беџет пацоли – Kurir.mk

ШОК НА ОСТРОВОТО: Екс претседателот на Косово заинтересен за купување на Манчестер Јунајтед

Ивона Петрова — Thu, 01 Dec 2022 10:27:11 +0000

Англиски медиуми јавуваат дека поранешниот претседател на Косово, Беџет Пацоли покажал интерес за купување на Манчестер Јунајтед од семејството Глејзер. Пацоли неодамна присуствуваше на натпревар на Арсенал кој славеше победа над Лестер. На прашање дали е заинтересиран за купување на Манчестер Јунајтед, Пацоли одговорил „Во ред, ќе го погледнам тоа“. Глејзери официјално ја покренаа продажбата на Јунајтед по речиси 18 години сопствеништво. За продажба на клубот бараат цена од пет милијарди фунти. Пацоли беше вториот претседател на Косово од февруари 2011 до април 2014 година.

Партијата на Пацоли ќе го поддржи уривањето на владата на Хоти

Тале Кристо — Fri, 11 Dec 2020 07:43:26 +0000

Партијата Алијанса ново Косово (АКР), на чие чело е поранешниот шеф на државата, а подоцна и на косовската дипломатија, Беџет Пацоли, најави дека ќе го поддржи гласањето во собранието за уривање на владата предводена од Демократскиот сојуз на Косово (ЛДК) и нејзиниот премиер Авдулах Хоти, јави дописникот на МИА од Приштина. Наим Мурсели, советник на лидерот на АКР, преку објава на својата страница на Фејсбук, синоќа порача дека Владата на Хоти „веќе ја има изгубено довербата“ и пратениците од неговата партија “ќе го поддржат нејзиното уривање“. АКР има двајца пратеници во 120-членото Собрание на Косово и тие досега ја поддржуваа актуелната влада, додека Мурсели денеска објави нивно заминување во опозиција. – Само една обединета опозиција може да го отвори патот за нови избори во Косово. Оваа влада веќе ја има изгубено довербата и граѓаните со нетрпение очекуваат друг да ја преземе должноста. (…) АКР ќе го поддржи уривањето на оваа влада, напиша советникот на Пацоли. Во врска со полемиките меѓу коалиционите партнери околу изборот на нов шеф на државата, откако досегашниот претседател Хашим Тачи поднесе оставка на функцијата, Мурсели порача дека е јасно оти „ниеден нов претседтел не може да биде избран без опозицијата“. Најголемата косовска опозициска партија, Движењето самоопределување (ВВ) на претходниот премиер Албин Курти, од порано има покренато иницијатива за собирање потписи на републичките пратеници за изгласување недоверба на владата предводена од Хоти, кој ја презеде власта на почетокот на јуни годинава, откако го урна дотогашниот коалиционен партнер Курти. За покренување моција за владата потребни се 40 потписи, а за изгласување недоверба 61 глас на пратениците од 120-члениот косовски Парламент. ВВ има 28 пратеници, така што двајцата пратеници од партијата на Пацоли не се доволни за свикување седница за гласање доверба на кабинетот на Хоти. Втората најголема опозициска партија, Демократската партија на Косово, објави дека нема да ја потпише моцијата за уривање на актуелната влада, но оти ќе гласа за нејзино уривање доколку тоа прашање дојде на дневен ред во Собранието.

Косово отвора амбасада во Тајланд

Ивона Петрова — Tue, 17 Dec 2019 07:11:15 +0000

Косовскиот вицепремиер и министер за надворешни работи Беџет Пацоли објави синоќа дека идната недела ќе се отвори амбасада на Република Косово во Тајланд, во југоисточна Азија, јави дописникот на МИА од Приштина. Шефот на дипломатијата во косовската влада во оставка за телевизијата Клан Косова изјави дека дипломатското претставништво во Бангкок ќе биде отворено на 22 декември. – На 16 декември го инаугуриравме генералниот конзулат во Хамбург (Германија), а на 22 декември ќе отвориме амбасасада во Тајланд, изјави Пацоли.

