бесплатен превоз – Kurir.mk

Средношколците имаат право на бесплатен превоз и за време на претстојниот летниот распуст

Дарко Андоновски — Fri, 09 Jun 2023 10:49:12 +0000

Ги информираме средношколците кои ги исполнуваат условите за користење на бесплатен јавен превоз, дека и оваа година ќе имаат право бесплатно да се возат за време на летниот распуст. Правото на бесплатен превоз за време на претстојниот распуст е согласно Програмата за активностите на Град Скопје од областа на средното образование во 2023 година, која, меѓудругото, вели “со почетокот на 2023 година учениците од средните училишта на Град Скопје ќе имаат можност да користат бесплатен превоз и за време на зимскиот и летниот распуст и на овој начин непречено да ги извршуваат своите училишни обврски за посетување на феријална пракса и практикантска обука...“. Инаку, од понеделник (12.06.2023 год) јавниот превоз ќе функционира по летен возен ред. Распоредот на сообраќање на возилата на сите линии (градски и приградски) е достапен на веб страницата на ЈСП Скопје (www.jsp.com.mk).

ЈСП: Студентите да го продолжат билетот доколку сакаат да користат бесплатен превоз и наредната година

Ивона Петрова — Wed, 28 Dec 2022 08:35:43 +0000

ЈСП Скопје ги потсетува корисниците на студентски годишен билет за бесплатно користење на јавен превоз дека неопходно е да го продолжат/заверат билетот за 2023 година, доколку сакаат да користат бесплатно јавен превоз и во текот на наредната година. Продолжувањето/заверувањето на билетот се врши во кој било центар за персонализација на ЈСП Скопје, со лично присуство на студентот кој треба да достави потврда за редовен студент издадена од акредитирана високообразовна установа (не постара од 30 дена), да приложи оригинал индекс со запишан зимски семестар и лична карта на увид. На студентите/бруцоши од студентската 2022/2023 година, билетот автоматски им важи и за наредната календарска година. Право на користење на студентски годишен билет за бесплатно користење на јавен превоз имаат сите редовни студенти на државните факултети во Град Скопје до додипломски студии (Прв циклус), без ограничување на возраста. Единствено заверен/продолжен билет за тековната година е валиден документ за бесплатно користење на јавен превоз за посочената категорија студенти, не се признаваат индекс, потврда за студент или друга документација која служи за заверување на билетот.

ЈСП: Бесплатен јавен превоз поради загадувањето на воздухот

Тале Кристо — Mon, 26 Dec 2022 15:02:30 +0000

Јавното сообраќајно претпријатие ги информира граѓаните дека согласно соопштението од Министерството за животна средина и просторно планирање за надминување на прагот на алармирање на суспендирани честички со големина до 10 микрометри, се активира мерката бесплатен јавен превоз. Како што информираат оттаму, мерката започнува да се применува од денеска година па сè до завршување на алармантната состојба, што ќе биде објавено од надлежното Министерство согласно резултатите од државниот мониторинг систем за квалитет на амбиентен воздух.

Бесплатен воз за неколку категории граѓани од 1 мај

Дарко Андоновски — Sat, 23 Apr 2022 12:23:09 +0000

Бесплатен превоз во железничкиот сообраќај се воведува од 1 мај 2022 година, согласно возниот ред на Железници на Република Северна Македонија Транспорт АД-Скопје за 2022 година, одлучила Владата. – Со оваа мерка овозможуваме континуирана поддршка на граѓаните се со цел поттикнување на железничкиот сообраќај како најевтин и еколошки превоз, се појаснува во соопштението од Министерството за транспорт и врски. Бесплатиот превоз во железничкиот сообраќај се однесува за: – Млади лица до 27 години, секоја прва и трета недела во месецот, во период на викенд денови од петок од 12 часот, до понеделник до 12 часот – Бесплатен превоз на стари лица, жени до 62 години и мажи до 64 години секој втор викенд во месецот (петок, сабота и недела) – Бесплатен превоз за студенти секој четврток – И бесплатен превоз за сите ученици во средното образование и тоа еднаш неделно во среда.

