Башар ал Асад – Kurir.mk

Сирискиот претседател Асад пристигна во Москва, ќе се сретне со Путин

Ивана Ефремовски — Tue, 14 Mar 2023 20:59:31 +0000

Сирискиот претседател Башар ал Асад денеска пристигна во Москва во својата прва официјална посета надвор од Блискиот Исток по разорниот земјотрес, јавија светските медиуми, повикувајќи се на соопштение од канцеларијата на Асад на Телеграм. Асад во рамки на посетата ќе разговара со рускиот претседател Владимир Путин. Тој е придружуван од голема делегација сириски министри. Во соопштение Кремљ наведе дека двајцата лидери ќе разговараат за соработката во политиката и трговијата, како и во хуманитарната област. Тие ќе зборуваат и за „перспективите за целосно решавање на ситуацијата во и околу Сирија“. (МИА)

Сирискиот претседател ал-Асад со Указ ја укина функцијата Голем муфтија

Катерина Бојаџиева — Tue, 16 Nov 2021 15:21:39 +0000

Со Указ на сирискиот претседател Башар ал-Асад е укината функцијата Голем муфтија, кој досега ја претставуваше највисоката верска исламска власт во оваа земја, јави денеска агенцијата Сана. Указот вчера стапи на сила, со што де факто е пензиониран шеикот Ахмад Бадредин Хасун (72), кој функцијата Голем муфтија ја извршуваше од 2004 година. Неговите овластувања сега ќе ги преземе Исламскиот совет, тело под Министерството за верски прашања. Отсега Исламскиот совет ќе ги утврдува празниците според лунарниот календар и ќе дава мислења за верски прашања. Сана не соопштува детали за причините за укинувањето на функцијата Голем муфтија, но одлуката е донесена по долгогодишни напори на Владата да го прошири надзорот над верските прашања.

Асад и сопругата се излекуваа од Ковид-19

Ивона Петрова — Tue, 30 Mar 2021 08:54:06 +0000

Сирискиот претседател Башар ал Асад и неговата сопруга Асма оздравеа од коронавирус по негативните ПЦР тестови кои ги добиле, јавува Ројтерс. -По завршување на карантинот, симптомите и негативниот тест претседателот и првата дама се вратија на работните обврски нормално, наведува САНА. Агенцијата на 8 март објави дека Асад е позитивен на коронавирус.

На Асад му се слоши насред говор, медиумите шпекулираат дека имал срцев удар

Ивана Ефремовски — Wed, 12 Aug 2020 18:27:13 +0000

Претседателот на Сирија, Башар ал Асад денеска го прекина говорот во Парламентот откако му се слоши поради нискиот крвен притисок, соопшти неговиот кабинет. -Асад на неколку минути го прекина говорот поради нискиот крвен притисок, а потоа продолжи со говорот, се наведува во соопштението од Кабинетот на сирискиот претседател. Дел од странските медиуми објавија дека можмо е Асад да преживеал срцев удар. Досега не е познато дека Асад има какви било здравствени проблеми. Тој им се обрати на пратениците по повод минатомесечните избори, што се трети откако во Сирија почнаа судирите во 2011 година. (МИА)

According to #Assad's media, the speech interrupted for couple minutes as Assad lost his balance due to low blood pressure. The speech will be published as usual with delay. I doubt they will show Assad as he fell.#Syria #SyriaHighlights https://t.co/bAVzNjgnKC
— Mohamed Al Neser ? (@M_Alneser) August 12, 2020

Чичко на Башар ал Асад е осуден за перење пари во Франција

Тале Кристо — Wed, 17 Jun 2020 13:50:03 +0000

Чичко на сирискиот претседател Башар ал Асад, Рифат ал Асад, во Париз е осуден на четири години затвор за перење пари. Рифат ал Асад (82), кој живее во егзил откако неуспешно се обиде да ја преземе власта од неговиот брат Хафиз во 1984 година, е осуден за користење на сириските државни фондови за купување куќи и канцелариски вредни 90 милиони евра. Француски суд, исто така, одлучи да му го одземе целиот имот во Франција, како и имот во вредност од 29 милиони евра во Лондон. Помладиот брат на поранешниот сириски претседател Хафиз ал Асад негира дека сторил какви било злоупотреби, а неговите адвокати најавија дека ќе поднесат жалба. Тој не се појави на суд поради здравствени причини, но се наоѓа во Франција, пренесува Би-Би-Си.