Пацоли очекува Томор Морина наскоро да се врати во Косово

Ивона Петрова — Thu, 08 Aug 2019 07:23:25 +0000

Министерот за надворешни работи на Косово Беџет Пацоли очекува поранешниот припадник на Ослободителната војска на Косово, кој на 24 јули, врз основа на потерница на Интерпол беше уапсен од македонската полиција на граничниот премин Блаце, наскоро да биде пуштен од притвор и да се врати во Косово, јави дописникот на МИА од Приштина.

Пацоли преку објава на својата страница на Фејсбук ирази задоволство поради вчерашната одлука на надлежниот суд во Северна Македонија да го одбие барањето на Србија за екстрадикција на Морина.

– Среќен сум што Томор Морина ја доби првата битка на судството во Северна Македонија за одбивање на српската одлука за екстрадикција. Ние веруваме силно во професионалната работа на властите во Северна Македонија и во пријателските врски меѓу нашите две земји. Многу бргу тој ќе се врати дома, кај своето семејство и пријателите и ги повикувам сите да бидат трпеливи, напиша Пацоли.

Кривичниот совет при Основниот кривичен суд – Скопје вчера донесе решение дека не се исполнети условите за екстрадиција на поранешниот припадник на ОВК во Србија. Воедно, на Морина му е продолжен притворот до правосилноста на ова решение, односно до одлучување по предметот од страна на на Врховниот суд на РСМ.

МИА

Пацоли бара објаснување: Зошто негови службеници биле на барикадите во Зубин Поток?

Ивана Ефремовски — Wed, 29 May 2019 06:38:24 +0000

Вицепремиерот и министер за надворешни работи на Косово, Беџет Пацоли побара објаснување од Мисијата на Обединетите нации во Косово – УНМИК, како се случило нејзини службеници да се инволвирани во протестите на локалните Срби во Зубин Поток за време на полициската акција за апсење на осомничени за организиран криминал, јави дописникот на МИА од Приштина. Пацоли преку објава на Фејсбук информира дека синоќа го повикал УНМИК и побарал информација за тоа зошто еден меѓународен службеник, руски државјанин, заедно со еден косовски државјанин од српска националност, вработен во мисијата, се наоѓале на барикадите поставени од косовските Срби во обид да ја спречат операцијата на специјалната полиција во северно Косово. Шефот на косовската дипломатија вели дека неговото министерство „ќе го истретира предметот согласно меѓународното право“. -Косовската полиција, во текот на својата операција во северно Косово, денеска уапси еден меѓународен службеник на на УНМИК (руски државјанин) и еден локален службеник на УНМИК. Министерството за надворешни работи на Република Косово ќе го истретира предметот согласно меѓународното право. Полицијата на Косово го запозна МНР со деталите на настанот. МНР го повика УНМИК за објаснувања и ќе продолжи да соработува со надлежните авторитети за спроведување на законот со цел расветлување на околностите на присуството на меѓународниот и локалниот службеник на УНМИК на барикадата, објави синоќа Пацоли. УНМИК вчера изрази вознемиреност поради апсењето на своите двајца службеници и побара нивно итно ослободување, најавувајќи „дипломатски и меѓународни мерки“. Медиумите во Приштина објавија дека во акцијата во Зубин Поток се упасени Русинот Михаил Красночеков и Србинот Дејан Димовиќ, кои со возило на Мисијата на ОН биле на барикада во Зубин поток, во намера да ја спречат полицијата да ги однесе пред истражните органи уапсените припадници на полицијата, етнички Срби, осомничени за учество во организиран криминал, корупција, злоупотреба на службената должност и други кривични дела. На апсењето на Красночеков вчера реагираше и амбасадата на Русија во Белград, која побара итно ослободување на нејзиниот државјанин и одговорност од лицата кои го извршиле „флагрантниот инцидент“. Косовските медиуми подоцна синоќа објавија дека, по распитот од страна на истражните органи, Красночеков, кој бил повреден при судирот на протестантите со косовските специјалци, е пуштен на слобода. Во вчерашната акција на специјалните единици Росу, според извори од косовската полиција, се уапсени 19 полициски службеници и деветмина цивили, од албанска, српска и бошњачка националност. (МИА)

