21:02:59 +0000

Кошаркарите на Бадел 1862 стигнаа до голема победа во втоиот круг од натпреварите во женското издание на Јадранската лига. Пред македонскиот претставник падна фаворизираниот тим на Триглав, кој беше совладан со убедливи 69-44. Максмовска и Трајчевска со по 15 поени беа најпрецизни во таборот на македонскиот тим, а солиден учинок имаа и Кметовска (13) и Стојановска 12). Во следниот круг од натпреварите, на 3. февруари, исто така во Скопје, Бадел 1862 ќе го пречека топ-фаворитот во регионалната лига, екипата на Будуќност Бемакс.

Бадел 1862 испиша историја, девојките се пласираа во Суперлигата

Ивона Петрова — Thu, 16 Dec 2021 06:56:42 +0000

„Баделки“ славеа убедлива победа против Партизан (58:46) доволно за потврда на позицијата „4“ и место во следниот круг од натпреварувањето. Девојките во „сино-жолта“ комбинација стигнаа до историски пласман во првата „четворка“ која продолжува во втората фаза од женското регионално натпрварување. За тоа им требаше уште една победа над белградски Партизан, а „баделки“ вчеравечер го реализираа тоа. Го најавија планираниот триумф домашните кошаркарки уште во првото полувреме во кое по израмнетата прва четвртина, во втората дојдоа до посакувана разлика, и тоа од десет поени, реализирана преку неколку „контри“ и „полуконтри“. Во голем дел преку Трајчевска, на која одлично и асистираше Кметовска, која и немаше рамноправен противник во рекетот. „Ниската постава“ на екипата од Белград се обидуваше со брза игра и доста шутеви од далечина да парира во тоа, но без некој голем успех. На полувремето, Бадел 1862 водеше со сосема солидни (34:24). Но избраничките на тренерот Перо Стамески не се задоволија со тоа водство. Притиснаа уште повеќе по одморот. Во третиот дел од играта му дозволија на противникот да постигне само шест поени Дадоа двојно повеќе 13, и стигнаа до недостижна предност (47:30). Кметовска финишираше со дабл-дабл ефект од 20.поени и 10. скока, двоен скор имаше и Нена Трајчевска изразен преку 16.поени и 13.скока (плус и четири асистенции), додека двоен број на поени – 15, реализираше и Димова. Во Суперлигата, која стартува по новата година, кошаркарките на Бадел 1862 ќе играат уште осум натпревари против екипите на Будуќност Бемакс, Орлови, Војводина 021 и Триглав, кои беа најдобри во групата „А“ во која настапуваше нашиот втор претставник – Баскет Кам 2011.

Баскет Кам и Бадел 1862 ќе бидат дел од Јадранската лига

Бошко Тасиќ — Wed, 02 Jun 2021 19:24:56 +0000

Освојувачот на двојната круна во женската кошарка во Македонија, Баскет Кам и нивниот најголем ривал, Бадел 1862 се пријавија за учество во Јадранската кошаркарска лига за следната сезона. Неполни два дена по заврпувањето на финалната серија од плеј-офот во кој екипата од Макеоднска Каменица стигна и до шампионскиот трофеј, доаѓа потврдата за учество во најквалитетното натпреваруавње на просторите на поранешната држава. Според најавите од редовите на екипата од Македонска Каменица, повеќе информации за идните планови на клубот ќе бидат објавени во наредните денови. Женската Јадранска лига ќе брои вкупно 12. клубови учесници, поделени во две групи по шест. Што значи дека двата наши претставници ќе бидат одвоени во првата натпреварувачка фаза од регионалното натпреварување во кое би ги очекувало по десет натпревари против силни екипи од Србија, БиХ, Хрватска, Словенија, Црна Гора и Бугарија.