Пензионерите мора да имаат „Скопска“ за да се возат бесплатно во автобусите

Ивона Петрова — Thu, 24 Mar 2022 13:16:56 +0000

ЈСП Скопје потсетува дека пензионерите кои ќе ја користат можноста за бесплатен јавен превоз, одлука која важи од утре, неопходно е да поседуваат персонализирана електронска картичка „Скопска“, заверена/продолжена за тековната 2022 година. Продолжувањето на „Скопска“ може да се изврши во некој од седумте центри за персонализација. Такви центри има во Автокоманда (на автобуската постојка кај Шумарски факултет), во Аеродром (до ТЦ Капитол, во зградата на „Телекабел“), на Бит пазар (спроти некогашен „26 јули“), во Влае (во Порта Влае, на автобуската постојка), во Центар (во Градски ѕид, во просториите на ЈСП ТУРС), во Карпош 2 (на автобуската постојка кај Педагошки факултет) и на Транспортен центар (на терминалот, во автобусот). Сите центри за персонализација работат од понеделник до петок од 6 до 19.30 часот, а во сабота од 7 до 19.30 часот. -За купување нова персонализирана електронска картичка „Скопска“ се плаќа еднократен надомест од 200 ден, неопходна е лична карта на увид, а фотографирање се врши на лице место. Возрасните лица при бесплатно користење на превозот имаат обврска да се валидираат, а во случај на линиска контрола да ја приложат „Скопска“. Потсетуваме дека посочената категорија патници има право на бесплатен превоз секој ден, со месечен доплатен билет од 300 ден, појаснуваат од ЈСП. Бесплатниот превоз во вторник, петок, сабота и недела важи за жени над 62 години и мажи над 64 години и е согласно одлуката на Советот на Град Скопје, а средствата за оваа намена се обезбедени од градскиот буџет.

ОД ПЕТОК: Пензионерите добиваат четири дена бесплатен превоз, еве што треба да поседуваат

Ивона Петрова — Wed, 23 Mar 2022 10:45:09 +0000

Од петок започнува да важи одлуката за бесплатен јавен превоз за возрасни лица. Бесплатниот превоз се однесува на категоријата лица - жени над 62 години и мажи над 64 години и ќе важи во вторник, петок, сабота и недела. Со ова олеснување на трошоците на граѓаните ќе бидат опфатени околу 80.000 корисници на јавниот превоз во Скопје кои ќе имаат право да го користат превозот бесплатно, четири дена во неделата. -Воведувањето на бесплатниот превоз за возрасни лица е во согласност со одлуката на Советот на Град Скопје за дотации или давање на субвенции на Јавното сообраќајно претпријатие и средствата за оваа намена се обезбедени од Буџетот на Град Скопје. Морам да напоменам дека освен што се ослободуваат возрасните лица во посочените денови од трошоци за автобуски превоз, бесплатен превоз веќе имаат и учениците средношколци во средните училишта чијшто основач е Град Скопје, редовните студенти на додипломски студии на државните универзитети во Скопје, како и лицата со попреченост, истакна на денешната прес конференција, в.д.директорот на ЈСП, Иван Илиевски. Возрасните лица кои сакаат да користат бесплатен превоз во вторник, петок, сабота и недела, треба да поседуваат персонализирана електронска картичка „Скопска“ и при користење на јавен превоз да се валидираат, а истата картичка се приложува и во случај на линиска контрола. Персонализирањето на картичките се врши во некои од седумте центри за персонализација на ЈСП Скопје. Илиевски повтори дека наследената тешка финансиската состојба на претпријатието, односно загубата од 3 милиони евра, како и кредитот за набавените МАН возила, кој почна да се отплаќа од пред два месеца, нема да бидат причина за евентуални проблеми при реализација на ветените проекти на Град Скопје кои се однесуваат на јавниот превоз и неговите корисници. -Се соочуваме со големи предизвици, скок на цената на нафтените деривати, на природниот гас. Споредбено со декември минатата година, трошоците за гориво и гас се зголемени во просек за 33%. Ова е и ќе биде тешка година за сите, а ние како претпријатие бараме начин да ги сведеме на нула непродуктивните трошоци. Тешко е, но не се откажуваме. Откажувањето не е опција во нашиот случај. Затоа и на инцијатива на градоначалничката оваа година има дотации за бесплатен превоз за возрасни граѓани, потенцираше Илиевски, кој додаде дека во последниот период согласно стратегијата и барањата на граѓаните беа пуштени во употреба дополнителни автобуски линии, а беа вратени во функција и претходно укинатите ноќни линии. -ЈСП со Градот Скопје во следниот период ќе работи на дополнителна консолидација и дополнителни анализи кои се однесуваат на јавниот превоз и ќе изнаоѓа решенија за проблемите се со цел да им излеземе во пресрет на барањата на граѓаните, додаде в.д. директорот на претпријатието.

