балистичка ракета – Kurir.mk

Северна Кореја лансираше балистичка ракета

Ивана Ефремовски — Wed, 13 Sep 2023 06:07:13 +0000

Северна Кореја истрела најмалку една балистичка ракета во близина на нејзиниот источен брег, соопштија началниците на здружениот генералштаб на Јужна Кореја и крајбрежната стража на Јапонија. Тоа се случи само неколку часа пред севернокорејскиот лидер Ким Џонг-ун да се сретне со Владимир Путин во Русија. Не се наведени детали за големината или дострелот на проектилот. Но, околу пет минути по предупредувањето за лансирање, јапонската крајбрежна стража соопшти дека проектилот паднал. Нуклеарно вооружената Северна Кореја редовно лансира секакви ракети, од ракети со краток дострел и крстаречки проектили до интерконтинентални балистички ракети (ИЦБМ) кои можат да достигнат до САД. (МИА)

Ново тестирање на турска балистичка ракета Тајфун

Тале Кристо — Tue, 23 May 2023 11:10:26 +0000

Ново тестирање на турската балистичка ракета Тајфун е извршено денеска во турскиот град Ризе. Домашно произведената балистичка ракета со краток дострел може да погоди цел на растојание од 561 километар за 456 секунди. Пред тестирањето беа преземени опсежни безбедносни мерки на аеродромот Ризе-Артвин и неговата околина. Тестирањето на Тајфун е извршено во 06:44 часот по локално време (05:44 по средноевропско време) и заврши без инциденти. Претседателот на Дирекцијата за одбранбена индустрија на Турција, Исмаил Демир на социјалните мрежи објави снимка од ракетното тестирање. Ракетата е изработена од компанијата „Roketsan“. „Успешно извршивме ново пробно истрелување на ракетата Тајфун. Им честитам на сите што придонесоа, особено на „Roketsan, рече Демир. Пробното истрелување на ракета Тајфун е извршено од аеродромот Ризе-Артвин на 18 октомври 2022 година.

Русија тестираше интерконтинентална балистичка ракета

Тале Кристо — Wed, 12 Apr 2023 06:40:25 +0000

Русија успешно лансираше интерконтинентална балистичка ракета од локација на југот на земјата, соопшти рано утринава Министерството за одбрана, испраќајќи ново предупредување до своите непријатели. Ракетата со долг дострел беше лансирана од полигонот Капустин Јар во регионот Астрахан, на брегот на Каспиското Море. Пробната боева глава подоцна погоди објект во сојузничката земја Казахстан како што беше планирано, соопшти Министерството, додавајќи дека целта била да се тестира „борбената способност“ на ракетата. Кремљ неодамна предизвика реакција со својата најава дека ќе распореди тактичко нуклеарно оружје во Белорусија. Ова оружје има помал дострел од интерконтиненталните балистички ракети, кои можат да поминат повеќе од 5.000 километри.

Ким: Северна Кореја истрела балистичка ракета за да предизвика страв кај непријателите

Ивона Петрова — Fri, 17 Mar 2023 08:13:02 +0000

Северна Кореја денеска потврди дека истрелала интерконтинентална балистичка ракета со цел, како што наведе, „да им влее страв на непријателите“. Ракетата беше лансирана вчера изутрина, неколку часа пред јужнокорејскиот претседател Јун Сук-јол да се сретне со јапонскиот премиер Фумио Кишида на самит, делумно насочен кон обнова на безбедносните врски меѓу американските сојузници во услови на севернокорејски нуклеарни закани. Официјалната новинска агенција на Северна Кореја КЦНА објави дека претседателот Ким Џонг-ун го надгледувал пробното лансирање на ракетата Хвасонг-17 и ја нагласил целта да се „внесе страв кај непријателите“ поради, како што рекол, „отвореното непријателство“ покажано кон Северна Кореја со заедничките.воени вежби на САД и Јужна Кореја. Ракетата била лансирана под висок агол за да се избегне територијата на соседите на Северна Кореја, а проектилот достигнал максимална височина од 6.045 километри и поминал 1.000 километри пред да падне во водите на источниот брег на земјата, соопшти КЦНА.