Башар Асад закажа парламентарни избори на 13 април

Ивана Ефремовски — Tue, 03 Mar 2020 14:11:10 +0000

Сирискиот претседател Башар ал Асад закажа парламентарни избори во земјата на 13 април, соопшти пресслужбата на сирискиот лидер. -Изборите за членови на сирискиот парламент се закажани за понеделник, 13 април 2020 година, се наведува во соопштението на Асад. На изборите во 2016 година одѕивот на гласачите изнесувал 57,56 отсто. Тогаш за 250 места во парламентот, половина од кои традиционално им припаѓаат на претставници на работничката класа и селаните, се бореа 3.500 кандидати. (МИА)

Турските сили возвратија на нападите на армијата на Асад

Ивона Петрова — Mon, 03 Feb 2020 08:08:45 +0000

Откако во сириски артилериски напад беа убиени четири и ранети деветмина турски војници во сириската провинција Идлиб, армијата на Турција одговори со напади врз речиси 40 објекти. Претседателот Реџеп Тaип Ердоган нагласи дека државата ќе продолжи со возвраќање на какви било напади од силите на Асад. – Одговоривме соодветно на тие напади и ќе продолжиме…Одлучни сме да продолжиме со операциите за безбедност на нашата држава, народот и границите со Идлиб. Кој се сомнева во нашата цврста решителност, наскоро ќе разбере дека тоа му е грешка, изјави тој во Истанбул. Според договорот од 2017 година со Русија и Иран, регионот има 12 пунктови што се под надзор и неколку од нив се опкружени со сириската армија. Турското Министерство за одбрана соопшти дека единиците испратени за поддршка на тие пунктови биле нападнати. Тоа се случи и покрај тоа што сириската страна беше информирана за нивниот потег, додаде Министерството.

Трамп: Никогаш не сум ни разговарал за атентат врз Асад

Ивона Петрова — Thu, 06 Sep 2018 06:32:14 +0000

Американскиот претседател Доналд Трамп изјави дека не барал атентат врз сирискиот лидер Башар ал- Асад, оспорувајќи ги наводите од книгата на Боб Вудворд „Страв: Трамп во Белата куќа“. Трамп на новинарите им рекол дека за можноста за атентат на Асад „никогаш не ни било разговарано“. -За тоа никогаш не се ни размислувало, ниту ќе се размислува, изјави Трамп, со оценка дека книгата на Вудворд е „фикција“. Американскиот новинар Вудворд напиша во книгата дека Трамп минатата година сакал Асад да биде убиен, но министерот за одбрана Џејмс Матис го игнорирал неговото барање. МИА

САД: Брз одговор ако Асад повторно употреби хемиско оружје

Матеја Петровски — Wed, 05 Sep 2018 06:13:38 +0000

Белата куќа предупреди дека САД и нивните сојузници ќе одговорат „брзо и примерно“ ако сирискиот претседател Башар ал-Асад употреби хемиско оружје. Во соопштение Белата куќа нагласува дека внимателно ја следи ситуацијата во сирискиот регион Идлиб што е под контрола на бунтовниците. Таму според нив може да се очекува силите на сириската влада да извршат офанзива што може да предизвика хуманитарна катастрофа. (Миа)

Трамп го предупреди Асад и неговитe сојузници во Сирија да не го напаѓаат Идлиб

Матеја Петровски — Tue, 04 Sep 2018 05:51:44 +0000

Претседателот на САД Доналд Трамп го предупреди шефот на сириската држава Башар ал Асад и неговите сојузници Иран и Русија да не ја „напаѓаат невнимателно“ северозападната сириска провинција Идлиб која е под контрола на бунтовниците. - Претседателот на Сирија Башар ал Асад не треба невнимателно да ја нападне провинција Идлиб. Русите и Иранците ќе направат голема хуманитарна грешка ако учествуваат во оваа потенцијална човечка трагедија. Можат да бидат убиени стотици илјади луѓе. Не дозволувајте да се случи тоа, напиша Трамп во Твитер. Иран вчера повика на чистење на сириската провинција Идлиб од терористи, како што Асад и неговите сојузници ги нарекуваат сите свои противници во Сирија. Ова се случи во време кога Техеран се подготвува за разговори со Москва и Дамаск за спроведување офанзива против последниот голем бунтовнички бастион на сириската територија. Во Идлиб и околината живеат околу три милиони луѓе, од кои речиси половина избегале од други сириски области. ОН предупреди дека евентуална офанзива би можела да предизвика најголема хуманитарна криза од почетокот на конфликтот во Сирија пред седум и пол години. (Миа)