беровско – Kurir.mk

Локализиран пожарот меѓу беровските села Будинарци и Митрашинци

Ивона Петрова — Sat, 23 Jul 2022 19:00:51 +0000

Пожарот во планските ридови помеѓу беровските села Будинарци и Митрашинци е локализиран попладнево во 17 часот, информира вечерва Дирекцијата за заштита и спасување (ДЗС). – Тимовите и сите други учесници се вратени во базите, а остануваат дежурни екипи од Шумското стопанство „Малешево“ – Берово. Во текот на утрешниот ден ќе се направи контрола на теренот, објави ДЗС на својот профил на Фејсбук. Во објавата се посочува дека во текот на денешниот ден пожарите ги гасеа тимови од ПОЗС Берово, Валандово и Куманово. – Тимот од Свети Николе со пумпи беа ангажирани за полнење со вода базенот за полицискиот хеликоптер. Ер Тракторот денеска дејствуваше на неколку наврати до целосно локализирање на пожарот, наведуваа од ДЗС.

Пожарот во Беровско и понатаму се гасне

Магдалена Андонова — Sat, 23 Jul 2022 07:14:21 +0000

Пожарот во Беровско и понатаму се гасне, а пожарникарите и луѓето од Берово кои учествуваат во неговото гаснење ќе останат на терен се до негово целосно локализирање. Сашко Руменовски, командир на Територијалната противпожарна единица од Берово информираше дека покрај гаснењето од земја од утрово повторно имаат и воздушна поддршка. -Со цел скратување на времето за полнење вода од Беровско Езеро во село Будинарци поставен е импровизиран базен, од каде хеликоптерот ќе полни вода заради побрза интервенција, вели Руменовски. Додава дека од утрово контролата за справувањето со огнената стихија ја презел Управувачкиот комитет за координација и управување со системот за кризи. Според проценките на ТППЕ Берово, досега од пожарот е зафатена високостеблеста дабова и букова шума со површина од 50 хектари. (МИА)

Се уште е активен пожарот меѓу беровските села Митрашинци и Будинарци

Тале Кристо — Fri, 22 Jul 2022 15:47:22 +0000

Пожарот што зафати подрачје меѓу беровските села Митрашинци и Будинарци се уште е активен. Ветрот прави проблеми со ставање под целосна контрола на огнените јазици. Состојбата се менува од час во час, изјави за МИА Владо Клинчарски, директор на ЈП „Македонски шуми – Малешево“ – Берово. Тој посочи дека во моментов пожарот го гаснат околу 100 пожарникари од Берово, но и од Виница, Кочани, Радовиш, Струмица и од други градови, како и специјални тимови на Дирекцијата за заштита и спасување, на Центарот за управување со кризи, полиција, гранична полиција и вработени во „Македонски шуми“. Клинчарски вели дека сега битката со огнената стихија се одвива само од земја, бидејќи ЕР-тракторот е повлечен напладне по 12 часот кога имаше драстично покачување на температурите. Тој нагласи дека екипите остануваат на терен, бидејќи ветерот и високите температури не одат во прилог на гаснење на овој пожар кој зафати околу 50 хектари високо стеблеста шума.

Спречено ширењето на пожарот во малешевскиот крај, на терен 110 луѓе и 17 возила

Ивона Петрова — Fri, 22 Jul 2022 12:11:34 +0000

Од 4 и пол часот утринава до 10:30 на пожарот што го зафати малешевскиот крај, на границата меѓу селата Митрашинци и Будинарци, дејствувал хеликоптер при што е постигнато пожарот да престане да се шири, информираат од Регионалниот центар за управување со кризи (РЦУК) – Берово. Во гаснење на пожарот се ангажирани 110 луѓе и 17 возила, а преку Дирекцијата за заштита и спасување е побарано во гаснењето да се вкучи и ЕР-трактор (авион). – На терен се следниве ДЗС со 30 луѓе и со четири возила, ТППЕ-Берово – шест луѓе и две возила, ТППЕ-Делчево – четири луѓе со едно возило. Доброволно ПП Д Кочани со пет луѓе и со едно возило, ШС Малешево од Берово со 22 луѓе со три возила, ШС Равна река од Пехчево со осум луѓе и две возила, ШС од Радовиш со пет луѓе и едно возило, ШС Виница со пет луѓе и едно возило, ЈПКР Услуга со 10 луѓе и две возила и од населението – 15 луѓе, соопшти РЦУК – Берово.