САД го осудија обидот на Пјонгјанг да лансира интерконтинентална балистичка ракета

Тале Кристо — Thu, 03 Nov 2022 06:58:21 +0000

САД го осудија денешниот обид на Северна Кореја да лансира интерконтинентална балистичка ракета и повикаа на строго спроведување на санкциите на ОН против Пјонгјанг. Лансирањето „ја нагласува потребата сите земји целосно да ги спроведат резолуциите на Советот за безбедност“ со кои се воведуваат санкции кон Северна Кореја, изјави портпаролот на Стејт департментот Нед Прајс. Северна Кореја денеска се обиде да лансира интерконтинентална балистичка ракета, но се чини дека лансирањето не успеа, соопшти јужнокорејската војска, еден ден по серијата лансирања. Според вооружените сили на Јужна Кореја, неуспехот најверојатно се случил „за време на втората фаза на разделувањето“ Генералштабот на Јужна Кореја соопшти дека рано утрото регистррале лансирање на интерконтинентална балистичка ракета, по што следеле две лансирања на балистичка ракета со краток дострел. Ракетата со голем дострел поминала околу 760 километри на височина од 1.920 километри со брзина 15 пати поголема од онаа на звукот. Била истрелана под остар агол, можеби за да се избегне влегување на територијата на соседните земји. Ракетите со краток дострел летаа на височина од околу 330 километри, со брзина петпати поголема од брзината на звукот.

САД го осудија денешното лансирање балистичка ракета од Северна Кореја

Тале Кристо — Thu, 24 Mar 2022 14:24:03 +0000

САД го осудија денешното лансирање на неидентификуван проектил од страна на Демократска Народна Република Кореја. -Како и другите тестирања годинава што ја ескалираат ситуацијата, вклучително и она со двете интерконтинентални балистички проектили, и овој е чисто прегазување на низа резолуции на ОН, и ја демонстрира заканата што незаконските оружја за масовно уништување и балистичката ракетна програма на Северна Кореја ја претставува за соседите и за регионот во целина, изјави портпаролот Нед Прајс. САД и меѓунородната заедница ја повкуваат ДНРК да запре со натамошни провокации и да се ангажира во одржлив и продлабочен дијалог. Од САД напоменаа и за цврстата заложба за одбрана на Република Кореја и Јапонија, и дека тесно ќе се координираат со сојузниците и партнерите за да се одговори на заканите на ДНРК, и да се остварат заедничките цели за целосна денуклеаризација на Корејскиот Полуостров.

Северна Кореја истрела интерконтинентална балистичка ракетa

Ивона Петрова — Thu, 24 Mar 2022 13:03:47 +0000

Северна Кореја денеска истрела интерконтинентална балистичка ракета во правец на Јапонското Море, изјави денеска јужнокорејскиот претседател Мун Џае-ин. Според претседателот на Јужна Кореја, ова е „прекин на суспензијата на лансирањето на интерконтинентални балистички ракети, што претседателот Ким Џонг-ун ѝ го вети на меѓународната заедница“. Јужнокорејската војска соопшти дека веднаш одговорила со истрелување „ракети од земја, море и од воздух“ од своите брегови. Јапонскиот премиер Фумио Кишида го осуди овој „скандалозен и непростлив чин“. Режимот на Северна Кореја „ги загрозува мирот и безбедноста на Јапонија, регионите и на меѓународните заедници“, појасни Кишида од Брисел, каде присуствува на самит на Г7. Осудувајќи го овој потег на Пјонгјанг, Белата куќа уверуваше дека САД ќе ги преземат „сите неопходни мерки за обезбедување на американските територии, Јужна Кореја, како и на Јапонија“. Резолуциите на Обединетите нации ѝ забрануваат на Северна Кореја, земја која е под меѓународни санкции поради своите нуклеарни и оружени програми, да тестира балистички ракети. Од почетокот на оваа година, Пјонгјанг спроведе повеќе ракетни тестови и изврши две лансирања, како што тврди, на сателити за извидување. Меѓутоа, тоа не беа интерконтинентални ракети, иако Вашингтон и Сеул се сомневаат дека севернокорејскиот режим тестирал одредени такви системи, за време на овие лансирања.