ЈСП: Истекува рокот за бесплатен превоз, студентите да си ги заверат билетите до 1 март

Магдалена Андонова — Wed, 23 Feb 2022 10:40:42 +0000

Ги потсетуваме студентите кои ги исполнуваат условите за користење на годишен студентски билет за бесплатен јавен превоз дека уште неколку дена имаат право на бесплатен превоз со незаверен/непродолжен билет за 2022 година. Од 1.03.2022 год секој студент од посочената категорија, доколку не поседува уредно заверен/продолжен билет, во случај на линиска контрола, ќе добие записник (казна), доколку не поседува друг тип валиден билет. Единствен валиден документ за користење на бесплатниот превоз е уредно заверен/продолжен билет за тековната година, не се признаваат индекс, потврда за студент и слично. ЈСП Скопје и годинава по барање на студентите, за три месеци го продолжи рокот за продолжување на важноста на посочениот тип на билет за 2022 година. Продолжувањето на билетот се врши во некој од центрите за персонализација со неопходната документација (индекс на увид со запишан летен семестар и потврда за редовен студент, не постара од 1 месец). Право на користење на билетот имаат сите редовни студенти на државните факултети во Скопје до додипломски студии, без ограничување на возраста.

ЈСП информира дека бесплатниот јавен превоз ќе важи до наредните препораки

Магдалена Андонова — Mon, 27 Dec 2021 17:51:43 +0000

Ве информираме дека на сила е одлуката за бесплатен јавен превоз за сите граѓани, како една од пакетот итни мерки на Град Скопје за намалување на загадувањето на воздухот и заштита на здравјето на граѓаните, стои во соопштението на ЈСП до јавноста. Од таму информираат дека бесплатениот превоз ќе важи се до наредните препораки.

