Белата куќа – Kurir.mk

Зеленски: Не сум добил претходни информации од Белата куќа за протекувањето американски доверливи документи

Ивана Ефремовски — Wed, 03 May 2023 06:26:26 +0000

Украинскиот претседател Володимир Зеленски во интервју за „Вашингтон пост“ изјави дека Белата куќа не го информирала за истекувањето на информации од тајни американски документи, кои го привлекоа вниманието на целиот свет минатиот месец. „Не сум добил претходни информации од Белата куќа или од Пентагон“, ја цитира публикацијата изјавата на Зеленски. „Ова е неисплатливо за нас. Тоа не е добро за угледот на Белата куќа и мислам дека не е добро за угледот на САД“, додаде Зеленски. Министерот за одбрана на Украина, Олексеј Резников, на 12 април изјави дека протечените американски доверливи документи содржат мешавина од вистинити и лажни информации за војската на неговата земја и го минимизираат нивното негативно влијание. Како одговор на коментарите на Зеленски, портпаролот на Советот за национална безбедност на Белата куќа, Џон Кирби, рече: „Ние сме во постојана комуникација со нашите украински колеги за голем број прашања, вклучително и во однос на отворените обелоденувања, но нема да навлегуваме во детали за тие доверливи дискусии“. Портпаролот на Пентагон, бригадниот генерал Патрик Рајдер рече дека американскиот секретар за одбрана Лојд Остин разговарал со голем број сојузници, вклучувајќи го и Резников, за ова прашање. „Остин имаше голем број телефонски и лични разговори со нашите сојузници и партнери ширум светот за да разговара за ова прашање, за да нагласи колку сериозно го сфаќаме ова прашање, вклучително и неколку разговори со неговиот украински колега, министерот Резников“ изјави Рајдер за Си-Ен-Ен. (МИА)

Од 11-ти мај САД го укинува барањето за вакцинација против Ковид-19 за странските патници

Ивана Ефремовски — Tue, 02 May 2023 06:33:40 +0000

Белата куќа објави дека од патниците повеќе нема да се бара да бидат вакцинирани против Ковид-19 за да влезат во САД. На 11 мај, кога ќе заврши вонредната состојба поврзана со коронавирусот во САД, барањето за вакцинација против Ковид-19 ќе биде отфрлено за луѓето кои патуваат со меѓународни летови и за федералните вработени, соопшти Белата куќа. Во февруари, Претставничкиот дом на САД гласаше за укинување на барањето повеќето странски патници да бидат вакцинирани против Ковид-19, едно од ретките ограничувања за патување поврзани со пандемијата што се уште постои. Во јуни минатата година, администрацијата на Бајден го отфрли барањето луѓето што пристигнуваат во САД со авион да бидат негативни на тестот за Ковид, но ги задржа барањата на Центрите за контрола и превенција на болести (ЦДЦ) да се вакцинираат повеќето странски патници. Одделот за внатрешна безбедност, исто така, вчера соопшти дека почнувајќи од 12 мај повеќе нема да бара од патниците кои не се државјани на САД и кои влегуваат во земјата преку копнени контролни пунктови или на фериботи да се вакцинираат против Ковид и да обезбедат доказ за вакцинација. (МИА)

Белата куќа до Конгресот достави документи за повлекувањето од Авганистан

Ивона Петрова — Fri, 07 Apr 2023 05:34:36 +0000

Американскиот претседател Џозеф Бајден до Конгресот достави доверливи документи за повлекување на силите од Авганистан, соопшти синоќа Белата куќа. Администрацијата на Бајден, исто така, објави документ во кој сумира дека повлекувањето било планирано и извршено, заклучувајќи дека не постои замисливо „сценарио“ освен задржување на зголемени американски воени сили во земјата за да се борат против талибанците. Портпаролот на Советот за национална безбедност на Белата куќа, Џон Кирби, го бранеше начинот на кој беше извршено повлекувањето во времето на Бајден, потсетувајќи дека демократскиот претседател е обврзан со договорите потпишани од неговиот претходник Доналд Трамп со талибанците. Повлекувањето на САД од Авганистан „отсекогаш било намера на претседателот“ Бајден, рече портпаролот. Но, неспорно е дека одлуките донесени од претходната администрација и целосниот недостаток на подготовка значително ги ограничија достапните опции“, додаде Кирби. Бајден „не преговараше со талибанците. Тој не ослободи 5.000 затвореници. Тој не ја намали воената сила во Авганистан на 2.500 или не склучи договор со талибанците да не ги напаѓаат нашите војници“, додаде тој.

Белата куќа изрази „длабока загриженост“ на извештаите за можен пуч во Молдавија

Ивана Ефремовски — Tue, 14 Feb 2023 11:24:57 +0000

Портпаролот на Советот за национална безбедност во Белата куќа Џон Кирби рече дека извештаите за тоа дека рускиот претседател Владиир Путин наводно планира пуч во Молдавија „предизвикуваат голема загриженост“.

Претседателката на Молдавија Маја Санду претходно го обвини Путин за намера да ја урне владата на земјата. На прашање на новинар на брифингот синоќа, Кирби одговори дека „извештаите за ова предизвикуваат длабока загриженост“.

