балетска претстава – Kurir.mk

Детска балетска претстава Петар Пан

Тале Кристо — Thu, 23 Mar 2023 06:45:48 +0000

Во Националната опера и балет на 31 март премиерно ќе биде изведена детската балетска претстава Петар Пан во режија и кореографија на Ирена Лозинска. Детали за претставата ќе бидат соопштени денеска на прес-конференција. Сценариото и сонговите за претставата ги напиша Ристо Самарџиев, визуелната магија е доловена преку костимите на Елена Вангеловска и сценографијата на Љупчо Јованов. Музиката е на Владимир Дојчиновски –Дојчин, а продукцијата на М-Соунд. Во овој музичко балетски спектакл учествуваат и 56 деца од балетско студио „Арт балет“, заедно со Веселин Трајковски и Ницолас Алехандре Хоурсеау, гостите при балетскиот ансамбл. Детската балетска претстава за Петар Пан, момче што не сакаше да порасне, ќе биде изведена од 17:30 и 20 часот на 31 март, а билетите можат да се набават на mktickets.mk, Југотон и Литература.мк.

Изведба на балетската претстава „Дон Кихот“ од Лудвиг Минкус

Тале Кристо — Wed, 15 Feb 2023 07:00:37 +0000

Со почеток во 20 часот на големата сцена на Националната опера и балет ќе се изведе балетската претстава во два чина „Дон Кихот“ од Лудвиг Минкус, во кореографија на Виктор Јаременко од Украина. Диригент на претставата е Иван Еминовиќ. Сценограф е Андреј Злобин, додека под костимографијата се потпишува Гана Ипатиева од Украина. Во улогите на Китри и Базил ќе настапат Христина Наќевска и Балаж Лочеи (Унгарија). Во улогата на Еспадо ќе настапи Бобан Ковачевски, а во улогата на Улична, Симона Колиштркоска. Настапуваат солисти, балетскиот ансамбл и оркестарот на Националната опера и балет заедно со деца од балетскиот оддел на ДМБУЦ „Илија Николовски-Луј“. „Дон Кихот“ е волшебна приказна за ветерници, „совршената“ жена и вистинската љубов. Балетското дело е поставено на музиката на Минкус со експресивно темпо кое резултира со познатото „Дон Кихот Па де де“, кој дава акцент на целата претстава. Kомпозиторот и виолинист Лудвиг Минкус (1826-1917) напишал неколку популарни балети, а речиси сите од нив, а особено балетот „Дон Кихот“ и денес се изведувани низ целиот свет. „Дон Кихот“ е балет базиран на познатиот истоимен роман од Мигел де Сервантес Како што наведуваат од Националната опера и балет, приходот од продадените билети за балетската претстава ќе бидат донирани како помош за настраданите во земјотресот во Турција и Сирија.

Балетската претстава „Госпоѓиците од Авињон“ на НОБ гостува во Софија

Ивона Петрова — Fri, 08 Jul 2022 06:17:04 +0000

Националната опера и балет денеска гостува со балетската претстава „Госпоѓиците од Авињон“ на Софискиот фестивал на музички театар. Режисер е Олга Панго – примабалерина, кореограф и директор на Балетот на НОБ, јавува дописникот на МИА од Софија. Претставата ќе биде изведена во Паркот на Воената академија во Софија, а доколку времето е лошо, ќе се игра на сцената на Музичкиот театар. Во рамките на фестивалот, на голема сцена во Музичкиот театар, Олга Панго ќе зборува за тенденциите на современиот танц во класичниот балет. Таа ќе го сподели своето искуство за кореографијата во мјузиклите и за потребата од нови движења во современите балетски и танцови претстави. Со претставниците на Националната опера и балет, Панго претходно ќе го посети Културно-информативниот центар на Северна Македонија во Софија и ќе има средба со неговиот директор Сашко Насев, кој ќе ги запознае со односи меѓу двете земји во областа на културата.

Балетската претстава „Ана Каренина“ денеска и утре во НОБ

Ивона Петрова — Tue, 01 Mar 2022 06:47:46 +0000

Во Националната опера и балет денеска и утре ќе се изведе „Ана Каренина“, балетска претстава во два чина со одбрана музика од рускиот композитор Петар Илиќ Чајковски. Кореографијата е на Лео Мујиќ од Хрватска, сценографијата е на Александар Ношпал. -Во повеќе од два часа, балетските уметници на Националната опера и балет, на чело со впечатливиот, емотивниот до исцрпување танц и инспиративните движења на Мими Поп Алексова Атанасовска како Ана Каренина, Никола Хаџитанев (Бугарија) како Вронски, Емил Јорданов (Бугарија) како гроф Каренин, ќе ги пренесат сите емоции кои го означуваат ова дело: љубoв, страст, омраза, лутина, гнев, љубомора, тага, мајчинска болка, велат од НОБ. Како дел од балетската претстава настапуваат истакнати солисти, солисти и целиот балетски ансамбл на Националната опера и балет.