Пентагон го одложи тестирањето на балистичката ракета „Минутмен 3“

Ивона Петрова — Thu, 03 Mar 2022 07:21:00 +0000

Американската армија соопшти дека го откажува тестирањето на интерконтиненталната балистичка ракета „Минутман 3“, во насока на смирување на страстите откако Русија најави кревање на нивото на подготвеност на своето нуклеарно оружје. Изјавата на рускиот претседател Владимир Путин од минатиот викенд за кревање на нивото на подготвеност предизвика стравувања дека инвазијата врз Украина би можела да доведе до нуклеарна ескалација, додека одредени европски политичари таквата најава на Путин ја оквалификуваа како прикриена закана кон Запад. Шефот на руската дипломатија, Сергеј Лавров, синоќа изјави дека доколку до неа дојде третата светска војна ќе биде нуклеарна, порака што многумина ја дочекаа со големо нелагодување. Пентагон силно ја осуди реториката на руските власти. Оценува дека одложувањето на тестирањето на интерконтиненталните ракети ќе служи како пример за Москва. „Во овие мигови на тензии свесни сме за важноста САД и Русија да се свесни за ризиците што ги носат погрешните проценки така што е потребно да сторат се како би ги довеле таквите ризици до минимум“. Одлуката за одложување на тестирањето покажува дека немаме намера да се впуштаме во какви било активности што би можело погрешно да бидат толкувани, изјави портпаролот на Пентагон, Џон Кирби. Тој уште рече дека донесувањето на одлуката не било лесно, но оти на тој начин САД покажуваат дека се серизона нуклеарна сила. „Минутмен 3“ е клучен дел на американкиот балистички арсенал со дострел до 9.660 километри и максимална брзина од 24 илјади километри на час. Ракетите се лансираат од подземни силоси со кои ракуваат лансирни посади.

Индија тестираше интерконтинентална балистичка ракета Агни-5

Тале Кристо — Thu, 28 Oct 2021 08:06:57 +0000

Индија тестираше интерконтинентална балистичка ракета способна да носи нуклеарно оружје со дострел од 5.000 километри. Ракетата беше тестирана од остров во близина на источниот брег, во услови на растечки тензии на границата со Кина. „Успешното лансирање во средата е во согласност со политиката на Индија да има средства за минимално и убедливо одвраќање што треба да биде поддршка на посветеноста никогаш да не ги употреби прва“, соопшти Владата. Како што се наведува, ракетата Агни-5 паднала во Бенгалскиот залив со многу висока прецизност. Моќниот ракетен арсенал на Пекинг го принуди Њу Делхи да ги подобри своите системи вооружени во последните години, а се верува дека Агни-5 може да погоди цел во речиси цела Кина. Индија ги развива своите нуклеарни и ракетни системи со среден и долг дострел од 1990-тите, во услови на растечка стратешка конкуренција со Кина во обид да ги зајакне одбранбените способности на земјата. Тензиите меѓу двете земји се зголемија, со распоредувањето трупи на двете страни, по конфликтот во јуни 2020 година, кога 20 индиски војници беа убиени во долината Галван во Ладах, а Кина, исто така, претрпе неодреден број жртви во конфликтот. Последните преговори меѓу индискиот и кинескиот воен врв за решавање на ситуацијата на линијата на спорната граница на Хималаите беа прекинати на 11 октомври, при што двете страни меѓусебно се обвинуваат за неуспехот на договорот.

САД успешно ја тестираа балистичката ракета Tридент II

Тале Кристо — Sun, 19 Sep 2021 07:43:42 +0000

Американската воена морнарица успешно ја тестираше балистичката ракета Тридент II, што беше истрелана од брегот на Кејп Канаверал во државата Флорида. Примарна цел на оваа акција беше да се демонстрира подготвеноста на Стратешкиот систем на вооружувањето на морнарицата и екипажот пред оперативното распоредување, по планираниот ремонт на дел од подморницата за полнење гориво, соопшти Интернет страницата на американската морнарица navy.mil. -Овој тест, како и сличните, ја нагласува нашата подготвеност и способност да донесуваме стратешки одлуки во 21 век, рече адмиралот Томас Иши, директор за глобални операции на вооружените сили на САД. Ова лансирање ракета над Атлантскиот Океан беше 184 -ти успешен тест на ракетата Тридент II.