По тензиите се огласи косовскиот министер за надворешни работи, ја обвини Србија за злоупотреба

Ивана Ефремовски — Tue, 28 May 2019 09:12:11 +0000

Вицепремиерот и министер за надворешни работи на Косово, Беџет Пацоли, вели дека косовските граѓани уапсени во денешната полициска акција во северно Косово се „дел од мрежа која е длабоко вмешана во шверц, корупција, злоупотреба на службена должност и други видови организиран криминал“, јави дописникот на МИА од Приштина. Пацоли, кој учествува на состанокот во Братислава на министрите за надворешни работи на Вишеградската група и земјите од Балканот – членки на Европската унија, преку својата страница на Фејсбук напиша дека денешната акција е дел од операција која е подготвувана со месеци и која последните денови се одвивала и во други делови на Косово. -Косово сака да ја покаже својата решеност за борба против организираниот криминал, корупцијата и и злоупотребата на службената должност и ги повикуваме сите да ги поддржат таквите дејствија, напиша Пацоли. Тој побара од Србија да не ја злоупотребува денешната полициска акција, за која вели дека е вообичаена активност усмерена против организираниот криминал. -Ја повикувам Србија да не злоупотребува политички една вообичаена полициска операција. Ги повикувам да ја поддржат борбата против организираниот криминал и да не се противат на таа борба. Она што е битно е добросостојбата на сите заедници кои живеат во Косово и Владата на Косово гарантира дека тоа е нејзин висок интерес. Јас го осудувам повикот на српските власти за мобилизација на војската поради една обична полициска операција против мрежите на организиран криминал, напиша Пацоли.

Пацоли го поздрави изгласувањето на Преспанскиот договор во грчкиот Парламент

Катерина Бојаџиева — Fri, 25 Jan 2019 15:41:10 +0000

Косовскиот вицепремиер и шеф на дипломатијата Беџет Пацоли ја поздрави ратификацијата на Преспанскиот договор во грчкото Собранието, оценувајќи ја како храбар чекор, кој придонесува за иднината на двете земји и на цецлиот регион, јави дописникот на МИА од Приштина. Косовското МНР, преку соопштение, ги пренесе честитките на Пацоли до грчкиот премиер Алексис Ципрас и до двете земји за, како што вели, храбите одлуки кои се во полза на Македонија и Грција, но и на целиот регион. – Силно ја поздравувам ратификацијата на Договорот од Преспа во Парламентот на Грција. Им ракоплескам на грчкиот премиер Алексис Ципрас и на двете земји, за донесувањето на храбрата одлука за подобра иднина на Грција и Македонија. Ова е значаен чекор и за целиот регион, порача шефот на косовската дипломатија.

Пацоли бара укинување на таксата од 100 отсто за увозот од Србија

Предраг Кукиќ — Wed, 16 Jan 2019 17:20:57 +0000

Косовскиот вицепремиер и министер за надворешни работи Беџет Пацоли смета дека Владата, на чие чело е Рамуш Харадинај, не смее да го одбие барањето на Соединетите Американски Држави и треба да ја укине таксата од 100 отсто на увозот на производи од Србија и Босна и Херцеговина, јави дописникот на МИА од Приштина. Во интервју за косовската јавна радио-телевизија, РТК, Пацоли рече дека ќе разговара за Харадинај за можноста да се одговори позитивно на барањето од Вашингтон. Неговиот шеф, претседателот на Владата, од друга страна, денеска повторно порача дека, и покрај барањето од САД, таксата нема да се укине се додека Србија не го признае Косово. Говорејќи за косовската надворешна политика, Пацоли во интервјуто за РТК изрази жалење што неговата работа е отежната поради, како што рече, „недостатокот на единство кај косовскиот државен врв“. Шефот на косовската дипломатија рече дека е точно оти „различните ставови на претседателот (Хашим Тачи) и премиерот (Харадинај) во врска со дијалогот со Србија создаваат извесни нејаснотии“. Според Пацоли, во дијалогот со Белград, Приштина би тербала да направи „одредени компромиси“, кои, како што рече, може да се „потребни во рамките на демаркацијата со Србија“.

