без греење – Kurir.mk

Кличко: Киев може да остане без греење до пролет

Дарко Андоновски — Thu, 01 Dec 2022 17:58:51 +0000

Градоначалникот на Киев Виталиј Кличко не ја исклучува можноста, во случај на руско гранатирање на инфраструктурата на главниот град во текот на зимата, водата да мора да се испушти од системот за греење, а до пролет ќе биде тешко да се врати. -Во ситуација кога нема греење и вода во рок од 24 часа на надворешна температура од минус пет, ќе мораме да ги испразниме системите за греење во Киев, бидејќи тоа може да доведе до дополнително оштетување на системот. Ќе бидеме принудени да ја исклучиме водата, а до почетокот на пролетта ќе имаме тешки предизвици, изјави Кличко на Киевскиот безбедносен форум, пренесе украинска „Правда“. Киевскиот градоначалник истакна дека „за многу краток временски период температурата во становите може да не се разликува многу од надворешната температура“, а дека постои и ризик од уништување на системот за снабдување со електрична енергија во целиот град. Тој ги повика жителите да бидат подготвени за различни сценарија и да подготват резервен план. -Секој жител на Киев би го замолил да разговара со роднини, познаници. Доколку некој од нив некаде има куќа, а во неа да има парно и вода, во случај на критична ситуација да отиде таму, бидејќи тоа се двете клучни компоненти за нормален живот, вели Кличко.

Владата и Парламентот на БиХ останаа без греење

Магдалена Андонова — Mon, 07 Mar 2022 17:53:51 +0000

Зградите во Сараево каде се сместени седиштата на Советот на министри и на Парламентот на БиХ денеска останаа без греење, што е директна последица на наглиот скок на цените на енергенсите, па државните службеници немаа друг избор освен да седат во капути или да се загреваат шетајќи по ходници. Службата за заеднички работи на државните институции на БиХ претходно најави дека парното ќе биде исклучено од вторник, но вработените денеска ги дочекаа студени канцеларии, пренесува Хина. Компанијата во БиХ, која претходно доби тендер за снабдување со гориво што се користи за топлана, се откажа од зделката бидејќи драстичното поскапување на енергенсите ја направи таа работа непрофитабилна и едноставно ги остави парламентарците, министрите и вработените во стручните служби и министерствата во БиХ да се смрзнуваат. – Толку е студено што сите постојано шетаме, изјави за бањалучки „Независне новине“, Јаков Галиќ, член на заедничката комисија за човекови права на двата парламентарни дома. Тој додаде дека за него е несфатливо зошто претходно не бил решен проблемот со греењето во овие згради. – Со еден збор, несфатливо е среде ваква зима да нема греење во парламентот. Тука се сите институции, служби, агенции, има многу работници. Луѓето претежно шетаат, рече Галиќ. (МИА)

Две недели градинката во ОУ „Мирче Ацев“ Ѓорче Петров нема греење

Магдалена Андонова — Tue, 17 Nov 2020 15:08:52 +0000

„Објава од инбокс на загрижени родители: ДВЕ НЕДЕЛИ ВО ГРАДИНКАТА ДЕТЕЛИНКА ВО ОУ МИРЧЕ АЦЕВ НЕМА ГРЕЕЊЕ ! Две недели дечињата и вработените се греат на клима, затоа што нема парно ! Па уште директорката се заканувала да молчат ! Во услови на КОВИД 19 кој во државава коси насекаде, само во Ѓорче Петров има над 712 позитивни лица, ДВЕ НЕДЕЛИ НЕМА ПАРНО ГРЕЕЊЕ ВО ГРАДИНКА !? Ај што имаме најмногу заболен персонал во државава и најмногу дечиња во изолација, ај што нема вакцини против грип ОСТАВАТЕ ДВЕ НЕДЕЛИ ДЕЛИЊА ДА СМРЗНУВААТ !!! ВЕДНАШ ДА ГО РЕШИТЕ ПРОБЛЕМОТ ЗА ДЕЧИЊАТА ИНАКУ ЌЕ ИМА БОЈКОТ НА РАБОТАТА НА ГРАДИНКАТА !!!!“ Фејсбук статус на страницата „Ѓорче Петров“

Нацев: Припадниците на Армијата оставени без греење, на војниците им се наредува да се собираат во една просторија за да се затоплат

Тале Кристо — Sat, 11 Jan 2020 12:37:16 +0000

Кога ви е поважно да одвоите цел ден за да се клатите пред камера во украден видео спот, а не ве интересираат условите во кои работи Армијата на Република Македонија, јасно е дека војската ќе ја плати цената, изјави на денешната прес-конференција Александар Нацев од ВМРО-ДПМНЕ. Кога ви е приоритет да одговарате на прашања од типот „благо без кое не може да живеете?”, јасно е дека војниците ќе мрзнат, вели Нацев. -Почитувани, овие греалки се сликата за условите во кои работат припадниците на Армијата во 21 век. Ова не се НАТО стандарди. Во касарната „Илинден“ веќе неколку дена војниците и старешните се оставени без греење. Војниците се насочуваат да земаат слободни денови, за да има помалку луѓе во работните простории. Целта е да се исклучуваат некои грејни тела, бидејќи ако секаде се вклучат грејни тела во павилјоните, паѓаат и избиваат осигурувачи, открива тој. -На војниците им се наредува да се собираат во една просторија, каде што групно ќе се греат на греалици, кои им било кажано да ги донесат од дома. Дополнително, војниците дури и потценувачки се охрабруваат да издржат уште неколку дена без парно, бидејќи ќе се затоплело времето, па немало да биде толку ладно, додава НАцев. -До кога со декларативни заложби и лажна загриженост за војската? До кога војниците ќе ги трпат на свој грб незаинтересираноста и неефикасноста на тимот на Шекеринска, кој е составен од партиски послушници, а не од професионалци кои ја сакаат Армијата и кои сакаат да придонесат за нејзино оптимално функционирање, прашува Александар Нацев од ВМРО-ДПМНЕ. -После 12-ти април следува обнова на Македонија, а обезбедувањето на соодветни финансиски и материјални услови за припадниците на Армијата ќе стане приоритет, порача Нацев на Денешната прес-конференција.