белорусија – Kurir.mk

Русија и Белорусија почнаа петдневни заеднички воени вежби

Тале Кристо — Fri, 22 Sep 2023 19:20:33 +0000

Москва и Минск денеска почнаа петдневни заеднички воени вежби на територијата на Белорусија, соопшти белоруското Министерство за одбрана. „Воената вежба, која почна денеска во Белорусија, не претставува закана за соседните земји“, изјави началникот на Генералштабот на вооружените сили на Белорусија, првиот заменик - министер за одбрана Виктор Гулевич. Тој појасни дека руските и белоруските сили вежбаат „операции за одбрана на двете земји и подобрување на нивото на обученост на трупите“.

Руските и белоруските пливачи се враќаат на меѓународните натпреварувања

Бошко Тасиќ — Wed, 06 Sep 2023 18:38:55 +0000

Меѓународната пливачка федерација повторно ќе им дозволи на руските и белоруските спортисти да се натпреваруваат, но со статус на неутрални учесници. По опсежни консултации, Светската пливачка федерација донесе серија „строги критериуми“ за учество на руските и белоруските спортисти на меѓународната сцена. Правилата, кој ги состави независна работна група, вклучуваат забрана за активна поддршка на руската инвазија врз Украина, настап без национални обележја и интонирање химни, како и строги мерки против допинг. Покрај ова, одлучено е дека по само еден спортист во дисциплина од Русија и Белорусија ќе може да настапи на светските натпреварувања во водени спортови во организација на Меѓународната пливачка федерација.

САД ги повикаа своите државјани веднаш да ја напуштат Белорусија

Ивана Ефремовски — Mon, 21 Aug 2023 19:56:31 +0000

Амбасадата на САД во Белорусија денеска издаде предупредување со кое ги повика своите државјани веднаш да ја напуштат Белорусија. Во соопштението на амбасадата се наведува дека Литванија претходно затворила два свои гранични премини со Белорусија и дека Полска, Летонија и Естонија навестиле дека можеби ќе го сторат истото. Мисијата ги повика американските граѓани да одат преку една од последните три земји бидејќи „не им е дозволено да влезат во Полска по копнен пат од Белорусија“. „Не патувајте во Белорусија поради континуираното овозможување од страна на белоруските власти на рускиот неиспровоциран напад врз Украина, трупањето руски воени сили во Белорусија, произволното спроведување на локалните закони, потенцијалот за граѓански немири, ризикот од притвор, и ограничената способност на амбасадата да им помогне на американските граѓани кои живеат или патуваат во Белорусија“, се нагласува во сооопштението на американската Амбасада во Минск. (МИА)

ЕУ денеска ги прошири санкциите кон Белорусија

Ивона Петрова — Mon, 21 Aug 2023 18:08:45 +0000

Европската унија денеска објави дека ги проширила санкциите против Белорусија со забрана за извоз на голем број високо чувствителни стоки и технологии во таа земја, јави Бета. Како што соопшти Европската комисија, мерките усвоени од Советот на Европската унија „ги усогласуваат санкциите против Белорусија со режимот на санкции против Русија“ и обезбедуваат казнените мерки што се наметнати кон Москва да не можат да се заобиколат преку Белорусија. Забраната опфаќа стоки и технологии што придонесуваат за воениот и технолошкиот напредок на Белорусија и се погодни за употреба во воздухопловната и вселенската индустрија. Меѓу забранетите стоки се и огнено оружје и муниција. Воведувањето на најновиот, 11-ти пакет рестриктивни мерки е поврзано со вмешаноста на Белорусија во руската инвазија на Украина.

Литванија привремено затвора два гранични премини со Белорусија

Катерина Бојаџиева — Wed, 16 Aug 2023 12:53:30 +0000

Владата на Литванија денеска соопшти дека одлучила да затвори два од шесте гранични премини кон Белорусија поради зголемените тензии во односите со соседот. Два селски премини, кои не ги користеа комерцијалните возила, од петок ќе бидат затворени. Литванската влада информира дека ќе бидат затворени премините Тверециус и Сумскас, а сообраќајот ќе биде пренасочен кон граничниот премин Медининкаи, кој е најголем од шесте контролни пунктови во Литванија. Одлуката е донесена бидејќи Литванците се повеќе се загрижени за присуството на платеници од групата Вагнер, поврзани со Русија во Белорусија. Соседна Полска годинава ги затвори сите гранични премини со Белорусија освен еден, откако во таа земја беше затворен полски новинар и протерани полски дипломати.