Пацоли: Одлуката на Владата за зголемување на таксите за увоз од Србија беше едногласна

Ивона Петрова — Wed, 21 Nov 2018 17:57:27 +0000

Косовскиот вицепремиер и министер за надворешни работи Беџет Пацоли изјави денеска дека одлуката на косовската Влада за зголемувањето на таксата за увоз од Србија за 100 отсто е „во рамки на напорите да се гради една достоинстена косовска држава“, јави дописникот на МИА од Приштина. Пацоли преку објава на Фејсбук порача дека денешната одлука не е насочена против српското население кое живее во Косово. – Истата мерка се однесува и на државата Босна и Херцеговина, која дејствува во синхронизација со политиките на Србија во однос на Косово. Посакувам и се надевам дека оваа мерка нема да предизвика пораст на цените на основните продукти во Косово, бидејќи за такво нешто нема причина. Ние ќе бидеме со трговците, производителите и граѓаните, со цел се што е предвидено со владината одлука да се реализира во пракса, напиша Пацоли. Тој ги отстрани дилемите кои се појавија во српските медиуми дали и тој лично се согласил со новата мерка на косовската Влада, нагласувајќи дека одлуката била едногласна. – Денешното гласање на седницата на Владата беше едногласно, исто како што е обединета и владејачката коалиција, порача шефот на косовската дипломатија. Српските медиуми објавија слика од владината седница на која се гледа дека Пацоли не кренал рака при гласање на седницата на Владата. Кабинетот на косовскиот премиер Рамуш Харадинај одлучи денеска да ги зголеми за 100 отсто таксите на производите кои се увезуваат од Србија и Босна и Херцеговина. Како и при првото зголемување за 10 отсто од пред неколку недели, образложението на Владата во Приштина е дека таквиот чекор се презема „поради дивата кампања на Белград против косовската државност и попречувањето на зачленувањето на Косово во меѓународните организации“. Директен повод за денешната одлука на Владата во Приштина е вчерашното блокирање на Косово од страна на Србија при обидот за зачленување во Интерпол. МИА

Пацоли оптимист дека Косово во вторник ќе биде примено во Интерпол

Ристе Здравков — Sun, 18 Nov 2018 12:07:06 +0000

Министерот за надворешни работи на Косово Беџет Пацоли објави денеска дека е утврдена агендата на Самитот на Интерпол кој започна денеска во Дубаи и дека за барањето на Косово за зачленување во Организацијате ќе се гласа во вторник, на 20 ноември, јави дописникот на МИА од Приштина. Шефот на косовската дипломатија преку својата страница на Фејсбук изрази оптимизам дека неговата земја ќе биде примена во светската полициска Организација. – Почеток кој ветува. Потврдена е агендата на самитот на Интерпол и ставена е на дневен ред точката во која Косово аплицира за зачленување. Борбата против меѓународниот организиран криминал и тероризмот е наша цел. Гласањето е во вторник, напиша Пацоли на Фејсбук. За да биде примено во Интерпол за Косово треба да гласаат две третини од членките на Организацијата. На самитот на Организацијата во Обединетите Арапски Емирати денеска ќе се избира нов претседател, откако досегашниот претседател Менг Хонгвеи во септември годинава беше упасен во Кина поради обвиненија за корупција во времето додека бил заменик министер за јавна безбедност на таа земја.