Бен Вајт – Kurir.mk

Англиската федерација ја излажа јавноста, Вајт го напушти СП поради конфликт?

Ристе Здравков — Fri, 09 Dec 2022 15:56:04 +0000

Бен Вајт на последниот ден од ноември го напушти тренинг кампот на репрезентацијата на Англија, а со соопштение се огласи и фудбалската федерација на оваа земја. Вајт поради повреда го пропушти воведниот натпревар на „Гордиот Албион“ против Иран, не играше против Соединетите Американски Држави и Велс, а потоа се врати во татковината. Од англиската федерација соопштија дека заминувањето е од приватни причини и побараа да се почитува приватноста на фудбалерите, но тоа очигледно е далеку од вистината. „Бен Вајт ја напушти англиската тренинг база во Ал Вакра и се врати дома во Англија. Причината е од приватна природа. Фудбалерот на Арсенал нема да се врати во Катар и нема да биде во составот до крајот на Светското првенство. Бараме во овој момент да се почитува приватноста на играчите“, тогаш соопшти Фудбалската асоцијација на Англија. Сепак, тамошните медиуми пишуваат дека вистинската причина за заминувањето на Вајт од Катар е конфликт со помошниот тренер на Герет Саутгејт. Наводно, Вајт влегол во клинч со Стив Холанд на тренинг. На крајот, одлуката била дека Бен Вајт може да се врати во Арсенал, и дека повеќе нема потреба да биде член на тимот за време на Светското првенство. Очигледно е дека англиските репрезентативци тоа не го доживеаја како претеран проблем, со оглед на тоа што лесно се пласираа до четвртфиналето, во кое ќе се сретнат со Франција.

Англија остана без еден репрезентативец кој неочекувано го напушти Катар

Ристе Здравков — Wed, 30 Nov 2022 21:14:23 +0000

Дефанзивецот на англиската фудбалска репрезентација Бен Вајт го напушти репрезентативниот камп на Светското првенство во Катар и од лични причини се врати во Англија, соопшти Англиската фудбалска асоцијација (ФА). Од ФА додаваат дека не очекуваат Вајт да се врати во Катар. “Бен Вајт ја напушти англиската тренинг база во Ал Вакра и се врати дома во Англија. Причината е од приватна природа. Фудбалерот на Арсенал нема да се врати во Катар и нема да биде во тимот до крајот на Светското првенство. Бараме тоа во овој момент да се почитува приватноста на играчот“, се наведува во соопштението на репрезентацијата на Англија. Вајт пред два дена не тренираше со образложение дека е болен. Инаку, десниот бек на Арсенал беше едно од изненадувањата на конечниот список на Герет Саутгејт. Англија како прва во групата Б се пласираше во осминафиналето каде в недела ќе игра против Сенегал.

Арсенал го донесе англискиот репрезентативец Вајт за 50 милиони фунти

Катерина Бојаџиева — Fri, 30 Jul 2021 18:21:47 +0000

Членот на англиската фудбалска репрезентација Бен Вајт (23) е нов фудбалер на премиерлигашот Арсенал, соопшти денеска клубот од северен Лондон. Англиските медиуми пренесуваат дека Вајт потпишал петгодишен договор со Арсенал, а трансферот од екипата на Брајтон изнесува 50 милиони фунти. Вајт минатата сезона одигра 36 натпревари во Премиер лигата за Брајтон, а по повредата на Трент Александер – Арнолд беше повикан во англиската репрезентација со која пред три недели го освои второто место на ЕУРО2020. – Бен беше нашата клучна мета за ова лето. Тој поседува голем квалитет и затоа сме возбудени што ни се приклучува во тимот, изјави за клупскиот сајт, техничкиот директор на Арсенал, Еду.