балтимор – Kurir.mk

Пет лица се повредени при вооружен напад на Универзитет Морган во Балтимор

Ивана Ефремовски — Wed, 04 Oct 2023 07:46:38 +0000

Во синоќешниот вооружен напад пред студентскиот дом на Државниот универзитет Морган во Балтимор, САД, повредени се пет лица, но ниту еден од нив не е во критична состојба. Полицијата во Балтимор синоќа околу 21 часот и 30 минути добила информација за напаѓачот, поради што кампусот бил блокиран четири часа. Полицијата соопшти дека во нападот повредени се четворица мажи и една жена, на возраст од 18 до 22 години. Четворица од петте повредени се студенти. Полицијата не соопшти дали некој е уапсен, ниту информации за осомничениот напаѓач или напаѓачите. (МИА)

Најмалку четири лица загинаа во престрелка во Балтимор

Тале Кристо — Sun, 02 Jul 2023 10:01:24 +0000

Најмалку четири лица загинаа, а 25 се ранети во престрелка во Балтимор, град во сојузната држава Мериленд, пренесоа американските медиуми повикувајќи се на локални службеници и сведоци. Порталот „BNO News“ објави дека масовното пукање наводно се случило нешто по полноќ по локално време на забава на која присуствувале повеќе од 100 луѓе по повод „Денот на Бруклин“. Очевидци велат дека биле испукани околу 30 истрели. Други детали засега не се познати.

Над 150 свештеници од надбискупијата во Балтимор сексуално злоупотребиле повеќе од 600 деца

Ивона Петрова — Thu, 06 Apr 2023 12:26:29 +0000

Повеќе од 150 католички свештеници поврзани со надбискупијата во Балтимор сексуално злоупотребувале над 600 деца и главно не биле повикани на одговорност за злосторството, се наведува во вчера објавениот државниот извештај, со што се открива обемот на злоупотребата во период од 80 години. Извештајот содржи сериозни обвинувања против надбискупијата, најстарата римокатоличка епархија во САД, која има ингеренции во поголемиот дел од сојузната држава Мериленд. Во некои парохии, училишта и заедници имало неколку активни насилници во исто време. На пример, 11 насилници живееле и работеле во парохијата Свети Марко во Катонсвил помеѓу 1964 и 2004 година. Еден ѓакон признал дека злоупотребувал повеќе од 100 деца. Балтиморскиот архиепископ Вилијам Лори им се извини на жртвите и рече дека извештајот „опишува историја на надбискупијата, што треба да се осуди; време кое нема да се занемари, игнорира или заборави“. Мрежата на жртви на злоупотребата од страна на свештениците, позната како СНАП, истакна дека во извештајот се наведени повеќе имиња на злоупотребувачи отколку што биле јавно објавени од страна на претставници на надбискупијата. Организацијата го повика архиепископот да ја објасни недоследноста. Во извештајот, исто така, се наведува дека претставниците на Католичката црква повеќе биле фокусирани на прикривање на злоупотребата наместо на заштита на жртвите. Во некои ситуации, жртвите пријавиле злоупотреба на свештеници кои и самите биле насилници. Во извештајот, од речиси 500 страници, наведени се бројни примери на црковни власти кои ги штитат обвинетите свештеници, на пример, дозволувајќи им да се пензионираат предвремено или да се префрлат во други парохии. Во 1964 година, отец Лоренс Брет призна дека сексуално злоупотребувал тинејџер на католички универзитет во Конектикат. Тој беше испратен во Ново Мексико под маската на лекување од хепатитис, а потоа во Сакраменто каде друг тинејџер пријавил дека бил малтретиран од Брет. Подоцна бил префрлен во Балтимор каде служел како капелан во католичко средно училиште за момчиња и малтретирал повеќе од 20 деца. Откако беше обвинет за малтретирање од неколку студенти во 1973 година, на Брет му беше дозволено да ја напушти функцијата под изговор дека се грижи за својата болна тетка. Училишните службеници не ја пријавиле злоупотребата кај властите. Тој никогаш не се соочи со кривична пријава и почина во 2010 година.

САД: „Куќа на смртта“ во Балтимор се продава за 225.000 долари

Тале Кристо — Fri, 02 Apr 2021 07:53:32 +0000

Куќа во Балтимор, Мериленд, САД, којашто навистина изгледа морничаво и според многумина – морбидно, се нуди на продажба. Цената е 225.000 американски долари. Куќата има специфична декоративна тема… Во дневната соба доминира црната боја, а во неа има ковчези, мебел од црна кожа, скулптура на „Смртта“, фотографии од гилотини, погреби, сцени од хорор-филмови, како и црни дресови на Лас Вегас Рајдерс. Во кујната, исто така, сѐ е во знакот на црното – фрижидерот, масата столиците, вратичките, а трпезаријата е „украсена“ со дресови и шлемови на Рајдерс. На горниот кат има спална соба со голем кревет, а телевизорот е фиксиран на таванот. Во оваа просторија има и неколку огледала, а на страните на креветот има два крста. Подрумот е, веќе претпоставувате – црн, а во него има две црни кожни фотелји поставени пред телевизор. Околината на куќата е исто така – морничава, украсена како гробишта, со лажни гробници и надгробни камења, но има и шпајз и бар на отворено. Куќата е дизајнирана од сегашниот сопственик Били.

Најмалку една жртва во експлозија на гас во Балтимор

Тале Кристо — Tue, 11 Aug 2020 06:07:02 +0000

Најмалку едно лице загина, а четири се повредени во експлозија на гас во Балтимор, каде под урнатините има и неколку деца. Според првите информации, загинала една жена, а четири лица се хоспитализирани со сериозни повреди. Експлозијата уништила три куќи и оштетила четврта, а остатоците биле расфрлани низ целата населба. На многу куќи од експлозијата испукало стакло. Иако пожарникарите официјално објавија дека станува збор за експлозија на природен гас, причините за несреќата се испитуваат.

Експлозија на гас во Балтимор, урнати неколку куќи, една жена загина

Ивана Ефремовски — Mon, 10 Aug 2020 16:45:38 +0000

Жена загина во експлозија на гас во Балтимор, неколку лица се повредени, и неколку куќи се уништени. Најмалку пет лица се заробени под урнатините, јави ТВ Фокс, повикувајќи се на локалните медиуми. Брза помош и пожарникари се на местото на експлозијата. Според првичните информации, станува збор за експлозија на гас.

Инцидент во театар во Балтимор: Маж извикувал Хајл Хитлер! Хајл Трамп

Ивона Петрова — Fri, 16 Nov 2018 10:04:34 +0000

Во татар во американскиот град Балтимор дошло до инцидент кога еден маж почнал да извикува: Хајл Хитлер! Хајл Трамп! Инцидентот се случил за време на паузата при изведувањето на класична претстава, чие дејствие се случува во еврејско село во царска Русија. Откако мажот почнал да го извикува нацистичкиот поздрав, дошло до вознемиреност и гледачите во паника почнале да излегуваат од татарот. – Неколку луѓе од публиката пшочнаа да трчаат кон излезите. Јас мислев дека ќе слушнам истрели, изјави новинарот Рих Шер за Си-Ен-Ен, кој бил еден од присутните на изведбата на претставата „Виолинист на покрив“. Тој истакна дека мажот извикувал и други работи пред обезбедувањето да го изнесе од театарот. МИА