Балетската претстава „Оревокршачка“ од Петар Илич Чајковски во НОБ

Ивона Петрова — Fri, 24 Dec 2021 07:05:49 +0000

По повод новогодишните празници, Националната опера и балет (НОБ) на големата сцена ќе ја изведе божиќната балетска бајка „Оревокршачка“, а исто така најавени се и три изведби на 24, 25 и 28 декември. – Првпат балетот „Оревокршачка“ бил поставен на сцената на Националната опера и балет на 2 декември 2001 година, од тогаш до денес редовно се изведува на нашата сцена за време на новогодишно-божиќните празници. Оваа година е јубилејна, 20 години од првата изведба на балетот „Оревокршачка“ пред македонската публика, соопштија од НОБ. Со величествената музика на Чајковски, по кореографија на Василиј Иванович Ваинонен од Русија, претставата е пренесена од Михаил Крапивин од Русија, сценограф е неговиот сонародник Анатолиј Нежњи, а костимограф е Љупка Ристовска. – Балетот „Оревокршачка” е волшебна, новогодишно-божиќна бајка, мириса на снег, карамела и на цимет. Обоен е со црвено, златно и со бело. Веројатно затоа на публиката никогаш не и е доста од „Оревокршачка“ пред Нова година, секоја година, псоочуваат од НОБ. Во главните улоги настапуваат Мими Поп Алексова Атанасовска, Бобан Ковачевски, Ела Канер од Турција во претставата на 24 декември. Ивана Коцевска, Балаж Лашеи од Унгарија, Ела Канер од Турција во претставата на 25 декември, а Христина Наќевска, Балаж Лашеи од Унгарија и Ела Канер од Турција во претставата на 28 декeмври. Настапуваат првенците, солистите, балетскиот ансамбл при Националната опера и балет и ученици од ДМБУЦ „Илија Николовски Луј“.

Четири изведби на балетот „Оревокршачка“

Ивона Петрова — Wed, 25 Dec 2019 07:04:59 +0000

Во пресрет на новогодишните празници, Националната опера и балет четири пати ќе ја изведе балетската претстава „Оревокршачка“ поради голем интерес. Се работи за едно од најпопуларните и најизведувани дела на музика на Петар Илич Чајковски кое публиката ќе има можност да го види денеска и на 28, 29 и 30 декември. Денешната и изведбата в недела се наменети за најмладите и ќе почнуваат во 12 часот, а претставите на 28 и 30 декември се со почеток во 20 часот. Ќе настапи оркестарот под диригентство на Бисера Чадловска, балетски првенци, ансамблот на Балетот, како и ученици од ДМБУЦ „Илија Николовски Луј“. – Волшебна балетска авантура за сите возрасти. Новогодишно-божиќна бајка која мириса на снег, карамела и на цимет. Обоена е со црвено, златно и со бело. Веројатно затоа на публиката никогаш не и е доста од балетот „Оревокршачка“, соопшти НОБ.

„Дамата со камелии“ идната недела во Опера и балет

Ивона Петрова — Wed, 16 Oct 2019 09:14:35 +0000

Раскошната балетската претстава „Дамата со камелии“, на музика од Џузепе Верди ќе биде изведена идната недела, на 22 октомври во 20 часот, во Националната опера и балет. „Дамата со камелии“ е балетска продукција која наиде на одличен одзив кај публиката и беше оценета со позитивна критика, својата премиера ја имаше на 31.10.2014 г. Работена по музиката на Џузепе Верди, а драматуршката подлошка е земена од неговата популарна „Травијата“. Кореографијата е на еден од водечките руски кореографи Василиј Медведев, кој работи со големите театри „Бољшој“ од Москва и „Марински“ од Санкт Петербург. Прекрасните костими и убавата сценографија се дело на Павол Јураш, гостин од Словачка. Во главните улоги ќе настапат првенците Марија Кичевска-Шокаровска и Бобан Ковачевски. Настапуваат солисти, балетскиот ансамбл и оркестарот на Националната опера и балет. Диригент е Иван Еминовиќ.