Кибер истрага: Хакери со години шпионирале странски дипломати во Белорусија

Ивона Петрова — Fri, 11 Aug 2023 06:34:19 +0000

Група хакери со години шпионирале вработени во амбасадите на четири земји во Белорусија, вклучително и за време на војната во Украина, објавија истражувачите од словачката компанија за кибер безбедност ESET. Цел на нападот биле околу 15 уреди во сопственост на дипломати од две земји во Европа, една од Јужна Азија и една од Африка, а кои работеле во амбасади, изјави истражувачот на ЕСЕТ, кој е автор на извештајот. Кампањата за дигитална шпионажа започнала во 2021 година и се уште е активна, се вели во извештајот. Засега не е јасно колку вработени се жртви на таа кампања. Но, истрагата, која открива нов и софистициран хакерски тим кој наводно работи надвор од Белорусија, илустрира колку дипломатите можат да бидат ранливи на кибер шпионажа. Во извештајот се вели дека хакерите манипулирале со податоците на нивните жртви „веројатно“ на ниво на интернет услуга. Ова значи дека тие би можеле да бидат измамени да преземаат малициозен софтвер без да го знаат тоа. Белоруската амбасада во Вашингтон не одговори веднаш на барањето на западни медиуми за коментар.

Полска испраќа 10.000 војници на границата со Белорусија

Дарко Андоновски — Thu, 10 Aug 2023 08:26:21 +0000

Полска планира да распореди до 10.000 дополнителни војници на границата со Белорусија за поддршка на Граничната стража, изјави денеска министерот за одбрана Мариуш Блашчак. - Околу 10.000 војници ќе бидат на границата, од кои 4.000 директно ќе ја поддржуваат Граничната стража, а 6.000 ќе бидат во резерва, соопшти министерот во интервју за јавното радио. - Ја приближуваме армијата до границата со Белорусија за да го избркаме агресорот, за да не се осмели да нè нападне, изјави Блашчак. Заменик-министерот за внатрешни работи Масиеј Вашик вчера изјави дека Полска ќе испрати дополнителни 2.000 војници на границата со Белорусија.

Русија и Белорусија би можеле да играат претквалификации за ЕП 2026

Бошко Тасиќ — Wed, 02 Aug 2023 11:18:56 +0000

Извршниот Комитет на Европската ракометна федерација донесе одлука да биде оставено едно празно место во претквалификациите за машкото Европско првенство во 2026 година што ќе се игра во Данска, Шведска и Норвешка. Тоа место би можело да и припадне на некоја од во моментов суспендираните федерација – Русија и Белорусија. Во претквалификациите кои се играат во јануари 2024 година има три двојки (Koсово – Велика Британија, Летонија – Луксембург и Белгија – Кипар), а во квалификациите директно место обезбедија најдобрите осум селекции од претходните квалификации за ЕП 2024 што не обезбедија место на континенталниот собир – Естонија, Турција, Италија, Словачка, Финска, Украина, Израел и Литванија. Останатите 20 квалификанти ќе бидат учесниците на ЕП 2024 без шампионот и трите домаќини на ЕП (Данска, Шведска и Норвешка). За потсетување, Русија и Белорусија последен пат настапија на ЕП 2022 година во машка конкуренција, додека кај дамите Русинките беа дел од СП 2021.

ЕУ усвои рестриктивни мерки против Белорусија поради вмешаноста во руската агресија

Ивана Ефремовски — Wed, 26 Jul 2023 13:28:31 +0000

Земјите-членки на Европската унија денеска усвоија рестриктивни мерки против Белорусија поради нејзината вмешаност во конфликтот на Русија со Украина. „Амбасадорите на Европската унија денеска се договорија за усвојување на рестриктивни мерки, имајќи ја предвид ситуацијата во Белорусија и нејзината вмешаност во руската агресија врз Украина“, соопшти шпанското претседателство со ЕУ на Твитер. Шпнаското претседателство напоменува дека рестриктивните мерки ќе опфатат поединци и субјекти во Белорусија. (МИА)

Белорусија ги обучува и вооружува вработените во Министерството за вонредни ситуации

Катерина Бојаџиева — Tue, 25 Jul 2023 05:42:13 +0000

Министерството за вонредни ситуации на Белорусија наскоро ќе го заврши процесот на вооружување и воена обука на своите вработени за да можат во случај на вооружен конфликт да им пружат помош на министерствата за одбрана и за внатрешни работи, изјави синоќа министерот за вонредни ситуации Вадим Синјавски. Министерот Синјавски во изјава за државната телевизија рече дека сите вработени во тоа министерство ќе бидат подготвени да им помогнат на своите колеги министри доколку дојде до вооружен конфликт или „некаков вид немири или бунт“. Белорускиот претседател Александар Лукашенко претходно оваа година изрази желба „секој човек да може да ракува со оружје“. Иако Белорусија не испрати свои војници на бојното поле во Украина, нејзиниот претседател и дозволи на Москва да започне инвазија од белоруска територија, која започна во февруари минатата година.