Арсовска: Целосно бесплатен јавен превоз за граѓаните за две години

Ивона Петрова — Fri, 17 Dec 2021 13:38:03 +0000

Проблематичниот проект за воведување на БРТ превоз, акцијата за чистење на дивите депонии, катастрофалната финансиска состојба во која е оставен градот од претходната градска власт, како и лошата финансиска состојба на јавните претпријатија на градот беа дел од темите за кои градоначалничката Данела Арсовска разговараше на денешниот брифинг со новинарите. Според неа покрај сите проблеми кои веќе се познати за самиот БРТ систем, кај него посебно проблематично е што е донесен без да биде изгласан од Советот на Град Скопје. „Морам да кажам дека она што го видовме тука, од аспект на решението кое што беше презентирано во јавноста како нешто револуционерно, не само што не е револуционерно, туку е и на штета на граѓаните на градот Скопје. Пред се затоа што за тој БРТ превоз, нема одлука од Советот на Град Скопје“- порача Аросвска. Таа најави дека се работи на реорганизација на ЈСП и дека за две години целосно ќе се реализира проектот за бесплатен јавен превоз за граѓаните. „Се работи на програмата што ја имавме зацртано, односно се преземаат првите чекори од етапното воведување бесплатен автобуски превоз. Ревизијата во ЈСП Скопје е започната, се детектираат сите слабости во работењето на ова претпријатие. Како што знаете, ова претпријатие е тежок загубар, а целта на новото раководство е да овозможи претпријатието да работи со оптимално намалување на трошоците, зголемување на приходите и овозможување непречено функционирање со сето она што може да се направи во следниот период. Најпрвин, претпријатието да излезе од долговите, второ - да се овозможи да се воведе бесплатен превоз, првично на оние категории на кои што им беше ускратено ова право и трето - изнаоѓање начини за детектирање на финансиски средства преку донатори за набавка на прва транша на автобуси, а понатаму ќе видиме како ќе биде финансирањето“- рече денеска градоначалничката Арсовска. Градоначалничката Арсовска најави дека се работи на реорганизација на ЈСП и дека за две години целосно ќе се реализира проектот за бесплатен јавен превоз за граѓаните. „Се работи на програмата што ја имавме зацртано, односно се преземаат првите чекори од етапното воведување бесплатен автобуски превоз. Ревизијата во ЈСП Скопје е започната, се детектираат сите слабости во работењето на ова претпријатие. Како што знаете, ова претпријатие е тежок загубар, а целта на новото раководство е да овозможи претпријатието да работи со оптимално намалување на трошоците, зголемување на приходите и овозможување непречено функционирање со сето она што може да се направи во следниот период. Најпрвин, претпријатието да излезе од долговите, второ - да се овозможи да се воведе бесплатен превоз, првично на оние категории на кои што им беше ускратено ова право и трето - изнаоѓање начини за детектирање на финансиски средства преку донатори за набавка на прва транша на автобуси, а понатаму ќе видиме како ќе биде финансирањето“- рече денеска градоначалничката Арсовска. Аровска порача дека ЈСП Скопје ја почна реализацијата на проектот од предизборната програма „Скопје без заборавени населби“, односно, продолжување на автобуските линии од линискиот превоз онаму каде што ги нема. „Запознаени сте дека има голем број места каде што за жал јавниот превоз не е достапен и покрај тоа што има технички можности за тоа, а жителите на тие места пешачат по 2, 3 и повеќе километри за да стигнат до најблиската автобуска станица. Во финална фаза е постапката за нов линиски ред, воведување ноќни линии, воведување зачестени линии онаму каде што се потребни имајќи предвид дека имаме ситуации на одредени локации каде што само двапати во текот на денот пристигнува автобус, што го ограничува начинот на корисниците на јавниот превоз од подалечните локации да стигнат дома“- образложи Арсовска. Таа објасни дека Градот Скопје изминатиов период спроведува голема акција за чистење на дивите депонии. „Преку пријави и комуникација со граѓани од сите населени места претходно детектиравме околу 120 диви депонии. Чистењето го реализираме преку нашите јавни претпријатија и во соработка со дел од општините во Скопје, а до овој момент речиси сите депонии се исчистени. Оваа заедничка акција за чистење на дивите депонии ја спроведуваме за доброто на сите граѓани и за првпат се случува во олкав голем обем“- рече градоначалничката Арсовска. Градоначалничката додаде дека покрај создавањето диви депонии, еден од најгорливите проблеми е и нивното палење, зашто со тоа се загрозува животот и здравјето на граѓаните и нагласи дека тоа нема да се толерира. „Почнавме со неселективно казнување на сите оние кои ќе бидат затекнати како создаваат и палат депонии, а со тоа го загрозуваат животот и здравјето на граѓаните. Во моментов службите создаваат систем за следење на состојбите, со кој покрај следењето на депониите кои што се веќе исчистени со дрон, активно ќе се работи на пријави од граѓани со цел да се спречи нивното повторно создавање“- категорична е Арсовска.

ЈСП со голема промена од 1 септември за средношколците- за пензионерите одлуката непроменета

Дарко Андоновски — Mon, 31 Aug 2020 10:58:24 +0000

Ве информираме дека од утре, вторник (1.09.2020 год) повторно ќе важат бесплатните годишни средношколски билети за користење на јавниот превоз. Потсетуваме дека од пред три месеца во функција се и бесплатните годишни студентски билети, а и натаму не важи одлуката за бесплатен превоз за возрасни лица (жени со 62 год, мажи со 64 год) во вторник, петок, сабота и недела.