ФОТО: Ер тракторот полета, ќе го гасне пожарот во беровско

Ивона Петрова — Fri, 22 Jul 2022 09:20:57 +0000

Дирекцијата за заштита и спасување информира дека Ер тракторот полета за гасење на пожарот во беровско. -По појавата на пожар на месноста помеѓу селата Митрашинци и Будинарци во Беровско во која е зафатена голема површина со дабова и нискостеблеста шума Дирекцијата за заштита и спасување се активира со 5 тима за гасење на пожари со вкупно 36 лица и 8 возила, велат од ДЗС. Во гаснење на пожарот од рано утринава вклучен е и хеликоптер на МВР.

Ер тракторот ќе се активирa за гаснење на пожарот во беровско, има индиции дека е подметнат

Ивона Петрова — Fri, 22 Jul 2022 06:42:11 +0000

Еден полициски хеликоптер од утринава интензивно го гасне пожарот во беровскиот регион, вели за МИА директорот на Центарот за управување со кризи (ЦУК) Стојанче Ангелов. Хеликоптерот од воздух почнал со исфрлање на вода од 5 часот. -Ер-тракторот на Дирекцијата за заштита и спасување ќе пристигне околу 10 часот. Во моментов на терен се и десет пожарникари на ТППЕ Берово и 30 припадници на Национални шуми од подружницата на Берово, изјави Ангелов. Посочи дека пристигнуваат и пожарникарски екипи од Виница, Радовиш, Кочани, Струмица, Тетово. Командирот на ТППЕ-Берово, Сашко Руменковски претходно за МИА информираше дека со помош на хеликоптерот спречено е ширење на огнот кон боровата шума и е направен обрач околу огнот. Првично беа зафатени околу 50 хектари високостеблеста шума, во непристапен планински предел. Надлежните велат дека има индиции и овој пожар да е подметнат.

ВИДЕО: Пожарот во Беровско интензивно се гасне од воздух

Ивона Петрова — Fri, 22 Jul 2022 06:27:38 +0000

Интензивно се гасне пожарот и од земја и од воздух меѓу беровските села Митрашинци и Будинарци. Командирот на ТППЕ-Берово, Сашко Руменковски за МИА вели дека уште рано наутро почнале хеликоптерите да исфрлаат вода од воздух, со што е спречено да се шири огнот кон боровата шума. Тој посочи дека пристигнуваат и колеги пожарникари и доброволци од соседните градови и од цела држава. Руменковски вели дека сега е направен обрач и не е дозволено да се шири огнот.

Изгаснат пожарот кај во беровско

Ивона Петрова — Wed, 04 Sep 2019 10:03:45 +0000

Локализиран е пожарот што вчера попладне го зафати атарот на селата Мачево, Будинарци и Владимирово. Раководителот на подружницата „Малешево“ на „Македонски шуми“, Владо Клинчарски изјави дека пожарот е изгаснат околу еден часот по полноќ. – Во пожарот кај месноста „Габеро“ опожарени се 15-16 хектари шумско земјиште со зафатени поединечни шумски стебла од млад црн бор и смрека, како и необработливи пасишта со стара трева. Иако во близината на пожарот имаше колиби, за среќа нема жртви и материјална штета, бидејќи не се дозволи тој да се приближи до објектите, изјави Клинчарски. Во гаснењето на пожарот се вклучило и месното население од Мачево, Владимирово и Будинарци, како и припадници на МВР и Противпожарната бригада од Берово. Екипи на „Македонски шуми“ – подружница Малешево утрово по направената обиколка на теренот констатирале дека пожарот е целосно изгаснат и дека нема опасност од негово повторно појавување.