-Ние даваме целосна подршка на владата на Молдавија и молдавскиот народ. Не видовме независни потврди за тоа, но тоа сигурно изгледа како страница од учебникот на Путин, рече тој. (МИА)

Кирби: Нема знаци дека Русија ќе употреби нуклеарно оружје

Ивана Ефремовски — Wed, 02 Nov 2022 13:21:13 +0000

САД не забележуваат ниту еден знак дека Русија се подготвува да употреби нуклеарно оружје, изјави денеска портпаролот на Белата куќа, Џон Кирби. Тој рече дека нема посебен коментар за написот на „Њујорк Тајмс“ дека Русија наводно подготвува нуклеарни напади. „САД континуирано ги следат чекорите на Москва откако Русија спомена можна употреба на нуклеарно оружје, а во моментов нема индиции дека такво нешто се подготвува“, посочи Кирби.

Белата куќа домаќин на конференција за борба против софтвер со кој се бара откуп

Дарко Андоновски — Mon, 31 Oct 2022 10:48:47 +0000

Белата куќа денеска и утре ќе биде домаќин на втората меѓународна конференција за борба против Ransomware – „штетен софтвер со кој се бара откуп“, на која ќе присуствуваат 36 земји, како и претставници од некои од најголемите светски компании. Минатогодишниот состанок се одржа онлајн поради пандемијата. За овогодинешниот официјални лица ќе бидат со физичко присуство во Вашингтон, изјави висок функционер на американската администрација.

Жан Пјер: Нема индикации дека Русија се подготвува да употреби нуклеарно оружје на непосреден начин

Ивана Ефремовски — Fri, 07 Oct 2022 17:49:30 +0000

Немаме причина да ја актуелизираме нашата стратешка нуклеарна позиција, исто како што немаме индикации дека Русија се подготвува да користи нуклеарно оружје на непосреден начин, изјави денеска портпаролката на Белата куќа, Карин Жан Пјер. Оваа изјава доаѓа еден ден по изјавата на американскиот претседател Џо Бајден, кој рече дека за првпат по Студената војна, светот се соочува со ризик од нуклеарен Армагедон. На прашањето дали предупредувањата на Бајден се поврзани со нови разузнавачки информации достапни за САД, портпаролката на Белата куќа одговори: „Не“. Таа додаде дека зборовите на Бајден се засилена верзија на претходните изјави од Белата куќа, кои покажуваат колку сериозно се сфаќаат заканите на Русија. (МИА)

Белата куќа: Погрешна е одлуката на ОПЕК+ да го намали производството на нафта

Магдалена Андонова — Thu, 06 Oct 2022 13:55:20 +0000

Одлуката на ОПЕК+ да го намали производството на нафта за два милиона барели дневно јасно покажува дека тие земји и угодуваат на Русија, изјави синоќа Карин Жан-Пјер, портпаролка на Белата куќа. Според неа, одлуката е „грешка“. Белата куќа излезе со специјална изјава за одлуката на ОПЕК+. - Претседателот Бајден е разочаран од кратковидното решение на ОПЕК+ да ги намали квотите за производство на нафта, во време кога светската економија се судира со продолжителните негативни последици од инвазијата на Путин во Украина. Во време кога стабилноста на глобалното снабдување со енергија е од клучно значење, одлуката на ОПЕК+ посебно ќе предизвика уште понегативно влијание кај државите со низок и среден животен стандард, кои се уште страдаат од зголемување на цените на енергенсите, соопштија од Белата куќа. (МИА)

Елтон Џон ќе има концерт во Белата куќа, еве што ќе се прославува

Ивана Ефремовски — Wed, 21 Sep 2022 06:44:07 +0000

Белата куќа утре ќе биде домаќин на британскиот музичар Елтон Џон, кој ќе одржи концерт за „прославување на обединувачката и обновувачка моќ на музиката“, соопшти денеска американската Администрација. Белата куќа ги покани на концертот „оние кои секојдневно пишуваат историја, вклучувајќи тука едукатори, медицински работници, студенти, активисти за правата на ЛГБТ заедницата и луѓе кои се залагаат за подобра грижа за менталното здравје… Претседателот на САД, Џозеф Бајден и неговата сопруга Џил исто така ќе ја поздрават британската поп-легенда“, се додава во соопштението. Предвидено е Бајден и првата дама на САД да одржат говори. Елтон Џон, кој минатата пролет го прослави својот 75. роденден, е познат по хитовите „Goodbye Yellow Brick Road“, „Your Song“, „Rocket Man“ и „Can You Feel The Love Tonight“. Како светска ѕвезда, тој јавно се изјаснува како геј и е посветен на борба против СИДА-та. (МИА)

Портпаролот на Пентагон, Џон Кирби, преминува на повисока должност во Белата куќа

Магдалена Андонова — Sat, 21 May 2022 08:14:04 +0000

Портпаролот на Пентагон, Џон Кирби, во иднина ќе ги координира стратешките комуникации во Националниот совет за безбедност на Белата куќа, јавија британските меидуми, повикувајќи се на канцеларијата на американскиот претседател. „Во тоа својство, Кирби ќе ги координира меѓуресорските напори за појаснување на американската политика и ќе биде важен владин глас за прашањата во оваа област, вклучително и одржување прес-конференции во Белата куќа“, се наведува во соопштението. Кирби, кој стана заштитно лице на брифинзите во американското Министерство за одбрана, особено за време на руската инвазија на Украина, претходно работеше во Стејт департментот. (МИА)